Ia Kahrepen Mour?
DAHME KAHREHDA PASAPENGPEN MET INENEN KESEMPWAL? Ehu irair me kin keieu kapwunod ong aramas emen iei en ahneki mour me sohte wehwepe. Ni pali teio, aramas emen me kin ahneki mour me mie wehwepe kin kak powehdi kahpwal kan nan eh mour. Viktor E. Frankl me wia emen toahktehn mwahliel oh selin pepehm oh me wia emen me pitila oh sohte mehla nan Holocaust ntingihdi: “Sohte mehkot nan sampah wet me kin inenen sawas laud ong aramas emen en kak powehdi irair me keieu suwed duwehte en emen eh pahn ese me mie wehwehn eh mour.”
Ahpw mie soangsoangen kawehwe kan me pid ire wet. Tohto kin pehm me emenemen pahn wiahiong en mie wehwehn eh mour. Ni pali teio, ekei me kin kamehlele me aramas tepisang mahn kin padahngki me sohte wehwehn mour.
Ahpw ni mehlel, e wia elen loalokong kitail en rapahki sawas sang rehn Siohwa Koht me wia Sounketikihda Mour pwehn diarada wehwehn mour. Medewe dahme sapwellime Mahsen mahsanih me pid duwen ire wet.
Dahme Paipel Mahsanih
Paipel mahsanih me mie sapwellimen Siohwa Koht koasoandi ni ahnsou me e ketin kapikada aramas. Siohwa ketikihong tepin ohl oh lih kehkehlik pwukat me kileldi pah.
Senesis 1:28. “Kumwa kaparaparala pwe kadaudokamwa kan pahn kousoanla wasa koaros nin sampah oh kaunda mehkoaros. I kihong kumwa manaman en kaunda mwahmw akan, menpihr kan oh mahn lawalo kan koaros.”
Koht kupwurki Adam oh Ihp oh neira seri kan en kaparadaisiala sampah pwon. E sohte ketin kupwurki aramas en mahla oh mehla, oh e sohte pil kupwurki aramas en kauwehla sampah. Ahpw pwehki pilipil sapwung me tepin atail pahpa oh nohno kahlap wiahda kahrehda atail sohsohki dihp oh mehla. (Senesis 3:2-6; Rom 5:12) Mendahki met, sapwellimen Siohwa koasoandi sohte wekila. Ni ahnsou keren sampah pahn wiahla paradais ehu.—Aiseia 55:10, 11.
Siohwa ketin kapikkitailda oh ketikihong kitail kehl oh loalokong en kak kapwaiada kupwure. E sohte ketin kapikkitailda pwe kitail en pein uhtohrda oh saledeksang ih. Nna tehk kanaiehng dahme iren Paipel kan me kileldi pah kasalehda duwen ia kupwuren Koht ong kitail.
Eklesiasdes 12:13. “Mwurin mepwukat koaros, meteieu me I pahn nda: lemmwiki Koht, oh kapwaiada sapwellime mahsen, pwehki ih kahrepe wet me aramas kepikipikihda.”
Maika 6:8. “Eri, iet me KAUN-O kin ketin kupwurki kitail en wia: kitail en wiahda me pwung; kitail en kin kasalehda atail limpoak poatopoat, oh peikiong atail Koht ni karakarahk.”
Madiu 22:37-39. “‘Ke pahn poakohng Kaun-o omw Koht sang nan kapehdomw unsek, sang ni ngenomw unsek, sang ni omw lamalam koaros unsek.’ Ih met kosonned me keieu lapalap oh kesempwal. A me keriaun kesempwal, me rasehngete met, iei: ‘Ke pahn poakohng mehn mpomw duwen omw kin poakohng pein uhk.’”
Iaduwen Pasapeng me Kohsang nan Paipel Kin Kameleilei Mehlel Atail Madamadau
Pwe misihn ehu en kak doadoahk mwahu, kitail anahne doadoahngki misihno nin duwen me sounwiepen misihno koasoanehdi. Duwehte met, pwe kitail en dehr pein kauweikitailla—sohte lipilipil ma atail nanpwungmwahu rehn Koht, de ni madamadau, de pepehm, de war—kitail anahne doadoahngki atail mour ni ahl me Sounwiapatail kupwurki. Kilang iaduwen ire pwukat me kileldi pah me pid duwen mour kin kasalehda iaduwen atail kak ahneki meleilei nan atail madamadau ma kitail ese ia kupwuren Koht.
Ni arail kin koasoanehdi dahme keieu kesempwal nan arail mour, tohto kin pilada en nantihong en kepwehpwehla. Ahpw Paipel kehkehliki: “irail kan me men kepwehpwehla kin pwupwudiong nan songosong oh lohdiong nan lidip en ineng pweipwei oh keper tohto.”—1 Timoty 6:9, 10.
Ni pali teio, irail kan me limpoakohngla Koht ahpw kaidehn mwohni kin diarada dahme kin keieu wahdo nsenamwahu mehlel. (1 Tim. 6:7, 8) Irail kin wehwehki duwen kesempwalpen doadoahk laud oh me irail pwukoahki en apwalihala arail anahn akan en war. (Episos 4:28) Ahpw irail pil kin kesempwaliki sapwellimen Sises mahsen en kaweid wet: “Sohte aramas emen kak liduwih soumas riemen; pwe e pahn kailongki emen, e ahpw pahn poakepoake meteio; e pahn loalopwoatohng emen, e ahpw pahn mwamwahliki meteio. Eri, ih pil duwen kumwail: kumwail sohte kak papah Koht oh pil kepwehn sampah kan.”—Madiu 6:24.
Kahrehda irail kan me kin poakohng Koht sohte kin mwohneki arail doadoahk kan de nannanti irail en kepwehpwehla, ahpw me irail kin keieu kesempwalki nan arail mour iei en wia mehkan me Koht kupwurki. Irail kin pohnese me ma irail pahn kin mwohneki kapwaiada kupwuren Koht, Siohwa Koht pahn ketin apwalih irail. Ni mehlel, Siohwa kin ketin nsenki en wia met.—Madiu 6:25-33.
Ni arail kin ehuiong aramas akan, me tohto kin keieu nsenohki pein irail. Nan rahnpwukat sampah wet sohte kin meleilei pwehki aramas tohto kin “roporop ong pein irail, . . . sempoak.” (2 Timoty 3:2, 3) Ni ahnsou me emen pahn kin kansensuwedih irail de sohte pwungki arail iren madamadau, irail kin kasalehda “soangen lingeringer koaros, soangen men pei koaros, soangen lahlahwe koaros.” (Episos 4:31) Ni emen sohte kin ahneki kanengamah, met sohte kin kak wahdo meleilei ahpw e kin “kahrehda akamai.”—Lepin Padahk 15:18.
Weksang met, irail kan me kin peikiong sapwellimen Koht kaweid me pid poakohng mehn mparail kan duwe pein irail kin “kadekpene oh loallamwahupene, oh mahkpene.” (Episos 4:32; Kolose 3:13) Pil ni ahnsou kan me meteikan sohte kin kasalehda kadek ong irail, irail kin song kahlemengih Sises me ni ahnsou me aramas akan lahlahwe, “e soh mwahn dupukohng irail.” (1 Piter 2:23) Duwehte Sises, irail kin wehwehki me e kin inenen wahdo peren ma irail kin papah meteikan, me kin pil wehwehkiong irail kan me sohte kin kalahnganki soahng mwahu kan me irail kin wiahiong irail. (Madiu 20:25-28; Sohn 13:14, 15; Wiewia 20:35) Siohwa Koht kin ketikihong sapwellime ngehn sarawi ong irail kan me kin kahlemengih sapwellime Ohl, oh ngehn wet kin kihong irail pepehm en meleilei nan arail mour.—Kalesia 5:22.
Ahpw iaduwen omw madamadau ong dahme pahn wiawi nan ahnsou kohkohdo kin kamwakid meleilei en omwi madamadau?
[Kawehwehpen kilel kan nan ehu ehu pali 4]
Aramas emen kin anahne wehwehki mwahu ia udahn kahrepen eh mour
[Kawehwehpen kilel kan nan ehu ehu pali 5]
Sises kin padahkihong kitail iaduwen kitail kak ahneki madamadau meleilei