Dahme Uhdahn Kesempwal?

EHU rahno ohl emen kohdo rehn Sises. E ese me Sises uhdahn loalokong kahrehda e idek reh: ‘Maing Sounpadahk, komw mahsanihong mahs rieio en kihong ie ekei eh dipwisou ko.’ Ohlo medewe me e konehng en ahneki ekei en rieo dipwisou ko.

Ma kowe Sises, dahme ke pahn nda?— Sises mwahngih me mie en ohlo kahpwal. Ahpw kahpwal wet kaidehn iei eh men ahneki en rieo dipwisou ko. En ohlo kahpwal iei eh sohte ese dahme uhdahn kesempwal nan mour.

Nna kita medewe mahs duwen met. Dahme pahn keieu kesempwal ong kitail? Iei en naineki mehn mwadong kan, de en ahneki likou kapw kan?— Soh, mie mehkot me kesempwal sang mepwukat. Oh ih me Sises kupwurki padahkihong ohlo. Ih eri mahsanih duwen ohl emen me manokehla Koht. Ke men rong duwen met?—

Ohl menet uhdahn kepwehpwe. Mie sapwe oh eh imwen nahk kan. Wahnsahpw akan me e kin padokedi kin pweida mwahu. Kahrehda eh imwen nahk ko solahr itar ong eh wahnsahpw ko. Eri, dahme ohlo pahn wia? Ohlo eri nda: “I pahn kauwehla ei imwen nahk kan, ahpw uhd kauwada ekei me laudsang, wasa I pahn nekidala ie wahn sapweiet oh ei kepwe kan koaros.”

Ohl kepwehpweo medewe me ih met me konehng en wia. E lemeleme me e uhdahn loalokong pwehki eh pahn kihpene dipwisou tohto. Ih eri nda: ‘I ahneki kiden kepwe mwahu, me wia nekinekohng sounpar tohto. Nna, I pahn kommoalla; kamakamadipw; papaieki ei dipwisou kan, oh pereperenki!’ Ahpw mie mehkot sapwung nan eh madamadau. Ke ese dahkot mwo?— E kin medemedewehte pein ih oh eh nsenamwahu. E manokehla Koht.

Koht eri mahsanihong ohl kepwehpweo: “Aramas pweipwei men kowe! Pwongpwong wette ke pahn mehla; a ihs me pahn ahneki omw kepwe kan me ke koasoakepenehr?” Ohl kepwehpweo kak doadoahngki dipwisou pwukat mwurin eh mehla?— Soh, emen tohrohr me pahn doadoahngki. Sises ketin usehlahte mahsanih: ‘Ih duwen met me kin wiawi ong aramas akan me kin koasoakepene ong pein irail kepwehn sampah, ahpw semwehmwe mwohn Koht.’​—Luk 12:13-21.

Ke sohte men duwehte ohl kepwehpwe menet, kaidehn?— Dahme e kin keieu kesempwalki nan mour iei en kepwehpwehkihla dipwisou kan. Ia uwen eh sapwung. E sohte kin itarki dahme mie. Mwohn Koht e sohte kepwehpwe.

Aramas tohto kin duwehte ohl kepwehpwe menet. Re sohte kin itarki dahme re ahneki. Oh met kak kahrehiong irail nan kahpwal laud tohto. Karasepe, mie noumw mehn mwadong?— Soangen mehn mwadong dah me ke naineki?— Ia duwen ma emen kompoakepahmw naineki mpwei ehu de toahl ehu de pil mehn mwadong teikan me sohte noumw? E konehng ken ndaiong ahmw pahpa oh nohno en pwainda ehu noumw?—

Ekei pak mehn mwadong kin mwomwen kesempwal. Ahpw dahme kin wiawihong mehn mwadongo mwurin ahnsou kis?— Mwein e kin meringla de ohla, oh ke solahr men naineki. Mie mehkot me uhdahn kesempwal sang mehn mwadong kan. Ke ese dahkot met?—

Met iei ahmw mour. Ahmw mour uhdahn kesempwal pwehki ma sohte met, ke sohte kak wia mehkot. Ahpw ma ke men mour, ke anahne wia dahme Koht kupwurki, kaidehn?— Eri kitail en dehr duwehte ohl kepwehpwe pweipweio me manokehla Koht.

Kaidehn serihte me kin wia mehkot pweipwei duwehte ohl kepwehpweo. Tohto aramas laud me pil kin wia met. Ekei irail sohte kin itarki dahme mie. Mwein mie kenerail mwenge me itar, arail likou oh wasahn kousoan. Ahpw re sohte kin itarki. Re men ahneki likou tohto. Re men imwaneki ihmw laud. Soahng pwukat pweilaud. Kahrehda irail kin doadoahk laud pwehn alehdi mwohni laud. Ni arail kin alehdi mwohni laud, re pil kin men ahneki dipwisou tohto.

Ekei me laud kan kin nohn kedirepwkihla arail doadoahk en mwohni kahrehda sohla arail ahnsou ong peneinei. Oh solahr arail ahnsou ong Koht. Ia duwe, neirail mwohni kak kolokol arail mour?— Soh, e sohte kak. Re kak doadoahngki neirail mwohni mwurin arail mehla?— Soh pwehki me melahr akan sohte kak wia mehkot.​—Eklesiasdes 9:5, 10.

Eri, e sapwung en naineki mwohni?— Soh. Kitail kak pwainkihda mwenge oh likou. Paipel mahsanih me mwohni wia mehn sawaspatail. (Eklesiasdes 7:12) Ahpw ma kitail limpoakohng mwohni, eri kitail pahn lelohng kahpwal kan. Kitail pahn duwehte ohl kepwehpwe pweipweio me kihpene dipwisou tohto ong pein ih ahpw sohte kepwehpwe mwohn Koht.

Ia wehwehn en kepwehpwe mwohn Koht?— Met wehwehki en mwohneki Koht nan atail mour. Ekei aramas kin nda me re kamehlele Koht. Re lemeleme me en kamehlelehte Koht itar. Ahpw ia duwen, irail uhdahn kepwehpwe mwohn Koht?— Soh, irail duwehte ohl kepwehpweo me manokehla Koht.

Sises sohte kin ketin manokehla Seme me ketiket nanleng. E sohte kin ketin nantihong en wiahda mwohni laud. Oh e sohte sapwellimanki dipwisou tohto. Sises mwahngih dahme uhdahn kesempwal nan mour. Ke ese dahkot met?— Met iei en kepwehpwe mwohn Koht.

Ke kak ndaiong ie ia duwen atail pahn kak kepwehpwehla mwohn Koht?— Kitail kak kepwehpwehla mwohn Koht sang ni atail pahn kin wia soahng kan me kin kaperenda ih. Sises mahsanih: ‘Ahnsou koaros I kin wia mehkan me e kin kupwurperenki.’ (Sohn 8:29) Koht kin kupwurki atail kin wia mehkan me e kupwurki kitail en wia. Ke kak ndaiong ie soahng kan me ke kak wia pwehn kaperenda Koht?— Ke kak wadek Paipel, kohla iang mihting kan en Kristian, kapakap ong Koht oh sewese meteikan en sukuhlki duwen ih. Iei soahng pwukat me keieu kesempwal nan mour.

Pwehki Sises eh kepwehpwe mwohn Koht, ihme kahrehda Siohwa kin ketin apwahpwalih ih. E ketikihong Sises kapai en mour soutuk. Siohwa pahn ketin apwalih kitail ma kitail kin wia duwehte Sises. Eri, kitail en duwehte Sises oh dehr duwehte ohl kepwehpweo me manokehla Koht.