Kawehwehda duwen Wehio

Pali 1: Ia duwen atail kak kapwaiada atail pwukoahn pakairki Wehin Koht? Ele kitail pahn kak kamwakid irail en men rong ni atail pahn tepikihda atail koasoi ni soangen oaralap kei, ahpw e anahne sansal me rohng me kitail kin lohki kin pid duwen Wehin Koht.

Doadoahk kesempwal wet kin pidada atail wadek de ndahla mahsen kan nan iren Paipel kan me kin pidada duwen Wehio. Ni omw kin koasoia duwen Wehio, tehk kanahieng me irail kan me ke koasoiong en wehwehki duwen met. Kitail anahne kawehwehda mwahu, sang ihte nda me Wehin Koht koperment ehu. Ekei aramas kin diarada me e apwal en medewe duwen koperment ehu me soh sansal. Ke kak kawehwehiong irail ni soangsoangen ahl kei. Karasepe, kitail sohte kak kilang kisinieng, ahpw e kin uhdahn wia kamwahu ong atail mour. Kitail sohte kak kilang Meno me kin kamwakamwakid kisinieng, ahpw e sansal me e ahneki manaman laud. Paipel kin mahsanih me e wia “Nanmwarki poatopoat.” (1 Tim. 1:17) De ke kak kawehwehiong me nan sahpw laud kan, aramas tohto saikinte kohla ni arail poasen kaun de kilangki masarail arail kaunen koperment kan. Re kin ese met sang ni ripoht en nuhs kan. Pil duwehte, Paipel wiawihda ni lokaia daulih 2,200, me kin padahkihong kitail duwen Wehin Koht; e kasalehiong kitail en ese ihs me ahneki manaman oh dahme Wehio kin wiewia. Kahn Iroir, me wiawihda ni lokaia keieu tohto nanpwungen makasihn koaros nan sampah, oh e kin ngoangki “Pakpakairki Wehin Siohwa” nin duwen me ntingdi ni mwohn kilin Kahn Iroir.

Pwe kitail en sewese aramas akan en wehwehki ia uhdahn wehwehn Wehio, ele ke pahn kasalehda soahng kan me re kin men koperment kan en kihda me duwehte: Sohte perki kahpwal en mwohni , meleilei, saledek sang mwersuwed, Sohte lipilipilki aramas, palien kasukuhl, oh palien roson mwahu. Kasalehiong me Wehin Koht kelehpw me pahn kaitarala mepwukat oh soahng mwahu koaros me aramas kin anahne.—Mel. 145:16.

Nantihong kamwakid aramas akan pwe ren kak wiahla towe kan en Wehio, me Sises Krais me wie kakaun nin duwen Nanmwarki. Kasalehiong manaman kan me Sises ketin wiahda, me kasalehda dahme e pahn ketin wia nin duwen Nanmwarki men nanleng. Kalapw koasoia irair mwahu kan me e ketin kasalehda. (Mad. 8:2, 3; 11:28-30) Kawehwehiong me Sises ketin pwoukinkitailla oh me mwuhr Koht ketin kaiasada ih ong mour me sohte kak mehla nanleng. Ih wasao me e pahn ketin kakaun nin duwen Nanmwarki.—Wiewia 2:29-35.

Pali 2: Kawehwehda mwahu me Wehin Koht wie kakaun sang nanleng. Ahpw, ken tehk me pali laud en aramas akan sohte kak kilang irair kan me re medewe kin wia mehn kadehde ong kaunda wet. Ken pohnese met oh idek ma re ese dahme Sises Krais mahsanih me pahn kadehdehda met. Kasalehda ekei ire kan duwen ekei kilel kan me dierek nan Madiu irelaud 24, Mark irelaud 13, de Luk irelaud 21. Eri idek dahme kahrehda Krais eh wiahla nanmwarki en nanleng eh pahn wiahiong irair en sampah. Kasalehiong Kaudiahl 12:7-10, 12.

Nin duwen mehn kadehde sansal ong dahme Wehin Koht wiewia, wadek Madiu 24:14, oh kawehwehda duwen koasoandi en kasukuhl en Paipel sampah pwon me wiewiawi ahnsouwet. (Ais. 54:13) Koasoiaiong aramas akan duwen soangsoangen kasukuhl me Sounkadehdehn Siohwa kan kin paiekihda—soahng koaros kin poahsoandasang nan Paipel, soahng koaros kin wiawi ni soh isepe. Kawehwehda me patehng atail doadoahk en kalohk ihmw-lel-ihmw, kitail kin wia onop en Paipel ni soh isepe rehn emenemen aramas oh peneinei kan daulih sahpw 230. Mehnia koperment en aramas me kak kihda soangen kasukuhl me laud kaidehn ongete tohn eh wehi ahpw ong aramas kan nan sampah pwon? Luke aramas akan en kohdo Wasahn Kaudok, pwehn towehda mihting tohrohr en Sounkadehdehn Siohwa kan, pwe ren kilang ia duwen kasukuhl wet eh kin kamwakid mour en aramas akan.—Ais. 2:2-4; 32:1, 17; Sohn 13:35.