Dahme Kahrehda Kitail En dehr Likamw?

IA DUWEN ma kisin serepein men ndaiong eh nohno: “I pahn mwadang pwurodo mwurin sukuhl.” Ahpw mwuri, e mihmi oh mwadong rehn ienge tohnsukuhl kan oh ahpw ndaiong eh nohno: “Ei sounpadahko me ndaiong ie ien mihmi mwurin sukuhl.” E pahn mwahu en nda met?—

De mwein kisin pwutak emen ndaiong eh pahpao: “I sohte kikimlong mpweio nan ihmwo.” Ahpw ia duwen ma pwutako uhdahn wia met? E pahn sapwung en nda me e sohte wia?—

Sounpadahk Lapalapo ketin kasalehiong kitail dahme pwung en wia. E mahsanih: “Amwail ‘Ei en Ei’ oh ‘Soh en Soh.’ Pwe me kin daulihala met, e kin tepisang rehn Me Suwedo.” (Madiu 5:37, NW) Ia wehwehn dahme Sises mahsanih?— E wehwehki me kitail anahne wia dahme kitail kin nda.

Mie karasepe ehu nan Paipel me kasalehda ia uwen kesempwal en lokaia mehlel. E pid duwen aramas riemen me nda me ira tohnpadahk kei en Sises. Kita pahn kilang dahme wiawi.

E saikinte lel sounpwong riau mwurin Sises pwoula. Aramas tohto kohdo Serusalem sang wasa doh kan pwehn iang kamadipw kesempwal ehu en mehn Suhs me adaneki Pendekos. Wahnpoaron Piter wia padahk kaselel ehu ni eh padahkihong aramas ko duwen Sises me Siohwa ketin kaiasada. Ih tepin ahnsou me irail me tohto me kohdohng Serusalem sukuhlki duwen Sises. Met irail men kalaudehla dahme re ese. Eri, dahme re wia.

Irail mihmi werei sang dahme re koasoanehdi. Ahpw mwurin ahnsoukis, ekei solahr neirail mwohni oh re anahne sawas pwe ren kak pwainda kanarail mwenge. Tohnpadahk kan nan Serusalem men sewese irail. Eri me tohto netikihla arail dipwisou kan oh wahdo mwohniko rehn sapwellimen Sises wahnpoaron ko. Wahnpoaron ko eri kihong mwohni rehn irail kan me anahne.

Ananaias oh eh pwoud Sapaira me wia kisehn mwomwohdisohn Kristian nan Serusalem, netikihla sapwarao. Sohte me ndaiong ira en wia met. Ira me pein pilada. Ahpw ira sohte wia met pwehki ira poakohng sapwellimen Sises tohnpadahk kapw kan. Ira men aramas kan en medewe me ira aramas mwahu kei. Ira eri lemehda en nda me ira kihong mwohni ko koaros pwehn sewese meteikan ahpw ira kihongete ekis mwohnio. Ia ahmw madamadau duwen met?—

Eri Ananaias kohdo tuhwong wahnpoaron ko. E kihong mwohnio rehrail. Ahpw Koht mwahngih me e sohte kihong mwohni ko koaros. Koht eri ketin kahrehiong wahnpoaron Piter en ese me Ananaias sohte mehlel.

Piter eri nda: ‘Ananaias, dahme kahrehda ke mweidkihong Sehdan en wia met? Mwohn ahmw netikihla sahpwo, e wia uhdahn sapwomw. Ke sohte anahne netikihla. Oh pil mwurin ahmw netikilahro, ke kak pilada dahme ke pahn wiahiong mwohnio. Eri a, dahme kahrehda ke pilada en mwomwehda me ke kihdo mwohni ko koaros ni ahmw kihdo ekiste? Kaidehn kiht te me ke pitih, ahpw ke pitih Koht!’

E wia mehkot me inenen laud. Ananaias likamw! E sohte wia dahme e nda. E mwomwehdahte. Paipel padahkihong kitail dahme wiawi mwuri. E mahsanih: “Ni Ananaias eh rong mahsen wet, e ahpw pwupwte mehla.” Koht me ketin kahrehiong en mehla. Mwurin mwo, re wahla paliwereo liki oh sarepedi.

Awa siluh mwuri Sapaira ahpw kohdo. E sohte ese dahme wiawihong eh pwoudo. Piter eri idek reh: ‘Iei met uwen mwohni koaros me kumwa ale sang ni pweinen sahpw me kumwa netikilahro?’

Sapaira sapeng nda: “Ei, ih koaros men.” Ahpw met likamw ehu! Ira koledi ekis mwohnio sang pweinen sapwarao. Koht eri pil ketin kahrehiong Sapaira en mehla.​—Wiewia 5:1-11.

Dahme kitail anahne sukuhlki sang dahme wiawihong Ananaias oh Sapaira?— E padahkihong kitail me Koht sohte kupwurki irail me kin likamw. E kupwurki kitail en lokaia mehlel ahnsou koaros. Ahpw aramas tohto kin nda me e sohte sapwung en likamw. Ke leme dahme aramas pwukat nda me mehlel?— Ke ese me soumwahu koaros, medek, oh mehla pohn sampah kin wiawi pwehki likamw ehu?—

Tamanda me Tepilo likamw ong tepin liho, Ihp. E ndaiong liho me e sohte pahn mehla ma e sapeikiong Koht oh kang wahn tuhke me Koht mahsanih en dehr kang. Ihp kamehlele Tepilo oh kang wahntuhkeo. E pil kahrehiong Adam en kang. Kahrehda ira wiahla aramas dipan akan oh neira seri kan koaros pahn ipwidi oh wia aramas dipan ekei. Pwehki irail aramas dipan kei, koaros nein Adam seri kan kin lokolok oh mehla. Ia duwen kahpwal pwukat koaros eh tepida?— E tepisang likamw ehu.

Ihme kahrehda Sises mahsanih me Tepilo “likamw men, oh pil semen soangen likamw koaros.” Ih me tepin wiahda likamw. Ni emen eh kin wiahda likamw, e kin wia dahme Tepilo wia nin tapio. Kitail anahne medewe duwen met ma kitail kin lemehda en wiahda likamw.​—Sohn 8:44.

Ahnsou dah me emen kakete men wiahda likamw?— Kaidehn ni ahmw kin wiahda mehkot sapwung?— Mwein ke sapwungala oh kauwehla mehkot. Ma aramas idek rehmw, ke kak nda me riomw pwutak de serepein me kauwehla? De ke kak mwomwehda me ke sehse dahme wiawi?—

Ia duwen ma ke anahne wia ahmw homework ahpw ke wiahda ekeite? Ke kak nda me ke wiahda koaros?— Kitail anahne tamanda duwen Ananaias oh Sapaira. Ira sohte ndahda soahng koaros. Koht eri ketin kasalehda uwen suwed en dahme ira wiahda ni eh kahrehiong ira en mehla.

Eri sohte lipilipil dahme kitail wia, kitail pahn kalaudehla kahpwalo ma kitail likamw. E pil sapwung ma kitail ndahte ekei soahng kan me wiawi. Paipel mahsanih: “Kumwail en kin lokaia mehlel.” E pil mahsanih: “Kumwail dehr kin kine likamw nanpwungamwail.” Siohwa kin ketin mehlel ahnsou koaros oh e pil ketin kasik kitail en pil wia soahngohte.​—Episos 4:25; Kolose 3:9.