Kohpada Dahme Pahn Wiawi ni Ahnsou Keren

ME PID duwen dahme pahn wiawihong aramas oh pil sampah ni ahnsou kohkohdo, wahnpoaron Piter ntingihdi: “Kitail koapworopwor oh awiawih lahng kapw oh sampah kapw, wasa me pwungen kalahngan en Koht pahn poadada ie poatopoat, duwen eh ketin inoukidahr.” (2 Piter 3:13) Soukohp Aiseia me tepin ntingihdi kokohp me pid duwen inou en “sampah kapw ehu oh lahng kapw ehu.” (Aiseia 65:17; 66:22) Eri ni ahnsou me Piter koasoia duwen kokohp wet, e kasalehda me nan eh ahnsou, inou wet saikinte uhdahn pweida.

Mwurin sounpar 32 samwa, wahnpoaron Sohn ntingihdi Kaudiahl ehu. Kaudiahlo kin koasoia me “sampah kapw” kin iang kapai kan me Wehin Koht pahn wahdo. (Kaudiahl 21:1-4) Kokohp en Paipel me pid duwen irair en sampah mwohn Wehin Koht pahn leledo kin pweida ni atail ahnsou. Ihme kahrehda kitail kak kasik me kereniong Wehin Koht pahn wahdo sampah kapw. Ia pahn duwen mwomwen sampah kapw ni ahnsowo? Pwuhken Aiseia kin padahkihong kitail.

Kapai kan nan Sampah Kapw

Meleilei oh Minimin en Kaudok nan Sampah Pwon. “Re pahn wekidohng neirail kedlahs akan ong ni mehn deipwel, oh neirail ketieu kan ong ni naipokos. Sohte ehu wehi pahn pwurehng pelianda ehu wehi, de pil kaunopada nair sounpei kan ong mahwen.”—Aiseia 2:2-4.

Meleilei Nanpwungen Aramas oh Mahn akan. “Kidi en wel kan oh sihpw kan pahn kousoanpene ni popohl, lepard kan pahn kin wendi mpen kisin kuht kan. Koupwul kan oh laion pwulopwul kan pahn kin mwengepene, oh kisin seri kan me pahn wia sileparail. Kou kan oh pehr kan pahn kin mwengepene, neirail kan pahn kin wendipene ni popohl. Laion kan pahn kin kang dihpw duwehte kou kan. . . . Sohte meninkau de mehkot suwed pahn mie nan Saion, sapwellimen Koht dohl sarawio. Pwe sampah pahn direkihla kupwurokong en KAUN-O, duwehte madau eh kin direkihla pihl.”—Aiseia 11:6-9.

Mwenge Tohto ong Koaros. “Wasaht pohn Nahna Saion KAUN-O, Wasa lapalap pahn ketin kaunopada kamadipw ehu ong wehi koaros nin sampah—kamadipw ehu me pahn direkihla kisin sak keieu kaselel oh wain keieu iou.”—Aiseia 25:6.

Solahr Mehla. “KAUN-O, wasa Lapalahpie pahn ketin kamwomwala mehla kohkohlahte! E pahn ketikihsang pilenmesen aramas koaros oh ketikihsang kanamenek me sapwellime aramas akan wie lokolongkier wasa koaros nin sampah. Pein KAUN-O me mahmahsen.”—Aiseia 25:8.

Me Melahr akan Pahn Iasada. “Irail kan sang rehn at tungoal aramas akan me melahr pahn pwurehng mourda! Paliwararail kan pahn pwurehng mourda. Koaros me memeir nan ar sousou pahn pwourda oh koulki koulen peren. . . . KAUN-O eh pahn ketin kamourada me melahr akan.”—Aiseia 26:19.

Mesaia Pahn Wia Sounkopwung Mwahu. “E sohte pahn ketin kadeikada sang ni me e kin mahsanihete de ketin karongehte. E pahn ketin kadeik me semwehmwe kan nin duwen me pwung, oh doare pwungen me paisuwed kan.”—Aiseia 11:3, 4.

Me Maskun oh me Salengepon Pahn Mwahula. “Me maskun kan pahn pehdpeseng, oh me salengepon kan pahn rongada wasa.”—Aiseia 35:5.

Sapwtehn Pahn Kapwarehda Wah. “Sapwtehno pahn perenda, oh rohs akan pahn mpwek oh masalpeseng nan sahpw madekeng kan. Sapwtehno pahn kokoul oh ngisingiski eh peren.”—Aiseia 35:1, 2.

Sampah Kapw. “I pahn wiahda sampah kapw ehu [ehu koasoandi kapw en aramas] oh lahng kapw ehu [ehu koperment kapw nanleng]. Mehkoaros me pweidahr nan ahnsou samwalahr ako pahn manokonokla douluhl. Kumwail nsenamwahukihla oh pereperenki kohkohlahte mehkan me I pahn wiahda. . . . Aramas akan [tohn sampah kapw] pahn kauwada imwarail kan oh kousoanla loale—sohte emen tohrohr pahn kak doadoahngki. Re pahn wiahda ar mwetuwel en wain oh pahn kin nsenamwahuki wahn wain kan—ahpw sohte emen tohrohr pahn kak adihasang ar wain. Nei aramas akan pahn mour werei, rasehng tuhke kei. Re pahn nsenamwahuki mehlel dipwisou kan me re koadoahkihada. Arail doadoahk kan pahn kin pweida mwahu, oh neirail seri kan sohte pahn diar paisuwed. Pwe I pahn kupwuramwahwih irail oh neirail seri kan erein dih kan koaros me pahn kohdo. Pil mwohn arail pahn kaimwisekala ar kapakap akan rehi, I pahn kapwaiada ar pekipek kan.” “KAUN-O ketin mahsanih, ‘Nin duwen sampah kapw oh nanleng kapw eh pahn mihmi mwohn silangi, ih duwen kadaudokamwail kan oh adamwail pahn mihmi mwohn silangi.’”—Aiseia 65:17-25; 66:22.

Kohpada Kapai kan en Ahnsou Kohkohdo

Kaidehn pwuhken Aiseia kelehpw me kin kohpada kapai kan en ahnsou kohkohdo. Mie kokohp tohto nan Paipel me kin kawehwehda kapai kan me Koht pahn ketin kapwaiada ki sapwellime Wehio me Krais kin ketin kaunda. Ke men kousoan nan soangen irair kaselel pwukat? Ke pahn kak! Pein rapahki dahme Paipel kin uhdahn padahngki me pid kupwuren Koht ong ahnsou kohkohdo oh sukuhliki ia duwen ke pahn kak paiekihda. Sounkadehdehn Siohwa kan pahn perenki sewese iuk en wia met.

[Kawehwehpen kilel kan nan ehu ehu pali 4]

Pahn mie meleilei nanpwungen aramas oh mahn akan

[Kawehwehpen kilel kan nan ehu ehu pali 5]

Me melahr akan pahn iasada

[Kawehwehpen kilel kan nan ehu ehu pali 6]

Sampah pwon pahn wiahla paradais