IREN MEHN KASUKUHL 6
Soangen Koapworopwor Dahieu me Mie ong me Melahr akan?
1. Ia rohng mwahu duwen me melahr akan?
Ni Sises eh ketin lella Pedani me karanih Serusalem, kompoakepah Lasarus melahr rahn pahieu. Sises ketila wasa me e seridi ie iangahki Marda oh Mery, rien ohl mehlao. Pokon ehu pil kohpene wasao. Ke kak medewehla soangen peren me Marda oh Mery ahneki ni ahnsou me Sises ketin kaiasada Lasarus?—Wadek Sohn 11:21-24, 38-44.
Marda eseier rohng mwahu duwen me melahr akan. E ese me Siohwa pahn ketin kaiasada me melahr akan pwe ren pwurehng mour nin sampah.—Wadek Sohp 14:14, 15.
2. Ia irair en me melahr akan?
Koht mahsanihong Adam: “Ke wiawihda sang pwehl oh ke pahn pwurehng wiepwella.”—SENESIS 3:19.
Aramas wiawihkihda pwehl. (Senesis 2:7; 3:19) Sohte ngehn me mi nan paliwaratail. Sohte mehkot kin momour mwurin atail mehla. Ni atail kin mehla, atail mwahliel pil kin mehla, oh kitail sohla kak medewe mehkot. Kahrehda, Lasarus sohte koasoia duwen dahme wiawi ni ahnsou me e mehla pwehki me melahr akan sohte kak kehn mehkot.—Wadek Eklesiasdes 9:5, 6, 10.
Ia duwe, Koht kin ketin kalokehki aramas kisiniei mwurin arail mehla? Pwehki Paipel kin kasalehda me me melahr akan sohte kak kehn mehkot, e sansal me kalokolok nan kisiniei iei padahk likamw pwoat me kahrehiong aramas ren kapwukoahki Koht mehkot me e sohte ketin wia. Koht kin ketin kalahdeki soangen madamadau en kalokehki aramas kisiniei.—Wadek Seremaia 7:31.
Kilang kisin kasdo Ia Irair en me Melahr akan?
3. Me melahr akan kak koasoiong kitail?
Me melahr akan sohte kak lokaia de rong mehkot. (Melkahka 30:9) Ahpw ekei tohnleng kan me suwed oh ele kin lokaiahiong aramas akan oh mwomwehda me irail me melahr akan. (Sud 6) Siohwa ketin keinepwihsang kitail en song koasoiong me melahr akan.—Wadek Deuderonomi 18:10, 11.
4. Ihs me pahn iasada?
Aramas rar rar kei me melahr pahn iasadahng mour nin sampah. Pil irail kan me sehse Koht oh me kin wia soahng suwed kan pahn iang iasada.—Wadek Wiewia 24:15.
Irail kan me iasada pahn kak sukuhlki dahme mehlel duwen Koht oh kasalehda arail pwoson Sises sang arail peikiong. (Kaudiahl 20:11-13) Irail kan me iasada oh kin wia me mwahu pahn kak ahneki mour kohkohlahte nin sampah.—Wadek Sohn 5:28, 29.
5. Dahme kaiasada kin padahkihong kitail duwen Siohwa?
Koht ketikihda koapworopwor ong me melahr akan sang ni eh ketin poaronehdo sapwellime Ohlo pwehn pwoukinkitailla. Eri, kaiasada kin padahkihong kitail duwen sapwellimen Siohwa limpoak oh kalahngan. Ni ahnsou me me melahr akan pahn pwurehng mourda, ihs me ke keieu men kilang?—Wadek Sohn 3:16; Rom 6:23.