Sises Kapwourda me Mehlahr

SEREPEINO me ke kilang nan kilel wet sounpahr 12. Sises kolokol peh, oh ah nohno oh pahpa me kesihnen limwah. Ke ese dahme kahrehda irail peren kowahlap? Kitail pahn kilang.

Semen serepeino emen ohl kesempwal me adaneki Sairus. Rahn ehu nah serepeino soumwahuda, oh wendi ong nan lohs. Ahpw serepeino sohte mwahula. Ah soumwahu doarala mehlel. Sairus oh ah pwoud pahtoukihla, pwehki likamwete neira serepeino pahn mehla. Neira serepein tehmen. Sairus eri kohieila rapahki Sises. E rong duen manaman kan me Sises wiewia.

Ni ansou me Sairus diarada Sises, mie pokon kalaimwun ehu mi limwah. Ahpw Sairus nannanti lao e lel rehn Sises oh e pwupwedi ni aluwiluwe. ‘Nai serepeino me inenen soumwahu kowahlap,’ e indaiong. ‘Menlau, kohdo oh kakehlail ih,’ e peki. Sises eri mahsanih me e pahn kohla.

Ni ara kohkohwei, pokono kin kapilpene Sises. Ansouohte Sises uhdi. ‘Ihs me sair ie?’ e mahsanih. Sises pehm me mie manaman kohsang reh, ihme e esehki me mie me sair ih. Ahpw ihs? Lih emen me soumwahukiehr sounpahr 12. Liho kohieido oh sair imwin sapwellime likou, oh mwahula!

Met kahreong Sairus en ekis insenamwahu, pwehki e ese me mengei ong Sises en kamwahuiahla emen. Ahpw ansouohte soun wah rohng men pwarado. ‘Dehr kedirepwe Sises,’ e padahkiong Sairus. ‘Noumw serepeino mehlahr.’ Sises rong met oh mahsanih ong Sairus: ‘Dehr insensuwed, noumw serepeino pahn mwahula.’

Ni ara lelohng ihmwen Sairus, aramas kan wia mwamwaiei. Ahpw Sises mahsanih: ‘Kumwail dehr sengeseng. Serio sohte mehla. E memeirte.’ Ahpw irail kouruhr oh kamwane Sises, pwehki irail ese me serio mehlahr.

Sises eri alehda semen serepeino oh iangahki ah nohno oh sapwellime wahnpoaron silimen oh kohieila nan wasa me serio wonohn. Ih eri alehda pehn serio oh mahsanih: ‘Pwourda!’ Serio ahpw mourada, duwehte me ke kilang nan kilel wet. Serepeino pwourda oh alialu! Ihme kahrehda ah nohno oh pahpa me inenen peren kowahlap.

Met kaidehn keieun aramas me Sises kamourada sang mehla. Keieun aramas me Paipel padahkiong kitail me Sises kamourada iei pwutak emen nain liohdi men nan kahnihmwen Nain. Mwuhri, Sises pil kamourada Lasarus, rien Meri oh Marda. Ni ansou me Sises pahn kaunda wehin Koht duwen nanmwahrki men, e pahn kamourada aramas tohto sang mehla. Kaidehn met rohng kaperen ehu ong kitail?