Siohwa Sohte Pahn Pwand

“Mehnda ma [kasansalo] pahn pwand, ahpw awiawihete; pwe e pahn pweida ni ahnsawi; oh e sohte pahn pwand.”​—APAKUK 2:3.

1. Soangen ngoang dahieu me sapwellimen Siohwa aramas akan kin kasansalehda, oh met kin kamwekid irail en wia dah?

“I PAHN douda nan ei imwen iroir, oh awiawih.” Sapwellimen Koht soukohp Apakuk, ki lamalam teng, wia met. (Apakuk 2:1) Sapwellimen Siohwa aramas akan nan senturi 20 pil kin kasansalehda lamalamohte. Ihme kahrehda, re kin ngoangki mwekidki pakair wet me kohda nan kapokon kesempwal ehu nan September 1922: “Rahnwet kin wia rahn kesempwal ieu. Kilang, Nanmwarkio kaundahier! Kumwail kin wia sapwellime sounkalohk kan. Ihme kahrehda, kumwail en kalohki, kalohki, kalohki duwen Nanmwarkio oh sapwellime wehi.”

2. Ni en irail Kristian me keidi kan pwurehng kehlailda mwurin Mahwen Keieu en Sampah, dahme re kin kalohki?

² Mwurin Mahwen Keieu en Sampah, Siohwa kakehlailda luwen me keidi lelepek kan. Duwehte Apakuk, emenemen irail kak koasoia: “I pahn douda nan ei imwen iroir oh I pahn pepehd awiawih dahme Kauno pahn mahsanihong ie pwe I en patohwanda oh dahme e pahn ketin sapengki ei kaulim kat.” Lepin lokaia “pepehd” oh “sinsile” ni lokaiahn Ipru kin kalap mih nan kokohp tohto.

“E Sohte Pahn Pwand”

3. Dahme kahrehda kitail anahne pepehd?

³ Ni ahnsou me Sounkadehdehn Siohwa kan kin kalohki sapwellimen Koht kaweid, re anahne en kapwaiada mahsen en kokohp en Sises: “Kumwail mwasamwasahn oh pepehd, pwe kumwail sehse ahnsawi. E pahn rasehng aramas emen me kin wia seiloak reirei ehu me kihdi ong eh ladu ko ni imwe pwe re en apwahpwalih oh kihong irail koaros doadoahk; e ahpw ndaiong silepen wenihmwo en sinsile mwahu oh mwasamwasahn. Eri, kumwail mwasamwasahn pwe kumwail sehse iahd me soumas en ihmwo pahn pwurodo​—ma nin soutik, de nin lukepen pwong, de nin sohrahn, de nimenseng. Ma e mwadangete pwurodo, e pahn diarada amwail memeir. Eri, dahme I ndaiong kumwail, I pil ndaiong aramas koaros: kumwail pepehd oh mwasamwasahn!” (Mark 13:35-37) Kitail anahne pepehd, duwehte me Apakuk kin wia, oh kapwaiada mahsen en Sises!

4. Iaduwen irair me kitail kin mih pah, kin rasehng ni ahnsoun Apakuk mpen pahr 628 B.C.E.?

⁴ Apakuk kanekehla nah pwuhk mpen pahr 628 B.C.E., mwohn Papilon wiahla wehi kehlail ehu me kaunda sampah pwon. Erein sounpar tohto sapwellimen Siohwa kadeik ong Serusalem me kin lahlahwe pwoson mehlel kin lohkseli. Ahpw, e sohte sansal iahd kadeiko pahn wiawi. Ihs me kak kamehlele me ihte sounpar 21 mwohn Siohwa pahn doadoahngki Papilon en kasorehla Serusalem? Duwehte nan atail ahnsou, kitail sehse ‘rahno de awao’ me kileldi ong imwin koasoandi wet, ahpw Sises kaweidkin kitail: “Iei me kumwail en pil onohnop ahnsou koaros, pwe Nein-Aramas pahn ketido ni awa me kumwail pahn sasairki.”​—Madiu 24:36, 44.

5. Sapwellimen Koht mahsen me ntingihdi nan pwuhken Apakuk 2:2, 3, kin kangoange kitail ni ahl dahieu?

⁵ Ki kahrepe mwahu ehu, Siohwa ketikihong Apakuk pwukoah wet: “Ntingihedi pohn ekei pelien takai dahme I pahn mahsanihong uhk, pwe aramas en kak mengeiki wadek. Ntingihedi, pwehki e saikinte lel ahnsou me e pahn wiawi. Ahpw e pahn mwadang leledo, oh dahme I pahn kasalehiong uhk pahn pweida. Mehnda ma e pahn pwand, ahpw awiawihete; pwe e pahn pweida ni ahnsawi; oh e sohte pahn pwand.” (Apakuk 2:2, 3) Rahnwet, mwersuwed oh tiahk lemei kin inenen rekla wasa koaros nan sampah, oh met kin kasansalehda me “rahn lapalap oh kamasepwehk wet en ketidohn Kauno [“Siohwa,” New World Translation]” kerendohr. (Soel 2:31) Sapwellimen Siohwa mahsen kin ketikihong kitail kangoang laud: “E sohte pahn pwand”!

6. Iaduwen kitail pahn kak pitsang rahn en kadeik?

⁶ Iaduwen kitail kak pitsang rahn en kadeiko me kohkohdo? Siohwa sapengki peidek wet ni ah kin kawehwehda wekpeseng en irail aramas pwung kan oh me suwed akan: “Me suwed kan sohte pahn mour; ahpw me pwung kan pahn momourte pwehki ar loalopwoatohng Koht.” (Apakuk 2:4) Nan atail ahnsou, irail kaun noahrok oh aklapalap akan oh aramas akan kin kemehlahr aramas pwung rar kan, keieu nan Mahwen Keieu oh Keriau en Sampah oh mahwen kan nanpwungen keinek kan. Weksang met, irail sapwellimen Koht ladu keidi kan ni limpoak oh popohl kin ni lelepek dadaurete. Irail “wehi loalopwoato en pedolong, wehio me towe kan kin wia dahme pwung.” Wehi wet, oh ienge kan, “sihpw teikan,” kin idawehnla kaweid wet: “Kumwail likih Siohwa kohkohlahte, pwe Siohwa iei Paipalap kohkohlahte.”​—Aiseia 26:2-4; Sohn 10:16.

7. Pwehn pwungiong dahme Pohl kohsapahlih nan pwuhken Apakuk 2:4, dahme kitail anahne wia?

⁷ Ni ahnsou me wahnpoaron Pohl ntingwong irail mehn Ipru Kristian akan, e kousapahlih pwuhken Apakuk 2:4 ni eh padahkiong sapwellimen Siohwa aramas akan: “Kumwail uhdahn pahn kin kanengamah, pwe kumwail en kapwaiada kupwuren Koht oh ale mehkan me e ketin inoukihong kumwail. Pwe, duwen Pwuhk Sarawi eh mahsanih, “Ahnsou tehr kis, a ih me ketiket kohdo pahn leledo; e sohte pahn pwapwand. Nei aramas pwung kan pahn momourki pwoson; a ma emen irail pahn kesehla eh pwoson, I sohte pahn kupwurperenki.” (Ipru 10:36-38, NW) Atail ahnsou kaidehn ahnsoun kommoal de mwohneki dipwisou kan de mwohni kan oh mehn kamwait kan en sampah wet en Sehdan. Dahme kitail anahne wia lao lel “ahnsou tehr kis” pahn leledo? Duwehte Pohl, kitail me kin iang sapwellimen Siohwa wehi sarawio pahn anahne ‘wia uwen kitail kak pwe kitail en lel dahme mi mwohtail’ mour soutuk. (Pilipai 3:13, 14) Oh kitail anahne en kahlemengih Sises, ‘dadaurete pwehki peren me mi mwohtail.’​—Ipru 12:2, NW.

8. Ihs “ohlo” nan pwuhken Apakuk 2:5, oh dahme kahrehda e sohte pahn pweida?

⁸ Apakuk 2:5 koasoiada duwen “ohl kehlail men” me kin weksang sapwellimen Siohwa ladu kan, pwe e sohte kin lel eh mehn akadei, mendahki e “rasehng mehla me sohte kin medla.” Ihs ohl menet me “sohte kin medla”? E duwehte Papilon ni ahnsoun Apakuk, “ohl” menet me kin rasehng aramas tohto, kin wiawikihda wehi kehlail en politik kan​—duwehte Fascist, Nazi, Communist, de pil democratic—​kin iang mahwen kan pwehn kak kalaudehla sapwarail. E pil kin kemehla aramas pwung kan oh audekihda Sheol, de sousou kan. Ahpw “ohl” de pwihn en aramas widing en sampah en Sehdan kin sakaukihla pein eh kin kesempwaliki pein ih, ahpw e sohte kin pweida ni eh kin “kapokonepene ong pein ih wehi kan oh aramas akan.” Ihte Siohwa Koht kak kaminiminpene aramas koaros, oh e pahn kapwaiada met ki sapwellime Wehin Mesaia.​—Madiu 6:9, 10.

Keieun Karia en Karia Limau ko

9, 10. (a) Dahme Siohwa kin padahkiong Apakuk en kalohki? (b) Me pid wihn en noahrok, ia irairen sampah nan rahnpwukat?

⁹ Siohwa doadoahngki Sapwellime Soukohp Apakuk en kalohki duwen karia limau, kadeik akan anahne wiawi pwehn kaunopada sampah wet ong sapwellimen Koht tohnkaudok lelepek akan en kousoanla loale. Aramas pwung pwukat kin ‘doadoahngki lepin padahk kei’ me Siohwa kin doadoahngki. Kitail wadek nan pwuhken Apakuk 2:6: “Meid suwediong mehmen me kin kulihada dipwisou me kaidehn ah​—ia uwen werei!—oh ihs me kin wia pweipwand laud kan!”

¹⁰ Aramas kin kesempwaliki wihn en noahrok. Nan sampah wet, irail aramas kepwehpwe kan kin kekeirada ahr kin kepwehpwela, ahpw irail me semwehmwe kan kin wia semwehmwehla. Irail aramas akan me kin netikihla wini suwed kan oh pil aramas akan kin pitihdi aramas teikan oh alehda mwohni laud, ahpw ni ahnsowohte, aramas tohto kin duhpekla. Pahkis ehu en aramas akan me mih nin sampah wet me semwehmwehla. Wasahn kousoan en aramas akan nan wehi tohto me inenen suwed. Irail akan me kin kasikasik me pwung kan en pweida nin sampah kin weriwerki: “Ia uwen werei” suwed pwukat kin wie tohtohla! Ahpw, imwio kerendohr! Ni mehlel, kasansalo “sohte pahn pwand.”

11. Dahme Apakuk mahsanih duwen kamaramas, oh dahme kahrehda kitail kak nda me aramas tohto kin dipkihda dipen kemehla aramas nin sampah nan rahnwet?

¹¹ Soukohpo padahkiong aramas suwedo: “Kumwail kulihalahr tohn wehi tohto​—a met irail kan me pitla pahn kulih kumwail pwehki amwail kamaramas oh wiakauwe tohn sampah oh arail kahnimw kan.” (Apakuk 2:8) Rahnwet, ihr me kin dipkihda dipen kemehla aramas kin inenen rek nan sampah! Sises mahsanih: “Koaros me kin doadoahngki kedlahs pahn mehkihla kedlahs.” (Madiu 26:52) Ahpw, nan senturi 20 kelepw, mie wehi kan oh keinek kan me kin dipkihda dipen kemehla aramas tohtohsang aramas sapw kei. Meid suwediong irail akan me kin iang ur nan nta!

Keriaun Karia

12. Ia keriaun karia, oh iaduwen kitail kak ese me kepwehpwehn sampah sohte katepe?

¹² Keriaun karia, me ntingihdi nan pwuhken Apakuk 2:9-11, kin kohwong irail akan me “kakepwehpwehkilahr arail peneinei kan dipwisoun kul kan, oh songosong en perehdi dewemwail kan pwe aramas en dehr kauwehla!” Irail aramas akan me kin wihnkihda mehkan ni widing kan, sohte pahn katepe ong ih, nin duwen sounmelkahka kawehwehda met ni sansal: “Ke dehr perki ma aramas emen pahn kepwehpwehla, ma eh kepwe kan pahn pil laudla; e sohte pahn kak wa kohla ni eh pahn mehla; e kepwe kan sohte pahn iang kohdihla nan sousou.” (Melkahka 49:16, 17) Kesempwal en tehk kaweid me kohsang rehn Pohl: “Panawiheki koaros me kepwehpwe nan mour wet re en dehr aklapalap, oh dehr koapworopworki soahng kan me sohte kin tengeteng, duwehte atail kepwehpwehn sampah; ahpw re en koapworopworki Koht, me kin ketin kalahngan oh me kin ketin sapankihong kitail soahng koaros pwe kitail en peren.”​—1 Timoty 6:17.

13. Dahme kahrehda kitail anahne pousehlahte kalohki sapwellimen Koht kaweid kan?

¹³ Ia uwen kesempwal sapwellimen Koht kadeik akan en lohkiseli nan rahnpwukat! Ni ahnsou me irail mehn Parisi kan uhwongada pokono me kin kapikapinga Sises nin duwen “Meno me ketiket kohdo nin duwen Nanmwarki ni mwaren Siohwa,” Sises mahsanih: “Kumwail en ese pwe ma re pahn nennenla, takai pwukat pahn uhd pein lokaiahda.” (Luk 19:38-40) Duwehte nan rahnpwukat, ma sapwellimen Koht aramas sohte pahn kasansalehda irair suwed akan me kin wiawi nin sampah wet, ‘takain kelen ihmw kan kin weriwerki.’ (Apakuk 2:11) Eri, kitail ni eimah pousehla kalohkiseli sapwellimen Koht kaweid ong aramas akan!

Kesiluhn Karia oh Ire me Pid Dipkihda Dipen Kemehla Aramas

14. Pelien lamalam nin sampah kin dipkihda dipen kemehla aramas me pid dah?

¹⁴ Kesiluhn karia me Apakuk pakairki kin pid duwen kamaramas. Apakuk 2:12 mahsanih: “Meid suwediong kumwail! Kumwail poahsoanehkihda kahnimw ehu suwed oh kauwekihda kamaramas!” Nan koasoandi en ahnsou wet, dipkihda dipen kemehla aramas kin kalap pid wiewia suwed akan. E sansal me pelien lamalam akan nan sampah wet kin dipkihda dipen kemehla aramas nan poadoapoad en aramas akan. Mahwen me pid “Crusades,” ni ahnsou me aramas me dene irail Kristian kei mahweniong Muslim kan; Catholic Inquisition nan Spain oh Latin America; Mahwen ni erein Sounpahr Silisek nan wehin Iurop nanpwungen Prohs oh Kadolik; oh me keieu suwed sang mahwen koaros, iei Mahwen Keieu oh Keriau en Sampah me wiawi nan senturi wet, mahwen pwukat tepida sang rehn irail me kisehn Kristendom.

15. (a) Ki utuht sang rehn pelien lamalam akan, dahme wehi kan kin pousehla wiahda? (b) Pwihn en United Nations kak kauhdi irail wehi kan me kin wiahda dipwisoun mahwen kan?

¹⁵ Ehu wiewia me keieu suwed me wiawi erein ahnsoun Mahwen Keriau en Sampah iei Nazi Holocaust, iei ahnsowo me mehn Suhs rar rar kei oh aramas pwung kan sang Iurop mehkihla. Pelien lamalam en Roman Kadolik nan Wehin Prans ahpwtehn wehkada me irail sohte irehdi mehn Nazi kan ren dehr kemehla aramas lop kei nan perehn kas kan. Ahpw, wehi kan kin pousehlahte kaunopada en kemehla aramas akan, oh pelien lamalam kan kin utungada koasoandi wet. Makisihn me adaneki Time (international edition) kin ahpwtehn koasoia duwen pelien lamalam en Russian Orthodox: “Pelien lamalam me pwurehng kehlailda pil kin iang alehdi pwais ehu me mahs sohte aramas pahn lemeleme irail pahn wia: misihn en mehn Russia ong mahwen. . . . Irail kin kalap kapakapki sompihr en mahwen kan oh wasahn pweidi en sounpei kan. Ni sounpwong en November nan Moscow, Danilovsky Monastery, kaun en Russian Patriarchate, pelien lamalamo pil kasarawi nein mehn Russia kan neirail nuklear pakudang kan.” Pwihn en United Nations kak kauhdi wehi kan nin sampah wet en sohla wiahda dipwisoun mahwen kan? Re sohte kak! Nin duwen nuhspaper en London, England, The Guardian, koasoiada duwen emen me kana ki Nobel Peace Prize oh e koasoia met: “Mehkot me inenen kansensuwed, iei irail member limau me tengeteng nan pwihn en UN Security Council, irail pil iei pwihn limau me kin wiahda dipwisoun mahwen kan me keieu tohto nin sampah wet.”

16. Dahme Siohwa pahn wiaiong wehi kan me kin utungada mahwen kan?

¹⁶ Siohwa pahn kadeikada wehi kan me kin utungada mahwen kan? Apakuk 2:13 ketitihki: “Tohn wehi kan me kumwail kalowehdi luwetkihla doadoahk laud kan me soh katepe, oh kisiniei ahpw isikala mehkoaros me re kauwada. Siohwa, Wasa Lapalap, me ketin wiahdahr mepwukat.” “Siohwa karis en sounpei kan!” Ei, Siohwa sapwellimaniki karis en tohnleng kan me kin ketiket nanleng, oh e pahn ketin doadoahngki irail en kasorehla aramas akan oh wehi lemei akan!

17. Ia uwen deila loalokong en Siohwa pahn kadirehla sampah mwurin sapwellime kadeik ong wehi lemei kan?

¹⁷ Dahme pahn wiawi mwurin Siohwa pahn kadeikada irail pwihn en wehi lemei kan? Apakuk 2:14 kin kihda pasepeng: “Ahpw sampah pahn direkihla marain lingaling en Kauno [“Siohwa,” NW], rasehng madau eh kin direkihla pihl.” Koapworopwor kaselel ehu! Ni ahnsoun Armakedon, sapwellimen Siohwa kaunda pahn linganla kohkohlahte. (Kaudiahl 16:16) E kamehlelehong kitail me e pahn ketin ‘kalinganahda aluweluwe kan,’ iet sampah me kitail kin kousoanla powe. (Aiseia 60:13, NW) Aramas koaros pahn sukuhliki duwen sapwellimen Koht elen mour, pwe sapwellimen Siohwa kupwur kaselel kan pahn pweida wasa koaros nan sampah duwehte pihl kin kadirehla madau kan.

Kapahieun oh Kalimau en Karia kan

18. Ia kapahieun karia me Apakuk pakairki, oh iaduwen met pweida ong irairen sampah nan rahnpwukat?

¹⁸ Pwuhken Apakuk 2:15 kin kawehwehda duwen kapahieu en karia: “Meid suwediong kumwail! Ni amwail lingeringer kowahlap kumwail mwamwahliki oh kanamenekihala mehn mpamwail kan. Kumwail kahrehiong irail en wasawasasseli, rasehng me sakaula men.” Ih kahrepe sampah en ni ahnsou wet kin suwedla oh pingada. Ekei pelien lamalam kan inenen kohdi douluhl ni ahr kin mweidong dipen nenek en wiawi. Soumwahu kan, duwehte AIDS oh soumwahu teikan me kohsang dipen nenek, kin mwadangete parala nin sampah pwon. Dih en ahnsou wet sohte kin kasansalehda nan ar mour “lingan en Siohwa,” ahpw re kin ahneki madamadau me pein irail me keieu kesempwal oh re kin wie susuwedla oh re pahn lelohng mehla nan sapwellimen Koht kadeik. “Namenek me pil pahn kipeikumwaildi, a kaidehn wahu,” iei sampah suwed wet pahn nimala dahl en sapwellimen Siohwa engieng, me kin karasaiong me Siohwa ketin kupwurki en wia met. ‘E pahn ketin wekidohng wahupamwail ni kanamenek.’​—Apakuk 2:16.

19. Ia wehwehn tepin koasoi kan ong kalimau en karia me Apakuk pakairki, oh dahme kahrehda mahsen pwukat kin kesempwal nan sampah en nan rahnpwukat?

¹⁹ Tepin koasoi kan en kalimau en karia ni kehlail kin kalehkekin aramas akan en dehr kaudokiong dikedik en eni kan. Siohwa padahkiong soukohpo en pakairki mahsen kehlail pwukat: “Meid suwediong kumwail! Pwe kumwail kin ndaiong lepin tuhke lep, “Pirida!” de ong takai ehu me sohte kin lokaia, “Pwourda!” Ia duwe, dikedik en eni men kak kasalehiong kumwail kaudiahl ehu? Mehnda ma e kidikidkipene kohl oh silper, ahpw sohte mour loale.” (Apakuk 2:19) Lao lel atail ahnsou, irail pelien Kristendom oh pil aramas akan me iang pelien lamalam kan me sohte kin kamehlele Koht kin kaudokiong arail lopwu kan, Madonnas, sansal kan, oh sansal teikan me mwomwen aramas oh mahn akan. Sansal pwukat koaros sohte kak mourada oh doarehla aramas akan me kin kaudokiong irail ni ahnsou me Siohwa pahn kadeikada aramas akan. Edetehn dikedik pwukat kidikidkipene kohl oh silper, irail sohte mehkot douluhl, oh re sohte duwehte lingan soutuk en Koht Siohwa, oh lingan en sapwellime kapikapikda kan. Eri, kitail pahn kapinga mware lingan ni ahnsou kohkohlahte!

20. Nan soangen koasoandi en Tehnpas Sarawi dahieu me kitail kin ale pwais kaselel en papah ni pereperen?

²⁰ Ei, atail Koht, Siohwa, kin warohng atail kaping kan. Ia uwen loal atail kin wauneki Ih, oh kitail en kapwaiada kaweid kehlail en liksang kaudok ong sansal kan. Ahpw rong! Siohwa kin mahsanih: “Kauno [“Siohwa,” NW] kin ketiket nan Tehnpese Sarawi; eri, sampah pokon en nennenla mwohn silangi!” (Apakuk 2:20) Soukohpo mwein kin medemedewe duwen tehnpaso nan Serusalem. Ahpw, rahnwet kitail kin ale pwais kaselel en kaudokiong Siohwa nan koasoandi en Tehnpas Sarawi ni pali ngehn me siksang Tehnpas Sarawi en mahs, iei wasa me atail Kaun Sises Krais manamanla en wiahla Samworo Lapalap. Nan kehlen Tehnpas Sarawi nin sampah, iei wasa me kitail kin tuhpene, papah, oh kapakap, kawauwih mwaren Siohwa. Oh peren laud ehu kitail ahneki ni atail kin kaudokiong Samatail nanleng limpoak sang nan mongiongatail kan!

Ke Tamanda?

• Ia omw madamadau ong sapwellimen Siohwa mahsen pwukat: “E sohte pahn pwand”?

• Nan atail ahnsou, ia wehwehn karia kan me Apakuk pakairki?

• Dahme kahrehda kitail anahne pousehla lohkiseli sapwellimen Siohwa kaweid kan?

• Nan mehnia Tehnpas Sarawi me kitail ale pwais kaselel en papah?

[Kilel nan pali 11]

Duwehte Apakuk, sapwellimen Koht ladu kan en ni ahnsou wet kin ese me Siohwa sohte pahn pwand

[Kilel nan pali 14]

Ke kin kalahnganki pwais en kaudokiong Siohwa nan sapwellime kelen Tehnpas Sarawi en pali ngehn?

[Credit Line]

U.S. Army photo