‘Ken Kasalehda Kanengamah Oh Pereiukasang Me Suwed’

“Ladun Kauno men en dehr akamai. E pahn kin kadek ong aramas koaros, . . . oh kasalehda kanengamah oh kin pere pein ih sang me suwed.”​—2 TIMOTY 2:24, NW.

1. Ni atail kin wia atail pwukoahn Kristian akan, dahme kahrehda kitail kin tuhwong aramas akan me kin lokaia lemei?

IA AHMW pepehm ni ahnsou kan me ke kin tuhwong irail akan me sohte kin pwungkin uhk de dahme ke welwelian? Ni ah kawehwehda duwen imwin rahn akan, wahnpoaron Pohl kohpada me aramas akan pahn “karaun likamw, . . . kamwakara, lemei.” (2 Timoty 3:1-5, 12) Ele ke pahn tuhwong soangen aramas pwukat nan wasahn kalohk de pil wasa teikan.

2. Iren Pwuhk Sarawi dah kan me kak sewese kitail en kak mwahu ong aramas me kin lokaia lemei ong kitail?

² Kaidehk irail koaros me kin lokaia lemei sohte perenki dahme pwung. Apwal laud akan de pwunod kak kahrehda aramas en lokaia lemei de lingeringer ong me mih limwahrail. (Eklesiasdes 7:7) Aramas tohto kin wia met pwehki irail kin mour oh doadoahk nan wasa kan me lokaia lemei oh suwed kin kalapw wiawi. Met sohte kihong Kristian akan kahrepe ehu en wia soahng wet, ahpw e kin sewese kitail en kak wehwehki dahme aramas teikan kin wiahki soahng wet. Ia pahn mwomwen atail mwekid ni ahnsou kan me aramas lokaia lemei ong kitail? Lepin Padahk 19:11 mahsanih: “Ma ke me loalokong, ke pahn kak kanengamahiong omw lingeringer.” Oh Rom 12:17, 18 kaweidkin kitail: “Kumwail dehr dupungkihong me suwed. . . . Kumwail wia uwen amwail kak pwe kumwail en ahneki popohl rehn aramas koaros.”

3. Iaduwen meleilei kin pidada rohng me kitail kin kalohki?

³ Ma kitail aramas meleilei kei, e pahn sansalda sang ni atail wiewia kan. E pahn sansalda ni mwomwen atail koasoi oh wiewia, ele pil sang ni mwomwen masatail oh ngilatail. (Lepin Padahk 17:27) Ahnsou me e kadarpeseng sapwellime tohnpadahk ko pwe irail en kohla kalohk, Sises kaweidkin irail: “Ni amwail pahn kin pedolong nan ihmw ehu, amwail rahnmwahu en kin duwe met: ‘Popohl ong tehnpas wet.’ Ma tohn ihmwo pahn kasamwo kumwail, amwail popohl pahn mihmihte rehrail; a ma re sohte men kasamwo kumwail, a kumwail pwurehng amwail popohl.” (Madiu 10:12, 13) Rohng me kitail kin lohkiseli iei Rongamwahu. Pwuhk Sarawi kin koasoiahki rong wet “Rongamwahu en popohl,” “Rongamwahu en sapwellimen Koht kadek sapan,” oh “Rongamwahu en Wehio.” (Episos 6:15; Wiewia 20:24; Madiu 24:14) Me keieu kesempwal iei en ehukihong meteikan Rongamwahu sang Mahsen en Koht, ah kaidehn en kauwe dahme irail kamehlele oh akamai ong irail.

4. Dahme kitail kak nda ma emen ndahiong kitail “I sohte men rong” mwohn ahmw kak kawehwehong kahrepen ahmw kohla reh?

⁴ Mwein tohnihmwo pahn ndaiong uhk, “I sohte men rong.” Pali laud en ahnsou ke kak nda, “I men wadek ong komwi ehute ire mwotomwot sang nan Pwuhk Sarawi.” Ele mwein e pahn mweidada. Nan ekei irair, ele e pahn konehng en nda: “I kasikasik ien kak ehukihong komwi duwen ehu ahnsou me pahn sohlahr kopwung sapahrek oh aramas akan pahn kak limpoakpene.” Ma tohnihmwo sohte kasalehda me e men kalaudehla ah sukuhliki Mahsen en Koht, ele ke kak kapataiong: “Ahpw e sansal me ahnsouwet kaidehn ahnsou mwahu ehu ong komwi.” Ma tohnihmwo sohte ngihlmwahu ni eh sapeng uhk, met wehwehki me tohnihmwo “sohte warohng”? Mendahki soangen mwohmw dah me irail wia, tamataman ire me Pwuhk Sarawi kaweidki duwen en “kadek ong aramas koaros, . . . oh kasalehda kanengamah oh pereiukasang me suwed.”​—2 Timoty 2:24.

Sohl kin Wia Dahme Suwed Pwehki E Sehse Dahme E Wiewia

5, 6. Dahme Sohl wiaiong sapwellimen Sises tohnpadahk kan, oh dahme kahrehda e mwekid ni soangen ahlo?

⁵ Nan senturi keieu, mie emen ohl me adaneki Sohl me aramas akan kin pohnesehki duwen eh koasoi loamwomw oh tiahk lemei. Pwuhk Sarawi kasalehda me e kin “men kemehla tohnpadahk en Kauno.” (Wiewia 9:1, 2) Mwuhr, e wehkada me e kin “lahlahwe mahso, oh pil kaloke oh kauwe.” (1 Timothy 1:13) Mendahki ekei kise ko wialahr Kristian kei, e wehkada duwen eh wiewia kan ong sapwellimen Krais tohnpadahk ko: “I inenen lingeringerkin irail; ihme kahrehda I pil kohkilahr nan kahnimw en wehin liki kan pwe I en kaloke irail.” (Wiewia 23:16; 26:11; Rom 16:7, 11) Sohte wasakis kasalehda me tohnpadahk ko song akamai ong Sohl mwohn wehi pokon ni e kin wiahiong irail mwohmw suwed akan.

⁶ Dahme kahrehda Sohl wia met? Sounpar kei mwuri e ntingihdi: “Ei saikinte pwoson me kahrehiong ie ei sehse dahme I wiewia.” (1 Timoty 1:13) E wia Parisi men me sukuhl laud oh “aleier peneu kehlail nan Kosonned en samatail kahlap ako.” (Wiewia 22:3) Mendahki en Sohl sounpadahk Kamaliel sohte kin lipilipilki aramas, samworo lapalap Kaiapas me Sohl kin patehng kin wia aramas suwed emen. Kaiapas kin kaun mwekid suwed oh met imwikihla kamakamalahn Sises Krais. (Madiu 26:3, 4, 63-​66; Wiewia 5:34-​39) Mwurin mwo, Kaiapas tehkada mwahu pwe sapwellimen Sises wahnpoaron ko en lelohng kamakam, oh e kehkehlikiong irail en tokedihsang kalohk ni mwaren Sises. Kaiapas me kaun en Sanhedrin me imwikihla en Stipen eh wisikla oh kostakaidi. (Wiewia 5:27, 28, 40; 7:1-​60) Sohl iang kadehde kostakaidi en Stipen oh Kaiapas kihong ih manaman en doula oh nantihong katokehdi doadoahk en sapwellimen Sises ko ni eh sali iraildi nan Damaskus. (Wiewia 8:1; 9:1, 2) Ki kaweid en Kaiapas, Sohl lemehiong me dahme e wia iei kasalepen eh ngoangki oh uhki Koht, ahpw ni mehlel sohte ah pwoson mehlel. (Wiewia 22:3-5) Pwehki met, Sohl sohte ese me Sises me uhdahn Mesaia. Ahpw mwuhr, Sohl tehkada me e sapwung ni ahnsou me Sises me kaiasadahr mahseniong ih nanial me kolahng Damaskus.​—Wiewia 9:3-6.

7. Dahme wiawihong Sohl ni eh tuhwong Sises pohn ahl me kohlahng Damaskus?

⁷ Ahnsoukis mwuri, tohnpadahk Ananias pekederlahng pwehn kalohk ong Sohl. Iaduwen​—⁠ke lemeleme me ke pahn ngoangki kalohk ong Sohl? Ananias ekis perki tuhwong Sohl, ahpw e koasoiong Sohl ni ahl kadek. En Sohl madamadau oh wiewia wekila pwehki manaman me wiawi ni eh tuhwong Sises pohn ahl me kolahng Damaskus. (Wiewia 9:10-​22) Mwuhr e uhd adaneki Pohl, oh wiahla wahnpoaron oh misineri en Kristian ngoang men.

Aktikitik Ahpw Eimah

8. Iaduwen Sises kasalehda irairen Semeo ong irail kan me kin wia me suwed?

⁸ Sises wia sounkalohk ngoang men en Wehio me inenen aktikitik oh eimah ni eh kin sewese aramas akan. (Madiu 11:29) E kin kasalehda irair en Seme nanleng, me kin kangoange me suwed akan en tokedihsang ahr wiewia suwed kan. (Aiseia 55:6, 7) Ni eh kin sewese me dipan akan, Sises kin tehk kanahieng irairen wekidekla kan me mie, oh e kin kangoange soangen aramas pwukat. (Luk 7:37-​50; 19:2-​10) E sohte kin kadeik aramas akan pwehki mwomwe arail, ahpw Sises kin kahlemengih Seme me kin kalahngan, kadek oh kanengamah ni eh kin koapworopworki me irail pahn koluhla. (Rom 2:4) Kupwuren Siohwa iei me aramas koaros en koluhla pwehn komourala.​—1 Timoty 2:3, 4.

9. Dahme kitail kak sukuhlkihsang en Sises kapwaiada kokohp en Aiseia 42:1-4?

⁹ Pwehn kasalehda sapwellimen Siohwa madamadau ong Sises Krais, soun nting en Rongamwahu, Madiu ntingihdi mahsen en kokohp: “Iet ie laduwo, me I piladahr, kompoakepahio me I kin popohlki. I pahn audehkihda Ngeni, oh e pahn padahkihong aramas koaros duwen pwungen ei kadeik. E sohte pahn kamworongada wasa, e sohte pahn weriwer, e pil sohte pahn lokaia ni ngihl laud pohn ahl akan; sohte ahlek pu pwoat e pahn kauwehla, sohte lamp me pahn kunlahr ehu e pahn kakunla, sapwellime pwuhng lao pahn kaunda wasa; oh tohn wehi koaros pahn koapworopworkihla mware.” (Madiu 12:17-​21; Aiseia 42:1-4) Pahrekiong mahsen en kokohp pwukat, Sises sohte kin pidada akamai en kamwoarong kan. Ni ahnsou me e pil kin mih pahn songosong, e kin koasoi mehlel oh kin kamwekid irail me mongiong mehlel kan.​—Sohn 7:32, 40, 45, 46.

10, 11. (a) Mendahki Parisi kan kin kauwe Sises, dahme kahrehda e kin kalohk ong ekei irail? (b) Soangen pasepeng dah kan me Sises kin wia ong me uhwong ih kan, ahpw dahme e sohte wia?

¹⁰ Ahnsou me e kin kalkalohk, Sises kin padahk ong Parisi tohto. Mendahki ekei irail kin nantihong en kadeikada ih ki soahng kan me e kin padahkki, Sises sohte kin medewe me irail koaros aramas suwed. Saimon, me mahs wia Parisi suwed men, me men tuhwong Sises luhke ih en iang ih mwenge. Sises alehda luhk wet oh kalohk ong irail me iang mih mwo. (Luk 7:36-​50) Pil ehu ahnsou, emen Parisi ndand me adaneki Nikodemas kohla rehn Sises ni pwong pwe aramas de kilang ih ahpw Sises sohte lipwoare ih ki eh awiawih lao wasa pwong ahpw pwurala. Ahpw, e kalohk ong Nikodemas duwen limpoak me Koht ketin kasalehda ni eh kadarodo sapwellime Ohl pwehn kak ritingada ahl ong aramas pwoson akan en alehdi mour soutuk. Sises pil kasalehda ni kadek kesempwalpen peikiong sapwellimen Koht koasoandi. (Sohn 3:1-​21) Nikodemas mwuhr koasoiada kamwahu akan en Sises ni ehu me Parisi teikan kauwe Sises.​—Sohn 7:46-​51.

¹¹ Sises kak kilang uwen mwalaun en irail ako me nannantiong en lidipiedi ih. E sohte mweidala soun uhwong pwukat en kahrehong ih pidada nan akamai soh katepe kan. Ahpw, ahnsou akan me konehng, e kin doadoahngki pasapeng kan me mwotomwot ahpw kehlail ni eh kin koasoiada mour en kaweid ehu, doadoahngki karasaras ieu, oh doadoahngki iren Pwuhk Sarawi ehu. (Madiu 12:38-​42; 15:1-9; 16:1-4) Ekei pak Sises kin nennenlahte oh sohte sapeng ni ahnsou akan me e kilang e pahn sohte katepe.​—Mark 15:2-5; Luk 22:67-​70.

12. Mendahki aramas akan pil wer ong Sises, dahme kahrehda e kak sewese irail?

¹² Ekei ahnsou, aramas akan me mihla pahn manaman en ngehn saut akan kin wer ong Sises. Ahnsou me soahng wet kin wiawi, e kin kasalehda kanengamah oh pil doadoahngki manaman me Koht ketikihong ih pwehn kamwahuwihala irairo. (Mark 1:23-​28; 5:2-8, 15) Ma ekei aramas kin lingeringerda oh wer ong kitail ni ahnsou me kitail kalohk, kitail pil anahne kasalehda kanengamah, oh kitail anahne kasalehda kadek oh tiahk mwahu nan soangen irair wet.​—Kolose 4:6.

Anahnepen Kanengamah nan Peneinei

13. Dahme kahrehda ekei pak aramas akan kin uhwong kisehrail kan me kin tepida onop Pwuhk Sarawi rehn Sounkadehdehn Siohwa kan?

¹³ Anahnepen sapwellimen Sises tohnpadahk kan en kasalehda kanengamah kin sansalda nanpwungen peneinei. Aramas emen me kin inenen mwekidkihda mehlel en Pwuhk Sarawi kin pil men eh peneinei kan en ahneki soangen pepehmohte. Ahpw, Sises kasalehda me kisehn peneinei kan ele pahn uhwong. (Madiu 10:32-​37; Sohn 15:20, 21) Mie kahrepe tohto me soahng wet kin wiawihki. Karasepe ehu, padahk en Pwuhk Sarawi kin kasukuhliong kitail en mehlel, koahiek, oh wauneki meteikan, oh ahnsowohte e pil padahkiong kitail me atail pwukoa keieu laud iei ong Sounkapikpatailo. (Eklesiasdes 12:1, 13; Wiewia 5:29) Emen kisehn peneinei me pahn pehm me eh manaman tikitikla pwehki atail loaloapwoat ong Siohwa ele pahn nsensuwedla pahtail. Nan soangen ahnsou pwukat, e kesempwal kitail en idawehn mehn kahlemeng mwahu en Sises me pid kanengamah!​—1 Piter 2:21-​23; 3:1, 2.

14-16. Dahme wekidala ekei irail akan me mahs kin uhwong kisehn ahr peneinei kan?

¹⁴ Tohto nan rahnpwukat me kin papah Siohwa me ahr pwoud de kisehn ahr peneinei kin uhwong irail pwehki wekidekla kan me kin wiawi ni ahr tepidahr onop Pwuhk Sarawi. Ele irail me uhwong pwukat rongehr ekei koasoi en uhwong kan me pid Sounkadehdehn Siohwa kan, kahrehda irail mwein perki pwe ede kahrehdo soahng suwed kan nan ahr peneinei. Dahme wekidala ahr lamalam? Pak tohto, e kin kohsang mehn kahlemeng mwahu kan. Pwehki me onop Pwuhk Sarawi kin kapwaiada kaweid kan en Pwuhk Sarawi​—kaukaule iang towehda mihding kan koaros oh iang kalohk oh ni ahnsowohte pil kapwaiada arail pwukoahn nan peneinei oh kasalehda kanengamah mendahki lokaia kamedek kan​—kin kak katokehdi uhwong kan en peneinei.​—1 Piter 2:12.

¹⁵ Emen me uhwong ele sohte pahn men rong kawehwe kan sang nan Pwuhk Sarawi pwehki lipilipilki aramas de pohnmwahso. Ih pepehm wet me emen ohl nan United States ahneki me nda me e kin inenen uhki ah wehi. Ehu pak, ahnsou me eh pwoud kohla iang towehda kapokon ieu, e wahda pein ah likou koaros oh kohkohla. Ehu pak, e kohkohsang imweo oh wahda nah kesik pwehn kohla kemehla pein ih. E ikidki me en ah pwoud pelian lamalam me kahrehda eh kin wia soangen mwekid pwuko. Ahpw, eh pwoud kin nantiong kapwaiada kaweid en Pwuhk Sarawi. Sounpar rieisek mwurin liho wiahla Sounkadehdehn Siohwa men, ohlo pil wiahla emen Sounkadehde. Nan Albania emen lih inenen lingeringerkihda nah serepeino eh onop Pwuhk Sarawi rehn Sounkadehdehn Siohwa kan oh papidaisla. Liho kauwehla nein serepeino Pwuhk Sarawi pak 12. Ehu rahn, liho pahkpeseng nein nah serepeino Pwuhk Sarawi kapw me nah serepeino kin kihdi pohn tehpelo. E pahkpesengte oh inenehdi Madiu 10:36, oh nohno menet diarada me ireo kawehwehda duwen ih. Pwehki e nsenohki nah serepeino, e iang ih kohla ni pwoht me nah serepeino oh Sounkadehde teikan pahn dake kohla ni kapokon ehu nan Italy. Ahnsou me liho kilang soangen limpoak me re ahneki, oh ahr kin pwolehdi emen emen oh ahr kin mas peren oh kokouruhrpene, ah pepehm tepida wekidekla. Ahnsoukis mwuri, e pwungkidahr en onop Pwuhk Sarawi. Rahnwet e kin nantiong en sewese meteikan me kin uhwong padahk mehlel.

¹⁶ Ehu pak, emen ohl doadoahngki naip pwehn kamasapwehki ah pwoud, ohlo tuhwong eh pwoud likin Kingdom Hall oh tepida karaun likamwih liho. Liho ni ngihl kadek ndaiong ah pwoudo: “Pidelongdo nan Kingdom Hall, oh pein kilang.” E wia met, oh mwuhr e wialahr emen elder.

17. Ma ekei pak irair akan kin soansuwed nan imwen Kristian akan, mehnia kaweid en iren Pwuhk Sarawi me kak sawas?

¹⁷ Mendahki tohnihmwomw koaros wia Kristian kei, miehte pak me irairen peneinei kan kin soansuwed oh irail pil kin wia lokaia lemei pwehki soh unsek. E inenen katapan kitail en kin tehk kaweid me kohwong mehn Episos ko en mahs: “Kumwail kadohwanewei sang kumwail soangen mwakar koaros, soangen ineng suwed koaros, soangen lingeringer koaros, soangen men pei koaros, weriwer, soangen kauwe koaros, soangen kailok koaros en nan kapehdamwail.” (Episos 4:31, NW) E sansal me soangen irair me re mih loale, pein ahr soh unsek kan, oh ekei pak ahr mour en mahs akan kin mwekid ni soangen irairo. Dahme pahn sewese irail en kak wekila? Arail “mohngiong oh lamalam uhdahn pahn onohnsapahlda.” (Episos 4:23) Ni ahr kin onop Mahsen en Koht, doudouloale duwen ahr pahn doadoahngkiong nan ahr mour, werekiong riatail Kristian akan, oh poadidiong kapakap, wahn ngehn en Koht akan pahn kak pweida nan ahr mour. Irail pahn sukuhliki en “kadekpene oh loallamwahupene, oh mahkpene duwen Koht eh ketin mahkohng kumwail rehn Krais.” (Episos 4:32) Mendahki dahme meteikan pahn wia, kitail anahne kasalehda kanengamah, kadek, loallamwahu, oh mahk. Ei, kitail anahne en “dehr dupungkihong me suwed.” (Rom 12:17, 18) Kasalehda limpoak mehlel ni atail kahlemengih Koht iei me keieun pwung en wia.​—1 Sohn 4:8.

Kaweid ong Kristian kan Koaros

18. Dahme kahrehda kaweid me pwarada nan 2 Timoty 2:24 inenen konehng elder men nan Episos, oh iaduwen Kristian kan koaros kak paiekihda kaweid wet?

¹⁸ Kaweid duwen en “kanengamah ahnsoun apwal” kin pwungiong Kristian koaros. (2 Timoty 2:24) Ahpw, kaweid wet kohwong Timoty, me anahne kaweid wet ahnsou me e kin papah nin duwen elder men nan Episos. Ekei tohnmwomwohdiso kan kasalehda pein arail madamadau kan oh arail padahk sapwung kan. Pwehki irail sohte nohn wehwehki kesempwalpen Kosonned en Moses, irail sohte kin wehwehki kesempwalpen pwoson, limpoak oh nsen mwakelekel. Pohnmwahso kahrehda arail kin akpwungki wehwehn lepin lokaia kan, ahpw pohnsowehla mouren sapwellimen Krais padahk kan oh kesempwalpen lelepek ong Koht. Pwehn kakohng soangen irair ko, Timoty anahne en kawahuwih padahk mehlel en Pwuhk Sarawi ahpw ahnsowohte pil kin kamantik ni eh kin kaweid rie Kristian kan. Duwehte elder kan nan rahnpwukat, Timothy pohnese me kaidehn nah pwihn en Kristian kan oh e anahne kaweid irail ni ahl me pahn kak kahrehdo limpoak en Kristian oh miniminpene.​—Episos 4:1-3; 1 Timoty 1:3-​11; 5:1, 2; 6:3-5.

19. Dahme kahrehda e kesempwal ong kitail koaros en “rapahki opampap”?

¹⁹ Koht kin kangoange sapwellime aramas akan en “rapahki opampap.” (Sepanaia 2:3) Lepin lokaiahn Ipru me kin kawehwehda “opampap” kin wehwehkiong irair ehu me aramas emen kin dadaur mendahki lokolok ni kanengamah, ni sohte lingeringerda oh sohte pelian. Kitail en kaukaule peki sapwellimen Siohwa sawas pwe kitail en kak kanengamah oh wia weliepe mwahu kei, mehnda ma irair akan me apwal.

Dahme Ke Sukuhlki?

• Ahnsou kan me aramas kin lokaia lemei ong uhk, mehnia iren Pwuhk Sarawi me kak sewese iuk?

• Dahme kahrehda Sohl kin wia tiahk lemei?

• Iaduwen mehn kahlemeng en Sises kin sewese kitail en kak ehuiong soangen aramas koaros?

• Soangen kamwahu dah kan me pahn kohsang ni atail kin kanengamah ni lokaia nan peneinei?

[Kilel nan Pali 12]

Mendahki aramas tohto kin esehki Sohl ah irair suwed kan, Ananias kin kadek ong ih

[Kilel nan Pali 15]

Kristian emen me kin lelepek ong kapwaiada eh pwukoa kan kak wekidala madamadau en irail me kin uhwong ih nan ah peneinei

[Kilel nan Pali 16]

Kristian kan kin kangoange meteikan en kasalehda limpoak oh miniminpene nanpwungarail