“Mehla Kasohrala Kohkohlahte”

Medewehla iaduwen ma ke wadekada nuhs ehu me oaralap wia met. Ni mehlel, saikinte nuhspepa ieu kak ntingihda soangen koasoi pwukat. Ahpw, mahsen pwukat pwarada nan pwuhk ehu me mahkihier pahr kid kei, iei Paipel.

Nan Paipel, e kin kawehwe mwahu duwen mehla. Paipel sohte ihte kasalehda dahme kahrehda kitail kin mehla, ahpw, e pil kin kawehwe duwen irair en me mehlahr akan oh pil kihda koapworopwor me ehu rahn me mehlahr akan pahn iasada. E pil kasalehda duwen ahnsou kapwuriamwei ieu ni ahnsou kohkohdo me pakair wet pahn wiawi: “Mehla kamwomwmwomwlahr, oh mour powehdier unsek!”​—1 Korint 15:54.

Paipel kin kawehwe duwen irair en mehla ni ahl me wehwe mwahu a kaidehn liseliping. Karasepe, e kin kalap karasa mehla ong ‘irair en meir,’ oh kin kasalehda me aramas mehlahr kan kin “wie memeir.”​—⁠Melkahka 13:3; 1 Deselonika 4:13; Sohn 11:11-​14.

E sansal me Sises Krais iei ih me pahn kihweisang mehla. E mahsanih me e ketido sampah “pwe en tounmeteikihla moure, pwe me ngeder en maiauda.” (Madiu 20:28) Irair wet kin rasehng irair en wahsang seri men, oh pahn kapwurpwurala ihte ma pweipwei ieu pahn kohda. Rasehng irair wet, pweipwei me pahn kak kamaiau kitail sang dihp oh mehla iei sapwellimen Sises mour me wia aramas unsek emen.​—Wiewia 10:39-​43.

Mehla kin wia imwintihti men. Aramas koaros mie arail imwintihti kei me irail kin ahnekipene, me duwehte soumwahu, oh likeilapala, me pil kin kahrehda apwal lokolok. Koht ketin inoukihda me e pahn ketin kasohrala soangen irair pwukat koaros, oh pil pahn kasohrala ahn aramas imwintihti me keieu laud. “Imwintihti me pahn lohdi keieu mwuhr, iei mehla.”​—1 Korint 15:26.

Ni inou wet ah pahn pweida, aramas pahn kakehr ale kaperenpen ahneki mour unsek, ahnsou me dihp oh mehla solahr pahn wiawi. Ahpw, ni ahnsou wet, kitail nsenamwahu ni atail ese me aramas me kitail poakpoake me mehlahr wie komkommoal, oh ma Koht pahn ketin tamataman irail, re pahn iasada.

“Mehla, Ia Omw Tehtehn Meninkau?”

E dehde mwahu me wehwehkihla irair en aramas mehlahr akan kak sewese kitail en ahneki madamadau pwung ong duwen mour. Mehla sohte anahne en wia mehkot apwal en wehwehki. Kitail kak perenki mour oh sohte masak pwe dene imwintihti menet me nohn kamasepwehk. Oh ni atail esehier me mehla sohte pahn kakunsang kitail douluhl atail mour kohkohlahte, met pahn kihsang kitail madamadau me ieite me kitail en wia en raparapahkihte kaperen akan en sampah, pwe dene “mour me nohn mwotomwot.” Ni atail wehwehkihier me aramas me kitail poakpoake me mehlahr me Koht kin tamataman, irail wie memeir nan irair en mehla oh awiawih ahnsou en iasada, oh met kak kihong kitail madamadau saledek oh kakehla atail ineng en wiewia atail mour.

Ei, kitail kak ahneki koapworopwor ong ahnsou kohkohdo, ahnsou me Soun Ketikihda Mour, Siohwa Koht, pahn ketikihsang mehla kohkohlahte. Ia uwen kapai ni ahnsou me kitail kak wia peidek wet: “Kowe, Mehla, ia omw manaman en powehdi? Ia omw tehtehn meninkau?”​—1 Korint 15:55.