Peik Kin Pere Iuk

KE PAHN perenki ma ke kak wia soahng koaros me ke mwahuki? Mie pak me ke kahng aramas en ndahng uhk dahme ken wia? Ndaiong ie ni mehlel dahme ke medemedewe.—

Ahpw mehnia me mwahu ong uhk? Mehlel me e mwahu ken wia soahng koaros me ke mwahuki? De e kin imwila mwahu ma ke kin peikiong ahmw pahpa oh nohno?— Koht mahsanih me ke anahne peikiong ahmw pahpa oh nohno, eri mie kahrepe mwahu ken peik. Kitail pahn kilang kahrepen met.

Ke sounpar depe?— Ke ese ahmw pahpao sounpar depe?— Sounpar depe ahmw nohno de nohno kahlapo de pahpa kahlapo?— Re mour werei sang uhk. Emen kin esehla soahng tohto pwehki eh mour werei. E kin rong, kilang oh wia soahng tohto pahr koaros. Kahrehda me pwulopwul kan kak sukuhlki sang me mah kan.

Mie emen me pwulopwul sang uhk me ke ese?— Ke sou kin ese laud sang ih?— Dahme kahrehda?— Pwehki ke mour wereisang ih. Mie ahnsou laud ong uhk en sukuhlki soahng tohto sang emen me pwulopwul sang uhk.

Ihs me mour wereisang kowe, ngehi, de pil aramas koaros?— Iei Siohwa Koht. E mwahngih laud sang kowe oh ngehi. Ni eh kin mahsanihong kitail en wia mehkot, kitail kak kamehlele me ih me pwung kitail en wia mehnda ma e apwal. Ke ese me mie ahnsou ehu me Sounpadahk Lapalapo pil kin pehm me e apwal en peik?—

Ehu ahnsowo Koht ketin padahkihong Sises en wia mehkot me inenen apwal. Sises ketin kapakapki met duwehte nan kilel wet. E ketin kapakap patohwan: ‘Ipa, ma komw ketin kupwurki, a komw ketikihweisang apwal wet.’ Ni en Sises ketin kapakapki met, e ketin kasalehda me e sohte kin mengei ahnsou koaros en wia kupwuren Koht. Ahpw ke ese ia duwen Sises eh ketin kaimwisekala sapwellime kapakap?—

Sises ketin kaimwisekala sapwellime kapakap ni eh patohwan: “Soh, kaidehkin nsenei, pwe kupwuromwihte en pweida.” (Luk 22:41, 42) Sises kupwurki kupwuren Koht en pweida, ah kaidehn nsene. Eri Sises ketin kapwaiada dahme Koht kupwurki en wia ah kaidehn dahme e ketin medemedewe me pahn keieu mwahu.

Dahme kitail kak sukuhlki sang met?— Kitail kak sukuhlki me ahnsou koaros e kin pwung en wia dahme Koht mahsanih mehnda ma e apwal. Pil mie mehkot kitail sukuhlki. Ke ese dahkot met?— Kitail sukuhlki me Koht oh Sises kaidehn mehtehmen duwehte me ekei aramas kin nda. Siohwa Koht mah sang oh mwahngih laudsang sapwellime Ohl Sises.

Ni atail kin peikiong Koht, kitail kin kasalehda me kitail poakohng ih. Paipel mahsanih: “Iet duwen wehwehn poakohng Koht: kitail en peikiong sapwellime kosonned akan.” (1 Sohn 5:3) Eri met ke kak wehwehki me kitail koaros anahne peikiong Koht. Ke men peikiong ih?—

Kitail kak pahkala neitail Paipel oh kilang dahme Koht mahsanih seri kan en wia. Kitail pahn wadek dahme Paipel mahsanih nan Episos irelaud 6 iretikitik 1 lel 3 (NW). E mahsanih: “Seri kan, peikiong amwail pahpa oh nohno kan me kin ehuiong Kaun-o, pwe ih me pwung. ‘Kahkahki semomw oh inomw,’ iei tepin kosonned me inou ehu iang. Eri, iet inowo: ‘pwe ke en pweida mwahu oh mour werei nin sampah.’”

Eri Siohwa me ketin mahsanihong uhk ken peikiong ahmw pahpa oh nohno. Ia wehwehn “kahkahki” pahpa oh nohno? E wehwehki ken wauneki ira. Oh Koht ketin inoukihdi me ma ke kin peikiong ahmw pahpa oh nohno, ke pahn “pweida mwahu.”

I pahn padahkihong uhk koasoipen aramas ekei me komourala pwehki irail kin peik. Aramas pwukat momour mahsie nan kahnimw en Serusalem. Pali laud en aramas nan kahnimwo sohte kin rong Koht, ihme kahrehda Sises ketin padahkihong irail me Koht pahn ketin kauwehla kahnimwo. Sises pil mahsanihong irail ia duwen arail pahn kak pitsang ma irail kin poakohng dahme pwung. E mahsanih: ‘Ni amwail pahn kilang sounpei kei me kapilpenehr Serusalem, kumwail pahn esehki me ahnsoun eh ohla kerendohr. Eri, ni ahnsowo kumwail en tangalahng pohn dohl akan.’​—Luk 21:20-22.

Eri, duwehte me Sises mahsanih, sounpei ko kohdo pwehn kauwehla Serusalem. Sounpei en Rom ko pidakihpene Serusalem. Ahpw sounpei ko kohkohla oh sohte me ese kahrepe. Pali laud en aramas ako medewe me irail solahr mi nan keper. Irail eri mihmihte nan kahnimwo. Ahpw dahme Sises mahsanih irail en wia?— Ma ke mi nan Serusalem ahnsowo, dahme ke pahn wia? Irail me uhdahn kamehlele Sises tangasang imwarail ko oh tangalahng nan nahna kan me dohsang Serusalem.

Erein sounpar ehu, sohte mehkot wiawihong Serusalem. Ni keriaun pahr, pil sohte mehkot wiawi. Pil nan kesiluh en pahr, sohte mehkot wiawi. Mwein ekei aramas ko kin medewe me irail me tangasang kahnimwo pweipwei. Ahpw ni kapahieu en pahr, sounpei en Rom ko pwurodo. Irail pwurehng kapilpene Serusalem. Eri met e pwandalahr irail en tang. Ahnsou wet sounpei ko kauwehla kahnimwo. Pali laud en aramas me mi nan kahnimwo mehla oh luhwe ko selidi.

Ahpw dahme wiawihong irail me peikiong Sises?— Irail pitla. Irail mihmi dohsang Serusalem. Kahrehda irail sohte iang ohla. Peik doareirailla.

Ma ke pahn peik, met kak pere iuk?— Ahmw pahpa oh nohno kin padahkihong uhk en dehpa mwadong nanial. Dahme kahrehda ara nda met?— Pwehki sidohsa kak loiong uhk. Ahpw mwein ehu rahn ke pahn medewe: ‘Sohte sidohsa met. Sohte sidohsa pahn lel ie. Seri teikan kin mwadong nanial oh sohte pak ehu I kilang me sidohsa loiong irail.’

Ih duwen madamadau en pali laud en aramas nan Serusalem. Mwurin sounpei en Rom ko kohkohla, e mwomwen me solahr keper. Pwehki irail kilang meteiko arail mihmihte nan kahnimwo, re pil iang mihmi. Kaweid kohwong irail ahpw re sohte peikiong. Kahrehda irail mehla.

Kitail kilang pil ehu karasepe. Mie pak ke mwadongki masis?— Mwein e kin kaperen en kilang kisiniei ni ahnsou me ke kin isik masiso. Ahpw e keper en mwadongki masis. Imwomwo kak lulda oh kowe mehla!

Tamataman me peik ekeite ahnsou sohte itar. Ahpw ma ke kin peik ahnsou koaros, met pahn pere iuk. Ihs me mahsanih, “Seri kan, peikiong samamwail oh inamwail kan”?— Iei Koht. Oh tamataman me e mahsanih met pwehki e kin ketin poakohng uhk.