E Sapwung en Peidengki Sapwellimen Koht Wiewia kan?
EKEI kin nda me e sapwung en peidengki sapwellimen Koht wiewia kan. Ele re kin medewe me e sohte kasalehda wahu en kalelapak rehn Koht dahme kahrehda e kin ketin mweidohng de sohte mweidohng soahng kan en wiawi. Ih omw madamadau en met?
Ma ei, ele ke pahn pwuriamweikihla me aramas mwahu tohto kin peidengki sapwellimen Koht wiewia kan. Tehk soangen peidek pwukat me re kalelapak rehn Koht:
Ohl lelepek Sohp: “Dahme Koht kin ketin mweidikihong aramas suwed kan en momour, mweidohng irail en mour werei oh paiamwahu?”—Sohp 21:7.
Soukohp loalopwoat Apakuk: “Eri, ia duwen omwi kak kanengamahiong aramas loallap suwed pwukat? . . . Dahme komwi ketin nennenkihlahte nindokon ar komwkomwomwala aramas pwukat me uhdahn pwung sang irail?”—Apakuk 1:13.
Sises Krais: “Ei Koht, Ei Koht, dahme komw likidmeliekiniehla?”—Madiu 27:46.
Ma ke pahn wadek ire kan mwowe de mwurin iren Paipel pwukat, ke pahn kilang me e sohte kasalehda me Siohwa Koht ketin engiengda ni ahnsou me re kalelapak reh peidek pwukat. Sapwellime kanengamah sohte kapwuriamwei. Karasepe, Koht sohte kin ketin nsensuwedla ni atail kin peki reh en ketin kaitarala atail anahn kan en paliwar me kin kahrehda paliwaratail en kehlail. E kin ketin kupwurperenki ketikihong kitail dahme kitail anahne. (Madiu 6:11, 33) Pil duwehte, e ketin kupwurperenki ketikihong kitail kaweid me kak kahrehda kitail en ahneki madamadau oh pepehm mwahu. (Pilipai 4:6, 7) Ni mehlel, Sises mahsanihong sapwellime tohnpadahk ko: “Kumwail peki, kumwail ahpw pahn ale.” (Madiu 7:7) Audepen sapwellimen Sises inou wet kasalehda me e kin mahmahsanih duwen atail en alehdi kaidehn ihte dipwisou kan ahpw pil pasapengpen peidek kesempwal kan.
Ma ke kak kalelapak rehn Koht, mehnia peidek nanpwungen peidek pwukat me ke men kalelapak?
● Ia kahrepen ahi mour?
● Dahme pahn wiawihong ie ahnsou me I mehla?
● Dahme kahrehda komw ketin mweidohng I en lokolok?
Pwehki “audepen Pwuhk Sarawi unsek pwilisang rehn Koht,” ke pahn diarada pasapeng kan me Koht ketikihda nan sapwellime Mahsen, Paipel. (2 Timoty 3:16) Tehk dahme kahrehda ekei idek peidek pwukat oh pasapeng kan me Paipel kihda.