Ia Duwen Ahmw Kak Mour nan Sapwellimen Koht Sampah Kapw?

KOHT ketikihdiong Adam oh Ihp nan mwetuwel en Ihden. Mendahki ara sapeik oh mehla, Koht ketin koasoanehdi pwe neira seri kan iangahki kitail en kak mour kohkohlahte nan Paradais. Paipel inoukihda: “Me pwung kan pahn koukousoan nan sahpwo [“sampah,” NW] oh re pahn sapwenikihla kohkohlahte.”​—Melkahka 37:29.

Paipel mahsanih duwen “lahng kapw” ehu oh “sampah kapw” ehu. (Aiseia 65:17; 2 Piter 3:13) “Lahng” en ahnsou wet kin wiawihkihda koperment kan en aramas ahpw “lahng kapw” pahn wiawihkihda Sises Krais oh irail ako me pahn iang ih kakaun nanleng. Lahng kapw iei sapwellimen Koht koperment pwung me pahn wahdo popohl. Ia uwen eh pahn kaselel ahnsou me e pahn kaunda sampah pwon!

Eri, dahkot “sampah kapw”?— Sampah kapw iei aramas mwahu kan me kin poakohng Siohwa. Kilang pwe ahnsou me Paipel kin mahsanih “sampah,” ekei pak e kin wehwehki aramas me kin mihmi sampah a kaidehn paliweren sampah. (1 Kronikel 16:31; Melkahka 76:8; Sohn 3:16) Ihme kahrehda irail me wia “sampah kapw” pahn mour pohn sampah wet.

Sampahn aramas suwed en ahnsou wet pahn kasohrala. Taman me Nohlik en mwehin Nohao kasohrehla sampahn aramas suwedo. Oh duwen me kitail sukuhlkier, sampahn aramas suwed en ahnsou wet pahn kasohrala nan Armakedon. Kita pahn kilang ia pahn mwomwen mour nan sapwellimen Koht sampah kapw mwurin Armakedon.

Ke men mour kohkohlahte nan Paradais nan sapwellimen Koht sampah kapw meleileio?— Sohte toahkte kak wiahiong kitail en mour kohkohlahte. Sohte wini me kak pere kitail sang mehla. Ihte ahl en mour kohkohlahte iei en karanihala Koht. Sounpadahk Lapalapo ketin padahkihong kitail ia duwen atail pahn wia met.

Kita kak ale neita Paipel oh pahkalahng Sohn irelaud 17 iretikitik 3. Wasaht Sounpadahk Lapalapo mahsanih: “Oh iet mour [“mour soutuk,” NW]: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.”

Eri dahme Sises mahsanih me kitail anahne wia pwe kitail en kak mour kohkohlahte?— Keieu, kitail anahne esehla Samatail nanleng Siohwa oh pil sapwellime Ohlo me ketikihong kitail sapwellime mour. Met wehwehki me kitail anahne onopki Paipel. Pwuhk wet, Sukuhlki Sang Sounpadahk Lapalapo, kin sewese kitail en wia met.

Ia duwen atail sukuhlki duwen Siohwa pahn sewese kitail en mour kohkohlahte?— Eri, duwehte atail kin anahne mwenge rahn koaros, kitail pil anahne sukuhlki duwen Siohwa rahn koaros. Paipel mahsanih: “Kaidehkin pilawahte me aramas kak mourki, pwe mahsen koaros me kin pwilipwilsang nin doauesen Koht.”​—Madiu 4:4.

Kitail pil anahne sukuhlki duwen Sises Krais pwehki Koht ketin kadarodo sapwellime Ohlo pwehn kihsang dipatail. Paipel mahsanih: ‘Sang reh kelehpw me komourpen aramas kak dierek.’ Paipel pil mahsanih: “Mehmen me kin pwosonla Sapwellime Iehros, iei ih me kin ahneki mour soutuk.” (Wiewia 4:12; Sohn 3:36) Ia wehwehn “pwosonla” Sises?— E wehwehki me kitail uhdahn kamehlele Sises oh ese me kitail sohte kak mour kohkohlahte ma sohte ih. Kitail kamehlele duwen met?— Ma ei, kitail pahn pousehlahte sukuhlki sang Sounpadahk Lapalapo rahn koaros oh kitail pahn wia dahme e kin mahsanih.

Ehu ahl me mwahu en sukuhlki sang Sounpadahk Lapalapo iei en pwurepwurehng wadek pwuhk wet oh kilang oh medemedewe duwen kilel kan koaros. Kilang ma ke kak sapengla peidek kan me mi nan kilel pwukat. Ke pil kak iang ahmw pahpa de nohno wadek pwuhk wet. Ma ahmw pahpa de nohno sohte mi rehmw, iang me laud teikan oh seri teikan wadek. E sou pahn mwahu ma ke kak sewese meteikan ren sukuhlki sang Sounpadahk Lapalapo me pid dahme irail anahne wia pwehn kak mour kohkohlahte nan sapwellimen Koht sampah kapw?—

Paipel mahsanihong kitail: “Sampah wet kin sosohrala.” Ahpw e pil kasalehda ia duwen atail kak mour kohkohlahte nan sapwellimen Koht sampah kapw. E mahsanih: “Me kin kapwaiada kupwur en Koht pahn momour kohkohlahte.” (1 Sohn 2:17) Eri, ia duwen atail kak mour kohkohlahte nan sapwellimen Koht sampah kapwo?— Ei, iei sang ni atail sukuhlki duwen Siohwa oh sapwellime Ohl Sises. Ahpw kitail pil anahne wia dahme kitail kin sukuhlki. Eri, se koapworopworki me ahmw onopki pwuhk wet pahn sewese iuk en wia mepwukat.