Iren Kasukuhl Me Pid Kadek

KE ESE dahkot lipilipilki aramas?— Lipilipilki aramas wehwehki sohte mwahuki emen pwehki ehu soangen mwomwe de eh lokaia weksang ahmw lokaia. Eri lipilipilki aramas iei en ahneki pepehm oh madamadau sapwung duwen aramas men ni ahmw saikinte esehla soangen aramas dahmen ih.

Ke leme e pwung en sohte mwahuki de pwungki emen mwohn ahmw uhdahn esehla soangen aramas dahmen ih de pwehki eh weksang uhk?— Soh, lipilipilki aramas sohte pwung oh e pil sohte kin kasalehda kadek. Kitail en dehr soh kadek ong emen pwehki e weksang kitail.

Mie me ke ese me pohn kilio weksang uhk de eh lokaia weksang ahmw lokaia?— Mwein mie aramas me ke ese me mwomwarail ehusoahng pwehki paliwararail ohla de soumwahu. Ke kin kadek oh poakohng irail kan me weksang uhk?—

Ma kitail kin rong Sounpadahk Lapalap Sises Krais, kitail pahn kin kadek ong aramas koaros. Kitail en dehr lipilipilki ia wasa me aramaso kohsang ie de ma kilio ehu soangen poh. Kitail anahne kadek ong ih. Mehnda ma kaidehn ih madamadau wet me aramas koaros kin pwungki, ahpw ih me Sises kin ketin padahngki. Eri, kita pahn koasoia duwen met.

Ohlen Suhs emen me kin lipilipilki aramas kohdo rehn Sises oh idek peidek wet, ‘Dahme I anahne wia pwe I en kak ale mour soutuk?’ Sises mwahngih me ohlo song en kahrehiong Sises en mahsanih me kitail anahne kadek ongete atail keinek de tohnsapwatail. Sises sohte ketin sapengla peideko ahpw e ketin idek rehn ohlo: “Dahme Pwuhk Sarawi mahsanih?”

Ohlo sapengki: ‘Ke en poakohng Siohwa ahmw Koht sang nan mohngiong unsek oh ke en poakohng mehn mpomw duwen ahmw kin poakohng pein kowe.’ Sises mahsanih: “Me pwung omw pasapengen. Eri, kapwaiada men, ke ahpw pahn mourla.”

Ahpw ohlo sohte men kadek de poakohng aramas me weksang ih. Ih eri song en diar kahrepen eh sohte pahn wia met. Ih eri idek rehn Sises: ‘Ihs me uhdahn mehn mpei?’ Mwein ohlo men Sises en mahsanih: “Mehn mpomw kan iei kompoakepahmw kan” de “Irail akan me duwe iuk.” Pwehn sapengla peideko, Sises ketin kasalehda duwen karasaras ehu duwen mehn Suhs men oh mehn Sameria men. Iet karasaraso.

Ohlen Suhs men kohkohdihla sang Serusalem ong Seriko. Ni eh alialu kohla, loallap ekei ahpw koledi ih. Irail eri wokihedi nan ahlo oh kihsang nah mwohni oh eh likou kan. Loallap ko keme oh kesehdi ni keilen ahlo ni eh kereniongehr mehla.

Mwurin ahnsoukis, samworo men keididihla nanialo. E kilangada ohl me ohla laudo. Ma kowe mwo, dahme ke pahn wia?— Samworowo douluhllahsang keid apali ahlo. E sohte mwahn uhdi oh wia mehkot pwehn sewese ohlo.

Emen ohl me pwoson pil keid nan ahlohte. Ih emen mehn Lipai me kin papah nan tehnpas sarawi nan Serusalem. E pahn uhdi oh sewese ohlo?— Soh, e wia duwehte samworowo.

Eri, mehn Sameria men uhd keid nanialohte. Ke kak kilang eh wie kohkohdihdo nanialo?— E kilangada ohlen Suhs me wonohno oh e ohla laud. Eri, pali laud en mehn Sameria oh mehn Suhs akan kin kailongki emenemen. (Sohn 4:9) Ia duwe, ohlen Sameriao pahn kohkohla oh sohte sewese ohlen Suhso? E pahn medewe, ‘Ia kahrepen ei pahn sewese mehn Suhs menet? E sohte pahn sewese ie ma ngehi me mi nan eh irairo’.

Ahpw ohlen Sameriao kilang ohlo eh wie wonohn naniahlo oh e poakehla. E pehm me e sohte kak mweidalahte ohlo pwehn mehla wasao. Ih eri doudisang were dongkio oh kohla rehn ohlo oh tepida kamwahuih eh ohla ko. E kihong leh oh wain pwe met pahn sewese kamwahwihala. Ih eri kidimpene eh ohla ko.

Ohlen Sameriao eri kidahng ohlo pohn dakepeo. Ira eri wawai kokohdihla naniahlo lao re lel ni imwen keiru ehu de kisin hotel kis. Ohlen Sameriao alehda wasakis pwe ohlo en mihmi ie oh e apwalih mwahu ohlo.

Sises eri ketin idek rehn ohl me e mahmahseniongo: ‘Ihs rehn ohl silimen pwukat me wia mehn mpe mwahu men?’ Dahme ke pahn sapengki peidek wet? Samworowo, de mehn Lihpaio de ohlen Sameriao?—

Ohlo eri sapeng: ‘Ohl me uhdi oh sewese ohl me ohlao.’ Sises eri mahsanih: ‘Ke pwung. Kohwei oh wiahda duwehte.’​—Luk 10:25-37.

Met sou wia karasaras mwahu ehu? E kin kasalehda ni sansal ihs me wia mehn mpatail kan. Kaidehn ihte kompoakepatail keren kan. Oh kaidehn irail kante me duwehte pohn kilitail de me kin lokaiahki atail lokaia. Sises ketin padahkihong kitail en kadek ong aramas koaros sohte lipilipil ia wasa re kohsang ie, ia mwomwarail de mehnia lokaia me re kin doadoahngki.

Ih duwen Siohwa Koht. E sohte kin ketin lipilipilki aramas. Sises mahsanih: ‘Samamwail me ketiket nanleng kin ketin dakerki sapwellime ketipin pohn me suwed oh me mwahu kan, oh kin ketin kamwerehdi keteu pohn me lelepek kan oh me dipan akan.’ Eri, kitail anahne kadek ong aramas koaros duwehte Koht.​—Madiu 5:44-48.

Eri ma ke kilang emen medekla, dahme ke pahn wia?— Ia duwen ma aramaso kohsang nan ehu sahpw tohrohr de pohn kilio weksang pohn kilimwen? E wia mehn mpomw oh ke anahne sewese ih. Ma kowe kisin seri me sohte kak sawas, eri ke kak peki sawas sang rehn emen me laud. De ke kak eker emen pilismen de emen sounpadahk nan sukuhl. Soahng pwukat kin kasalehda kadek duwehte ohlen Sameriao.

Sounpadahk Lapalapo kupwurki kitail en kadek. E kupwurki kitail en sewese meteikan sohte lipilipil ihs irail. Ih kahrepen eh mahsanih duwen karasaras en ohlen Sameria kadeko.