Me Pwulopwul kan—Ia Duwen Amwail Pahn Doadoahngki Amwail Mour?
EMEN serepein pwulopwul nda: “I men ahneki mour me keieu mwahu.” E sansal me ih me ke pil mwahuki. Ahpw ia duwen ahmw pahn kak ahneki mour me “keieu mwahu”? Kasdo kan, iengomw kan, de pil mwein ahmw sounpadahk kin nda me naineki mwohni laud oh ahneki doadoahk mwahu me kin kahrehda mour me keieu mwahu!
Ahpw Paipel kaweidki me pwulopwul kan me en nannanti kepwehpwehla kin wia “mehkot me sohte katepe.” (Eklesiasdes 4:4) Ehu kahrepe iei me pwulopwul malaulaute me kin kak kepwehpwehla de ndandla. Oh irail pwukat kin kalapw nsensuwedla. Emen me pwulopwul nan Britain me nannanti en alehdi doadoahk mwahu nda: “E duwehte kakon ehu me sohte audepe. Ni ahmw pahn kilanglong loale, sohte mehkot me mi loale.” Mehlel me ekei pak, doadoahk ehu kak kahrehiong uhk en kepwehpwehla de ndandla. Ahpw, e sohte kak kaitarala ahmw “anahn en esehla Koht.” (Madiu 5:3, NW) Likin met, 1 Sohn 2:17 kaweidki me “sampah wet . . . kin sosohrala.” Mehnda ma ke pweida nin sampah wet, e pahn ongete ahnsoukis.
Ihme kahrehda Eklesiasdes 12:1 kin kangoange me pwulopwul kan ni ahl wet: “Tamanda Sounwiepomw nindokon omw wie pwulopwulte.” Ei, ahl me keieu mwahu en doadoahngki ahmw mour iei en papah Siohwa Koht. Ahpw keieu, mie soahng kan me ke anahne kapwaiada pwe ken kak papah Koht. Ia duwen ahmw kak wia met? Oh dahme met kin pid?
Dahme Anahn Pwehn Wiahla Emen Sounkadehdehn Siohwa
Keieu ke anahne kakairada ahmw ineng en papah Koht oh met sohte kin pein wiawi mehnda ma ahmw pahpa oh nohno wia Kristian kei. Ke anahne pein kakairada ahmw nanpwungmwahu rehn Siohwa. Serepein pwulopwul men nda: “Kapakap kin sewese iuk en ahneki nanpwungmwahu rehn Siohwa.”—Melkahka 62:8; Seims 4:8.
Rom 12:2 kasalehda pil ehu kahk me ke anahne wia. E mahsanih: “Esehda dahme kupwuren Koht—dahme mwahu, oh dahme e kin ketin kupwurperenki, oh dahme unsek.” Mie pak me ke peikasalki soahng kan me ke sukuhlki? Eri, idawehn kaweid en Paipel wet oh kamehlelehiong uhk me mepwukat me mehlel! Wia pein ahmw onop en Paipel. Wadek Paipel oh sawaspen Paipel kan. Ahpw sukuhlki duwen Koht kaidehn ihte en loalokongkihla ire mehlel kan. Ke anahne kihong ahmw ahnsou pwehn medemedewe dahme ke wadek pwe en kak tengedihong nan ahmw mohngiong. Met pahn kahrehiong ahmw limpoak ong Koht en kekeirda.—Melkahka 1:2, 3.
Mwuri, song en ehukihong meteikan, duwehte iengomw tohnsukuhl kan dahme ke kin sukuhlki. Mwurin mwo, iang wia doadoahk en kalohk sang ihmw lel ihmw. Mwein ekei pak ke pahn tuhwong iengomw tohnsukuhl kan ni ahmw kalohk oh mwein ke kin salohda nin tapio. Ahpw Paipel kin kangoange kitail en ‘dehr namenengki atail kadekadehde atail Kaun-o.’ (2 Timoty 1:8) Ke kin wa mahsen en komour oh koapworopwor! Eri, dahme ke pahn namenengki?
Ma ahmw pahpa oh nohno wia Kristian kei, mwein ke kin iang ira kalohk. Ahpw ke kin kak wia laudsang ihte kesikesihnen de kihlahte makasihn kan de doaropwe kan? Ke kin kak wia padahk oh doadoahngki noumw Paipel pwehn kalohk ong tohnihmw kan? Ma soh, eri ale sawas sang rehn ahmw pahpa oh nohno de emen me koahiek en padahk nan mwomwohdiso. Wiahda ahmw mehn akadei en kak wiahla sounkalohki rongamwahu me saikinte papidais!
Ahnsou pahn leledo me ke pahn mwekidki en inoukihong Koht me ke pahn papah ih kohkohlahte. (Rom 12:1) Ahpw en wiahda inou kaidehn nanpwungen kowehte oh Koht. Koht kupwurki koaros en wiahda “kadehde mwahu en pwoson mwohn sounkadehde tohto.” (1 Timoty 6:12) Ni ahnsou me ke pahn papidaisla, ke kin kadehde ni lokaia duwen ahmw pwoson. Mwuri ke kin papidaisla nan pihl. (Madiu 28:19, 20) Mehlel me papidais wia kahk kesempwal ehu. Ahpw ke dehr pweiek pwehki ke pehm me ke pahn sohte kak kapwaiada ahmw inowo. Ma ke kin likih Koht, e pahn ketikihong uhk “manaman lapalap” pwe ken kak kesihnenda teng.—2 Korint 4:7; 1 Piter 5:10.
Ni ahnsou me ke papidaisla, ke wialahr emen Sounkadehdehn Siohwa. (Aiseia 43:10) Met pahn anahne kamwakid laud mwomwen ahmw pahn doadoahngki ahmw mour. Wiahda inou kin wehwehki me ke pahn ‘tounmeteikihla pein kowe.’ (Madiu 16:24) Mwein ke pahn anahne tounmeteikihla ekei ahmw ineng de mehn akadei kan oh “rapahki mahs Wehin Koht.” (Madiu 6:33) Eri inou oh papidais kin ritingada ahl tohto en wia met. Kitail pahn tehk ekei.
Ahl akan en Doadoahngki Pali Laud en Ahmw Ahnsou Pwehn Papah Koht
● Doadoahk en Pioneer iei ehu ahl. Pioneer men iei emen me papidaisla oh kin kasalehda mehn kahlemeng mwahu oh kin koasoanehdi en kalohki rongamwahwo awa 70 de laudsang met nan ehuehu sounpwong. En doadoahngki ahnsou laud nan kalohk pahn sewese iuk en koahiekla nan doadoahk en kalohk. Pioneer tohto kin perenki arail sewese tohnsukuhl kan en Paipel en papidaisla oh wiahla Sounkadehdehn Siohwa kei. Ia duwe, mie doadoahk ehu me mwahusang doadoahk kaperen wet?
Pioneer tohto kin wia kisin doadoahk kan pwehn apwalih arail anahn akan. Me tohto kin koasoanehdi pwehn esehla doadoahk ehu nan sukuhl de sang rehn arail pahpa oh nohno pwe ren kak apwalih irail. Ma kowe oh ahmw pahpa oh nohno medewe me e konehng ken ekis kalaudehla ahmw sukuhl mwurin highsukuhl, tehk kanahieng me kahrepen ahmw wia met kaidehn en wiahda mwohni laud ahpw pwehn sewese ahmw doadoahk en kalohk de mwein doadoahngki pali laud en ahmw ahnsou pwehn papah Koht.
Pioneer men kin keieu kesempwalki eh doadoahk en kalohk oh sewese meteikan en ale mour a kaidehn eh doadoahk en mwohni. Ke sou wiahki pioneer ahmw mehn akadei? Doadoahk en pioneer kin kalapw elehda pwais teikan. Karasepe, ekei pioneer kan kin keseula nan wasa kan me mie anahn laud ong sounkalohk kan en Wehio. Ekei kin sukuhlki ehu lokaia tohrohr oh papah nan mwomwohdiso de sahpw me doadoahngki lokaiao. Ei, pioneer kin wia elen mour me uhdahn mwahu!
● Sukuhl en Paipel ong Pwopwoud Kristian kan iei pil ehu ahl. Sukuhl wet kin kihong pwopwoud Kristian kan kaiahn tohrohr pwe ren kak kalaudehla arail doadoahk ong Siohwa oh sapwellime pwihn. Tohto irail me kesepwil sang sukuhl wet kin alehdi pwukoa en papah nan wasa kan me anahne sawas nan pein arail sahpw. Meteikan kin pekederla nan sahpw teikan ma arail irair mweidohng. Irail kan me kesepwil sang sukuhl wet ele pahn wia pioneer tohrohr kan erein ahnsoukis pwehn tapiada oh kalaudehla doadoahk en kalohk nan wasa doh kan.
● Sukuhl en Paipel ong Brother Kiripw kan wiawihda pwehn kasukuhlih elder kan oh sounsawas kan me kiripw. Kasukuhl laud kin wiawi erein wihkte waluh. Kasukuhl wet kin pid pwukoa kan en elder kan oh sounsawas kan, sapwellimen Siohwa pwihn oh pil wiepen padahk ong wehipokon. Mwurin sukuhlo, ekei kin papah nan sapwarail a ekei kin papah nan sahpw teikan.
● Doadoahk en Pedel (Bethel) iei en papah nan ohpis en Sounkadehdehn Siohwa kan. Ekei tohn Pedel kin wia doadoahk en wiahda sawaspen Paipel kan. Meteikan kin wia doadoahk kan me duwehte apwalih ihmw oh misihn kan de anahn en war en tohn Pedel kan. Pwukoa pwukat koaros kin wia pwais kesempwal kei en papah Siohwa. Patehng met, irail kan nan Pedel kin perenki ese me sohte lipilipil doadoahk dah me re wia, e kin wia kamwahupen riarail kan koaros nin sampah pwon.
Ekei pak riatail kan me ahneki koahiek tohrohr kin ale luhk en papah nan Pedel. Ahpw, pali laud en irail kin ale kasukuhl mwurin arail lel Pedel. Irail kan nan Pedel sohte kin doadoahk pwehn ale dipwisou tohto ahpw re kin itarki sawas kan en mwenge, wasahn kousoan oh kisin sent ong pein arail anahn akan. Emen me pwulopwul nan Pedel koasoia duwen eh doadoahk nin duwen met: “E uhdahn kaselel! E sohte mengei en idawehn koasoandi kan ahpw I alehdi kapai tohto ni ei papah wasaht.”
● Doadoahk en kakau ihmw nan sahpw teikan (international service) kin kahrehiong emen en iang kauwada ohpis en Sounkadehdehn Siohwa kan oh arail Wasahn Kaudok kan. Irail me kin iang wia doadoahk wet kin seiloakla nan sahpw teikan pwehn sewese doadoahk wet. Met kin wia doadoahk kesempwal en papah duwehte doadoahk me irail kan wia ni arail kauwada tehnpas en Solomon. (1 Nanmwarki 8:13-18) Koasoandi ong epwelpen irail pwukat kin duwehte koasoandi ong irail tohn Pedel kan. Ia uwen eh wia kapai ehu ong irail pwukat ni arail kin papah nan doadoahk wet pwehn kapinga Siohwa!
Papah Siohwa Sang ni Mour Unsek
Papah Siohwa iei ahl me keieu mwahu en doadoahngki ahmw mour. Ke sou wiahda mehn akadei en doadoahngki pali laud en ahmw ahnsou pwehn papah Koht? Koasoiong ahmw pahpa oh nohno, elder kan oh sounapwalih me kin seiloak duwen met. Ma ke men papah nan Pedel de ke men iang Sukuhl en Paipel ong Brother Kiripw kan de Sukuhl en Paipel ong Pwopwoud Kristian kan, eri, iang mihting kan ong irail me men iang doadoahk pwukat me kin wiawi ni kapokon kan de mihting tohrohr kan.
Ahpw kaidehn koaros kak ale pwais pwukat. Ekei pak, kahpwal en roson, mwohni, oh pwukoahn peneinei kin katikala dahme emen kak wia. Mendahki met, Kristian inouda kan koaros anahne kapwaiada kehkehlik en Paipel wet: “Ke pahn poakohng Kaun-o omw Koht sang nan kapehdomw unsek, sang ni [“omw mour unsek,” NW], sang ni omw lamalam koaros unsek.” (Madiu 22:37) Siohwa kupwurki ken wia uwen ahmw kak koaros. Eri sohte lipilipil ia ahmw irair, papah Siohwa en wia mehkot me keieu kesempwal nan ahmw mour. Wiahda mehn akadei kan me ke kak lel pwehn papah Koht. Ei, “tamanda Sounwiepomw nindokon omw wie pwulopwulte” oh ke pahn ale kapai kohkohlahte!
Ma sohte kasansalda, iren Paipel koaros kohsang nan Pwuhk Sarawi ni Mahsen en Pohnpei. Ma NW kin pwarada, iren Paipelo kohsang nan New World Translation of the Holy Scriptures en lokaiahn wai.