Kitail Kak Pirida Sang Mehla!

MA KITAIL mehla, Koht pahn kupwurki kaiaskitailda, me wehwehki kapwurehiong kitail mour?— Ohl mwahu Sohp kamehlele me Koht kupwurki wia met. Eri ni Sohp eh lemehiong me e pahn melahr, e ahpw patohwanohng Koht: “Komw pahn ketin malipe ie, I ahpw pahn patohwan sapeng.” Sohp nda me Siohwa Koht pahn kupwurki mehlel en ketin kaiasada ih.​—Sohp 14:14, 15.

Sises pil duwehte Semeo, Siohwa Koht. Sises kupwurki sewese kitail. Ni ahnsou me ohl tokutok men patohwanohng ih, “ma komw ketin kupwurki, komw kak ketin kamwakeleiehda,” Sises ahpw ketin sapeng: “Iei, I mwahuki.” Ih eri kamwahwihala ohl tokutoko.​—Mark 1:40-42.

Sises ketin sukuhlki sang Semeo en poakohng seri kan. Pak riau, Siohwa ketin doadoahngki sapwellime ladu kan ren kaiasada seri kan mahso. Elaisa peki rehn Siohwa en ketin kaiasada nein lih emen pwutak. Liho kin kadek ong Elaisa. Siohwa eri ketin kaiasada pwutako. Siohwa pil ketin doadoahngki sapwellime ladu Elisa pwehn kaiasada kisin pwutak kis.​—1 Nanmwarki 17:17-24; 2 Nanmwarki 4:32-37.

E sou mwahu en ese me Siohwa kin ketin poakohng kitail?— Kaidehn ihte ahnsou me kitail momour me e kin ketin medewei kitail. E pil pahn ketin tamataman kitail ma kitail mehla. Sises pil mahsanih me Semeo kin ketin kilangwohng me melahr akan me e ketin poakohng duwehte ma re momourte. (Luk 20:38) Paipel mahsanih me ‘sohte mehla de mour, pil sohte mehkot me wiewiawi met de me pahn wiawi mwuhr, kak irehdihsang kitail ni limpoak en Koht.’​—Rom 8:38, 39.

Ni Sises eh ketiket sampah, e ketin kasalehda me Siohwa kin ketin nsenohki seri kan. Ke pahn taman me Sises kin ketikihong ahnsou pwehn koasoiaiong seri kan duwen Koht. Ahpw ke ese me Koht ketikihong Sises manaman en kaiasada seri kan?— Kita pahn koasoia duwen nein Sairus serepein me sounpar 12 me Sises ketin kaiasada.

Sairus kin mi rehn eh pwoud oh neira seri tehmeno limwahn Lehn Kalili. Ehu rahno serepein pwulopwul menet soumwahuda oh Sairus kilang me e pahn mehla. E tepida medemedewe duwen Sises, me e kin rong me e kak kamwahwihala aramas soumwahu kan. Sairus eri kohla oh rapahki ih. E diarada Sises ni oaroahr en Lehn Kalili ni eh ketin padapadahki aramas tohto.

Sairus eri keidla nanpwungen pokono oh poaridi mwohn Sises oh patohwan: ‘Nei kisin serepein kis kereniongehr mehla. Komw kak ketila oh sewese ih?’ Ni ahnsowohte Sises ketin iangada Sairus. Pokon en aramas me kohdohng kilang Sounpadahk Lapalapo pil idawehn ira. Ahpw ni arail wie kohkohla, ohl ekei ahpw kohdo sang imwen Sairus oh padahkihong ih: ‘Noumw serepeino melahr; komw dehr kedirepwehkin Sounpadahken en ketido.’

Sises ketin karonge dahme ohl ako nda. E mwahngih duwen en Sairus eh nsensuwedkihla mehlahn nah seri tehmeno. Sises eri mahsanihong ih: “Komw dehr perki mehkot. Komw pwosonte, e ahpw pahn mourda.” Irail kohla oh lel imwen Sairuso. Kompoakparail ko wie sengiseng. Irail nsensuwed pwehki kompoakparail kisin serepeino melahr. Sises ahpw mahsanihong irail: “Dahme kumwail mwoaromwoarong oh mwahmwahieiki? Serien sohte mehla, e wie memeir!”

Ni Sises eh mahsanih met, aramas ako kouruhrki ih pwehki arail ese me kisin serepeino melahr. Eri dahme kahrehda Sises mahsanihki me e wie memeir?— Dahme ke leme e kupwurki padahkihong aramas ako?— E kupwurki irail en ese me mehla duwehte meir kelik. E kupwurki irail en ese me sang ni sapwellimen Koht manaman, e kak ketin kapwurehdo aramas mehla men ong mour duwehte atail kak kapirada emen sang eh meir.

Sises ketin kapedoi irail koaros me mi nan ihmwo. Ihte me mihmi wasao iei sapwellime wahnpoaron Piter, Seims, Sohn oh en serio pahpa oh nohno. Ih eri ketila wasa me serio mihmi ie. E ahpw koledi pehn serio oh mahsanih: “Serepein, pwourda!” Oh ni ahnsowohte, e pwourda oh tepida alialuhseli! Eh pahpa oh nohno uhdahn direkihla peren.​—Mark 5:21-24, 35-43; Luk 8:40-42, 49-56.

Eri medewe duwen met. Pwehki Sises eh kak ketin kamourada serepeino, e pahn kak ketin wia met ong meteikan?— Ke leme e uhdahn pahn ketin wia met?— Ei, e uhdahn pahn ketin wia met. Pein Sises mahsanih: ‘Ahnsou ehu pahn kohdo me irail koaros me mihmi nan sousou kan pahn rong kapitiei, oh re pahn pedoisang nan arail sousou kan.’​—Sohn 5:28, 29.

Ke leme Sises kupwurki kaiasada aramas?— Pil ehu karasaras nan Paipel pahn sapengla peidek wet. Mehkot me wiawi limwahn kahnimw en Nain kin kasalehda sapwellimen Sises pepehm ong aramas me kin pahtoula ni ahnsoun mehla kan.

Lih emen iang kapar en mehlahn nah pwutako ni pokono arail kohkohiei sang Nain. Eh pwoudo melahr oh met nah seri tehmeno pil mehla. Ia uwen eh pahtoula! Aramas tohto sang Nain iang kaparo ni arail weuwahla paliweren nah pwutako likin kahnimwo. Liho wie sengiseng oh sohte mehkot me aramas ako kak wia pwehn kansenamwahwihala.

Rahno, Sises oh sapwellime tohnpadahk ko wie kohkohdohng kahnimw en Nain. Irail tuhwong pokon me kohkohlahng sarepedi nein liho pwutako limwahn ewen kelen kahnimwo. Sises ketin poakehla liho ni eh ketin kilangada eh wie sengiseng. Eh pahtou laud kamwakid Sises en kupwurki sewese ih.

Sises mahsanihong liho ni kamantik ahpw inen me kahrehda liho en rong ih: “Ke dehr seng.” Sapwellime mwekid oh wiewia kahrehiong koaros en men kilang dahme e pahn ketin wia. Ni Sises eh ketila limwahn paliwaro, koaros kin medemedewe dahme e pahn ketin wia. Sises eri mahsanih: “Mwahnakapw, pwourda!” Ni ahnsowohte, e mwohdada! Ih eri tepida lokolokaia.​—Luk 7:11-17.

Medewehla duwen en liho pepehm! Ia pahn ahmw pepehm ma emen kompoakepahn me mehla pwurehng mourda?— Met sou kasalehda me Sises kin ketin poakohng aramas akan oh kupwurki sewese irail?— Eri medewehla ia pahn uwen kaperen ni ahmw pahn kasamwohdo aramas ong mour nan sampah kapw!​—2 Piter 3:13; Kaudiahl 21:3, 4.

Ekei aramas oh seri me pahn iasada iei aramas kei me kitail ese. Kitail pahn ese ihs irail duwehte Sairus eh ese nah serepeino ni Sises eh ketin kaiasada iho. Ekei iei irail kan me melahr sounpar epwiki de kid kei samwalahro. Koht sohte pahn ketin manokeirailla mehnda ma re momour mahsieo.

E sou kaperen en ese uwen Siohwa Koht oh sapwellime Ohl Sises ara kin ketin poakohng kitail?— Ira kupwurki kitail en momour, kaidehn ong sounpar keite ahpw kohkohlahte!