Alasang Soukohp akan—Apakuk
1. Dahme kahrehda kitail kak wehwehki dahme lelohng soukohp Apakuk?
1 Ni atail kin kilang suwed eh paraparala me kapilkitailpene nin sampah, ele kitail pahn ahneki pepehm me duwehte ahn Apakuk, me keinemwe rehn Siohwa: “Dahme komw ketin mweidkihong ie I en patopatohwan soangen sapwung oh suwed pwukat? Ia duwen omwi kak ketin kanengamahiong mahmahsanih soangen wiewia suwed wet?” (Apak. 1:3; 2 Tim. 3:1, 13) Doudouloale rohng me Apakuk kihda oh eh mehn kahlemeng en lelepek kak sewese kitail en dadaur ni atail awiawih sapwellimen Siohwa rahn en kadeik.—2 Pit. 3:7.
2. Ia duwen atail kak kasalehda me kitail kin momourki pwoson rahnpwukat?
2 Momourki Pwoson: Sang ni eh sohte mweidohng irair suwed me kapilpene en powehdi, Apakuk kin mwasamwasahn oh pwerisekiong eh papah Siohwa. (Apak. 2:1) Siohwa ketin kamehlelehiong soukohpo me Sapwellime mahsen pahn uhdahn pweida ni ahnsowo me e ketin kilelehiong oh “me pwung kan pahn momourte pwehki ar loalopwoatohng Koht.” (Apak. 2:2-4) Ia wehwehn met ong Kristian akan me momour ni imwilahn rahn en imwi wet? Me kesempwalsang en ese iahd me imwio pahn leledo iei en kamehlele me e uhdahn pahn wiawi. Pwoson kin kamwakid kitail en kin mwasamwasahn oh mwohneki doadoahk en kalohk.—Ipru 10:38, 39.
3. Dahme kahrehda kitail en kolokolete atail peren en papah Siohwa?
3 Pereperen Pwehki Siohwa: Ni ahnsou me Kok en Makok pahn mahweniong sapwellimen Siohwa aramas akan, atail pwoson pahn lelohng songosong. (Esek. 38:2, 10-12) Uhwong kin wahdo kahpwal, pil ong irail me kana. Ele mwenge sohla pahn itar, kitail kakete sohla ahneki kepwe, oh semwehmwehla. Ia mwomwatail ni ahnsou me kahpwal kan pahn pwarada? Apakuk ese me pahn mie kahpwal kan, eri e koasoanehdi en kolokolte eh peren nan eh papah Siohwa. (Apak. 3:16-19) “Peren me KAUN-O pahn ketikihong” kitail pahn sewese kitail en dadaurete pahn kahpwal kan me pahn pwarada.—Neh. 8:10; Ipru 12:2.
4. Soangen peren dah me kitail kak ahneki ahnsou wet oh ni ahnsou kohkohdo?
4 Irail kan me Siohwa ketin doarehla nan sapwellime rahn en kadeik pahn pousehlahte ar sukuhlki duwen sapwellimen Koht elen mour. (Apak. 2:14) Irail akan me iasada pil pahn sukuhlki duwen Siohwa. Pil ahnsou wet, kitail en isaneki ahnsou mwahu koaros en koasoia duwen Siohwa oh sapwellime wiewia kaselel kan!—Mel. 34:1; 71:17.