Sukuhliki Sapwellimen Siohwa Ahl Akan

“Kehsehkin ie . . . ahlomwi kan, pwe ien kak ese komwi.”—EKSODUS 33:13, New World Translation.

1, 2. (a)Dahme kahrehda Moses wiahki mwekid me e wia ni ahnsou me e kilang mehn Isipo ah kemekeme mehn Ipruo? (b) Pwe Moses en warohng papah nan sapwellimen Siohwa doadoahk kan, dahme Moses anahne sukuhl?

MOSES tikida nan tehnpasen Parao oh kasukuhlda oh alehdi erpit en soupeidi kan nan Isip. Ahpw, Moses ese me ih kaidehn mehn Isip. Ah pahpa oh nohno me kaipwidi ih ira mehn Ipru. Ni ah lelehr sounpar 40, e kohla oh dawih rie mehn Israel akan. Ni ah kilangada duwen mehn Isip emen ah kin kemekeme mehn Ipru men, pepehm en Moses kin ohla. Ih eri kemehla mehn Isipo. Moses pilada en poupalihkihla sapwellimen Siohwa aramas akan oh medemedewe me Koht kin ketin doadoahngki ih pwehn kapitasang rie kan sang pahn kanaudok. (Wiewia 7:21-​25; Ipru 11:24, 25) Ahnsou me wiewia wet sansaladahr, irail sohpeidi en Isip akan wiahkihla Moses aramas suwed emen, kahrehda e anahne sohpeisang wasao pwe ede mehla. (Eksodus 2:11-​15) Ma Moses iei Siohwa pahn ketin doadoahngki ih, e uhdahn pahn ese sapwellimen Siohwa ahl akan. Iaduwen, e mengiong Moses en ale kasukuhl wet?​—Melkahka 25:9.

² Sounpar 40 mwurin mwo, Moses lipala oh wiahla sounsilepen sihpw men. E sohte kin wiahla aramas loal suwed men pwehki dene rie mehn Ipru kan sohte kin perenki ih, ahpw Moses kin mweidala pein ih ong dahme Koht kupwurki. Mendahki sounpar tohto dower powe oh sohte kasansal ehu mie me nsenohki oh perenki dahme e wia, Moses kin mweidong Siohwa en kaweid ah mour. E sohte kin kihda pein ah madamadau ahpw ki menen sapwellimen Koht ngehn sarawi, e ntingihdi: “Moses iei ohl aktikitik men, me keieu aktikitik rehn aramas en sampah kan.” (Nempe 12:3) Siohwa kin ketin doadoahngki Moses ni ahl akan me inenen mwahu. Ma kitail pil rapahki mour en opampap, Siohwa pahn ketin kapai kitailada.​—Sepanaia 2:⁠3.

Kohwong Pwukoa Ieu

3, 4. (a) Pwukoa dah me Siohwa ketikihong Moses? (b) Soangen sawas dah me Moses alehdi?

³ Ehu rahn, tohnleng emen weliandi Siohwa oh mahseniong Moses limwahn Nahna Orep nan patapat en Sainai: “I mahsaniher uwen lokolok laud en nei aramas akan nan Isip; I rongehr ar pekipek sawas pwehki ar kaun kan me lemei. Ei, I dehdehkiher uwen ar lokolok laud. Eri, I kohdidohng kapitasang irail rehn mehn Isip kan, oh kahreirailsang nan sahpwo, kahreiraillahng nan sahpw kaselel oh pwelmwahu ehu, sahpw ehu me reken mwenge oh kepwe.” (Eksodus 3:2, 7, 8) Ong met, Koht ketikihong Moses doadoahk ieu, ahpw met pahn wiawi nin duwen kupwuren Siohwa.

⁴ Sapwellimen Siohwa tohnleng pil doula oh mahsanih: “Kohdo ahnsouwet oh I pahn kadaruhkewei rehn Parao, oh kowe wahweisang sapwellime aramas en Israel akan sang nan Isip.” Moses salohda. E sohte pehm me e warohng doadoahko, pwe ma e kehlkihte pein ah koahiek, eri e sohte pahn kakohng doadoahko. Ahpw, Siohwa kamehlelehiong Moses: “I pahn kadehdehda me I ieiang uhk.” (Ekodus 3:10-​12, NW) Siohwa ketikihong Moses pwukoa en kak wiahda kilel manaman akan me pahn wia kamehlelpen me mehlel Koht me ketin kadarodo ih. Aaron rien Moses ohlo, pahn wia nein Moses soun lokaia. Siohwa pahn ketin padahkiong ira dahme ira pahn nda oh wia. (Eksodus 4:1-​17) Moses pahn lelepek oh kapwaiada ah pwukoa?

5. Ia mwomwen madamadau en mehn Israel akan ah kin wia irair kahpwal ong Moses?

⁵ Nin tapio, ohl mah en Israel akan kamehlele Moses oh Aaron. (Eksodus 4:29-​31) Mwadangete ekis mwuri, “kaun akan me nein Israel” eri ikidiki Moses oh rie ohlo me dene ira wiahiong irail en “kasaut” mwohn Parao oh sapwellime ladu kan. (Eksodus 5:19-​21; 6:9) Ni ahnsou me mehn Israel akan mwesemweselweisang Isip, irail masakada ni ar kilang weren mehn Isip wararail weren mahwen akan arail rapahkin iraildo. Pwehki Sehd Weitahta ah mih mwohrail oh weren mahwen akan tangatangodo mwurirail mehn Israel akan pehmadahr me sohte wasa re kak pitila ie, oh irail tepida ikidiki Moses me ih me wiahda doadoahk sapwung wet. Ia mwomwen pahn omw mwekid ma ke iang mih wasao? Mendahte sohte weren mehn Israel oko pwoaht, Siohwa doadoahngki Moses en ruwese aramas akan en mweselda. Mwuri Koht eri pwalangpeseng pihl nan Sehd Weitahta, oh nan kapin sehdo eri ngalangalada pwe mehn Israel en kak kotehla sehdo.​—Eksodus 14:1-​22.

Kahpwal Ehu me Laudsang Doadoahk en Kamaiau

6. Dahme Siohwa ketin kadehdehda kehlail ni ah ketikihong Moses sapwellime pahngok?

⁶ Ni Siohwa ah ketin poaronehla Moses, e ketin kawehwehda mwahu kesempwalpen mwar sarawio. Wauneki mwar wet oh Ih me sapwellimaneki mwaro wia mehkot kesempwal. Ni Moses ah idek rehn Siohwa duwen sapwellime mwaro, Siohwa mahsanih ong Moses: “I pahn kadehdehda dahme I pahn kadehde.” Pil patehng met, Moses pahn pil padahkiong mehn Israel akan oh mahsanih: “Siohwa me wia Koht en samamwail kahlap oko, Koht en Eipraam, Koht en Aisek oh Koht en Seikop, me ketin kadariehdohng kumwail.” Siohwa pil kapataiong: “Met iei mwarei kohkohlahte, oh met iei kasarawihpe sang ehu dih lel ehu dih.” (Eksodus 3:13-​15) Mwar me sapwellimen Koht ladu kan nan sampah pwon esehki ih iei Siohwa.​—Aiseia 12:4, 5; 43:10-​12.

7. Kangoang dahieu me Koht ketikihong Moses edetehn Parao kin kasalehda irair en aklapalap?

⁷ Mwohn Parao, Moses oh Aaron kapwilwei ara padahk ni mwaren Siohwa. Ahpw, ni pohnmwahso, Parao koasoia: “Ihs Siohwa, me kahrehda ien peikiongki kapitie oh mweidewei mehn Israel akan? I sehse douluhl Siohwa oh laudsang met, I sohte pahn kadarala Israel.” (Eksodus 5:1, 2) Parao kadehdehda me ah mohngiong kekeluwak oh likamw, ahpw Siohwa kin kangoangehkihte Moses en pwurpwurehng wahwohng ih sapwellime pahngok kan. (Eksodus 7:14-​16, 20-​23; 8:1, 2, 20) Moses kak kilang me Parao inenen lingeringer laud. Mie kamwahu me pahn kohsang ah pahn pwurehng koasoiong ih? Mehn Israel inenen ngoangkihla alehdi kamourparail. Parao inenen ahneki sapwungki ni teng. Ma kowe Moses, dahme ke pahn wia?

8. Soangen mehn kamwahu dah me kohsang ni sapwellimen Siohwa wiewia ong Parao, oh iaduwen wiewia pwukat ah kin wia kamwahu ong kitail?

⁸ Moses pil pwurohng wahdo ehu pahngok, me mahsanih: “Iet me Siohwa me Koht en mehn Ipru kan mahsanih: ‘Mweidala nei aramas akan pwe re en kolahng kaudokiong ie.’ ” Koht pil mahsanih: “Met I pahn kihong pein komwi ei kalokolok kan koaros, oh ong sapwellimomwi lapalap akan, pwe komwi en mwahngih duwen eh sohte emen koht mie nin sampah pwon duwehte ngehi. Ahpw I mweidohng komwi en momour pwe I en kasalehiong komwi ei manaman, oh mwarei en kipehla wasa koaros nin sampah.” (Eksodus 9:13-​16) Pwehki dahme pahn lelohng ohl keptakai Parao, Siohwa kupwurkihda en ketin kasalehda sapwellime roson ni ahl ehu me pahn wia mehn kaweid kehlail ehu ong irail akan koaros me pahn uhwong Ih. Met pil iangahki Sehdan me Tepil, me Sises mwuhr kin kahdaneki ih “kaun en sampah wet.” (Sohn 14:30; Rom 9:17-​24) Duwen me kokohp oko mahsanih, mwaren Siohwa kalohkselihier nan sampah pwon. E ketin mweidohng mehn Israel akan oh iangarail me tohto me mihmi rehrail akan oh kin iang arail kaudok rehn momour. (Eksodus 9:20, 21; 12:37, 38) Sangehr ahnsowo kohdo, lohkseli en mwaren Siohwa wia kamwahu laud ehu ong aramas tohto sang rar kei me kin alehda kaudok mehlel.

Ehuiong Pwihn en Aramas Apwal Ieu

9. Iaduwen pein ahn Moses aramas akan kin kasalehda me re wauneki Siohwa?

⁹ Mehn Ipru kan ese mwar sarawio. Moses kin doadoahngki mwar wet ni ah kin patohwong irail, ahpw irail sohte kin ni ahnsou koaros kasalehda wahu me konehng ong Ih me sapwellimaniki mwahro. Mwurinte Siohwa ah ketin doadoahngki manaman oh kamaiauda mehn Israel akan sang Isip, dahme wiawi nin doken arail sohte mwadangete diar pilen nimpihl mwakelekel? Irail lipilipahnedo Moses. Mwurin mwo re mwoarongkihda mwenge. Moses kaweid oh keperkin irail me arail lipahned kaidehn e dokedokehte ih oh Aaron ahpw pil e uhwong Siohwa. (Eksodus 15:22-​24; 16:2-​12) Ni Nahna Sainai, Siohwa ketikihong mehn Israel akan Kosonnedo, oh manaman kapwuriamwei kan. Ahpw aramas akan keptakailahte oh kauwada koupwul ohl koht emen pwe ren kaudokiong oh dene me irail wia “kasarawi ong Siohwa.”​—Eksodus 32:1-9.

10. Dahme kahrehda ahn Moses pekipek me ntingihdi nan Eksodus 33:13 wia irair kesempwal ieu ong ladu en apwalih mwomwohdiso kan nan rahnwet?

¹⁰ Ia mwomwen wiewia en Moses ong pwihn en aramas ehu me pein Siohwa kin ketin panginkinirail tepinwar dengideng? Moses peki rehn Siohwa: “Eri, ma komw kupwurperenkin ie, I patohwan peki rehmwi, komwi en ketin kasalehiong ie kupwuromwien, pwe I en dadaurete ei kin papah komwi oh kin kaparanda kupwuromwi.” (Eksodus 33:13) Pwehn apwalih sapwellimen Siohwa Kristian akan nan rahnwet, irail laduhn mwomwohdiso kan sinsile pwihn en sihpw ehu me ahneki madamadau karakarahk sang mehn Israel oko. Ahpw, re pil kin wiahte kapakap ohte: “Komw ketin kehsehkin ie alomwi kan, Maing Siohwa, kasukuhlihkin ie omwi ahl akan.” (Melkahka 25:4, NW) Wehwehkihla sapwellimen Siohwa ahl akan kin kahrehiong sounapwalih kan en kak sewese kahpwal en aramas akan ni ahl me paian Mahsen en Koht oh pahrekiong sapwellime irair akan.

Dahme Siohwa Ketin Kasik Sang Rehn Sapwellime Aramas akan

11. Mehn kaweid dah kan me Siohwa ketkihong Moses, oh dahme kitail men esehla kaweid pwukat?

¹¹ Dahme Siohwa kupwurki sang rehn sapwellime aramas akan kin sansal sang sapwellime mahsen en pohn Nahna Sainai. Mwuri Moses alehsang Ih pelien takai riapali me Kosonned Eisek ko ntingihdi powe. Nin doken Moses ah kohdihdohsang pohn nahnao, e kilang mehn Israel akan wie kaukaudokiong koupwul mete ieu ih eri mwakarkihda oh katehki pelien takai ko nan pwel oh pwalpeseng. Siohwa eri pwarehng ketikihong mengen nin lime ko oh ntingihdi Kosonned Eisek ko pohn pelien takai ko me Moses wiahdahr. (Eksodus 32:19; 34:1) Kosonned pwukat sohte wekila sangete ni ahr tepin alahldio. Moses pahn kapwaiada kosonned pwukat. Koht pil ketin kadehdehiong Moses soangen Koht dah men Ih, oh pil ketin kasalehiong Moses duwen pahn ah mwekid nin doken ah pahn wiewia weliepen Siohwa men. Kristian akan sohte iang mih pahn Kosonned en Moses, ahpw dahme Siohwa mahsanih ong Moses audaudiki mour en kaweid akan me sohte kin wekidekla oh me pahn wie doadoahk ong aramas koaros me kin kaudokiong Siohwa. (Rom 6:14; 13:8-​10) Kitail tehksapahl ekei kosonned pwukat.

12. Iaduwen sapwellimen Siohwa kupwurki aramas en kaudokiong Ih lelepek unsek ah kin kamwekid wehin Israel?

¹² Kihong Siohwa lelepek unsek. Wehin Israel mih wasao ni ahnsou me Siohwa mahsanih me E ketin kupwurki lelepek unsek. (Eksodus 20:2-5) Mehn Israel akan kilangehr mehn kadehde tohtohie me Siohwa iei Ih Koht mehlel. (Deuderonomi 4:33-​35) Siohwa ketin kasalehda ni sansal me sohte lipilipil dahme wehi teikan kin wiewia, ahpw Ih, e sohte pahn ketin mweidohng soangen mwomwen kaudok en dikedik de wunahni ieu en wiawi rehn sapwellime aramas akan. Arail lelepek ong Ih en dehr wiawi ni mwohmw. Irail koaros en poakohng Siohwa ki arail mohngiong unsek, arail mour unsek, oh kehl unsek. (Deuderonomi 6:5, 6) Met pahn sang ni arail lokaia kan, wiewia kan​—oh soahng koaros nan arail mour. (Lipai 20:27; 24:15, 16; 26:1) Sises Krais pil mahsanih ni sansal me Siohwa ketin kupwurki atail lelepek unsek ong Ih.​—Mark 12:28-​30; Luk 4:⁠8.

13. Dahme kahrehda Wehin Israel pweipwandkihong Koht peik mehlel, oh dahme pahn kamwekid kapehditail akan en men peikiong Ih? (Eklesiasdes 12:13)

¹³ Kapwaiada sapwellimen Siohwa kosonned kan koaros. Aramas en Israel akan anahne ale mehn kataman me ni arail pahn wiahda inou ong Siohwa, irail inoukihda me re pahn peikiong Ih ni mehkoaros. Irail paiekihda saledek en wia pein arail pilipil, ahpw ong mehkan me Siohwa ketikihdiong kosonned akan, irail uhdahn pahn peik ni mehkoaros. Ni arail pahn kapwaiada e pahn wia kadehdehpen arail limpoak ong Koht oh pahn ale kamwahu kan ong irail oh neirail seri kan pwehki sapwellimen Siohwa koasoandi kan wiawihda ong kamwahuparail.​—Eksodus 19:5-8; Deuderonomi 5:27-​33; 11:22, 23.

14. Iaduwen Koht ah ketin kasalehiong Israel kesempwal en mwohneki mahs mehkan me ngehnin?

¹⁴ Kesempwaliki mahs mehkan me ngehnin. Kaweid kohwong Wehin Israel en dehr nsenohkihla anahn en war akan oh kahrehiong ar kasokala wiewia kan en pali ngehn. Mour en mehn Israel akan uhwongete rapahki mehkan me sohte katepe. Siohwa kin ketin katohrehla ahnsou nan ehu ehu wihk ah koasonehdi en wia ahnsou sarawi, ahnsou me koasoandi ohngete wiewia kan en kaudok ong Koht mehlelo. (Eksodus 35:1-3; Nempe kan 15:32-​36) Ehu ehu pahr, ahnsou tohrohr kin koasoandi ong kasarawi kan. (Lipai 23:4-​44) Soangen ahnsou pwukat kin kihda ahnsou mwahu aramas akan en kin koasoiapene nanpwungarail duwen sapwellimen Siohwa wiewia kehl akan, irail en pil katakataman sapwellime ahl akan, oh en pil kasalehda kalahngan pwehki sapwellime irair mwahu kan koaros. Nin duwen pwihn en aramas ieu me kin kasalehda arail lelepek ong Siohwa, irail pahn keirada nan arail lahn Koht oh limpoakohng Ih oh pahn alehdi sawas en keid nan sapwellimen Siohwa ahl akan. (Deuderonomi 10:12, 13) Mour en kaweid akan koaros me mih nan Kosonnedo kin wia kamwahu ong sapwellimen Siohwa ladu kan nan rahnwet.​—Ipru 10:24, 25.

Kesempwaliki oh Perenki Sapwellimen Koht Irair akan

15. (a) Iaduwen perenki sapwellimen Siohwa irair kaselel kan kin wia kamwahu ong Moses? (b) Iaduwen atail kak kaloalehla atail wehwehki sapwellimen Koht mahk, oh dahme kahrehda met kesempwal?

¹⁵ Kesempwaliki oh perenki sapwellimen Siohwa irair akan pahn pil sewese Moses ni ah kin apwahpwalih aramas akan. Eksodus 34:5-7 mahsanih me Koht ket mwohn Moses oh mahsanih: “Ngehi, Siohwa, Koht emen me diren kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel. I kin kapwaiada ei inou ong me ngeder, oh kin mahkohng me suwed kan oh me dipan akan; ahpw I uhdahn pahn kalokehki seri kan oh nein neirail kan lel ni dih kesiluh oh kapahieu pwehki dipen samarail kan.” Medemedewe mahs nan kapehdomw mahsen pwukat. Pein idek rehmw: ‘Ia wehwehn ehu ehu irair pwukat? Ia mwomwen Siohwa ah kin ketin kasalehda ehu ehu irair pwukat? Ia mwomwen irail Kristian sounapwalih kan pil kak kasalehda irair wet? Ia mwomwen sapwellime irair ah kin kamwakid atail mour?’ Kitail pahn kilang duwen ekei karasepe kan.

16. Iaduwen kitail kak kaloalehla atail wehwehki sapwellimen Koht mahk, oh dahme kahrehda met kesempwal?

¹⁶ Siohwa iei “Koht emen me mahk oh kadek.” Ma mie omw pwuhk me ede Insight on the Scriptures, ke soh wadek wehwehn “Mahk” (“Mercy”)? De wia omw roporopki lepin mahsen lepet nan Watch Tower Publications Index de nan prokram en computor Watchtower Library (CD-ROM).a Doadoahngki concordance pwehn rapahki iren Pwuhk Sarawi kan me kin mahsanih duwen mahk. Ke pahn kilang me likin Siohwa ah kin ketin kamarahrahla kalokolok, sapwellimen Siohwa mahk kin ketin kasalehda limpoak. E kin kahrehong Koht en kin ketikihda kamaiaupen aramas akan. Kasalepen met, Koht kin ketikihda ahn mehn Israel akan anahn akan en paliwar oh pil pali ngehn nin doken arail seiseiloaklahng nan Sapwen Inou. (Deuderonomi 1:30-​33; 8:4) Siohwa kin ketin mahk ohng irail ni ahnsou me re kin wiahda sapwung kan. E kin ketikihda mahk ong sapwellime aramas akan kawao. Eri, e kesempwal sapwellime ladu kan nan rahnwet en kasalehda limpoak ong emen emen!-Madiu 9:13; 18:21-​35.

17. Iaduwen atail wehwehkihla sapwellimen Siohwa irair en kadek-sapan ah pahn kak kangoangehda atail perenki kaudok mehlel?

¹⁷ Sapwellimen Siohwa kadek kin pil iang sapwellime mahk. Iaduwen omw pahn kawehwe ia wehwehn “kadek” (“gracious”)? Ke kak kilang dahme iren Pwuhk Sarawi kan mahsanih duwen sapwellimen Siohwa kadek. Pwuhk Sarawi ketin kasalehda me sapwellimen Siohwa irair en kadek kin pidada kupwurohkihla irail akan me paisuwedla nanpwungen sapwellime aramas akan. (Eksodus 22:26, 27) Nan wehi koaros, aramas en keiru kei oh pil meteikan kin kak apwalada. Ni ahnsou me Siohwa kin ketin padahkiong sapwellime aramas akan en dehr lipilipilki aramas oh en kasalehong soangen aramas pwukat kadek, e kin ketin katamankin irail en tamanda pwe irail pil wiahier aramas en keiru kei nan sapwen Isip. (Deuderonomi 24:17-​22) Ah iaduwen kitail sapwellimen Koht aramas akan nan rahnwet? Ma kitail kin kasalehda kadek, e pahn kaminimin kitail pene oh e pil kin kamwekid kapehden meteikan en iang kaudok ong Siohwa.​—Wiewia 10:34, 35; Kaudiahl 7:9, 10.

18. Dahme kitail sukuhliki sang kehkehlik kan me Siohwa ketikihong Wehin Israel pwehn kalekehkin irail elen mour akan en aramas sang wehi teikan?

¹⁸ Ahpw, mehn Israel akan sohte pahn kesempwaliki kasalehda kadek oh nsenohki aramas nan sahpw teikan laudsang arail poakohng Siohwa oh sapwellime koasondi en tiahk mwakelekel. Kahrehda, mehn Israel akan ale kaweid en dehr alasang tiahk en wehi kan me pidakih irailpene kan oh irail dehpa alehiong irail tiahk en arail kaudok kan oh arail elen mour samin akan. (Eksodus 34:11-​16; Deuderonomi 7:1-4) Met pil duwehte kitail nan rahnwet. Kitail en wia aramas mour mwakelekel kei, duwehte Koht, Siohwa, me sarawi.​—1 Piter 1:15, 16.

19. Iaduwen wehwehkihla kupwuren Siohwa ong wiewia sapwung ah pahn pere sapwellime aramas akan?

¹⁹ Pwe en ketin mwahngih ni mehlel me Moses wehwehki sapwellimen Siohwa ahl akan, E ketin kadehdehda me E sohte kupwurki wia dihp, E kin ketin pwand en engiengda. E kin ketikihong aramas akan ahnsou itar en sukuhliki sapwellime koasondi kan oh kapai irailada. Ni aramas ar kin koluhkihla dipahr akan, Siohwa kin ketin mahkohng dipahr akan, ahpw E sohte kin ketin pweiek sang ah kin ketin kaloke dihp toutou kan, ni sohte lipilipilki aramas. E padahkiong Moses me dih en mwuhr akan pahn kakete iang dolung imwi, ma mwahu de suwed, en dahme mehn Israel akan wiahda. Wehwehkihda ni mehlel sapwellimen Siohwa ahl akan pahn kak pere sapwellimen Koht aramas akan en dehr ikidiki Koht pein arail sapwung kan de pil kose me dene Koht me kin ketin mwekid pwand.

20. Dahme pahn kak sewese kitail en wia mwekid konehng ong iangatail me pwoson akan oh pil ong irail oko me kitail kin tuhwong nan atail wasahn kalohk? (Melkahka 86:11)

²⁰ Ma ke men kaloalehla ahmw wehwehki duwen Siohwa oh sapwellime ahl akan, eri kaukaule onop Paipel oh doudouloale mehkan me ke wadek nan Paipel. Tehk kanahieng sapwellimen Siohwa irair kapwuriamwei kan. Medemedewe oh kapakap duwen omw pahn kahlemengih Koht oh doadoahngki kaweid sang Koht nan omw mour. Met pahn sewese kumwail en pere kumwail en dehr pwupwudi nan dihp, oh wiewia mwahu ong iengemwail kan nan pwoson, oh pil sewese meteikan en esehla oh poakohng atail Koht lingano.

[Nting tikitik me mi pahs]

Dahme Ke Sukuhliki?

• Dahme kahrehda irair en opampap wia irair kesempwal ieu ong Moses, oh dahme kahrehda e kesempwal ong kitail?

• Ia kamwahu me kohsang ahn Moses kaukaule salkihong Parao sapwellimen Siohwa mahsen?

• Ia ekei iren kaweid kaselel akan me Moses sukuhliki, oh met pil dokedoke kitail?

• Iaduwen atail kak kaloalehla atail wehwehki sapwellimen Siohwa irair kaselel akan?

[Kilel nan Pali 7]

Ni lelepek Moses ketikihong Parao sapwellimen Siohwa mahsen

[Kilel nan Pali 9]

Siohwa ketin kasalehiong Moses sapwellime koasondi teng kan

[Kilel nan Pali 10]

Doudouloale duwen sapwellimen Siohwa irair kaselel akan