Mie Mwaren Koht

NI AHNSOU me kitail kin esehla emen, kitail kin men ese ede. Kitail koaros mie adatail. Koht ketikihong eden tepin aramaso. E ketin kahdaneki ih Adam. En Adam pwoud adaneki Ihp.

Ahpw kaidehn aramaste me mie ede. Medewe duwen soahng teikan me pil mie adarail. Ke kin kihong eden noumw kidi de kat, kaidehn?— Ahd wia mehkot kesempwal.

Kilangdahng uwen tohtohn usu kan ni pwong. Ke leme mie adarail?— Ei, Koht ketikihong eden ehuehu usu nanleng. Paipel mahsanihong kitail: “Ih me kin ketin koasoanehdi tohtohn usu kan oh ketikihong eden ehuehu usu.”​—Melkahka 147:4.

Ihs me ke leme me keieu kesempwal nanleng oh nin sampah?— Iei Koht. Ke leme mie mware?— Sises mahsanih me mie mwaren Koht. Ehu ahnsowo, Sises patohwanohng Koht: “Maing Semei, komwi ketin kalinganahla mwaromwi!” (Sohn 12:28) Ke ese mwaren Koht?— Pein Koht ketin padahkihong kitail mware. E mahsanih: “Ngehi Siohwa. Iei mwarei met.” Eri mwaren Koht iei SIOHWA.​—Aiseia 42:8, NW.

Ia ahmw pepehm ahnsou me meteikan kin tamataman edomwen?— Ke sou kin peren?— Siohwa kupwurki aramas en pil ese mware. Kahrehda kitail anahne doadoahngki mwar wet Siohwa ni ahnsou me kitail kin koasoia duwen Koht. Sounpadahk Lapalapo ketin doadoahngki mwaren Koht, Siohwa, ni eh kin mahseniong aramas akan. Ehu ahnsowo Sises mahsanih: “Ke uhdahn pahn poakohng Siohwa omw Koht sang nan omw mohngiong unsek.”​—Mark 12:30, NW.

Sises mwahngih me “Siohwa” iei mwar ehu me uhdahn kesempwal. Ihme kahrehda e ketin padahkihong sapwellime tohnpadahk kan en doadoahngki mwaren Koht. E pil ketin padahkihong irail en doadoahngki mwaren Koht nan arail kapakap akan. Sises mwahngih me Koht kupwurki aramas koaros en ese mware, iei Siohwa.

Mahsie Koht ketin kasalehda kesempwalpen mware ong Moses, emen ohlen Israel. Ahnsowo, mehn Israel kan kin mi nan sahpw me adaneki Isip. Mehn Isip kan kaliduiala mehn Israel kan oh re uhdahn lemei ong irail. Ni en Moses laudla, e song en sewese emen eh aramas ko. Met kahrehiong Parao, nanmwarki en Isip eh lingeringerda. E men kemehla Moses. Kahrehda Moses tangasang nan Isip.

Moses kohla nan ehu sahpw tohrohr. Sahpwo iei Midian. Moses pwopwoudla wasao oh wiahda eh peneinei. E wia silepen sihpw men. Ehu rahno Moses apwahpwalih nah sihpw kan limwahn nahna ehu ni eh kilangada mehkot me kapwuriamwei. Kisin tuhke kis wie lullul ahpw e sohte lulla. Moses eri keilahng limwah pwehn kak kilang mwahu.

Ke ese dahme wiawi?— Moses rongada ngihl ehu me liklikwer sang nan kisin tuhke me wie lullulo. Ngihlo mahsanih, “Moses! Moses!” Ihs me mahmahseno?— Koht me mahmahsen. Doadoahk tohto Koht pahn ketikihong Moses en wia. Koht mahsanih: ‘Kohdo I pahn kadaruhklahng Parao, nanmwarki en Isip, oh ke pahn wahdo nei aramas akan, iei mehn Israel kan, sang nan Isip.’ Koht ketin inoukihda me e pahn ketin sewese Moses.

Ahpw Moses patohwanohng Koht: ‘Ia duwen ma I kohla rehn mehn Israel kan nan Isip oh nda me Koht me ketin kadariehdo oh ia duwen ma irail idek rehi, “Ia mware?” Dahme I pahn nda?’ Koht mahsanihong Moses en padahkihong mehn Israel ko: ‘Siohwa me ketin kadariehdo rehmwail. Siohwa iei mware kohkohlahte.’ (Eksodus 3:1-15, NW) Met kasalehda me Koht pahn ketin kolokolte mwaro Siohwa. E sohte pahn ketin wekidala mwareo. Koht kupwurki aramas en ese mwareo, Siohwa, kohkohlahte.

Ni ahnsou me Moses pwurala Isip, mehn Isip kan lemeleme me Siohwa iei emen kisin koht en mehn Israel kan. Irail sohte medewe me ih me Koht en sampah pwon. Siohwa eri mahsanihong nanmwarki en Isip: “Mwarei en kipehla wasa koaros nin sampah.” (Eksodus 9:16) Siohwa eri uhdahn ketin kandandla mware. Ke ese ia duwen eh ketin wia met?—

Siohwa ketin doadoahngki Moses en kahluwa mehn Israel kan sang nan Isip. Ni arail lel ni Sehd Weitahta, Siohwa ketin wiahda ahl oapwoat nanwerengen Sehdo. Mehn Israel kan eri alu pohn ahlo kotehla Sehdo. Ahpw ni Parao oh nah sounpei kan ar tepida kote Sehdo, pihlo pwurehng pwurpene pohn mehn Isip ko oh irail koaros mehla.

Aramas wasa koaros nin sampah eri mwadangete rongada dahme Siohwa ketin wia ni Sehd Weitahtao. Ia duwen atail ese me irail rong duwen met?— Ele mwurin sounpar 40, mehn Israel ko lel nan Kenan, sahpw me Siohwa ketin inoukihong irail. Emen lih pwulopwul me adaneki Reap ndaiong ohl en Israel riemen: “Se pil rong duwen en Siohwa eh ketin kammadahda Sehd Weitahta mwohmwail ni ahnsou me kumwail pedoisang nan Isip.”​—Sosua 2:10, NW.

Rahnwet aramas tohto pil kin duwehte mehn Isip ko. Irail sohte kin kamehlele me Siohwa iei Koht en sampah pwon. Ihme kahrehda Siohwa kupwurki sapwellime aramas akan en padahkihong meteikan duwen ih. Ih met me Sises ketin wia. Ni imwin sapwellime mour nin sampah, e patohwanohng Siohwa: “Ngehi me kahrehiong irail en ese mwaromwi.”​—Sohn 17:26, NW.

Ke men duwehte Sises? Eri, padahkihong meteikan me mwaren Koht iei Siohwa. Ke pahn diar me aramas tohto sohte ese duwen met. Ehu kahrepe iei pwehki ekei aramas me kawehwe Paipel kin wiliankihdi mwaren Koht “KAUN-O.” Ahpw ma ke pahn kilang nan Eksodus 3:14 nan Pwuhk Sarawi en Pohnpei, mie nting kan me mi pah me koasoia me “KAUN-O” kin wiliandi Iahweh (Siohwa), mwaren Koht ni lokaiahn Ipru.

Dahme kitail sukuhlki sang atail wadek met?— Kitail esehla me Siohwa iei mwar me keieu kesempwal. Iei mwaren Koht Wasa Lapalahpie, Semen Sises oh iei Ih me ketin wiahda mehkoaruhsie. Tamataman me Sises mahsanih me kitail en poakohng Siohwa Koht sang nan atail mohngiong unsek. Ke kin poakohng Siohwa?—

Ia duwen atail pahn kak kasalehda me kitail kin poakohng Siohwa?— Ehu iei ni atail pahn esehla ih nin duwen kompoakepatail men. Pil ehu iei sang ni atail kin padahkihong meteikan mware. Kitail pil kak kasalehda soahng kaselel kan me Siohwa ketin wiahda oh pil sapwellime doadoahk mwahu kan. Met kin kaperenda Siohwa pwehki e kupwurki aramas akan en esehla duwen ih. Kitail pil kak iang wia met. Ke men iang wia met?—

Kaidehn aramas koaros pahn men rong atail kin koasoia duwen Siohwa. Aramas tohto pil sohte kin rong Sises, Sounpadahk Lapalapo, ni eh kin ketin padahngki duwen Siohwa. Ahpw met sohte kin kahrehiong Sises en uhdihsang eh kin ketin padahngki duwen Siohwa.

Eri, kitail en duwehte Sises. Kitail en kin koasokoasoia duwen Siohwa. Ma kitail kin wia met, Siohwa Koht pahn ketin perenkinkitail pwehki kitail kin kasalehda me kitail kin kesempwalki mware.