IREN MEHN KASUKUHL 29
Dahme Kin Wiawi ni Atail Kin Mehla?
Mie emen me ke uhdahn poakepoake melahr? Nan soangen ahnsou kamedek wet, mweinele ke kin medewe: ‘Dahme kin wiawi ni atail kin mehla? Kitail kak pwurehng tuhwong irail kan me kitail poakohng?’ Nan iren mehn kasukuhl wet oh mehn mwurin met, medewe duwen pasapeng kansenamwahu kan sang nan Paipel.
1. Dahme kin wiawi ni atail kin mehla?
Sises ketin kapahrekihong mehla meirkelik. Aramas emen me meirkelik sohte kin ese dahme kin wiawi limwah. Ia duwen mehla eh duwehte meir? Mwurin aramas emen eh mehla, e sohte kin pehm medek. E sohte kin loaleid, mendahki e uhdahn poakohng kompoakepah kan oh eh peneinei. Paipel mahsanih: “Me melahr akan sohte ese mehkot.”—Wadek Eklesiasdes 9:5.
2. Ia kamwahupen atail kin esehla dahme mehlel duwen mehla?
Aramas tohto kin masak mehla oh pil me melahr akan! Ahpw ke kak nsenamwahula ni omw ese dahme Paipel kin mahsaniheki duwen mehla. Sises mahsanih: “Me mehlelo pahn kasaledengkumwailla.” (Sohn 8:32) Ekei pelien lamalam kin padahngki me dene mie mehkot me kin momour mwurin aramas emen eh mehla, ahpw Paipel sohte kin padahngki met. Eri, aramas sohte kin lokolok mwurin eh mehla. Oh pil, me melahr akan sohte ese mehkot, kahrehda re sohte kak kamedekeikitailla. Eri kitail sohte anahne kaudokiong me melahr akan de pil wia mehkot pwe re dehr lingeringer pahtail oh kitail sohte anahne kapakapkin irail.
Ekei aramas kin nda me re kak koasoiong me melahr akan. Ahpw met sohte kak wiawi. Duwehte me kitail ahpwtehn sukuhlki, me melahr akan “sohte ese mehkot.” Ni mehlel irail akan me kin medewe me re kin koasoiong me melahr akan ele kin koasoakoasoiong ngehn suwed kan me kin mwomwehda wia aramas mehlao. Eri en esehla dahme mehlel duwen mehla kak perekitail sang ngehn suwed kan. Siohwa ketin kalekehkin kitail en dehr song en koasoiong me melahr akan pwehki e ketin mwahngih me koasoiong ngehn suwed kan pahn kauweikitailla.—Wadek Deuderonomi 18:10-12.
KALAUDEHLA OMW ESE MET
Kalaudehla omw sukuhlki dahme Paipel kin padahngki duwen mehla, oh kakehlaka omw pwoson Koht limpoako me sohte kin ketin kaloke me melahr akan.
3. Sukuhlki dahme mehlel duwen me melahr akan
Nan sampah pwon, mie soangsoangen madamadau kan ong dahme kin wiawi ni aramas emen eh mehla. Ahpw, kaidehn soangen madamadau pwukat koaros kak mehlel.
Dahme aramas akan nan omw wasa kin kamehlele duwen me melahr akan?
Pwehn kilang dahme Paipel kin padahngki, kilang KISIN KASDO.
Wadek Eklesiasdes 3:20, oh mwuri koasoiapene peidek pwukat:
Sang ni ire wet, dahme kin wiawi ni ahnsou me aramas emen kin mehla?
Mie mehkot me kin momourte mwurin aramas emen eh mehla?
Paipel padahkihong kitail duwen mehlahn Lasarus, kompoakepahn Sises keren men. Ni omw wadek Sohn 11:11-14, tehk dahme Sises mahsaniheki duwen Lasarus. Mwuri koasoiapene peidek pwukat:
Dahme Sises ketin karasahiong mehla?
Dahme met padahkihong kitail duwen irair en me melahr akan?
Ia omw pepehm ong dahme Paipel mahsaniheki duwen mehla?
4. En ese dahme mehlel duwen mehla kin wia kamwahupatail
En ese dahme mehlel duwen mehla kak sewese kitail en dehr masak me melahr akan. Wadek Eklesiasdes 9:10, oh mwuri koasoiapene peidek wet:
Me melahr akan kak kamedekeikitailla?
Ni atail kamehlele padahk mehlel sang nan Paipel, kitail sohte pahn kin kamehlele soahng likamw kan me dene kitail anahne kaperenda me melahr akan de kaudokiong irail. Wadek Aiseia 8:19, 20 oh Kaudiahl 4:11, oh mwuri koasoiapene peidek wet:
Ia sapwellimen Siohwa pepehm ni aramas emen eh kin kaudokiong de rapahki sawas sang rehn aramas melahr akan?
Me mehlel duwen mehla kin kasaledengkitailla sang tiahk kan me kin kansensuwedih kupwuren Siohwa
5. Kitail kin nsenamwahula ni atail esehla dahme mehlel duwen mehla
Aramas tohto kin rong me ni ar mehla, re pahn lokolok pwehki soahng suwed kan me re wiahda. Ahpw kitail kin nsenamwahu ni atail ese me sohte aramas emen kin lokolok mwurin eh mehla, mehnda ma e kin wiahda soahng kan me uhdahn suwed. Wadek Rom 6:7, oh mwuri koasoiapene peidek wet:
Paipel mahsanih me ni aramas emen eh mehla, Koht solahr kin ketin kapwukoahki ih dipe kan. Eri ke medewe me aramas melahr men kin lokolongki dipe kan mahso?
Ni atail kalaudehla atail esehla duwen Siohwa, kitail pahn wehwehkihla me e sohte mwahn kin ketin kaloke me melahr akan. Wadek Deuderonomi 32:4 oh 1 Sohn 4:8, oh mwuri koasoiapene peidek pwukat:
Ke medewe Koht me sapwellimanki irair pwukat kin ketin kupwurki kaloke me melahr akan?
Ke nsenamwahuki ni omw ese dahme mehlel duwen mehla? Dahme kahrehda?
EKEI ARAMAS KIN NDA: “I kin masak dahme pahn wiawihong ie ni ei pahn mehla.”
Mehnia iren Paipel me ke kak ehukihong pwehn kansenamwahwih?
DAHME KE SUKUHLKIER
Ni aramas emen eh mehla, eh mour imwisekla. Me melahr akan sohte kin lokolok de pil kak kamedekihala me momour kan.
Kousapahl
Dahme kin wiawi ni atail kin mehla?
Ia kamwahupen atail esehla dahme mehlel duwen mehla?
Dahme kahrehda atail esehla me mehlel duwen mehla kin kansenamwahwih kitail?
PIL TEHK
Kilang ma Paipel mahsanih me mie mehkot rehn aramas me kin momourte mwurin mehla.
Kilang ma Koht kin ketin doadoahngki ehl pwehn kaloke me suwed.
Kitail anahne masak me melahr akan?
Ngenen me Melahr akan—Irail Kak Seweseiuk de Kauweiukala? Irail Uhdahn Mie? (kisin pwuhk)
Kilang duwen ohl emen me nsenamwahula ni eh esehla dahme mehlel ni atail kin mehla.
“I Was Impressed by the Bible’s Clear, Logical Answers” (The Watchtower, February 1, 2015)