Peidek 2: Dahme Pahn Wiawihong Ie Ahnsou me I Mehla?
NI AHNSOU me Roman wia kisin pwutak, kompoakepah keren men mehkihla aksident en sidohsa. Roman nda: “Mehlahn kompoakepahio inenen kamwakid ie laud. Sounpar tohto mwurin aksidento, I kin medemedewe dahme pahn wiawihong kitail ni ahnsou me kitail mehla.”
Ia kahrepen aramas kin idengki peidek wet? Aramas sohte men kasik mehla. Sohte lipilipil atail sounpar, kitail sohte men mehla. Me tohto kin masak dahme pahn wiawi mwurin mehla.
Dahme ekei kin sapengki peidek wet? Me tohto kin kamehlele me ni emen eh pahn mehla, mie mehkot reh me kin momourte. Re kin kamehlele me aramas mwahu pahn ale ketingparail nanleng, a irail kan me suwed pahn ale kalokepen diparail kan kohkohlahte. Ekei kin medewe me ni emen eh pahn mehla, e kin sohla mie oh kedekedeo manokonokla douluhl.
Dahme pasapeng ko kin kasalehda? Keieu en pasapengo kasalehda me ni emen kin mehla, e sohte uhdahn kin mehla. Keriauo kin kasalehda me sohte kahrepen mour. Irail kan me kin medewe me sohte kahrepen mour kin ahnekihda soangen madamadau en seukoapworopwor wet: “Kitail en kin kamakamadipwte, pwe lakapw kitail pahn mehla.”—1 Korint 15:32.
Dahme Paipel padahngki? Paipel sohte kin padahngki me ni emen eh mehla, mie mehkot reh me kin momourte. Koht ketin kamwakid Nanmwarki Solomon en ntingihedi: “Me momour kan ese me re pahn mehla, ahpw me melahr akan sohte ese mehkot.” (Eklesiasdes 9:5) Irail kan me “sohte ese mehkot” sohte douluhl wehwehki dahme wiewiawi limwahrail. Re sohte kak pehm de wia mehkot. Kahrehda me melahr akan sohte kak sewese de kamedekihala me momour kan.
Weksang dahme me tohto kin kamehlele, Koht sohte ketin kupwurki aramas en mehla. E ketin kapikada tepin aramas Adam, me ahneki koapworopwor en mour soutuk nin sampah. Ihte ahnsou me Koht ketin mahsanih duwen mehla, iei ahnsou me e ketin mahsanihong Adam kalokepen eh pahn sapeik. E ketin keinepwihsang Adam en dehr kang wahntuhke ehu oh ketin padahkihong me ma e pahn kang, e “pahn mehkihla.” (Senesis 2:17) Ma Adam oh Ihp kolokolete ara peik, ira oh kadaudokara koaros me kin loalopwoat ong Koht pahn mour kohkohlahte nin sampah.
Adam pilada en pohnsehsehla sapwellimen Koht kehkehliko. E dipada ni eh sapeik ong Koht, kahrehda e mehla. (Rom 6:23) Sohte mehkot rehn Adam me pitsang mehla. Ahpw e sohla mie. Koht ketin mahsanihong Adam: “Ke pahn doadoahk oh kakerehdi pwudowomw, pwe ke en koadoahkihada wahn pwelen sampah, ke lao pwurehng wiepwella, me ke wiawihda sang ie. Pwe ke wiawihda sang pwehl oh ke pahn pwurehng wiepwella.” (Senesis 3:19) Pwehki kitail koaros tepisang Adam, kitail sohsohki sang ih dihp oh mehla.—Rom 5:12.
Mendahki Adam pilada en sapeik, Koht pahn ketin kapwaiada kupwure en ketin kadirehkihla sampah kadaudok en Adam. (Senesis 1:28; Aiseia 55:11) Ahnsou keren, Siohwa pahn ketin kaiasada pali laud en me melahr akan. Me pid ni ahnsowo, wahnpoaron Pohl koasoia: “Me mwahu oh suwed, pahn iasada sang mehla.”—Wiewia 24:15.
Pwehn kalaudehla omw esehla dahme kin wiawi ni ahnsou me emen mehla, kilang irelaud 6 en pwuhk en Dahme Paipel Uhdahn Padahngki? Ke kak rong deale pwuhk wet sang www.jw.org
[Koakon nan pali 7]
Dahme Sises Mahsaniheki Duwen Mehla?
Sises sohte ketin pwungki ekei kaunen pelien lamalam kan ni ahnsowo me kin nda me melahr akan sohte pahn iasada. (Luk 20:27) E sohte kin ketin padahngki me mie mehkot rehn aramas me sohte kin mehla. Ahpw Sises ketin padahngki soahng pwukat me kileldi pah.
Mehla duwehte meir. Ni ahnsou me kompoakepah Lasarus mehla, Sises mahsanih: “Kompoakepatail Lasarus meirlahr. A I pahn kolahng pangenda.” Sapwellimen Sises tohnpadahk ko sohte wehwehki dahme e mahsaniho. Irail patohwan: “Maing, ma e meirlahr, a e pahn mwahula.” Iren Paipelo kawehwehda: “Mahsen en Sises wet uhdahn wehwehki me Lasarus melahr, a irail ahpw kihkihong me e wehwehki me e memeirte. Sises eri mahsanihong irail ni sansal, ‘Lasarus melahr.’”—Sohn 11:11-14.
Me melahr akan pahn iasada. Ni Sises eh ketin lella ni imwen Lasarus, e ketin kansenamwahwihala Marda, rien Lasarus serepein, ni eh mahsanih: “Riomw ohlo pahn pwurehng mourda.” Sises eri ketin wiahda inou kaselel wet: “Ngehi me mour sapahl oh Sounkomour. Mehmen me pwoson ie, mehnda ma e pahn mehla, ahpw e pahn mour.” Sapwellimen Sises inou wet uhdahn mehlel. Mwohn aramas tohto, Sises ketin kaiasada Lasarus, mendahki e melahr erein rahn pahieu.—Sohn 11:23, 25, 38-45.
Nan kaudiahl me e ketikihong wahnpoaron Sohn, Sises pwurehng inoukihda me me melahr akan pahn kaiasada. E ketin kawehwehda ahnsou ehu ni ahnsou kohkohdo me mehla pahn lapwahda koaros me ni karasaras sensel pahn eh manaman.—Kaudiahl 20:13.