Ia Duwen Atail Kak Ese Me Armakedon Kerendohr?

KE ESE ia wehwehn kilelepen mehkot, kaidehn?— Kitail wadek nan Irelaud 46 duwen Koht eh ketikihda kilelepen eh sohte pahn ketin pwurehng kauwehkihla sampah nohlik. Wahnpoaron ko pil idek kilelepen iahd Sises pahn pwurehng ketido oh iahd me imwin sampah de koasoandi wet eh kerendohr.​—Madiu 24:3.

Pwehki Sises pahn ketiket nanleng ni soh sansal, kilelepen mehkot me anahn pwe aramas en kak wehwehki me e ketin tepidahr kakaun. Kahrehda Sises mahsanih duwen soahng kan me sapwellime tohnpadahk ko anahne kilikilang nan sampah wet. Ni ahnsou me mepwukat pahn wiawi, e pahn kasalehda me Sises ketidohr oh tepidahr kakaun nanleng nin duwen Nanmwarki men.

Pwehn padahkihong sapwellime tohnpadahk ko kesempwalpen arail pahn kilikilang kilelepen met, Sises mahsanihong irail: ‘Kumwail tehk mwahu duwen tuhke pik oh tuhke teikan koaros. Ni tehntuhke pwukat ar kin pwarada, kumwail kin esehki me ahnsoun dolung kerendohr.’ Ke kin ese ia duwen ahmw pahn kak ese iahd ahnsoun dolung kerendohr. Oh ke pil kak ese ma Armakedon kerendohr ni ahmw pahn kilang soahng kan me Sises mahsanih kin wiawi.​—Luk 21:29, 30.

Nan pali wet oh mehn mwurio, kitail pahn kilang kilel kei duwen dahme Sises mahsanih me pahn wia kisehn kilelepen Wehin Koht eh kerendohr. Ni ahnsou me mepwukat koaros pahn wiawi, Wehin Koht me Krais pahn kaunda pahn kauwehla koperment teikan koaros duwehte me kitail wadek nan Irelaud 46.

Eri, kilang mwahu kilel kan nan pali riau mwohn pali wet oh kita pahn koasoiapene duwen kilel pwukat. Ke kak wadek duwen dahme ke kilang nan kilel pwukat nan Madiu 24:6-14 oh Luk 21:9-11. Pil kilang kisin nempe kan nan ehuehu kilel. Ke pahn kilang nempe pwukat nan ehuehu parakrap me kawehwe kilel ko. Met kita pahn kilang ma soangsoangen wiewia pwukat me wia kisehn kilel me Sises ketikihda kin pweida nan atail ahnsou.

(1) Sises mahsanih: “Kumwail pahn rong rongen mahwen oh koasoiepen mahwen kan; . . . Ehu sahpw pahn uhwong ehu sahpw, ehu wehi pahn mahweniong ehu wehi.” Mie pak ke rong duwen rongen mahwen kan?— Keieun mahwen me wiawi nin sampah pwon wiawi sang 1914 lel 1918, oh keriaun mahweno wiawi sang 1939 lel 1945. Sangete mahs, saikinte pak ehu me mahwen wiawi nin sampah pwon! Rahnwet mahwen kin wiawi nan sampah pwon. Kereniong rahn koaros kitail kin rong de wadek duwen mahwen nan TV, redio oh doaropwehn rohng kan (nuhspehpa).

(2) Sises pil mahsanih: “Wasa koaros lehk lapalap . . . pahn wiawi.” Mwein ke ese me kaidehn koaros kin itar kanarail mwenge. Rahn koaros aramas kid kei kin mehla pwehki sohte itar kanarail mwenge.

(3) Sises ketin kapatahiong: “Soumwahu lusulus laud pahn wiawi wasa koaros.” Ke ese dahkot soumwahu lusulus?— E wia soumwahu ehu me kak kemehla aramas tohto. Ehu soumwahu lusulus me adaneki Spanish flu kemehla mpen aramas riedep (20,000,000) nan pahr ehu. Nan atail ahnsou, aramas tohtohsang mwo pahn mwein mehkihla soumwahu ehu me adaneki AIDS. Oh pil mie soumwahu en kanser, mohngiong, oh soumwahu teikan me kin kemehla aramas kid kei nan ehuehu sounpar.

(4) Sises ketikihda pil ehu kisehn kilelo, mahsanih: “Wasa koaros . . . rerrer en sahpw pahn wiawi.” Ke ese dahkot rerrer en sahpw?— E kin itikada nan pwehl. Ihmw kan kin rengkedi oh aramas kin kalapw mehla. Sangete nan pahr 1914, rerrer en sahpw tohto wiawi nan ehuehu pahr. Mie pak ke rong duwen rerrer en sahpw?—

(5) Sises mahsanih me pil ehu kisehn kilelo iei ‘me suwed pahn lalaudla wasa kan.’ Ihme kahrehda pirap oh lemei wie lalaudla. Wasa koaros aramas kin masak pwe ede mie me pirap nan imwarail kan. Mwersuwed oh lemei nan wasa koaros nin sampah kin laudsang mahs.

(6) Sises ketikihda ehu kisehn kilelo me uhdahn kesempwal ni eh mahsanih: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.” (Madiu 24:14) Ma ke kamehlele “rongamwahu” wet, eri ke pahn anahne padahkihong meteikan. Ni ahl wet ke kak iang wia pweidahn kisehn kilelo.

Ekei aramas mwein kin nda me soahng kan me Sises ketin kohpada duwe kin wiawi sangete mahs. Ahpw saikinte pak ehu me soahng pwukat koaros wiawi wasa tohto nin sampah pak ehute. Eri, met ke wehwehki ia wehwehn kilelo?— E wehwehki me ni atail pahn kilang soahng pwukat koaros eh wiawi, sapwellimen Koht sampah kapw pahn kereniong wiliandi sampah suwed wet.

Ni ahnsou me Sises ketikihda kilel wet, e pil mahsanih duwen ehu soangen ahnsou me kin mie nan pahr ehu. E mahsanih: ‘Kumwail peki rehn Koht pwe amwail pahn tang en dehr wiawi ni ahnsoun kopou.’ (Madiu 24:20) Ke leme ia wehwehn sapwellime mahsen pwukat?—

Ma aramas emen anahne pitla sang ehu kahpwal ni ahnsoun kopou, ahnsou me inenen apwal de keper en seiloak, dahme kak wiawi?— E pahn uhdahn apwal. E sou pahn kansensuwed ma emen mehla ni ahnsoun kopou pwehki e nohn kedirepwkihla soahng teikan oh sohte mwadang tang?—

Ke kilang ire kesempwal me Sises ketin kasalehda ni eh mahsanih en dehr awih lao ahnsoun kopou pwehn tang?— E mahsanihong kitail me pwehki kitail ese me Armakedon kerendohr, kitail sohte men kapwandehla atail kin kasalehda limpoak ong Koht sang ni atail kin papah ih. Ma kitail pahn wawai, kitail kakete pwandala. Eri kitail pahn duwehla irail ko ni mwehin Nohlik lapalapo me rong Noha ahpw sohte pedolong nan warihmwo.

Met, kita pahn koasoiapene duwen dahme pahn wiawi mwurin mahwen lapalap en Armakedon eh pahn wiawi. Kita pahn sukuhlki dahme Koht pahn ketin wiahiong kitail koaros me kin poakohng oh papah ih ni ahnsou wet.