Ia Duwen Atail Pahn Kaperenda Koht?

DAHME kitail kak wia pwehn kaperenda Koht? Mie mehkot kitail kak kihong ih?— Siohwa mahsanih: “Ngehi me naineki mahn en nanwel koaros.” E pil mahsanih: “Ngehi me sapwellimanki silper oh kohl koaros en sampah.” (Melkahka 24:1; 50:10; Akkai 2:8) Ahpw mie mehkot me kitail kak kihong Koht. Dahkot met?—

Siohwa ketin mweidohng kitail en pilada ma kitail pahn papah ih de soh. E sohte kin ketin iding kitail en wia dahme e kupwurki. Kita kak kilang dahme kahrehda Koht ketin wiaikitailda pwe kitail en kak pilada ma kitail pahn papah ih de soh.

Mwein ke ese dahkot robot. Iei misihn ehu me wiawihda pwe en wia soahng koaros me aramas me wiahdao mwahuki en wia. Kahrehda robot sohte kak pilada dahme e mwahuki wia. Siohwa kakete ketin wiaikitailda koaros pwe kitail en duwehte robot akan. E kak ketin wiaikitailda pwe kitail en wia soahng kante me e kupwurki kitail en wia. Ahpw Koht sohte ketin wia met. Ke ese dahme kahrehda?— Eri, ekei mehn mwadong duwehte robot kan. Ni ahmw pahn padik pwatin ehu, irail pahn wia soahng kante me aramas me wiairaildao men ren wia. Mie pak ke kilang soangen mehn mwadong wet?— Kitail kin kalapw pwangahkihda mwadongki soangen mehn mwadong me kin wia soahng kante me koasoandier ren wia. Koht sohte kupwurki kitail en peikiong ih ihte pwehki kitail koasoandier pwehn papah ih duwehte robot kan . Siohwa kupwurki kitail en papah ih pwehki kitail poakohng ih oh pwehki kitail men peikiong ih.

Ke leme ia sapwellimen Samatail nanleng pepehm ni atail kin peikiong ih pwehki kitail men wia met?— Eri ndahdo mahs, ia duwen ahmw wiewia eh kin kamwakid pepehm en ahmw pahpa oh nohno?— Paipel mahsanih me seri men me loalokong kin “kaparanda seme,” ahpw seri pweipwei men kin “kansensuwedihala ine.” (Lepin Padahk 10:1) Ke kin tehk me ahmw pahpa oh nohno kin peren ahnsou me ke kin wia dahme ira ilakihkin uhk ken wia?— Ahpw ia ara pepehm ni ahmw kin sapeik?—

Met kita pahn uhd medewe duwen Samatail nanleng Siohwa. E mahsanihong kitail ia duwen atail kak kaperenda ih. Menlau pahkala noumw Paipel en ong Lepin Padahk 27:11. Koht mahsanihong kitail wasaht: “Samwa [de kitail kak pil nda, nei serepein], ke en loalokongla, I ahpw pahn kin pereperen; e pahn mie ei pasapeng ong mehmen me pahn kauwei ie.” Ke ese ia wehwehn kauwe emen?— Eri mwein aramas emen pahn kauwei iuk ni eh pahn kouruhrkin uhk oh nda me ke sohte kak wiahda dahme ke nda me ke kak wia. Ia duwen Sehdan eh kin kauwe Siohwa?— Kita pahn kilang.

Tamataman me kitail sukuhlki nan Irelaud 8 en pwuhk wet me Sehdan kin men ih me en keieu kesempwal oh e men koaros en peikiong ih. Sehdan nda me aramas kin kaudokiong Siohwa ihte pwehki Siohwa pahn ketikihong irail mour soutuk ma irail kaudokiong ih. Mwurin Sehdan eh kahrehiong Adam oh Ihp en sapeikiong Siohwa, Sehdan uhwongada Koht. E ndaiong Koht: ‘Aramas kin papah komwi ihte pwehki dahme irail kin ale sang rehmwi. Mweidohng ie ei ahnsou, oh I kak kahrehiong koaros en sohpeiweisang komwi.’

Mehlel me kaidehn ih uhdahn mwomwen lokaia pwukat eh kileldi nan Paipel. Ahpw ni atail kin wadek duwen Sohp, e kin sansalda me Sehdan nda mehkot me duwehte met ong Koht. E uhdahn kesempwal ong Sehdan oh Siohwa ma Sohp lelepek ong Koht de soh. Kita pahn pahkala neita Paipel ong Sohp irelaud 1 oh 2 pwehn kilang dahme wiawi.

Tehk me nan Sohp irelaud 1, Sehdan iang mihmi nanleng ahnsou me tohnleng kan pwarodo rehn Siohwa. Siohwa eri ketin idek rehn Sehdan e kohsang ia. Sehdan sapengki me e kohkohseli nin sampah. Siohwa eri ketin idek reh: ‘Ke kilangehr Sohp, me kin papah ie oh sohte kin wiahda mehkot suwed?’​—Sohp 1:6-8.

Ahnsowohte Sehdan kihda kahrepe kan. ‘Sohp kin kaudokiong komwi ihte pwehki sohte eh kahpwal kan. Ma komw solahr pahn ketin sile ih oh kapaia ih, e pahn lahlahwei komwi.’ Siohwa eri ketin sapeng: ‘Nna mwahu Sehdan, ke kak wia soahng koaros me ke men wiahiong ih, ahpw paliwerehte me ke sohte pahn sair.’​—Sohp 1:9-12.

Dahme Sehdan wia?— E kahrehiong aramas en pirapahla nein Sohp kou oh dongki kan oh kemehla sileparail ko. Mwuri lioal pirte kemehla sihpw oh pil sileparail ko. Pil mwuri, aramas kohdo oh pirapahla nah kamel kan oh kemehla sileparail ko. Eri ni imwio, Sehdan kahrehiong kisinieng kehlail ehu en kauwehla ihmw me nein Sohp seri ehko mihmi loale oh kemeirailla koaros. Mendahki soahng pwukat koaros me wiawiher, Sohp wie papahte Siohwa.​—Sohp 1:13-22.

Ni ahnsou me Siohwa ketin pwurehng tuhwong Sehdan, e mahsanihong ih me Sohp kolokolete eh lelepek. Sehdan kihda kahrepe kan oh patohwanohng: ‘Ma komw mweidohng ie en kamedekihala paliwereo, e pahn lahlahwei komwi.’ Siohwa eri ketin mweidohng Sehdan en kamedekihala paliweren Sohp ahpw e mahsanihong ih en dehr kemehla ih.

Ni ahnsowohte, Sehdan kahrehiong paliweren Sohp pwon en kensla. E uhdahn pwohsuwed ihme kahrehda sohte me men karanih ih. Pil en Sohp pwoudo ndaiong ih: ‘Ke sou lahlahwe Koht ke ahpw mehla?’ Irail ko me mwomwehda wia kompoakepahn Sohp mwemweitdo reh oh kahrehiong eh pahtou eh laudla ni arail nda me mwein mie mehkot suwed me e wiahda me kahrehiong ih en lelohng kahpwal wet. Mendahki kahpwal oh medek me Sehdan wiahiong Sohp, e papahte Siohwa ni lelepek.​—Sohp 2:1-13; 7:5; 19:13-20.

Ke leme ia sapwellimen Siohwa pepehm ni Sohp kolokolete eh lelepek?— E kaperenda ih pwehki Siohwa kak mahsanihong Sehdan: ‘Kilang Sohp! E kin papah ie pwehki e men wia met.’ Ia duwe, ke pahn duwehte Sohp, me Siohwa kak mahsanih me ke wiahda mehn kahlemeng pwehn kadehde me Sehdan likamw?— E wia kapai ehu en sapengla Sehdan me nda me dene e kak wekid aramas koaros sang arail kin papah Siohwa. Sises ketin wiahki met kapai ehu.

Sounpadahk Lapalapo sohte ketin mweidohng Sehdan en kahrehiong ih en wia mehkot me sohte pwung. Medewehla ia uwen sapwellime mehn kahlemeng eh kin kaperenda Semeo! Siohwa kak ketin idih Sises oh mahsanihong Sehdan: ‘Kilang nei pwutaket! E kolokolete eh lelepek ni unsek pwehki eh poakohng ie!’ Pil medewe uwen peren me Sises sapwellimanki ni eh kin kaperenda Semeo. Pwehki peren wet, Sises ketin kolokolete eh lelepek mendahki eh pwoula pohn tuhkeo.​—Ipru 12:2.

Ke men duwehte atail Sounpadahk Lapalapo oh pil kaperenda Siohwa?— Eri, pousehlahte ahmw sukuhlki duwen dahme Siohwa kupwurki ken wia oh kapwaiada pwehn kaperenda ih!