Mwohneki Kupwuren Koht nan Atail Ahnsou
“[Krais] ketin pwoukihla aramas koaros, pwe irail kan me momour, re dehr kin mourki pein ihr.”—2 KOR. 5:15.
1. Kawehwehda ehu ekspiriens en emen misineri nan wasa me e kin doadoahk.
EMEN misineri me ede Aaron koasoia: “Warat sidohsa me tepin sidohsa me kaidehn weren sounpei me pidelong nan kousapw ehu me inenen doh nan Aperika. Wereila se sohte kak koasoiong mwomwohdiso tikitik ehu nan kousapwo, oh se anahne apwalih anahn en brother kan nan wasao. Patehng mwenge, likou, oh sawaspen Paipel kan, se pil wahda ehu kasdo en video me oaralap mahsanih Jehovah’s Witnesses—The Organization Behind the Name (Sounkadehdehn Siohwa kan—Pwihn me Kin Wiliandi Mwareo).a Aramas tohto kohdo kilang kasdo nan ‘wasahn kasdo’ nan kousapwo—lapalahn ihmw ieu me wiawihkihda dihpw, oh loale mie VCR oh TV—oh se anahne kasalehda kasdo pak riau. Mwurin ehuehu ahnsou me se kasalehda kasdo, onop en Paipel tohto tepida wiawi. E sansal me at doadoahk laud uhdahn katapan.”
2. (a) Dahme kahrehda Kristian akan kin koasoanehdi teng en doadoahngki arail mour ong papah Koht? (b) Peidek dah kan kitail pahn tehkpene ni ahnsouwet?
2 Dahme kahrehda Aaron oh ienge kan wia soangen doadoahk apwalo? Pwehki arail kin kalahnganki meirong tomw en Sises Krais, re inoukihong Koht arail mour oh re men doadoahngki arail mour ni ahl me pahrekiong kupwuren Koht. Duwehte irail, Kristian kan koaros me inoukihda arail mour kin koasoanehdi en “dehr kin mourki pein ihr” ahpw en wia soahng koaros “pwehki rongamwahu.” (2 Kor. 5:15; 1 Kor. 9:23) Irail ese me ni ahnsou me koasoandi en sampah wet pahn imwisekla, mwohni koaros oh pwais koaros nan sampah wet pahn sohte katepe. Kahrehda re men doadoahngki arail mour oh roson en war ni ahl me pahrekiong kupwuren Koht. (Ekl. 12:1) Iaduwen atail pahn kak iang wia met? Iawasa kitail kak diarada eimah oh kehl me anahn en wia met? Oh soangen elen papah dah kan mie ong kitail?
Ale Kahk kan Pwe Ken Kekeirda
3. Soangen kahk dah kan kin pidada en wia kupwuren Koht?
3 Ong Kristian mehlel kan, wia kupwuren Koht iei mehkot me re anahne wia erein arail mour. Met kin kalapw tepikihda en wadek Paipel rahn koaros, iang Theocratic Ministry Sukuhl, iang doadoahk en kalohk, oh kekeirda oh papidaisla. Ni atail kin kekeirda, kitail kin tamanda mahsen en Pohl: “Pwerisekiong oh poadidiong wiewia soahng pwukat, pwe aramas koaros en kak kilang omw kekeirda.” (1 Tim. 4:15) Soangen kekeirda wet sohte kin wiawi pwe kitail en kapinga pein kitail, ahpw e kin kasalehda atail koasoanehdi teng en wia kupwuren Koht ni soh roporop. Atail kin wia met kin kasalehda me kitail kin mweidohng Koht en kahre kitail ni soahng koaros nan atail mour, oh ih me uhdahn koahiek en wia met sang pein kitail me pahn wia met.—Mel. 32:8.
4. Iaduwen kitail kak powehdi pwunod kan?
4 Ahpw, atail pweieksang wiahda pilipil kan oh nohn pwunodki pein kitail kak irehdi atail kekeirda nan atail papah Koht. (Ekl. 11:4) Kahrehda mwohn kitail kak diarada peren mehlel en papah Koht oh meteikan, kitail ele pahn anahne powehdi pein atail pwunod kan. Karasepe, Erik kin medemedewe duwen papah nan mwomwohdiso ehu me kin doadoahngki ehu lokaia tohrohr. Ahpw e kin pwunodki soahng kan duwehte: ‘I kak miniminiong irail? I pahn perenki brother kan nan mwomwohdiso? Irail pahn perenkin ie?’ E koasoia: “I diarada me I anahne nsenohki brother kan laud sang ei kin nsenohki pein ngehi. I koasoanehdi I en uhdihsang pwunodki soahng pwukat oh medemedewehte dahme I kak ehukihong meteikan. I kapakapki sawas oh tepida wia dahme I koasoanehdi. Met I diarada peren laud nan ei papah wasao.” (Rom 4:20) Ei, ma kitail pahn kalaudehla atail papah Koht oh meteikan, atail peren oh nsenamwahu pil pahn laudla.
5. Dahme kahrehda kitail anahne koasoanehdi koasoandi kan ni keneinei pwehn mwohneki kupwuren Koht? Kihda karasepe.
5 Pwehn mwohneki kupwuren Koht oh pweida mwahu, kitail pil anahne koasoanehdi atail koasoandi kan ni keneinei. Kitail en dehr wiahda pweipwand tohto me kak kahrehiong kitail en wiahla lidu kan en koasoandi en sampah wet oh kihsang atail ahnsou en wia doadoahk en Koht. Paipel kin katamankin kitail: “Pekihsang emen mwohni, ke ahpw pahn wiahla lidun aramas me ke pekihsang mwohnio.” (Lep. Pad. 22:7) En likih Siohwa oh mwohneki atail papah ih kin sewese kitail en kolokol atail madamadau pwung. Karasepe, Guoming oh rie serepein riemen kin kousoan rehn arail nohno nan wasa ehu me pweinen ihmw kan inenen laud oh apwal en diarada doadoahk mwahu. Ahpw pwehki re kin kanahieng mwomwen arail kin doadoahngki mwohni oh sawaspene, re kin ahneki dahme re anahne mendahki ekei ahnsou kaidehn irail koaros kin doadoahk. Guoming koasoia: “Ekei ahnsou, sohte pweinen at doadoahk. Ahpw, se kak pousehla doadoahk en pioneer oh apwalih mwahu at nohno. Se kin kalahnganki at nohno eh sohte men sen uhdihsang doadoahk en pioneer oh pwukoa teikan nan mwomwohdiso pwehn kihong ih kepwe tohto.”—2 Kor. 12:14; Ipru 13:5.
6. Mehnia karasepe kin kasalehda iaduwen kitail kak wiahda atail mour en pahrekiong kupwuren Koht?
6 Ma ke kin iang pidada wiewia kan en sampah me pid duwen mwohni de soahng teikan, ke ele pahn anahne kawekila ahmw mour pwehn mwohneki kupwuren Koht. Soangen wekidekla kan sohte kak mwadang wiawi. Oh ma ke wiahda sapwung ni ahnsou me ke ahpwtehn tepida wia wekidekla kan, ken dehr lemeleme me ke sohte kakohng. Medewehla duwen Koichi, me kin kalapw doadoahngki eh ahnsou laud ong mehn kamweit kan mahs. Koichi kin onop Paipel mahs ni ahnsou me e pwulopwul, ahpw sounpar tohto, mehn mwadong en video kin kaunda eh mour. Ehu rahn Koichi medemedewe: ‘Dahme I wiewia? I daulih sounpar 30, ahpw I saikinte wia mehkot katapan nan ei mour!’ Koichi pwurehng tepiada eh onop en Paipel oh ale sawas sang mwomwohdiso. Mendahki eh wekidekla sohte kak mwadang wiawi, ahpw Koichi sohte kesehla eh koapworopwor. Ki kapakap oh kangoang limpoak sang rehn meteikan, e kak powehdi eh kahpwal en nohn doadoahngki eh ahnsou laud ong mehn mwadong. (Luk 11:9) Met Koichi kin ahneki nsenamwahu oh papah nin duwen ministerial servant men.
Sukuhliki Iaduwen Kitail Kak Toupahrek
7. Dahme kahrehda kitail anahne toupahrek en wia doadoahk en Koht?
7 E konehng kitail en kihong uwen me kitail kakohng pwe kitail en kak mwohneki kapwaiada kupwuren Koht. Kitail en dehr pweiek oh dangahnga en kapwaiada kupwuren Koht. (Ipru 6:11, 12) Ahpw, Siohwa sohte kupwurki kitail en pwangada douluhl—ni paliwar, madamadau, de pepehm. Ahneki lamalam en aktikitik oh pohnese me kitail sohte kak wia doadoahk en Koht ki pein atail kehl, kin wahdo kaping ong ih oh pil kasalehda atail toupahrek. (1 Pit. 4:11) Siohwa kin ketin inoukihda me e pahn ketikihong kitail kehl me anahn en wia kupwure, ahpw kitail en dehr idingkihong kitail en wia laud sang uwen me kitail kakohng, oh song en wia laud sang dahme e kupwurki kitail en wia. (2 Kor. 4:7) Pwe kitail en papah Koht oh sohte pahn pwangada douluhl, kitail anahne koasoanehdi iaduwen kitail pahn doadoahngki atail kehl.
8. Dahme wiawiong emen Kristian pwulopwul ni ahnsou me e kin song en kihong eh doadoahk oh Siohwa koaros uwen me e kak, oh wekidekla dahieu e wiahda?
8 Karasepe, sounpar riau, Ji Hye me kin mih nan ehu wehi nan palimese en Eisia kin wia doadoahk ehu me kin kihsang eh ahnsou laud oh pil ni ahnsowohte wia doadoahk en pioneer. E koasoia: “I kin song en kihong Siohwa oh ei doadoahk koaros uwen me I kak, ahpw I kin meir awa te limau nipwong. Kedekedeo, solahr mie ei kehl en madamadau ong padahk mehlel, oh ei peren en papah Siohwa tikitikla.” Pwehn papah Siohwa ki eh ‘mohngiong unsek, mour unsek, lamalam unsek, oh kehl unsek,’ Ji Hye rapahkihda ehu doadoahk me sohte pahn kihsang eh ahnsou laud. (Mark 12:30) E koasoia: “Mendahki ei peneinei kin ndaiong ie en wiahda mwohni laud, I kin nantihong mwohneki mahs kupwuren Koht. I kin ale mwohni me itarong dahme I anahne, duwehte likou kan me konehng. Oh I kin nsenamwahuki ei kin meir laud sang mahs! I diarada peren nan ei kalohk, oh ei nanpwung rehn Siohwa kehlailla. Met pwehki solahr mie ei ahnsou laud ong soahng kan en sampah me kin kasonge ie oh kauwehla ei ahnsou.”—Ekl. 4:6; Mad. 6:24, 28-30.
9. Iaduwen atail nanti kak kamwakid aramas akan nan wasahn kalohk?
9 Kaidehn koaros kak papah Koht nin duwen regular pioneer kan. Ma ke mahlahr de mie ahmw soumwahu de mie ahmw kahpwal teikan, tamanda me Siohwa uhdahn ketin kalahnganki ahmw lelepek oh ahmw kin wia uwen me ke kak ong ih. (Luk 21:2, 3) Kahrehda, kitail en dehr lemeleme me atail nanti sohte pahn kak wia mehkot mwahu ong meteikan pwe dahme kitail kak wia me tikitik. Karasepe, mwein kitail kohla ni ekei ihmw kan ahpw sohte diarada emen me perenki rong atail padahk. Ahpw mwurin atail kohkohla sang ihmw pwukat, tohnihmw ko mwein ele pahn koasoakoasoia duwen atail tuhwong irail awa kei de rahn kei, mendahki sohte me ritingada wenihmw ong kitail! Kitail sohte kin kasik me koaros pahn mwekidki rongamwahu, ahpw ekei pahn mwekidki met. (Mad. 13:19-23) Meteikan ele pahn mwekidki mwuhr ni ahnsou me irair en sampah de pein arail mour pahn wekila. Sohte lipilipil dahme pahn wiawi, ahpw ni atail kin wia uwen me kitail kak nan atail doadoahk en kalohk ong wehipokon, kitail kin wia doadoahk en Koht. Kitail kin “iang Koht ketin wiewia sapwellime doadoahk.”—1 Kor. 3:9.
10. Soangen ahl dah kei mie ong koaros nan mwomwohdiso en papah Koht?
10 Patehng met, kitail koaros kak sewese atail tohnpeneinei kan oh riatail brother oh sister kan nan mwomwohdisohn Kristian. (Kal. 6:10) Atail wiewia mwahu kan kak wia sawas laud ong irail ong ahnsou reirei. (Ekl. 11:1, 6) Ni ahnsou me elder kan oh ministerial servant kan kin pwerisek en wia arail pwukoa kan, re kin sewese irail nan mwomwohdiso en ahneki nanpwungmwahu rehn Siohwa, oh sewese irail en kalaudehla arail doadoahk en Kristian. Kitail en kamehlele me ma kitail kin ‘loalenohng atail doadoahk ong Kaun-o ahnsou koaros,’ atail doadoahk “kaidehk doadoahk mwahl ehu.”—1 Kor. 15:58.
Mwohneki Kupwuren Koht nan Ahmw Mour
11. Likin wia doadoahk en kalohk nan wasa me koasoandiong pein atail mwomwohdiso, soangen elen papah Koht dah kan mie?
11 Nin duwen Kristian kei, kitail kin perenki mour oh kitail men kapinga Koht ni soahng koaros me kitail kin wia. (1 Kor. 10:31) Ni ahnsou me kitail kin lelepek kalohki rongamwahu en Wehio oh padahkiong meteikan en peikiong mehkoaros me Sises ketin padahngki, kitail pahn diarada elen papah Koht tohto me kak kihong kitail nsenamwahu. (Mad. 24:14; 28:19, 20) Kitail ele pahn kak papah nan wasa kan me anahn laud en sounkalohk kan mie, nan ehu wasahn kalohk en mwomwohdiso tohrohr de ehu lokaia tohrohr, de ehu sahpw tohrohr ahpw kaidehn ihte wasa me koasoandi ong atail mwomwohdiso. Elder kan oh ministerial servant kan me saikinte pwopwoud mwein pahn kak ale luhk en iang Ministerial Training Sukuhl, oh mwurin ar kesepwil sang sukuhlo, re pahn kak papah nan mwomwohdiso me anahne sawas en irail Kristian akan me ale kaiahn mwahu, nan pein sapwarail de sahpw teikan. Pwopwoud kan me kin iang doadoahk en regular pioneer mwein pahn kak ale kaiahn ong doadoahk en misineri sang sukuhl en Gilead oh papah nan ehu sahpw tohrohr. Pil ahnsou koaros kin mie anahn en tohndoadoahk kan ong soangsoangen doadoahk kan me kin wiawi nan Bethel oh doadoahk en kauwada oh apwalih wasahn mihding kan oh imwen branch ohpis kan.
12, 13. (a) Iaduwen ke kak pilada mehnia elen papah me ke pahn akadeiong? (b) Kihda karasepen iaduwen kaiahn oh koahiek me kitail ale sang ehu pwukoa kak kadoadoahk ong pwukoa teikan.
12 Mehnia elen papah me ke pahn pilada? Nin duwen sapwellimen Siohwa ladu inouda men, kin ahnsou koaros sohpeiong ih oh sapwellime pwihn pwehn ale kaweid. Sapwellime ‘ngehn sarawi’ pahn sewese iuk en wiahda pilipil pwung. (Neh. 9:20, NW) Pwukoa ehu kin kalapw kihong kitail kaiahn mwahu ong pil ehu pwukoa tohrohr, oh kaiahn oh koahiek me kitail ale sang nan ehu pwukoa ele pahn kak kadoadoahk ong pil ehu pwukoa tohrohr me kitail pahn ale mwuhr.
13 Karasepe, Dennis oh eh pwoud, Jenny, kin kaukaule iang doadoahk en kauwada Kingdom Hall kan. Mwurin melimel laud me adaneki Katrina lelehr palieir en United States, ira kohla wasao pwehn sewese irail akan me anahne sawas. Dennis koasoia: “Doadoahngki koahiek me se ale sang doadoahk en kauwada Kingdom Hall kan pwehn sewese riatail brother kan kin kihong kiht peren laud. Irail akan me se sewese kasalehong kiht arail kalahngan, oh met uhdahn sair at mohngiong. Pali laud en pwihn teikan sohte nohn pweida mwahu nan arail doadoahk en kauwada ihmw kan. Sounkadehdehn Siohwa kan onehda sapahler de kauwadahr ihmw oh Kingdom Hall tohto sang 5,300. Aramas akan kin kilang met oh ni ahnsouwet, re kin kasalehda arail men rong at padahk laud sang mahs.”
14. Dahme ke kak wia ma ke men iang doadoahk en regular pioneer?
14 Ke kak mwohneki kupwuren Koht sang ni ahmw pahn pilada iang doadoahk en regular pioneer? Ma ke pahn wia met, ke pahn ale kapai tohto. Ma ahmw irair nan ahnsouwet sohte kak mweidohng uhk en pioneer, mwein ke pahn kak wekidala ahmw koasoandi kan. Ken kapakap duwehte Nehmaia wia ni ahnsou me e men ale ehu pwukoa kesempwal: “Komw ketin karonge ei pekipek oh . . . ketin kupwure ie.” (Neh. 1:11) Mwurin mwo, likih Siohwa pwehki e “kin ketin sapeng pekipek kan,” oh nantihong wia dahme ke kapakapki. (Mel. 65:2) Pwe Siohwa en kapaiada ahmw men kalaudehla ahmw papah ih, kowe me keieu anahne nantihong wia met. Ma ke koasoanehdi en tepida iang doadoahk en regular pioneer, kapwaiada dahme ke koasoanehdier. Ni ahnsou pahn dower powe, ke pahn ale kaiahn laud, oh ahmw peren pil pahn laudla.
Mour Ehu me Uhdahn Katapan
15. (a) Iaduwen kitail kin paiekihda atail koasoiong irail kan me kin papah Koht ahnsou werei oh wadek duwen arail ekspiriens kan? (b) Kihda ehu ekspiriens me ke diarada uhdahn kihda mehn kangoang laud.
15 Dahme ke kak kasik me pahn imwikihla ahmw kin mwohneki kupwuren Koht? Koasoiong irail akan me kin papah Siohwa ahnsou reirei, keieu irail akan me kin iang wia doadoahk en regular pioneer sounpar tohto. Ia uwen arail kin ahneki peren nan arail mour! (Lep. Pad. 10:22) Irail pahn padahkihong uhk me Siohwa kin ketin ahnsou koaros sewese irail en ahneki dahme re uhdahn anahne oh pil laudsang, oh e pil kin ketin sewese irail nan ahnsou apwal akan. (Pil. 4:11-13) Sang nan pahr 1955 lel 1961, The Watchtower kihda ekspiriens tohto en irail me lelepek kan nan artikel me oaralape mahsanih: “Mwohneki Ei Mehn Akadei nan Ei Mour.” Mwurin mwo, soangen ekspiriens epwiki kei pil sansalda. Ehuehu ekspiriens pwukat kin kasalehda irair en ngoang oh peren me kin katamankin kitail duwen irair pwukat me dierek nan pwuhken Wiewia kan. Ahmw wadek soangen ekspiriens mwahu kan pahn kamwakid uhk en nda, ‘Ih soangen mour wet me I men mourki!’
16. Dahme kak kahrehiong mour en Kristian men en katapan oh kaperen?
16 Aaron, me koasoipe kohda ni tepin artikel wet, koasoia: “Nan Aperika, I kin kalapw tuhwong me pwulopwul kan me kin kohkohseli nan wehio ni arail ki raparapahki arail mehn akadei nan mour. Pali laud sohte kak diarada. Ahpw kiht, se kin mwohneki kupwuren Koht sang ni at kin kalohki rongamwahu en Wehio, oh se kin paieki soangen mour me katapan oh direkihla wiewia kesempwal kan. Se kin pein kilang me kihwei kaperen sang ale.”—Wiewia 20:35.
17. Dahme kahrehda kitail anahne mwohneki kupwuren Koht ni ahnsouwet?
17 Iaduwen Kowe? Mehnia mehn akadei me ke kin mwohneki? Ma sohte mie ahmw mehn akadei kan me kak sewese iuk en mwohneki kupwuren Koht, wiewia teikan pahn mwadang kihsang ahmw ahnsou oh kehl. Ia katepen ahmw kin doadoahngki ahmw mour kesempwal ong soahng kan me koasoandi en Sehdan kin kesempwalki? Ni ahnsou keren, ahnsou me “kahn kamakam kowahlap” pahn wiawi, kepwe kan oh pwais kan nan sampah wet pahn sohte katepe. Atail nanpwungmwahu rehn Siohwa me pahn kesempwal. Ia uwen atail pahn kalahnganki atail kin papah Koht oh meteikan oh uhdahn mwohneki kupwuren Koht nan atail mour!—Mad. 24:21, NW; Kaud. 7:14, 15.
[Footnote]
a Sounkadehdehn Siohwa kan me wiahda.
Ke Kak Kawehwehda?
• Iaduwen Siohwa kin ketin kilangwohng atail papah ih?
• Iaduwen toupahrek kin sewese kitail en papah Koht oh meteikan?
• Soangen elen papah dah kan mie ong kitail?
• Iaduwen kitail kak mourki mour me uhdahn katapan ahnsouwet?
[Kawehwehpen kilel kan nan ehu ehu pali 11]
Kitail anahne toupahrek pwehn papah Siohwa ni mohngiong unsek
[Kawehwehpen kilel kan nan ehu ehu pali 12]
Mie ahl tohto en papah Koht