Peidek 1: Ia Kahrepen Ahi Mour?

ROSALIND, me tikida nan England, ahneki ineng en men loalokongkihla soahng kan ni uwen me e kak. E pil men sewese aramas akan. Mwurin eh kesepwil sang sukuhl, e alehdi doadoahk mwahu ehu me kin pidada sewese irail kan me sohte imwarail, oh e pil kin sewese irail kan me ahneki soumwahu en paliwar oh me kin pwand en koledi mehkot. Mendahki e ahneki doadoahk mwahu oh paiamwahu, e nda: “Erein sounpar tohto, I kin peidengki, ‘Dahme kahrehda kitail miehki?’ oh ‘Ia kahrepen mour?’”

Ia kahrepen aramas kin idengki peidek wet? Aramas sohte duwehte mahn me sohte kak peidengki oh medemedewe soahng kan. Kitail ahneki koahiek en sukuhlki soahng kan me wiawi mahs, wiahda koasoandi ong ahnsou kohkohdo oh rapahki kahrepen mour.

Dahme ekei kin sapengki peidek wet? Me tohto kin leme me uhdahn kahrepen mour iei en kepwehpwehla de ndandla oh ahneki nsenamwahu.

Dahme pasapengo kin kasalehda? E kin kasalehda me kitail kin pein koasoanehdi dahme kesempwal nan atail mour. Kupwuren Koht sohte kesempwal sang dahme kitail mwahuki.

Dahme Paipel padahngki? Nanmwarki Solomon inenen kepwehpwe oh kin rapahki mehn kamweit kan ahpw diarada me soahng pwukat sohte kin kaitarala kahrepen eh mour. E kasalehda ia uhdahn kahrepen mour ni eh ntingihedi: “Mwurin mepwukat koaros, meteieu me I pahn nda: lemmwiki Koht, oh kapwaiada sapwellime mahsen, pwehki ih kahrepe wet me aramas kepikipikihda.” (Eklesiasdes 12:13) Dahme kin pidada atail kapwaiada sapwellimen Koht kosonned kan?

Ehu me Koht ketin kupwurki ong kitail iei kitail en perenki mour. Solomon ntingihedi: “Me keieu mwahu ong aramas emen en wia iei en mwenge oh nim oh pereperenki wahn eh doadoahk. Ahpw met I pil pehmehr me e kohsang nin limen Koht.​”—Eklesiasdes 2:24.

Koht pil ketin kupwurki kitail en poakohng oh apwalih atail peneinei. Tehk kaweid mwahu oh mengei pwukat me kohwong emenemen tohnpeneinei.

“Ohl akan uhdahn pahn poakohng ar werek kan duwehte ar kin poakohng pein paliwararail kan.”​—Episos 5:28.

“Lih pwopwoud en wauneki eh pwoud.”​—Episos 5:33.

“Seri kan, . . . peikiong samamwail oh inamwail kan.”​—Episos 6:1.

Ma kitail doadoahngki kaweid en Paipel pwukat, kitail pahn diar ekis peren oh nsenamwahu. Ahpw me keieu kesempwal kitail en wia iei en sukuhlki soahng koaros me kitail kak duwen Sounkapikpatail oh karanihala ih nin duwen Kompoakpatail. Ni mehlel, Paipel kin lukei kitail en “keido mpen Koht.” E pil inoukihda inou kaselel wet: “E pahn ketin keiong mpamwail.” (Seims 4:8) Ma ke ale luhk wet, omw mour pahn miehla kahrepe.

Pwehn kalaudehla omw ese ia duwen omw kak mour ni ahl ehu me kin kaperenda Koht, kilang irelaud 12 en pwuhken Dahme Paipel Uhdahn Padahngki? Ke kak rong de ale pwuhk wet sang www.jw.org

[Koakon nan pali 5]

Dahme Sises Ketin Mahsaniheki Duwen Kahrepen Mour?

Sises uhdahn ketin kamehlele duwen kahrepen sapwellime mour. E mahsanih: “A iei, ong ni kahrepe wette me I kohkidohng sampah, pwe I en kadehdehda duwen me mehlel.” (Sohn 18:37) Erein sapwellime mour, Sises ketin padahkihong aramas akan duwen me mehlel duwen Koht oh Sapwellime koasoandi kan.

E pahn uhdahn miehla kahrepen atail mour ma kitail kin idawehn sapwellimen Sises mehn kahlemeng. Ni mehlel, Sises ketin lukei kitail en sukuhl sang reh. (Madiu 11:29) Tehk ahl riau me kitail kak wia met.

Sises ketin padahngki me ma kitail men nsenamwahu, kitail anahne pohnese atail anahn en esehla Koht oh “rong mahsen en Koht oh kapwaiada.” (Luk 11:28) Kitail kak kaitarala atail anahn en esehla Koht ma kitail loalokongkihla Koht mehlelo oh pil me e ketin poaronedohr, Sises Krais.​—Sohn 17:3.

Sises ketin kehkehlikihong sapwellime tohnpadahk ko ren padahkihong meteikan duwen dahme re sukuhlkiher. E mahsanih: “Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk: papidaisihirailla ni mwaren Sahm oh Sapwellime oh [“sapwellimen Koht manaman,” NW] oh kehkehlingkihong irail re en peikiong mehkoaros me I koasoanediong kumwail.”​—Madiu 28:19, 20.

Irail kan me kin kaitarala arail anahn en esehla Koht sang ni arail onopki Paipel oh doadoahngki dahme re sukuhlki kin diarada me arail mour kin mwahula. Arail kamehlele me arail mour uhdahn mie kahrepe kin kekeirda ni ahnsou me re tepida sewese meteikan ren esehla duwen Koht.