PEIDEK KAN EN PAIPEL PASAPENGLA

Ihte mwomwen mour en met?

Mie pak ke medewe ma mie soahng kan likin ihte en mwadong, doadoahk, pwopwoudida, ahneki peneinei, oh mahla? (Sohp 14:1, 2) Paipel kasalehda me aramas me uhdahn loalokong pil kin medewe duwen met.​—Wadek Eklesiasdes 2:11.

Mie wehwehn mour? Keieu, kitail anahne idek, Ia duwen mour eh miehla? Mwurin ar medemedewe duwen wiawihdahn atail mwahliel oh paliwaratail, me tohto kamehlele me Sounkapikada loalokong men me ketin wiahda kitail. (Wadek Melkahka 139:14.) Ma ei, eri mie kahrepen eh ketin kapikada kitail! Atail sukuhlki duwen kahrepe wet kak kalaudehla wehwehn atail mour.

Dahme kahrehda aramas kepikipikda?

Koht ketin kapaiada tepin ohl oh liho oh ketikihong ira pwukoa kaperen ehu. E ketin kupwurki ira en kadirehkihla sampah kadaudokara, kaparadaisihala sampah oh mour kohkohlahte.​—Wadek Senesis 1:28, 31.

Ahn aramas uhwongada sapwellimen Koht kaunda kapwandehla kupwureo en pweida. Ahpw Koht sohte ketin soikala kitail, oh e sohte ketin wekidala kupwureo ong kitail oh sampah. Paipel kamehlelehiong kitail me Koht kin ketin wie doadoahk pwehn doarehla aramas lelepek kan oh me kupwureo ong sampah pahn pweida! Eri Koht ketin kupwurki ken ahneki soangen mouro me e ketin kupwurki nin tapio! (Wadek Melkahka 37:29.) Ke kak sukuhlki sang Paipel ia duwen omw kak paiekihda dahme Koht kupwurki.