Ia Duwen Ahmw Pahn Ese Ihs Me Ke Pahn Peikiong?

EKEI pak e kin apwal en ese ihs me kitail pahn peikiong. Mwein ahmw pahpa de nohno ndaiong uhk en wia mehkot. Ahpw sounpadahk de pilismen men ndaiong uhk en wia mehkot tohrohr. Ma met wiawi, ihs rehrail me ke pahn peikiong?—

Nan Irelaud 7 en pwuhk wet, kitail wadek Episos 6:1-3. E mahsanih me seri kan anahne peikiong arail pahpa oh nohno kan. Iren Paipel wet mahsanih (NW): “Peikiong amwail pahpa oh nohno kan me kin ehuiong Kaun-o.” Ke ese ia wehwehn “ehuiong Kaun-o”?— Pahpa oh nohno me kin ehuiong Kaun-o kin padahkihong neirail seri kan en peikiong kosonned en Koht akan.

Ahpw ekei aramas laud kan sohte kin kamehlele Siohwa. Eri ia duwen ma emen irail ndaiong uhk me e mwahu en pirapahda ahmw pasapeng kan nan des en sukuhl de en ale mehkot sang nan sidohwa ni ahmw sohte pwain? E pwung ken pirap?—

Tamataman me Nanmwarki Nepukadnesar nda me aramas koaros en poaridiong sansal kohl me e wiahdao. Ahpw Sadrak, Mihsak oh Apedneko sohte iang poaridi. Ke ese dahme kahrehda?— Pwehki Paipel mahsanih me aramas pahn kin kaudokiong Siohwa kelehpwte.​—Eksodus 20:3; Madiu 4:10.

Mwurin Sises eh pwoula, sapwellime wahnpoaron ko wisikdohng Tohn Mwoalen Kopwung Lapalap en mehn Suhs akan. Samworo Lapalap Kaiapas nda: “Se kihong kumwail kosonned kehlail kumwail dehr pwurehng padahk ni mwaren [Sises]; ahpw kumwail kilang dahme kumwail wiahda: kumwail kalohkiselier amwail padahk kan nan Serusalem.” Dahme kahrehda wahnpoaron ko sohte peikiong Tohn Mwoalen Kopwung Lapalapo?— Piter wiliandi wahnpoaron ko koaros oh sapeng Kaiapas: “Se uhdahn pahn peikiong Koht, a kaidehn aramas.”​—Wiewia 5:27-29.

Nan ahnsowo, kaunen pelien lamalam en mehn Suhs kan kin ahneki manaman laud. Ahpw, arail wehio mi pahn kaundahn koperment en Rom. Kaunen arail koperment adaneki Sihsar. Mendahki mehn Suhs kan sohte men mi pahn kaundahn Sihsar, ahpw koperment en Rom wiahda soahng mwahu tohto ong aramas ako. Koperment kan en rahnwet pil kin wiahda soahng mwahu tohto ong aramas akan. Ke ese ia ekei soahng pwukat?—

Koperment kan kin wiahda ahl akan oh pwain pilismen kan oh soun kakun kisiniei pwehn apwalih kitail. Re pil kin wiahda sukuhl kan ong me pwulopwul kan oh wasahn apwalih roson en me mah kan. Koperment kin doadoahngki mwohni pwehn wiahda soahng pwukat. Ke ese ia wasa koperment kin kihsang ie mwohni?— Sang aramas akan. Mwohni me aramas kin pwainohng koperment kin adaneki daksis.

Ahnsou me Sounpadahk Lapalapo ketiket pohn sampah, mehn Suhs tohto sohte kin men pwain daksis ong koperment en Rom. Ehu rahno, samworo ko doadoahngki ohl ekei pwehn idek rehn Sises peidek ehu me pahn kihong ih nan apwal. Iet peideko, ‘Kitail anahne pwain ong Sihsar daksis de soh?’ Peidek widing ehu met. Ma Sises mahsanih, ‘Ei, kumwail anahne pwain daksis,’ mehn Suhs tohto sohte pahn pwungki met. Ahpw Sises sohte kak mahsanih, ‘Kumwail sohte anahne pwain daksis’ pwehki e pahn sapwung en mahsanih met.

Eri dahme Sises ketin wia? E mahsanih: “Kumwail kasalehiong ie mahs ehu mwohni silperen.” Ni arail wahdo mwohni ehu, Sises ketin idek rehrail: “Sansal en ihs oh mwaren ihs me ntinting powe?” Irail ahpw nda: “Sihsar.” Sises mahsanih: “Eri, kumwail kihong Sihsar dahme en Sihsar, a ong Koht dahme sapwellimen Koht.”​—Luk 20:19-26.

Sohte me kak diar sapwung ehu nan sapwellime pasapeng. Ma Sihsar kin wia soahng kan ong aramas, eri e pwung en doadoahngki mwohni me Sihsar wiahda pwehn pwainohng ih mepwukat. Eri ni ahl wet, Sises ketin kasalehda me e pwung en pwain daksis ong koperment ong soahng kan me kitail kin ale.

Ke saikinte kak iang pwain daksis. Ahpw mie mehkot me ke anahne wiahiong koperment. Ke ese dahkot met?— Peikiong kosonned akan en koperment. Paipel mahsanih: “Aramas koaros uhdahn pahn peikiong pwungen wehi kan.” Pwungen wehi pwukat iei irail akan me ahneki manaman nan koperment. Eri Koht me mahsanih kitail en peikiong kosonned akan en koperment.​—Rom 13:1, 2.

Mwein mie kosonned en dehr kidseli nanial akan. Ke anahne peikiong kosonned wet?— Ei, Koht kupwurki ken peikiong kosonned wet. Ke pil anahne peikiong pilismen kan?— Koperment kin pwain pilismen kan en apwalih aramas akan. Atail kin peikiong irail kin duwehte atail kin peikiong koperment.

Eri ma ke pahn kote ahlo a pilismeno nda “Awih!” dahme ke pahn wia?— Ma meteikan kin kotehla ahlo, ke pahn pil iang?— Ke anahne awih mehnda ma kowe kelehpw me pahn uhdi. Koht mahsanih ken peik.

Mwein mie kahpwal wiawi rehn mehn mpomw oh pilismeno nda: “Ken dehr kohla nanialo. Dehr pedoi.” Ahpw ke rong ngilen aramas weriwer oh ke men ese dahme wiawi. Ke pahn kohla likio pwehn kilang dahme wiawi?— Ni ahmw kin wia met, ke kin kasalehda me ke kin peikiong “pwungen wehi”?—

Nan wasa tohto, koperment kin wiahda imwen sukuhl kan oh kin pwain sounpadahk kan. Eri, ke lemeleme Koht kupwurki ken peikiong sounpadahk kan?— Medewe duwen met. Koperment kin pwain sounpadahk kan pwehn kasukuhlih iuk duwehte eh kin pwain pilismen kan pwehn apwalih aramas akan. Eri, en peikiong pilismen de sounpadahk men kin duwehte peikiong koperment.

Ahpw ia duwen ma sounpadahko nda me ke anahne wia mehkot me pid kaudok ong sansal ehu? Dahme ke pahn wia ahnsowo?— Mehn Ipru silimeno sohte poaridiong sansalo mendahki Nanmwarkio eh ndaiong irail en wia met. Ke tamataman dahme kahrehda?— Pwehki irail sohte men sapeikiong Koht.

Emen sounnting en poadopoad me adaneki Will Durant ntingihdi duwen tepin Kristian akan oh nda me irail sohte kin kihong arail “lelepek unsek ong Sihsar.” Ahpw re kin kihong Siohwa! Eri tamataman me Koht me pahn kin keieu nan atail mour.

Kitail kin peikiong koperment pwehki ih me Koht kupwurki kitail en wia. Ahpw dahme kitail pahn nda ma aramas ndaiong kitail en wia mehkot me Koht sohte kupwurki?— Kitail anahne nda soahng me wahnpoaron ko ndaiong samworo lapalapo: “Se uhdahn pahn peikiong Koht, a kaidehn aramas.”​—Wiewia 5:29.