Koapwoaroapwoar Dahieu Mie Ohng Kompoakpahmw Mehlahr Akan?

Mahsie Sohp idek: “Ma aramas emen pahn mehla, e kak pwurehng mourda?” (Sohp 14:14, King James Version) Mwein komw pil kin medemedewe irewet. Ia ahmw pepehm ma komw ese me ke kak pwurehng miniminiong kompoakpahmw melahr akan wasaht nin sampah pahn irair kei me keieu mwahu?

Eri, Paipel inouki: “Kisehmw melahr akan pahn mour. . . . Irail pahn iasada.” Oh Paipel pil mahsanih: “Me pwung kan pahn sapwenikihla sampah, oh re pahn koukousoan powe kohkohlahte.”—Aiseia 26:19; Melkahka 37:29.

Pwehn kak uhdahn likih inowo, kitail anahne diar pasapeng en peidek kei: Dahme kahrehda aramas akan kin mehla? Iawasa me melahr akan mih ie? Oh iaduwen kitail kak dehdehki me re pahn pwurehng mour?

Mehla, oh Dahme kin Wiawi Ahnsou Kitail Mehla

Paipel kasansalehda me Koht sohte kupwukupwure melahn aramas nin tepio. E ketin kapikada tepin pwopwoud Adam oh Ihp, ketikihdiong ira nan paradais ehu nin sampah me adeneki Ihden oh padahkiong ira en naineki seri oh kalaudehla deuara Paradais e lao kipehdi sampah pwon. Ira pahn mehla ihte ma ira sapeikiong sapwellime kosonned akan.—Senesis 1:28; 2:15-17.

Pwehki sohte itar ara kesempwalki kalahngan en Koht, Adam oh Ihp, sapeikla oh pwukoahki pweinen dihp. Koht mahsanihong Adam, “Ke [pahn] pwurehng wiepwella pwe ih me ke kohsang ie. Pwe pwehl kowe oh ke pahn pwurehng wiepwella.” (Senesis 3:19) Mwohn e kapikpik da, Adam sohte mie; e wia pwehl. Oh pwehki e sapeik, de dihp, Adam alehdi kalokepen pwurehng wiepwella, de irair en sohla mour.

Mehla iei irair en sohla mour. Paipel kasalehda wekpeseng: “Pweinen dihp iei mehla, ahpw kisakis en Koht iei mour soutuk.” (Rom 6:23) Pwehn kasalehda mehla iei irair ehu duwehte nan meir kelik, Paipel mahsanih: “Aramas momour akan ese me re pahn mehla; ahpw me melahr akan, irail sohte ese mehkot.” (Eklesiasdes 9:5) Ahnsou aramas emen mehla, Paipel ketihtihki: “Ngene pidoisang, e pwurehng wiepwella; nin rahno eh madamadau sohrala.”—Melkahka 146:3, 4.

Ahpw pwehki Adam oh Ihp te me sapeikiong kehkehliko nan Ihden, dahme kahrehda kitail koaros mehkihla? Pwe kitail koaros ipwidi mwurin en Adam ah sapeik, ihme kitail koaros sohsohki dihp oh mehla sang ih. Duwen me Paipel mahsanih: “Sang rehn ohl tehmen [Adam] dihp pedelong ong nan sampah oh mehla sang dihp, ihme mehla lelong aramas koaros.”—Rom 5:12; Sohp 14:4.

Ahpw emen kak peidek: ‘Aramas akan soh ahneki soul ehu me kin momourte mwurin mehla?’ Me tohto kin wia padahk wet, pil kin nda me mehla iei wenihmw ehu me pedelong ong pil ehu mour tohrohr. Ahpw padahko sohte tepisang Paipel. Pwe Mahsen en Koht kin padahk me kowe iei soul ehu, oh ahmw soul iei kowe, oh kin oarepene paliwaromw oh ahmw lamalam. (Senesis 2:7; Seremaia 2:34; Lepin Padahk 2:10) Paipel pil mahsanih: “Soul me wiewia dihp—pein ih pahn mehkihla.” (Ezekiel 18:4) Sohte wasa kis nan Paipel wia padahk duwen aramas mie ah soul me sohte kak mehla me momourte mwurin paliwar mehla.

Iaduwen Aramas Akan Kak Pwurehng Mour

Mwurin dihp oh mehla pedelong ong nan sampah, Koht ketin kasalehda me iei kupwure me melahr akan en iasada. Ihme Paipel mahsanih: “Eipraam . . . lemelemehte me Koht kak ketin komourada [Aisek] sang mehla.” (Ipru 11:17-19) En Eipraam ah likilik sohte sapwung, pwe Paipel mahsanih duwen Me Kehlailie: “Ih me Koht, kaidehn Koht en melahr akan ahpw en me momour akan, pwe irail koaros momouriong ih.”—Luk 20:37, 38.

Ei, Koht Kehlailie sohte sapwellimeniki kehlte ahpw pil inengiong kaiasada aramas me e kupwuramwahuki. Pein Sises Krais mahsanih: “Dehr pwuriamweikihla mepwukat, pwehki ahnsou ehu pahn kohdo me irail koaros me mihmi nan sousou pahn rong kapitie oh re pahn pedoi sang nan arail sousou kan.”—Sohn 5:28, 29; Wiewia 24:15.

Sohte werei mwurin e koasoia met, Sises kasaingedi kapar en mehla ieu kohkohiei sang kahnimwen Nain. Mwahnakapw me melahro iei nein liohdi nah iehros. Sises lao mahsanihada liohdio ah nsensuwed laud, Sises apw kupwurehla oh mwekidkihda. Ih eri mahsanihong me melahro: “Mwahnakapw, Pwourda!” Oh mwahnakapwo mwohdada, oh Sises ketikihong rehn ineo.—Luk 7:11-17.

Duwehte me wiawihong liohdio, peren laud pil mie ahnsou Sises pas ni imwen Sairus, kaun en Sinakokehn Mehn Suhs. Nah serepeino me mahki sounpahr 12 mehla. Ahpw ahnsou Sises lel ni imwen Sairus, e kohla rehn seri melahro oh mahsanih: “Serepein, pwourda!” Serepeino kesihnenda!—Luk 8:40-56.

Mwuri, kompoakapahn Sises Laseres pil mehla. Sises lao lel ni imweo, Laseres melahr erein rahn pahieu. Mendahki e nsensuwed laud, rie serepein Marda wiahda koasoien koapwoaroapwoar, ndinda: “I patohan ese me e pahn pwurehng mourda ni imwin kawa.” Ahpw Sises kohla ni sousouo, mahsanih pwe takaio en pwekpweksang oh likwerih: “Laseres, pedoido!” Oh e ahpw pedoido!—Sohn 11:11-44.

Nna, en medemedewe met: Ia iren Laseres erein rahn pahieun ah mehla? Laseres sohte koasoia mehkot duwen eh lelehr nsenamwahun nanleng de kalokolok nan ehl, pwe e uhdahn pahn koasoia ma e lella mwo. Soh, Laseres memeirte sohte kehn mehkot nan mehla oh pahn mihmihte nan irairo lao lel “kaiasada ni rahn en nek” ma Sises sohte kasapahldo moure ahnsowo.

Mehlel, manaman en Sises pwukat katepe ong ahnsou mwotomwot te, pwehki irail kan e ketin kaiasada pwurehng mehla. Ahpw e ketin kadehdehda sounpahr 1,900 samwalahr ko me, ki manaman en Koht, melahr akan uhdahn pahn pwurehng mour! Ihme ki manaman akan, Sises kasalehda ekis duwen me pahn pweida nan sampah pahn Wehin Koht.

Ahnsou Emen Kompoak Mehla

Ahnsou imwintihtio mehla leldo, ahmw nsensuwed kak laud, mendahki komw koapwoaroapwoarki kaiasada. Eipraam pwoson me ah pwoud pahn pwurehng mour, ahpw kitail wadek duwen “Eipraam pedelong loale mwahieiki Serah oh sengsengkin ih.” (Senesis 23:2) A iaduwen Sises? Ahnsou Laseres mehla, e ahpw “kupwurehla oh pahtoula,” oh mwuri ekis e “ketin tehntenihr.” (Sohn 11:33, 35) Eri, ahnsoun emen me komwi poakepoake mehla, met sohte kasalehda me ke luwet ma ke iang sengisengki.

Ahnsou emen seri mehla, met keieu apwal ong ah nohno. Ihme Paipel pohnese nsensuwed laud nohno men kak pehm. (2 Nanmwarki 4:27) Ei, e pil apwal ong pahpao. Nanmwarki Depit mwahieiki nah pwutak Apsalom ah mehla: “Ma ngehi me wilianukedi oh mehla.”—2 Samuel 18:33.

Ahpw pwehki komw likilingki kaiasada, ahmw nsensuwed sohte pahn mihmihte kohkohlahte. Duwen me Paipel mahsanih, komw sohte pahn “nsensuwed duwehte irail kan me sohte ahr koapwoaroapwoar.” (1 Deselonika 4:13) Ahpw, komw pahn kerenlahng Koht ki kapakap, oh Paipel inouki me “pein ih pahn ketin kakehla komwida.”—Melkahka 55:22.

Likin me kileldi kan, koaros iren Paipel kan Kohsang kawehwehn New World Translation of the Holy Scriptures.