Mwohneki Mehn Akadei Katapan nan Mour

“Kumwail me momour koaros, kumwail kapinga KAUN-O.”—MEL. 150:6.

1. Kawehwehda duwen ohl pwulopwul men me kin raparapahki mehn akadei nan eh mour.

SEUNG JIN, me tikida nan Korea koasoia:a “I kin sukuhliki palien wini pwehki I men doadoahngki ei mour en sewese aramas akan. I pil lemeleme me ndand oh mwohni me I kak ale sang ni ei wia toahkte men pahn kihong ie nsenamwahu. Ahpw I nsensuwedkihla ni ahnsou me I diarada me toahkte men sohte kak uhdahn kihong uwen laud en sawas me aramas akan kin uhdahn anahne. I eri tepida ale kasukuhl en mahlen, ahpw ei mahlen sohte kin nohn sewese meteikan, oh I pil pehm me ngehi aramas roporop men. I eri wiahla sounpadahk men oh mwadang diarada me ihte I kak wia, iei en padahngki ire kan, ahpw I sohte kak kihda kaweid mwahu me kak kahluwa aramas akan ong nsenamwahu mehlel.” Duwehte aramas tohto, Seung Jin kin raparapahki mehn akadei katapan nan mour.

2. (a) Dahme en ahneki mehn akadei katapan nan mour kin wehwehki? (b) Iaduwen kitail kak ese me Sounkapikpatail sapwellimaniki kahrepe kesempwal ni eh ketikihdi kitail pohn sampah?

² En ahneki mehn akadei katapan nan atail mour kin wehwehki me kitail wehwehki dahme kahrehda kitail kin momour, oh mie mehn akadei sansal me kitail kin nantihong lel. Kitail aramas kak uhdahn ahneki soangen mehn akadei wet? Ei! Sounkapikpatail ketikihong kitail loalokong, kadeikpen loalatail, oh koahiek en madamadau, oh met kin kasalehda me e sapwellimaniki kahrepe kesempwal ni eh ketikihdi kitail pohn sampah. Kahrehda kitail kak diarada oh lel mehn akadei katapan ma kitail pahn mourki mour me pahrekiong kupwuren Sounkapikadao.

3. Dahme kupwuren Koht ong tohnsampah kin pidada?

³ Paipel kin kasalehda me kupwuren Koht ong kitail kin pidada soahng tohto. Karasepe, kitail wiawihda mwahu mehlel oh met wia kasalepen sapwellimen Koht limpoak soh roporop ong kitail. (Mel. 40:5; 139:14) Kahrehda en mourki mour me pahrekiong kupwuren Koht kin wehwehki en poakohng meteikan ni soh roporop duwehte Koht kin ketin wiawiong kitail. (1 Sohn 4:7-11) Met pil wehwehki en peikiong sapwellimen Koht kaweid kan me kin sewese kitail en mourki mour me pahrekiong kupwure kan me poahsoankihda limpoak.​—Ekl. 12:13; 1 Sohn 5:3.

4. (a) Dahme anahn pwe kitail en ahneki mehn akadei katapan nan mour? (b) Ia mehn akadei keieu mwahu nan mour me aramas koaros kak ahneki?

⁴ Koht pil kupwurki aramas akan en mour nsenamwahu oh ahneki popohl nanpwungarail oh rehn mahn akan. (Sen. 1:26; 2:15) Ahpw, dahme kitail anahne wia pwehn ahneki nsenamwahu, oh sohte perki mehkot oh meleilei nan loalatail? Duwehte seri men anahne ese me eh pahpa oh nohno kin mihmi reh pwehn ahneki nsenamwahu oh sohte perki mehkot, kitail pil anahne ahneki nanpwungmwahu rehn Samatail nanleng pwehn diarada kahrepe oh mehn akadei katapan nan atail mour. (Ipru 12:9) Koht kin ketin mweidohng kitail en ahneki nanpwungmwahu reh sang ni eh kin ketin mweidohng kitail en karanihala ih oh kin ketin karonge atail kapakap kan. (Seims 4:8; 1 Sohn 5:14, 15) Ma kitail pahn iang Koht kekeid ni pwoson oh kompoakepahnki ih, kitail kak kaperenda oh kapinga Samatail nanleng. (Sen. 6:9; Lep. Pad. 23:15, 16; Seims 2:23) Met wia mehn akadei keieu mwahu nan mour me aramas koaros kak ahneki. Sounmelkahka men ntingihdi: “Kumwail me momour koaros, kumwail kapinga KAUN-O.”​—Mel. 150:6.

Ia Ahmw Mehn Akadei nan Mour?

5. Dahme kahrehda en rapahki kepwe kan mahs nan atail mour sohte kak kaitarala atail anahn akan?

⁵ Ehu me Koht kupwurki kitail en wia iei me en apwalih mwahu pein kitail oh atail peneinei. Met kin pidada en apwalih anahn en paliwar oh kakairada nanpwungmwahu rehn Koht. Ahpw kitail anahne toupahrek en wia met pwe ma kitail pahn nohn kesempwaliki anahn en paliwaratail, kitail solahr pahn apwalih atail anahn en ahneki nanpwungmwahu rehn Koht. (Mad. 4:4; 6:33) E kansensuwed me aramas tohto kin medemedewehte en ahneki kepwe kan. Ahpw, kitail sohte kak kaitarala atail anahn koaros sang ni ihte raparapahki kepwe kan. Ehu roporop me ahpwtehn wiawi rehn aramas kepwehpwe kan nan Eisia kin kasalehda me pali laud en irail kin “ahneki pwunod oh nsensuwed, mendahki irail kin ndandla oh pehm me re kin wiahda mehkot kesempwal pwehki arail kepwe tohto.”​—Ekl. 5:11.

6. Soangen kaweid dahieu Sises ketikihong aramas akan me kin raparapahki kepwe kan?

⁶ Sises kin ketin kaweidih kitail en dehr “noahrok en dipwisou kan.” (Mark 4:19) Dahme kahrehda e keper en noahrok en dipwisou kan? Ehu kahrepe iei pwe aramas akan ele pahn lemeleme me dipwisou kan kak kihong irail nsenamwahu, ahpw met sohte mehlel. Nanmwarki loalokong Solomon mahsanih: “Ma ke pahn poakohng mwohni, ke sohte mwahn pahn itarki.” (Ekl. 5:10) Ahpw kitail kak rapahki kepwe kan oh ni ahnsowohte papah Koht ni mohngiong unsek? Soh, kitail sohte kak wia met. Sises ketin kawehwehda ire wet: “Sohte aramas emen kak liduwih soumas riemen; pwe e pahn kailongki emen, e ahpw pahn poakepoake meteio; e pahn loalopwoatohng emen, e ahpw pahn mwamwahliki meteio. Eri, ih pil duwen kumwail: kumwail sohte kak papah Koht oh pil kepwehn sampah kan.” Sises ketin kangoange sapwellime tohnpadahk ko en ngoangki kepwehpwehkihla, kaidehn kepwehn sampah, ahpw “paien nanleng,” me wehwehki en wiahda adamwahu rehn Koht me “ketin mwahngih dahme konehng kumwail mwohn amwail saikinte kin peki mehkot.”​—Mad. 6:8, 19-25.

7. Iaduwen kitail pahn kak “lelohng ni mouro me uhdahn mour mehlel”?

⁷ Ni ahnsou me wahnpoaron Pohl ntinglahng ienge Kristian Timoty, e kihda kaweid kehlail me pid duwen ire wet. E ndaiong Timoty: “Panawiheki koaros me kepwehpwe nan mour wet re en dehr . . . koapworopworki soahng kan me sohte kin tengeteng, duwehte atail kepwehpwehn sampah; ahpw re en koapworopworki Koht, me kin ketin kalahngan oh me kin ketin sapankihong kitail soahng koaros pwe kitail en peren. Panawihekin irail re en . . . sapan oh perenki sewese meteikan. Ih duwen met ar pahn kaunopada ehu pai kesempwal ong pein irail, me pahn wia ehu poahsoan kehlail ong ni ahnsou kohkohdo. Eri, irail ahpw pahn kak lelohng ni mouro me uhdahn mour mehlel.”​—1 Tim. 6:17-19.

Dahkot “Mour Mehlel”?

8. (a) Dahme kahrehda me tohto kin nantihong ale kepwe kan oh ndandla? (b) Dahme aramas pwukat sohte kin wehwehki?

⁸ Ong me tohto, ahneki mour katapan kin wehwehki en ahneki kepwe tohto. Ehu makasihn en nuhs nan Eisia koasoia: “Irail akan me kin kilang kasdo kan de TV kin men ale dahme re kilang, oh medemedewe duwen dahme irail ele pahn kak ahneki.” Aramas tohto kin akadeiong ale kepwe kan oh ndandla. Me tohto kin tounmeteikihla arail ahnsoun pwulopwul, arail roson, arail mouren peneinei, oh kesempwalpen ahneki nanpwungmwahu rehn Koht pwehn ale soahng pwukat. Pali laud en aramas sohte kin lemeleme me soangen ineng pwukat kin kohsang rehn Sehdan oh ih me kin kamwakid irail en mwekid ni ahl me uhwong kupwuren Koht ong kitail. (1 Kor. 2:12; Ep. 2:2) Ihme kahrehda aramas tohto sohte kin nsenamwahu rahnwet!​—Lep. Pad. 18:11; 23:4, 5.

9. Dahme aramas akan sohte kak wiahda, oh pwekida?

⁹ Iaduwen irail akan me kin doadoahk laud ni soh roporop en sewese meteikan, nannanti en kihsang duhpek, soumwahu, oh tenek sapahrek? Arail doadoahk mwahu oh tounmetei kin kalapw sewese aramas tohto. Ahpw, mendahki irail kin wia uwen arail kak, re sohte pahn kak wekidala koasoandi wet en wiahla koasoandi pwung oh pahrek. Pwekida? Pwehki ni mehlel, “sampah unsek mi pahn manaman en Me Suwedo”—Sehdan—oh e sohte men koasoandi wet en mwahula.​—1 Sohn 5:19.

10. Iahd irail me lelepek kan pahn paieki “mour mehlel”?

¹⁰ Ia uwen kansensuwed ma emen sohte kak ahneki koapworopwor likin mour nan koasoandi en sampah ni ahnsouwet! Pohl ntingihdi: “Ma atail koapworopworki Krais e doakedoakehte atail mouren sampah wet, eri, kitail paisuwedsang aramas koaros nin sampah.” Irail akan me kin koapworopworkihte arail mour ahnsouwet kin ahneki soangen madamadau duwehte “kitail en kin kamakamadipwte, pwe lakapw kitail pahn mehla.” (1 Kor. 15:19, 32) Ahpw mie koapworopwor ong ahnsou kohkohdo, iei “lahng kapw oh sampah kapw, wasa me pwungen kalahngan en Koht pahn poadada ie poatopoat, duwen eh ketin inoukidahr.” (2 Pit. 3:13) Ni ahnsowo, Kristian akan pahn kak paieki “mour mehlel,” me iei “mour soutuk” oh unsek nanleng de sampah pahnangin kaundahn koperment en Wehin Koht!​—1 Tim. 6:12.

11. Dahme kahrehda en nantihong wia kupwuren Koht oh utungada sapwellime Wehio kin wia mehkot katapan?

¹¹ Wehin Koht kelehpw me pahn uhdahn kamwahwihala kahpwal en tohnsampah kan. Kahrehda en nantihong wia kupwuren Koht oh utungada sapwellime Wehio kin wia mehn akadei me keieu katapan me aramas koaros kak akadeiong. (Sohn 4:34) Ni atail kin iang doadoahk wet, kitail kak ahneki nanpwungmwahu rehn Samatail nanleng. Kitail pil kak perenki iang riatail rar kei nan mwomwohdisohn Kristian akan, me pil kin mwohneki mehn akadeiohte nan arail mour.

Wiahda Tounmetei kan me Pahn Kahluwalahng “Mour Mehlel”

12. Kawehwehda wekpeseng en mour nan koasoandi en sampah wet oh “mour mehlel.”

¹² Paipel mahsanih me koasoandi en sampah wet “oh mehkoaros nin sampah me aramas kin inengieng kin sosohrala.” Sohte ehu kisehn ahn Sehdan sampah, iangahki eh ndand oh kepwe kan, pahn pitla, “ahpw me kin kapwaiada kupwur en Koht pahn momour kohkohlahte.” (1 Sohn 2:15-17) Weksang kepwe kan oh lingan me pahn mwadang sohrala oh pil peren mwahl nan koasoandi en sampah wet, “mour mehlel”​—mour soutuk pahnangin kaundahn Wehin Koht—​pahn mihmi kohkohlahte oh warohng atail tounmetei kan. Kahrehda e kesempwal kitail en wiahda tounmetei kan me pahn kahluwakitaillahng “mour mehlel.”

13. Iaduwen pwopwoud ehu wiahda tounmetei kan me pahn kahluwalahng “mour mehlel”?

¹³ Nna, medewehla duwen Henry oh Suzanne. Ira kin pwoson sapwellimen Koht inou me koaros me kin mwohneki Wehio nan ar mour pahn ale sawas sang rehn Koht. (Mad. 6:33) Kahrehda ira koasoanehdi en kousoan nan ihmw ehu me sohte pweilaud oh pil emente en doadoahk en mwohni pwe ira en kak iang neira serepein riemen doadoahngki ahnsou laud ong doadoahk en kalohki Wehio oh wiewia teikan me kaperenda Koht. (Ipru 13:15, 16) Emen kompoakepahra sohte kak wehwehki ara pilipilo. E ndaiong Suzanne: “Suzanne, ma ke men kousoan nan ihmw ehu me mwahusang met, ke pahn anahne tounmeteikihla mehkot.” Ahpw Henry oh Suzanne ese me mwohneki Siohwa mahs ‘pahn kahrehiong irail mour ahnsou wet, oh pil ahnsou kohkohdo.’ (1 Tim. 4:8; Taitus 2:12) Neira serepein riemeno kekeirda oh wiahla regular pioneer ngoang kei. Nin duwen peneinei ehu, re sohte lemeleme me re katihasang mehkot me uhdahn; ahpw re uhdahn paiekihda ar kin wiahki “mour mehlel” arail mehn akadei.​—Pil. 3:8; 1 Tim. 6:6-8.

Dehr Nohn ‘Doadoahngki Dipwisoun Sampah kan’

14. Dahme kak wiawiong kitail ma kitail pahn manokehla atail mehn akadei katapan?

¹⁴ Mie keper laud ma kitail pahn manokehla atail mehn akadei katapan oh solahr kin kolokol teng atail koapworopwor en “mour mehlel.” Kitail kakete mweidohng “anahn akan oh kepwe kan oh peren kan en sampah wet” en kahluwa atail mour. (Luk 8:14) Ineng kehlail en men kepwehpwehla oh “pwunod kan en sampah wet” kak kahrehiong kitail en nohn iang pidada wiewia kan en koasoandi en sampah wet. (Luk 21:34) E inenen kansensuwed me ekei Kristian akan kin tepida ahneki ineng en kepwehpwehla duwehte aramas tohto nan sampah wet oh “salongalahsang pwoson oh kauwehkihla mohngiongirail soangen kapahtou tohtohie,” oh katihasang arail nanpwungmwahu rehn Siohwa. Ia uwen met wia imwila suwed pwehki ar sohte kin kolokol teng arail koapworopwor en “mour soutuk”!​—1 Tim. 6:9, 10, 12; Lep. Pad. 28:20.

15. Iaduwen ehu peneinei kin paiekihda ar sohte kin nohn “doadoahngki dipwisoun sampah kan”?

¹⁵ Pohl kin kaweidih “me kin doadoahngki dipwisoun sampah kan, duwehte ma re sohte kin paieki dipwisou pwukat.” (1 Kor. 7:31) Keith oh Bonnie kin kapwaiada kaweid wet. Keith koasoia: “I wiahla emen Sounkadehdehn Siohwa kan mwohnte ei pahn kanekehla sukuhl en wia toahkte en ngih. Mie ei pilipil. I kak apwalih me soumwahu tohto kei oh wiahda mwohni laud, ahpw met pahn kauwehla ei kin papah Koht. I koasoanehdi en dehr doadoahngki ahnsou laud ong ei doadoahk en toahkte en ngih pwe I en kak doadoahngki ahnsou laud pwehn apwalih irair en ei peneinei me pid kaudok oh ar pepehm, me pahn iangahki nait serepein limen me ipwidi mwuhr. Mendahki se sohte kin naineki mwohni laud, ahpw se esehlahr iaduwen se kak kasohtik, oh se kin ahnsou koaros ahneki dahme se anahne. Se kin ahneki pepehm en kerenpene, nsenamwahu, oh peren laud. Kedekedeo, kiht koaros tepiada doadoahk en regular pioneer. Met nait serepein kan kin pwopwoud nsenamwahu, oh silimen sang rehrail mie neirail seri kan. Arail peneinei pil kin nsenamwahu pwe re kin mwohneki kupwuren Siohwa mahs.”

Mwohneki Kupwuren Koht Mahs nan Ahmw Mour

16, 17. Soangen mehn kahlemeng en aramas koahiek dah kan Paipel kin kihda, oh iaduwen kitail kin tamanda irail?

¹⁶ Paipel kin kihda karasepe kan en irail akan me kin mourki kupwuren Koht oh irail akan me sohte kin wia met. Aramas koaros sohte lipilipil arail sounpar, tiahk me re tikida loale, oh irair me re kin mihmi loale, kak ale kasukuhl sang soangen karasepe pwukat. (Rom 15:4; 1 Kor. 10:6, 11) Nimrod wiahda kahnimw laud kan, ahpw e wia met ni eh kin “uhwong Siohwa.” (Sen. 10:8, 9, New World Translation) Ahpw me tohto wia mehn kahlemeng mwahu. Karasepe, Moses sohte kin wiahki kolokol eh ndand nin duwen kisehn peneinei en nanmwarki en Isip eh mehn akadei nan mour. Ahpw e kin kesempwaliki eh pwukoa kan me kohsang rehn Koht laud sang “kepwe kesempwal koaros en Isip.” (Ipru 11:26) Luk, iei toahkte men, ele kin sewese Pohl oh meteikan pwehn apwalih ar soumwahu kan. Ahpw Luk kin wiahda me keieu mwahu ong meteikan nin duwen sounkalohk men oh sounnting en Paipel men. Aramas tohto kin ese Pohl, kaidehn nin duwen semen en Kosonned men, ahpw nin duwen misineri men, oh “wahnpoaron en mehn liki kan.”​—Rom 11:13.

¹⁷ Me tohto kin tamanda Depit, kaidehn nin duwen kaunen sounpei men de soun keseng men de sounnting en koul men, ahpw nin duwen “ohl emen me [Koht] ketin kupwurki.” (1 Sam. 13:14) Kitail kin ese Daniel, kaidehn pwehki eh doadoahk nin duwen emen kaun nan koperment en Papilon, ahpw pwehki eh doadoahk nin duwen sapwellimen Siohwa soukohp lelepek men. Kitail kin ese Ester, kaidehn pwehki e wia lih nanmwarki en Persia, ahpw pwehki eh mehn kahlemeng en eimah oh pwoson. Kitail kin ese Piter, Andru, Seims, oh Sohn, kaidehn nin duwen sounlaid kan, ahpw nin duwen sapwellimen Sises wahnpoaron ko. Oh kitail kin tamanda atail mehn kahlemeng me keieu mwahu, Sises, kaidehn nin duwen “kapinteo,” ahpw nin duwen “Mesaiao.” (Mark 6:3; Mad. 16:16) Irail koaros kin wehwehki ni sansal me sohte lipilipil soangen koahiek dahieu, kepwe kan, de pwais dahieu re kin ahneki, irail anahne keieu kesempwalki arail papah Koht nan arail mour, kaidehn arail doadoahk nin sampah. Irail kin ese me mehn akadei me keieu katapan me re kak ahneki iei en wiahla ohl men de lih emen me kin lemmwiki Koht.

18. Iaduwen Kristian pwulopwul men koasoanehdi mwomwen e pahn doadoahngki eh mour, oh dahme e tepida wehwehki?

¹⁸ Seung Jin, me kohda ni tepin artikel wet, pil tepida wehwehki ire wet. E kawehwehda: “I koasoanehdi I en uhdihsang doadoahngki ei koahiek ong doadoahk en palien wini oh mahlen de wia sounpadahk, ahpw en doadoahngki ei mour pwehn kapwaiada ei inou ong Koht. Met I kin papah nan ehu wasa me uhdahn anahne sounpadahk en Paipel kan, oh I kin sewese aramas akan en tepida kekeid nan ahl me pahn kahluwalahng mour soutuk. Mahs, I kin lemeleme me en wia doadoahk en pioneer sohte pahn kak uhdahn doadoahngki ei koahiek kan. Ahpw, ei mour ni ahnsouwet kin inenen katapan sang mahs, pwe I kin nantihong kamwahwihala ei irair kan oh ei koahiek en padahkihong soangsoangen aramas akan. I wehwehki me en akadeiong kapwaiada kupwuren Siohwa iei ihte elen mour me katapan.”

19. Iaduwen kitail kak diarada mehn akadei katapan nan atail mour?

¹⁹ Nin duwen Kristian akan, kitail kin ahneki loalokong me pahn kahluwalahng mour soutuk oh koapworopwor en komourla. (Sohn 17:3) Eri, kitail en dehr kin ‘mwamwahliki sapwellime kalahngan me kitail aleier.’ (2 Kor. 6:1) Ahpw kitail en kesempwaliki oh doadoahngki ehuehu rahn oh sounpar nan atail mour pwehn kapinga Siohwa. Kitail en ehukihong meteikan loalokong me pahn wahdo kapai mehlel ni ahnsouwet oh pil me pahn kahluwalahng mour soutuk. Ni atail kin wia met, kitail pahn wehwehkihla mehlelpen mahsen en Sises: “Kihwei kaperen sang ale.” (Wiewia 20:35) Oh kitail pahn diarada mehn akadei katapan nan atail mour.

[Footnote]

Ke Kak Kawehwehda?

• Ia mehn akadei keieu mwahu me kitail kak ahneki nan mour?

• Dahme kahrehda en mourki kepwe kan sohte kak kaitarala atail anahn akan?

• Dahkot “mour mehlel” me Koht ketin inoukidahr?

• Iaduwen kitail kak doadoahngki atail mour pwehn kapwaiada kupwuren Koht?