Perenki Koht En Komourpatail

“I pahn pereperen oh nsenamwahu pwehki Siohwa; I pahn pereperen pwehki Koht iei ei sounkomour.”​—APAKUK 3:18.

1. Mwohn Papilon pwupwudi nan pahr 539 B.C.E., dahme Daniel kilangada nan kasansal ehu?

SOUNPAHR eisek samwa mwohn Papilon a ohla nan pahr 539 B.C.E., soukohp Daniel, me likeilapalahr, kilangehr kasansal kapwuriamwei ehu. E kohpadahr duwen wiewiahn sampah kan lao lel kaimwiseklahn mahwen nanpwungen imwintihti kan en Siohwa oh sapwellimen Koht Nanmwarki me Koht idiadahr, Sises Krais. Iaduwen Daniel mwekidki kasansal wet? E koasoia: “I inenen pwangada oh . . . I pwuriamweikihla kaudiahlo.”​—Daniel 8:27, New World Translation.

2. Mehnia mahwen me Daniel kilangada nan kasansalo, oh ia ahmw pepehm duwen kerendohn mahwen wet?

² Iaduwen kitail? Kitail mih ni imwin ahnsowo! Iaduwen kitail kin mwekidki ni ahnsou me kitail pohnese me mahwen me wiawi nan kasansal en Daniel​—sapwellimen Koht mahwen en Armakedon—​me inenen kerendohr? Iaduwen kitail kin mwekidki ni ahnsou me kitail kin dehdehkihla me suwed akan me kin sansalda nan kokohp en Apakuk inenen reklahr, ihme kahrehda, kamakamalahn imwintihti kan en Koht uhdahn pahn wiawi? Atail pepehm akan kin duwehte en Apakuk, me kileledi nan irelaud siluh nan nah pwuhk en kokohp.

Apakuk Kapakapki Sapwellimen Koht Mahk Kalahngan

3. Ihs me Apakuk kapakapki, oh iaduwen eh mahsan kan kak doake mouratail?

³ Audepen pwuhken Apakuk irelaud 3 iei kapakap ehu. Nin duwen Hab 3 iretikitik 1 kawehwehda, kapakap wet kin wiawi ni mwomwen koul kedepwidepw kan. Kapakap en soukohpo kin wiawi ni mwomwen me kapakap wet ong pein ih. Ahpw, Apakuk kin kapakapki sapwellimen Koht wehi pilipilo. Rahnwet, eh kapakap kin wia katep laud ong sapwellimen Koht aramas akan me kin iang doadoahk en kalohki Wehio. Ni atail pahn kolokolete madamadau wet oh wadek pwuhken Apakuk irelaud 3, mahsen pwukat pahn kahrehong kitail en kasikasik oh dirkihla peren. Kapakap en Apakuk, de koul kedepwidepw kan, kin kihong kitail kahrepe kehlail ehu en perenkihda Siohwa me iei Koht en komourpatail kan.

4. Dahme kahrehda Apakuk masepwehkada, oh ni ahl dahieu kitail kak likih me Koht pahn doadoahngki sapwellime manaman?

⁴ Nin duwen me kitail wadeker nan artikel riau en mwowe, irair akan nan sapwen Suda ni mwehin Apakuk me inenen suwed. Ahpw Koht sohte pahn mweidong irair wet en pousehla wiawi. Siohwa pahn mwekidki oh kapwungala irairo, duwehte me e wia mahso. Ihme kahrehda soukohpo weriwerki: “Maing Kaun, I patohwan rongehr duwen wiepen nin limomwi kan, oh e audehkiniehda lemmw kowahlap”! Ia wehwehn met? ‘Rongehr duwen wiepen nin limomwi kan’ kin pid poadoapoad me ntingdiehr duwen sapwellimen Koht wiewia kapwuriamwei kan, duwehte dahme wiawi nan Sehd Weitahta, nan sapwtehn, oh nan kahnimw en Seriko. Apakuk uhdahn esehla duwen wiewia pwukat, oh wiewia pwukat kin kamasepwehki ih pwehki e wehwehki me Siohwa pahn pwurehng doadoahngki sapwellime manaman kehlail ong eh imwintihti kan. Ni ahnsou me kitail kin kilang wiewia suwed akan en aramas nan rahnpwukat, kitail pil ese me Siohwa pahn mwekidki oh kapwungala irairo duwehte me e wia mahso. Met kin kahrehong kitail en masepwehkada? Uhdahn! Ihme kahrehda kitail kin wie kapakap duwehte me Apakuk wia: “Eri, komwi ketin pwurehng wiahda nan at ahnsou manaman lapalap akan me komwi ketin wiadahr mahs. Komw ketin kupwurkalahngan, nan pil sapwellimomwi engieng.” (Apakuk 3:2) Nan sapwellimen Koht ahnsou, “nan eilep en pahr akan,” e pahn kak doadoahngki sapwellime manaman. Oh ni ahnsowo, e pahn kak tamanda en kasalehda mahk ong irail akan me kin poakohng ih!

Siohwa Ketin Wonowong nan Mahwen!

5. Iaduwen ‘Koht ketin sapasapahldohsang Teman,’ oh ia wehwehn met ong Armakedon?

⁵ Dahme pahn wiawi ni ahnsou Siohwa pahn karonge atail kin kapakapki mahk kalahngan? Kitail diarada pasepeng nan pwuhken Apakuk 3:3, 4. Keieu, soukohpo koasoia met: “Koht ketin sapasapahldohsang Edom; Koht me sarawio ketiket kohdo sang pohn dohl akan en Paran.” Ni mwehin soukohp Moses, Teman oh Paran mih nan ahl me mehn Israel akan pahn keid loale kohla nan sapwtehn kohkohlahng Kenen. Ni ahnsou me wehi laud en mehn Israel akan tepida sapasapahl kohkohwei, pein Siohwa kin ketin mwomwen ieiang irail, oh sohte mehkot me pahn kak kauhdi ih. Mwohnte Moses mehla, e koasoia met: “Siohwa​—ketido sang pohn Nahna Sainai; e ketin pwarada rasehng ketipin pohn Edom; oh dakerada sapwellime aramas akan sang pohn Nahna Paran. E ketiket kohdahdo nanpwungen karis en tohnleng, nin lime palimaun e ketiki mpwulen kisiniei.” (Deuderonomi 33:2) Ni ahnsou me Siohwa pahn tepida mahweniong eh imwintihti kan nan Armakedon, sapwellime manaman pahn sansalda duwehte me e wia mahso.

6. Likin sapwellimen Koht lingan, dahme Kristian akan me kin dehdehkihla kilang?

⁶ Apakuk pil koasoia met: “Sapwellimen [Siohwa] lingan kin kipehdi pahnlahng, oh kapingpe pil kin kadirehla sampah pokon. E kin ketiket kohdo, rasehng lingaling en lioal; marain kin piripirsang nin lime kan.” Ia uwen kaselel! Ni mehlel, aramas akan sohte kak kilang Siohwa Koht oh mour. (Eksodus 33:20) Ahpw ong irail sapwellimen Koht sounpapah lelepek kan, ni karasaras, masarail ko en nan mohngiongirail kin pwuriamweikihla ni ahr kin doudouloale duwen sapwellime lingan. (Episos 1:18) Oh Kristian akan me kin dehdehkihla mwahu pil kin kilang mehkot likin sapwellimen Siohwa lingan. Kaimwiseklahn koasoia wet, Apakuk 3:4 mahsanih: “E kin ketiket kohdo, oh marain kin piripirsang nin lime, wasa me sapwellime roson oh manaman kin rirsang aramas.” Ei, kitail kin kilang me Siohwa kin kaunopada en kapwaiada sapwellime kupwur, ni ah pahn ketin doadoahngki kehl oh manaman me kohsang lime pali maun.

7. Ia wehwehn Sapwellimen Koht sapasapahldo en kana ong irail aramas akan me kin uhwong ih?

⁷ Sapwellimen Koht wonowong nan mahwen kana kin wehwehki mehkot suwed pahn kohwong irail aramas akan me kin uhwong ih. Apakuk 3:5 mahsanih: “E kin ketin kadarodo mwowe soumwahu lusulus, oh ketin ruwese mehla en idawehndo.” Ni ahnsou me mehn Israel kan karanih irepen Sapwen Inou nan pahr 1473 B.C.E., tohtohn irail kin uhwongada, iang wia dipen nenek oh pwongih dikedik en eni kan. Imwilahn met, aramas 20,000 samwa mehkihla soumwahu ehu me Koht kadarodo. (Nempe kan 25:1-9) Ni ahnsou keren, ni ahnsou me Siohwa pahn sapasapahldohng “Rahn Lapalap en Koht, Wasa Lapalahpie,” irail akan me kin uhwong ih pahn pil lelohng kalokolok kan pwehki diparail kan. Ekei mwein pil pahn mehkihla soumwahu kan.​—Kaudiahl 16:14, 16.

8. Nin duwen pwuhken Apakuk 3:6 mahsanih, dahme pahn wiawiong irail imwintihti kan en Koht?

⁸ Rong duwen dahme soukohpo kawehwehda duwen dahme Siohwa en sounkaris kan pahn wia. Nan Apakuk 3:6, kitail wadek: “Ni [Siohwa] kin ketin uhdi, sampah kin itikekda, oh sampah kin rerrerki ni eh kin ketin kommoalehdi. Nahna poatopoat kan rengkdier; dohl en kawa ko karakarahkala; dohl kan me e kin ketin keid pohn keilahn aio.” Keieu, Siohwa ‘ketin uhdi,’ duwehte kaun en sounpei men me kin uhdi oh tehk wasahn mahwen kan. Eh imwintihti kan rerrerki, masepwehkada. Re kilangada ihs me irail pahn mahweniong oh masepwehkada. Sises kohpadahr duwen ahnsou me “kadaudok kan koaros en sampah pahn sengiseng.” (Madiu 24:30) Ahpw irail pahn pwandala en wehwehki me sohte mehmen me pahn kak pelianda Siohwa. Pwihn en aramas akan​—pil irail akan me mwomwen kehlail duwehte “nahna poatopoat kan” oh “dohl en kawa ko”—​rengkdier. E pahn duwehte en Koht “keid pohn keilahn aio,” duwehte me e ketin wiahla mahso.

9, 10. Pwuhken Apakuk 3:7-11 kin katamankinkitail duwen dah?

⁹ Sapwellimen Siohwa “engieng kowahlap” lalaudla ong eh imwintihti kan. Ahpw mehnia dipwisoun mahwen kan me e pahn ketin doadoahngki nan mahwen lapalap wet? Rong duwen dahme soukohpo kawehwehda duwen dahme pahn wiaiong irailla: “Komw ketin onopadahr en doadoahngki sapwellimomwi ketieu, onopadahr en kadar sapwellimomwi lioal pwalangpeseng sampah. Ni nahna kan ar kilangkomwihda, re rerrer; pihl pwilipwildihdo sang pahnlahng. Kepin madau kan ngiringirisek, oh iloak kan lalaudlahr. Ketipin oh maram uhdi nan deura, pwehki lingan sapwellimomwi arep me piripirseli, oh pwehki lingen sapwellimomwi ketieu lingaling.”​—Apakuk 3:7-11.

¹⁰ Ni mwehin Sosua, Siohwa kahrehong ketipin oh maram en uhdi, met kin kasansalehda manaman kehlail ehu. (Sosua 10:12-14) Kokohp en Apakuk katamankin kitail duwen manamanohte me Siohwa pahn pwurehng doadoahngki nan Armakedon. Nan pahr 1513 B.C.E., Siohwa kasansalehda sapwellime manaman ni ahnsou me e doadoahngki Sehd Weitahta en kasohrehla sounkaris kan en Parao. Sounpar paheisek mwurin met wiawi, pillap Sordan lapakehda, ahpw met sohte wia mehkot apwal ong mehn Israel akan me sapasapahldohng Sapwen Inouwo. (Sosua 3:15-17) Ni mwehin soukohp lih Depora, ahd kehlail ehu me kapeila nein imwintihti kan en mehn Israel, Sisera, wararail weren nansapw en mahwen kan. (Sounkopwung kan 5:21) Nan Armakedon, Siohwa pil kak doadoahngki sapwellime kehl en wiahda lapake wet, oh ahd kehlail wet. Nansapwe oh lioal kan nin lime, kin rasehng ketieu de doupen arep kan.

11. Dahme pahn wiawi ni ahnsou me Siohwa pahn kasalehda sapwellime manaman?

¹¹ Ni mehlel, e pahn wia mehkot inenen kapwuriamwei mehlel ni ahnsou me Siohwa pahn kasalehda sapwellime manaman. Mahsen kan en Apakuk kin kasalehda me pwong pahn wiahla rahn oh rahn pahn marainsang ketipin. E sohte lipilipil ma kokohp wet me pid Armakedon pahn pweida ni uhdahn de ni karasaras, ahpw uhdahn kitail ese me Siohwa pahn kana oh e sohte pahn mweidong imwintihti men en pitila.

Komour ong Sapwellimen Koht Aramas akan!

12. Dahme Koht pahn wiaiong eh imwintihti kan, ahpw ihs me pahn pitsang?

¹² Soukohpo kin pousehla kawehwehda duwen sapwellimen Siohwa wiewia kan ni eh kasorehla eh imwintihti kan. Nan Apakuk 3:12, kitail wadek: “Nan sapwellimomwi engieng komw ketin kotehwei pohn sampah; nan sapwellimomwi engieng komw ketin tiakedi wehi kan.” Ahpw, Siohwa pahn pilada ihs me e pahn kasorehla. Ekei aramas pahn pitila. Apakuk 3:13 mahsanih, “Komw ketieila pwe komwi en ketin doarehla sapwellimomwi aramas akan.” Ei, Siohwa pahn ketin doarehla sapwellime aramas lelepek pilipilda kan. Kasoralahn Papilon Lapalap, minimin en kaudok likamw koaros nin sampah, pahn pweida ni unsek. Rahnwet, irail wehi akan kin nantihong kasorehla kaudok min. Ni ahnsou keren, sapwellimen Siohwa sounpapah kan pahn ale kalokolok sang rehn pwihn kan en Kok en Makok. (Esekiel 38:1–39:13; Kaudiahl 17:1-5, 16-18) Kalokolok me kohsang rehn Sehdan pahn pweida? Soh! Siohwa pahn engiengada pahn eh imwintihti kan, tiakedi irail duwehte emen kin tiakedi wahn wihd. Ahpw e pahn ketin doarehla aramas akan me kin kaudokiong ih ki ngehn oh mehlel.​—Sohn 4:24.

13. Iaduwen Apakuk 3:13 pahn pweida?

¹³ Eri met kokohp en kamakamalahn aramas suwed akan: “Komw [Siohwa] ketin kalowedier kaun menet me kohsang ihmwen me suwedo. poahsono me kamwomwala douluhl.” (Apakuk 3:13, NW) “Ihmw” wet kin karasaiong koasoandi suwedo me wiawihda pahn kaunda en Sehdan me Tepil. E pahn kamwomwala. “Kaun” menet, me wehwehki kaun akan me kin uhwong Koht, pahn pil kamwomwala. Koasoandio pwon pahn kamwomwala lel pil poahsoano. E sohlahr pahn mie. Ia uwen nsenamwahu mehlel!

14-16. Nin duwen pwuhken Apakuk 3:14, 15, dahme pahn wiaiong sapwellimen Siohwa aramas akan oh ahr imwintihti kan?

¹⁴ Nan Armakedon, irail akan me pahn song en kasorehla sapwellimen Siohwa “me keidio” pahn pingada. Nin duwen pwuhken Apakuk 3:14, 15, soukohpo koasoiong Koht: “Ki pein ah arep kan komwi me doakoahki nah karis kan ni ar kohkodohn pwakih ie, rasehng melimel kalaimwun ehu, oh pohnmwahso, duwehte irail kan me kin kahpwalihala me semwehmwe kan ni rir. Sapwellimomwi oahs akan tangatangseli pohn sehd, eri, iloak laud akan pwudopwudkihda.”

¹⁵ Ni ahnsou me Apakuk koasoia duwen “karis kan . . . ni ar kohkodohn pwakih ie,” soukohpo kin koasoiahki sapwellimen Siohwa me keidi kan. Duwehte aramas loallap suwed kan me kin awiawih aramas me re pahn pirapasang, wehi kan pil pahn awiawih oh sapwellimen Siohwa tohnkaudok akan oh song en kasohrehla irail. Irail imwintihti en Koht oh sapwellime aramas akan pahn “pohnmwahsohki” ar kin lemeleme me re pahn pweida. Kristian lelepek kan pahn mwomwen luwet, duwehte “me semwehmwe kan ni rir.” Ahpw, ni ahnsou me pwihn me kin uhwong Koht pahn tepida uhwongada Kristian lelepek pwukat, Siohwa pahn kahrehong pein neirail dipwisoun mahwen kan en kemehla irail. Irail pahn doadoahngki pein neirail dipwisoun mahwen kan, de “arep kan,” ong pein neirail sounpei kan.

¹⁶ Ahpw, pil mie mehkan me tohto me pahn pil pweida. Siohwa pahn doadoahngki ngehn kehlail kan en kasohrala eh imwintihti kan. Ki sapwellime “oahs akan” en karis nanleng pahnangin Sises Krais, e pahn wonoweite kankana tangatangseli pohn “sehd” oh “iloak laud akan,” me rasehng aramas akan me kin wiahla imwintihti kan en Koht. (Kaudiahl 19:11-21) Eri, me suwed akan pahn kohsang sampah. Met kin wia kasansaldahn wiewia kehlail ehu en sapwellimen Koht manaman oh kopwungpwung!

Rahnen Siohwa Kohkohdo!

17. (a) Dahme kahrehda kitail kak likih me kokohp en Apakuk pahn pweida? (b) Iaduwen kitail kak kahlemengih Apakuk ni atail kin awihawih rahn lapalap en Siohwa?

¹⁷ Kitail kak likih me kokohp en Apakuk pahn ni ahnsou keren pweida. E sohte pahn pwand. Iaduwen ke kin mwekidki omw kin esehla kokohpwet? Tamanda ni ahnsou me Apakuk ntingihdi kokohp wet, Koht kin padahkihong ih dahme e pahn ntingihdi. Eri, Siohwa pahn kapwaiada dahme e kupwurki, oh ni ahnsowo pahn mie pingaping laud ehu nin sampah wet. Ih kahrepe soukohpo ntinghidi met: “Ni ei kin rongada mepwukat, I kin rerada, kilin ewei kat kin wie rerrerki ei masepwehk. Paliwereiet kin mwoatoredi, oh nehi kat pil dipekelekel. A I pahn meleilei oh kasikasik ahnsou me Koht pahn ketin kaloke irail kan me kin mahweniong kiht.” (Apakuk 3:16) Apakuk inenen masepwehk​—ahpw, ki kahrepe mwahu ehu. Ahpw, eh pwoson luwetala? Uhdahn soh! E perenki awiawih ni meleilei rahn lapalap en Siohwa. (2 Piter 3:11, 12) Kitail soh kin ahneki soahngen madamadau duwehte ih? Uhdahn! Kitail kin ahneki pwoson kehlail me kokohp en Apakuk pahn pweida. Ahpw lao lel e pahn pweida, kitail pahn ni meleilei, awiawihte.

18. Mendahki Apakuk ese me e pahn lelong kahpwal akan, ia ah madamadau ong met?

¹⁸ Mahwen kan kin ahnsou koaros wiahda kahpwal ong aramas akan, pil ong irail akan kin kana. Duhpek mwein kak wiawi. Aramas akan mwein sohlahr pahn sapweniki sapwarail kan. Koasoandi en mour pahn kohdi. Ma met pahn wiaiong kitail, iaduwen kitail pahn mwekidki met? Apakuk wia mehn kahlemeng mwahu, pwe e koasoia met: “Mehnda ma tuhke pik kan sohte pahn wa, oh sohte wahn wain me pwarada nan mwetin wain kan; mehnda ma tuhke olip kan sohte pahn wa, oh sohte wahnsahpw nan mohs akan; mehnda ma sihpw koaros pahn mehla, oh wasahn kamwenge kou pahn tehnla; ahpw I pahn pereperen oh nsenamwahu, pwehki Kauno Koht, iei ei sounkomour.” (Apakuk 3:17, 18) Apakuk kin wehwehki me e pahn lelohng kahpwal akan, mwein pil lelohng duhpek. Ahpw, e sohte kesehla eh perenki Siohwa, iei ih me komourala Apakuk.

19. Kahpwal dah kan Kristian tohto kin lelong, ahpw dahme kitail kak likih ma kitail pahn mwohniki Siohwa nan atail mour?

¹⁹ Rahnwet, mwohn Siohwa pahn mahweniong aramas suwed akan, tohto aramas akan pahn lelohng kahpwal laud akan. Sises kohpadahr me mahwen kan, lehk lapalap, rerrer en sahpw akan, soumwahu lusulus laud pahn wiahla kisehn ‘kilel me pahn kasalehda ahnsoun eh ketier’ oh alehier manaman. (Madiu 24:3-14; Luk 21:10, 11) Tohto iengatail pwoson akan kin kousoan nan sahpw akan me kin lelohng kahpwal laud akan nin duwen pweidahn kokohp en Sises kasalehda, oh re kin lelohng kalokolok laud pwehki met. Kristian teikan mwein pahn pil lelohng soangen kahpwal pwukat ni ahnsou kohkohdo. Ahpw, ong tohto rehtail ele mwein ‘tuhke pik sohte pahn wa’ mwohn imwio. Ahpw, pwehki kitail wehwehki ia kahrepe soahng pwukat kin wiwiawi, met kin kakehle kitail. Oh pil, kitail kin ale sawas. Sises inoukihda: “Eri, kumwail rapahki mahs Wehin Koht oh dahme e kin ketin kupwurki, a soahng teikan koaros e ahpw pahn kin ketikihong kumwail.” (Madiu 6:33) Met sohte kin wehwehki me kitail pahn sohte lelohng kahpwal kan, ahpw e kin kamehlelehong kitail, ma kitail pahn mwohniki Siohwa nan atail mour, e pahn ketin apwaliala kitail.​—Melkahka 37:25.

20. Edetehn kitail kin lelohng kahpwal akan ong ni ahnsou wet, dahme kitail en nantihong wia?

²⁰ Edetehn kitail kin lelohng kahpwal akan me pahn wiawi ni ahnsou wet te, kitail sohte pahn kesela atail pwoson sapwellimen Siohwa kehl en kamour kitailla. Riatail brother oh sister tohto nan sapwen Aprika, Eastern Iurop, oh wasa teikan kin lelong kahpwal me inenen laud, ahpw re kin ‘pereperenki Siohwa.’ Kitail en duwehte irail, en dehr uhdi. Tamanda me Kaun Siohwa iei Utupen “kakehlailkitailla.” (Apakuk 3:19) E pahn uhdahn kapwaiada met. Armakedon pahn uhdahn wiawi, oh sapwellimen Koht inou ong sampah kapw pahn uhdahn pweida. (2 Piter 3:13) Oh “sampah pahn direkihla marain lingaling en Kauno [“Siohwa,” NW], rasehng madau eh kin direkihla pihl.” (Apakuk 2:14) Lao lel ni ahnsou kapereno, kitail en kahlemengih Apakuk. Kitail en ahnsou koaros ‘perenki Koht en komourpatail.’

Ke Tamanda?

• Iaduwen kapakap en Apakuk pahn kak kamwekid kitail?

• Dahme kahrehda Siohwa pahn ketin wonowong nan mahwen?

• Dahme kokohp en Apakuk mahsanih duwen komour?

• Lamalam dahieu kitail anahne ahneki ni atail pahn kin awiawih rahn lapalap en Siohwa?

[Kilel nan pali 19]

Soangen manaman dah me Koht pahn doadoahngki ong aramas suwed akan nan Armakedon?