Mour Nan Sampah Kapw Meleilei Ehu

Ni ahmw kilang kilel ni kilin doaropwe wet, pepehm dah kan me ke ahneki? Mohngiongomwi soh kin inengieng soangen meleilei, nsenamwahu, oh paiamwahu me sansalda nan kilel wet? Uhdahn. Ahpw met ihte auramen ehu pwehn kamehlele me irair pwukat pahn kak pweida nin sampah?

Aramas tohto ele pwungki me iei. Irair akan en rahnpwukat iei mahwin, mwersuwed, lehk, soumwahu, mahla​—⁠malaulau kei met. Ahpw mie kahrepe en koapwoaroapwoar. Kilkilangwong ahnsou kohkohdo, Paipel mahsanih duwen “lahng kapw akan oh sampah kapw ehu me kitail kin kasikasik nin duwen inou en [Koht], me pwung pahn pweida ie.”—2 Piter 3:13; Aiseia 65:17.

“Lahng kapw akan” oh “sampah kapw,” nin duwen paipel kawehwehda, kaidehn uhdahn war en lahng kapw akan de ehu war en sampah kapw. Pwe war en sampah wet oh lahng akan kapikpikadahr unsek, oh Paipel kasalehda me re pahn teng poatopoat. (Melkahka 89:36, 37; 104:5) “Sampah kapw” iei kosoandi kapw en aramas me koukousoan nin sampah, oh “lahng kapw kan” iei kaunda unsek en lahng, de koperment ehu, me pahn kaunda pohnangin sampah. Ahpw mehlel ieu me “ehu sampah kapw,” de koasondi kapw, kak en pweida?

Eri, tamataman ire mehlelo me soangen irair kaselel pwukat iei kisehn kupwuren Koht ong sampah nin tepio. E ketin pwilikihdi tepin pwopwoudo nan Paradais en Ihden nin sampah oh ketkihong ira pwukoah kaselel ehu: “En kaparaparala oh kadaudokomwa kan en tohtohla oh kadirehla sampah oh kaunda mehkoaros.” (Senesis 1:28) Ehi, kupwuren Koht ong ira iei en kaparaparala oh ekis ekis kaparadaisiehla sampah pwon. Mehndahki ira mwuhr pilada en sapeik ong Koht, oh solahr warohng mour soutuk, kupwuren Koht en nin tepio sohte wikila. Oh e uhdahn pahn pweida nan koasondi kapwo!—Aiseia 55:11.

Ni mehlelo, ni ahmw kin wia Kapakap en Kauno, de Samat me Ketiket Nanleng, pekipeki Wehin Koht en ketdo, ke wiewia kapakapki me sapwellime koperment en lahng en kihweisang suwed nin sampah oh kaunda pohnangin koasondi kapwo. (Madiu 6:9) Oh se kak kamehlele me Koht pahn ketin sapengala kapakapo, nin duwen sapwellime Mahsen inoukidier: “Me pwung kan pahn koukousoan nan sampah oh re pahn koukousoan powe kohkohlahte.”—Melkahka 37:29.

Mour nan Sapwellimen Koht Koasondi Kapw

Wehin Koht pahn wahdong sampah kapai akan me soh-pahrekpe, kapwaiahda soahng mwahu kan koaros me Koht kupwureki nin tepio me sapwellime aramas akan en paieki nin sampah. Kailok oh wiewiahn lipilipilki aramas pahn solahr, oh ekis ekis aramas koaros nin sampah pahn wia kompoakpe mehlel en mehn mparail koaros. Nan Paipel, Koht inoukidahr me e pahn ketin ‘katokihedi mahwen wasa koaros nin sampah.’ “Sohte Wehi ehu pahn pelianda wehi tohrohr ehu, de pil kaiahn ong mahwen.”—Melkahka 46:9; Aiseia 2:4.

Sampah pwon pahn ekis ekis wiahla mwetuwel ehu ni irairen paradais. Paipel mahsanih: “Sapwtehn pahn ngisingis oh pereperen, oh rohs akan pahn mpwek oh masalpeseng nan sahpw madekeng kan. . . . pwe pihl pahn kuspekda oh pwiliwei nan sapwtehn oh wasahn pihk karakar akan pahn wiahla leh, oh sahpw madekeng kan pahn audaudkihda pwarer en pihl.”—Aiseia 35:1, 6, 7.

Pahn mie kahrepe mwahu tohto en nsenamwahu nan sampah paradaiso. Solahr ahn aramas pahn duhpek pwehki lehk en mwenge. “Sapwatail kapwaredahr audepe,” Paipel mahsanih. (Melkahka 67:6; 72:16) Koaros pahn paiekihda wahn arail doadoahk kan, nin duwen Sounkapikpatail inoukihdier: “Re pahn padokedi ar mwetuwel en wain akan oh pahn nsenamwahuki wahn wain akan. . . . re sohte pahn padokedi, ah emen tohrohr pahn kangasang.”—Aiseia 65:21, 22.

Nan Sapwellimen Koht koasondi kapw, aramas akan solahr pahn koaitala nan imwen pweidi kan de nan ihmw tok kan, pwe Koht kupwurki me: “Aramas akan pahn kauwada imwarail kan oh kousoanla loale . . . re sohte pahn kauwada, ah emen tohrohr pahn kak doadoahngki.” Paipel pil inoukihda me: “Arail doadoahk kan sohte pahn sokatepe.” (Aiseia 65:21-23) Ihme aramas akan pahn wia doadoahk kan me kaperen oh pweida mwahu. Mour sohte pahn kasangat.

Wehin Koht lao pahn pil kasapahldo nanpwung meleilei me mie nan mwetuwel en Ihden nanpwungen mahn akan, oh mahn akan oh aramas. Paipel mahsanih: “Kidilipes kan pahn kousoanla rehn sihmpwul kan, taiker kan pahn kin wendi mpen kisin kuht kan, koupwul kan oh laion pwulopwul kan pahn kin tungoalpene oh kisin seri kis me pahn wia sileparail.—Aiseia 11:6-9; Oseia 2:18.

Nna medewehla, nan sampah paradaiso soangen soumwahu akan oh soumwahu en paliwar koaros pahn kamwahula! Mahsen en Koht kihda kamehlelpen met: “Sohte emen me kin kousoan nan sahpwo pahn nda: ‘I soumwahu.’” (Aiseia 33:24) “[Koht] pahn limwihasang pilen masarail akan koaros, oh mehla solahr pahn wiawi, solahr mwahiei, solahr nsensuwed, solahr medek. Soahng mering kan solahr pahn mie.”—Kaudiahl 21:4.

Iaduwen E Kak Pweiong Uhk

Uhdahn mongiongomwi ele kin mwekidkihda inou pwukat en Koht me pid mour nan sapwellime koasondi kapw en pwung. Oh mendahki ekei pahn leme me soangen kapai ako me daulihla dahme kak pweida, mehpwukat sohte daulihla dahme kak pweida sang nin limmen atail Sounkapikada kadek sapan.—Melkahka 145:16; Maika 4:4.

Ahpw pil mie mehkan me kitail anahne kapwaiahda ma kitail mwahuki mour kohkohlahte nan paradais me pahn pweida sampah. Sises kasalehda ehu anahn kesempwal pwukat, mahsanih nan eh kapakap ong Koht: “Iet mour soutuk, aramas akan en eseikomwihla me komwihte Koht mehlel oh pil esehla Sises Krais me komw ketin kadarodohr.”—Sohn 17:3.

Eri ma se uhdahn inengieng mour nan koasondi kapw en Koht, kitail anahne en mahs padahngki kupwuren Koht oh eri apw kapwaiahda. Pwe ire wet me mehlel: “Sampah wet pahn sosohrala oh ah ineng kan koaros, ahpw ih me kapwaiahda kupwur en Koht pahn momour kohkohlahte,” pwehn paieki soutuk kapai akan me Koht pahn ketin kamwarehdi pohrail.—1 Sohn 2:17.

Likin me kileldi kan, koaros iren Paipel kan kohsang kawehwehn New World Translation of the Holy Scriptures.