Duen Sises Ah Kin Padahk

EHU rahn Sises mahsanih ong ohl emen me ih en poakong mehn impe. Ohlo idek rehn Sises: ‘Ihs me mehn impei?’ Sises ese dahme ohl menet medemedewe. Ohlo lemeleme me aramas sang pein ah kainok oh pali en lamalam me mehn impe. Eri kitail pahn kilang dahme Sises padahkiong ih.

Ekei ansou Sises kin doadoahngki soi ni ah kin padahk. Eri ihme e wia met. E koasoaiada soi pwoat duen emen mehn Suhs oh emen mehn Samaria. Kitail sukuhlikiehr me kereniong mehn Suhs koaros kin kailongki mehn Samaria. Eri, iet soio:

Ehu rahn ohl en Suhs men kohkohdihla Seriko pohn ahl en nan nahna. Ah loallap kan parokedi ih. Irail pirapsang nah mwohni oh kame ih lao e kereniong mehla.

Mwuhri, samworo en mehn Suhs men aluhdo pohn ahlo. E kilang ohlo me kereniong mehla. Dahme ke lemeleme me a wia? Eri ihte me e wia, keila apali ahlo oh doululwei. Pil emen ohl sarawi aluhdo pohn ahlo. Menet mehn Lipai. E uhdi? Soh, e sohte uhdi pwen sewese ohlo me kamakamehr oh kereniong mehla. Ke kak kilang samworo oh mehn Lipai ekis dohwei pohn ahlo.

Ahpw kilang ihs me mi rehn ohl kamakamdahro. Ih ohl en Samaria men. Oh e sewese mehn Suhs men. E kihong wini ni ohla en ohlo. Mwuhri, e alehda ohl en Suhso oh wahla wasakis me e kak kommoal oh kehlailada.

Mwehrin ah kaimwisekela soio, Sises eri peidek rehn ohlo me idek reh peideko: ‘Ihs nanpwungen ohl silimen pwukat ah wiewia kansansalehda e mehn impen ohl me kamakamdahro? Samworo, mehn Lipai de mehn Samariao?’

Ohio sapeng: ‘Ohl en Samariao. E kadek ong ohlo me kamakamdahro.’

Sises mahsanih: ‘Kowe meid pwung. Eri kohwei oh wiaiong mehteikan duwehte me e wia.’

Ke soh perenki duen ahn Sises kin padahk? Kitail kak sukuhliki soahng tohto oh kesempwal ma kitail pahn rong dahme Sises mahsanih nan Paipel, kaidehn?