Onehda Sapahl Mehkoaros​—Nin Duwen Me Kohpadahr

“Eri, me ketiket pohn mwoahlo ahpw mahsanih, “Met I pahn onehda sapahl mehkoaros!” E ahpw pil mahsanihong ie, “Ntingihedi met, pwehki mahsen pwukat me mehlel oh likilik.”​—KAUDIAHL 21:5.

1, 2. Dahme kahrehda aramas tohto ni pwung kin pweiek en medemedewe duwen dahme pahn wiawi ni ahnsou kohkohdo?

MIE ahnsou ehu ke nda de medemedewe, ‘Ihs me ese dahme pahn wiawi lakapw?’ Ke kak wehwehki dahme kahrehda aramas akan kin pweiek en nda dahme pahn wiawi ni ahnsou kohkohdo de irail sohte kin likih aramas teikan me kin mwadangete kohpada dahme pahn wiawi ni ahnsou kohkohdo. Aramas akan sohte kak kohpada pwung dahme pahn wiawi ni sounpwong de sounpar kohkohdo.

² Nan makisihn en Forbes ASAP, e koasoia duwen oaralap wet: ahnsou. Makisihn wet koasoia dahme sounkair men nan TV, Robert Cringely, ntingihdi: “Ahnsou iei mehkot me kin kanamenekiala kitail koaros, ahpw aramas akan me kin keieu lelohng kahpwal pwehki ahnsou, iei irail akan me kin kohpada duwen ahnsou kohkohdo. Sosohng en kohpada dahme pahn wiawi ni ahnsou kohkohdo iei mwomwen mwadong ehu me kitail pahn luhs ahnsou koaros. . . . Ahpw, irail akan me dene re kak kohpada duwen dahme pahn wiawi ni ahnsou kohkohdo kin nantihong en pousehla wia arail kokohp kan.”

3, 4. (a) Dahme ekei aramas akan kin kasikasik duwen millennium kapwo? (b) Madamadau pwung dah kan ekei aramas ahneki duwen ahnsou kohkohdo?

³ Ele mwein ke kilang aramas tohto kin medemedewe duwen millennium kapwo, mwomwen aramas tohto kin medemedewe duwen ni ahnsou kohkohdo. Ni tepin pahr samwalahro, makisihn en Maclean koasoia: “Ong mehn Canada kan, pahr 2000 duwehte pahr teikan, ahpw mwein mehkot mwahu pahn kak tepida wiawi.” Professor Chris Dewdney me kohsang York University kihda kahrepe aramas akan kin kasikasik mehkot mwahu me pahn wiawi: “Millennium kin wehwehki me kitail pahn kak ni karasaras emwiemw sang senturi suwedo.”

⁴ Eri, met mwomwen auremen ehu? Nan Canada, ihte persent 22 sang roporop ehu me wiawi “kin kamehlele me sounpar 2000 pahn wahdohng sampah ahnsou kapw ehu.” Ni mehlel, kereniong elep en aramas pwukat kin “lemeleme me mahwen pahn wiawi nin sampah”​—mahwen en sampah—​mwohn sounpar 50. Ni sansal, pali laud kin lemeleme me millennium kapwo sohte pahn kak kihsang atail kahpwal akan, onehda sapahl mehkoaros. Sir Michael Atiyah, mahs ih me president en Britain Royal Society, ntingihdi met: “Mwadang kawikiwiklahn wiewia kan . . . kin wehwehki me kariesek ehu en senturi pahn wahdohng kahpwal akan ong tohnsampah koaros. Kahpwal akan en nohn mwadang tohtohlahn aramas akan, kahpwal en sahpw oh pihl oh nan wehwe saminla, oh aramas tohto duhpekla oh anahn ehu en mwadangete kihsang kahpwal pwukat.”

5. Iawasa kitail kak diarada kaweid ong dahme pahn wiawi ni ahnsou kohkohdo?

⁵ Ele mwein ke wahpwonki met, ‘Pwehki aramas akan sohte kak kohpada dahme pahn wiawi ni ahnsou kohkohdo, eri, kitail en pohnsehsehla dahme pahn wiawi ni ahnsou kohkohdo?’ Pasapeng en peidek wet, soh! Ni mehlel, aramas akan sohte kak ni pwung kohpada dahme pahn wiawi ni ahnsou kohkohdo, ahpw kitail en dehr lemeleme me sohte emen me kak wia met. Eri, ihs kak wia met, oh dahme kahrehda kitail en ahneki koapworopwor laud ong dahme pahn wiawi ni ahnsou kohkohdo? Ke kak diarada pasapeng mwahu kan nan kokohp pahieu. Re ntingihdi nan pwuhk ndand ehu oh aramas tohto me kin wadek pwuhk wet, oh pil tohto kin sohte wehwehki audepen pwuhk wet oh pohnsehsehla​—pwuhk wet iei Paipel. Sohte lipilipil dahme ke medemedewe duwen Paipel, de ia uwen laud ke ese audepen Paipel, e pahn katep laud ong uhk en wadek iren Paipel pahieu kesempwal. Re kin kohpadahr duwen dahme pahn wiawi ni ahnsou kohkohdo me inenen kaselel. Oh pil, kokohp pahieu pwukat kin koasoiada duwen dahme pahn kak wiawiong uhk oh kompoakpahmw kan.

6, 7. Iahd kokohp en Aiseia wiawi, oh iaduwen eh kokohp kan pweida?

⁶ Keieu kin dierekda nan Aiseia irelaud 65. Mwohn kitail pahn wadek, medemedewe duwen dahme wiawi ahnsowo​—iahd kokohp wet wiawihda oh soangen irair dah kei kin wiawi ahnsowo. Sapwellimen Koht soukohp, Aiseia, ntingihdi mahsen pwukat, oh e momour mpen sounpahr 100 mwohn kasohralahn wehin Suda. Kaimwiseklahn wehin Suda wiawi ni ahnsou me Siohwa sohlahr kin perehla mehn Suhs salelepek kan, oh e mweidong mehn Papilon kan en kasorehla Serusalem oh kaliduwih mehn Suhs akan. Met wiawi daulih sounpar epwiki mwurin Aiseia kohpada duwen met.​—2 Kronikel 36:15-21.

⁷ Nin duwen poadoapoad kan en pweidahn kokohp wet, tamanda me Koht padahkiong Aiseia en kohpada duwen emen me saikinte ipwidi, mehn Persia men, ede Sairus, me pahn kalohwedi Papilon. (Aiseia 45:1) Sairus sewese mehn Suhs akan en pwurala sapwarail nan pahr 537 B.C.E. Aiseia, kohpadahr duwen onehda sapahl wet, nan irelaud 65. E keieu koasoiada duwen irair akan me mehn Israel akan pahn kak paiekihda nan sapwarail kan.

8. Dahme Aiseia kohpada duwen ahnsou kohkohdo kaperen ehu, oh mehnia lepin lokaia kan me kesempwal ong kitail?

⁸ Kitail wadek nan pwuhken Aiseia 65:17-19: “I pahn wiahda sampah kapw ehu oh lahng kapw ehu. Mehkoaros me pweidahr nan ahnsou samwalahr ako pahn manokonokla douluhl. Kumwail nsenamwahukihla oh pereperenki kohkohlahte mehkan me I pahn wiahda. Serusalem kapw me I pahn wiahda pahn diren peren, oh towe kan pahn kin diren nsenamwahu. Pein ngehi pahn kin kupwurperenki Serusalem oh towe kan. Sohte ngilen mwahiei pahn mie wasao, sohte ngilen peksawas.” Ni mehlel, Aiseia koasoiada duwen irair akan me kin mwahu sang irair akan me mehn Suhs akan kin lelohng nan Papilon. E kohpadahr duwen pereperen oh diren nsenamwahu me pahn wiawi. Menlau tehk lepin lokaia pwukat “sampah kapw ehu oh lahng kapw ehu.” Ehdin lepin lokaia pwukat pwarada nan Paipel, oh e kin pwarada pahn pak pahieu, oh koaros pak pahieu kin kohpada duwen dahme pahn wiawi ong ni ahnsou kohkohdo.

9. Iaduwen mehn Suhs mahs ako kin pidada nan pweidahn kokohp en Aiseia 65:17-19?

⁹ Kokohp en Aiseia 65:17-19 kin tepin pweida ong mehn Suhs akan en mahs, nin duwen me Aiseia kohpada ni pwung, irail pwurala ni sapwarail, oh re pwurehng wia kaudok min. (Esra 1:1-4; 3:1-4) Ke ese me irail pwurala sapwarail nan sampah wet, kaidehn wasa teikan nan audepen lahng. Met pahn kak sewese kitail en wehwehki dahkot lahng kapw ehu oh sampah kapw ehu me Aiseia kohpadahr. Kitail sohte anahne medemedewe duwehte ekei kin wia, duwen kokohp soh-sansal kan en Nostradamus de aramas teikan me kin kohpada duwen ni ahnsou kohkohdo. Paipel kin kawehwehda ni sansal dahme Aiseia koasoia.

10. Iaduwen kitail kin wehwehki “sampah” kapw me Aiseia kohpadahr?

¹⁰ Nan Paipel, lepin lokaia wet “sampah” sohte kin ahnsou koaros wehwehki weren sampah. Karasepe ehu, Melkahka 96:1 mahsanih: ‘Sampah, kumwail koulkihong Siohwa.’ Kitail ese me atail sampah​—sahpwo oh madau kan—​sohte kak koul. Aramas kin koul. Ei, Melkahka 96:1 kin koasoia duwen aramas akan nin sampah.a Ahpw Aiseia 65:17 pil kin koasoia duwen lepin lokaia wet “lahng kapw ehu.” Ma “sampah” kin karasaiong koasoandi en aramas kapw ehu nan sapwen mehn Suhs akan, eri dahkot “nanleng kapw”?

11. Ia wehwehn lepin lokaia pwukat “lahng kapw”?

¹¹ Pwuhk ehu me oaralap koasoia Cyclopædia of Biblical, Theological, and Ecclesiastical Literature, me M’Clintock and Strong wiahda, kawehwehda: “Ni ahnsou lepin lokaia nanleng kin pwarada nan kasansal en kokohp akan, lepin lokaia wet kin wehwehki . . . pokon en irail kaun akan . . . wia kakaun pohn aramas akan, nin duwen nanleng kin kesihnenda oh kakaun sampah.” Cyclopaedia kin kawehwehda lepin lokaia riau pwukat ni ahnsou me re kin patpene “lahng oh sampah,” ‘ni lokaiahn karasaras en kokohp akan, lepin lokaia pwukat kin wehwehki irair en aramas akan me kin ahneki pwukoa me wekpeseng me kin pid kaunda wehi. Nanleng kin rasehng pwihn en kaun akan; sampah kin rasehng aramas akan me kin mih pahn kaun akan.’

12. Iaduwen mehn Suhs en mahs akan ekspiriens “lahng kapw ehu oh sampah kapw ehu”?

¹² Ni ahnsou me mehn Suhs akan pwurala sapwarail, re uhd iang mih pahn koasoandi kapw ehu. Mie kaun kapw akan. Serupapel, emen kadaudok en Nanmwarki Depit, wia kepina men oh Sesua kin wia samworo lapalapo ahnsowo. (Akkai 1:1, 12; 2:21; Sekaraia 6:11) Ira me rasehng “lahng kapw ehu.” Ira kin kaunda ihs? “Lahng kapw” kin kaunda “sampah kapw” me wehwehki koasoandi en aramas mwakelekelda kan me pwurodo nan sapwarail pwehn onehda sapahl Serusalem oh Tehnpas Sarawi oh pwurehng kaudokiong Siohwa wasao. Ihme kahrehda, pweidahn kokohp wet me kin pid lahng kapw oh sampah kapw kin pweida ong mehn Suhs akan ni ahnsowo.

13, 14. (a) Ia pil ehu ahnsou lepin lokaia pwukat “lahng kapw ehu oh sampah kapw ehu” pwarada nan Paipel me kitail anahne tehk? (b) Dahme kahrehda kitail kin men ese ni ahnsou wet duwen kokohp en Piter?

¹³ Nantihong wehwehki mour en padahk wet. Met kaidehn sosong ehu pwehn kawehwe Pwuhk Sarawi de kaidehn irairen mwomwen tehkete dahme wiawi nan poadoapoad en mahs. Ke kak wehwehki met ni ahmw pahn tehk pil ehu wasa nan Paipel me kileledi lepin lokaia pwukat “lahng kapw oh sampah kapw.” Nan 2 Piter irelaud 3, ke pahn kilang lepin lokaia pwukat oh wehwehki me met kin pidada dahme pahn wiawihong kitail ni ahnsou kohkohdo.

¹⁴ Wahnpoaron Piter ntingihdi sapwellime kisinlikou mpen sounpahr 500 mwurin mehn Suhs akan pwurala sapwarail. Nin duwen emen wahnpoaron en Sises, Piter ntingwong sapwellimen Krais tohnpadahk kan oh Sises adaneki “Kaun” nan 2 Piter 3:2. Nan iretikitik 4, Piter koasoia duwen ahnsou me Sises pahn “ketiket nan mwoale nanleng” oh kokohp wet kin pid atail ahnsou. Mehn kadehde tohto kin kasalehda me Sises ketiket nan mwoale nanleng ni ahnsou me Mahwen Keieu en Sampah tepidahr, oh met pweida ni e aleier manaman nin duwen Kaun emen en sapwellimen Koht Wehin nanleng. (Kaudiahl 6:1-8; 11:15, 18) Met kin mie wehwe kesempwal me pid dahme Piter kohpadahr nan irelaud wet.

15. Iaduwen kokohp en Piter duwen “nanleng kapw” kin pweida?

¹⁵ Kitail wadek nan 2 Piter 3:13: “Eri, kitail koapworopwor oh awiawih lahng kapw oh sampah kapw, wasa me pwungen kalahngan en Koht pahn poadada ie poatopoat, duwen eh ketin inoukidahr.” Kitail sukuhlikier me Sises iei Kaun kesempwal men nanleng nan “lahng kapw.” (Luk 1:32, 33) Ahpw, iren Paipel teikan kin kasansalehda me e sohte pahn kaunda kelepw. Sises inoukihda me wahnpoaron kan oh ekei aramas teikan pahn mie deurail nanleng. Nan pwuhken Ipru, wahnpoaron Pohl koasoiada duwen soangen aramas pwukat me “Koht ketin malipeier irail en kohdahla nanleng.” Sises pil mahsanih me pwihn wet pahn iang ih mwohd nan mwoale nanleng. (Ipru 3:1; Madiu 19:28; Luk 22:28-30; Sohn 14:2, 3) Mour en padahk wet: mie ekei aramas me pahn iang Sises kakaun nin duwen nanmwarki oh irail koaros iangahki Sises pahn wia nanleng kapwo. Eri, ia wehwehn “sampah kapw” me Piter koasoia?

16. Iaduwen “sampah kapw” wiawier ahnsou wet?

¹⁶ Duwehte pweidahn kokohp wet mahso​—ni ahnsou me irail mehn Suhs akan pwuralahng sapwarail—​pweidahn 2 Piter 3:13 nan atail ahnsou kin pidada irail aramas akan me kin uhpaiong kaundahn lahng kapwo. Ke kak kilang aramas rar kei nan rahnpwukat me kin perenki uhpaiong kaunda wet. Re kin paiekihda prokram en kasukuhl oh nantihong idawehnla kosonned akan me diarekda nan Paipel. (Aiseia 54:13) Aramas pwukat wiahda poahsoan en “sampah kapw” pwehki re kin wiahki pwihn en aramas nin sampah me kohsang wehi kan koaros, lokaia kan koaros, keinek kan koaros, oh re kin doadoahkpene uhpaiong Nanmwarki, Sises Krais me kin kakaun ni ahnsouwet. Ire mehlel kesempwal, iei me ke pil pahn kak iang pwihn wet!​—Maika 4:1-4.

17, 18. Dahme kahrehda mahsen pwukat nan 2 Piter 3:13 kin kihong kitail koapworopwor ong dahme pahn wiawi ni ahnsou kohkohdo?

¹⁷ Menlau dehr lemeleme me kitail sehse ni oaretik duwen dahme pahn wiawi ni ahnsou kohkohdo. Ni mehlel, ma ke pahn kasawihada mwahu 2 Piter irelaud 3, ke pahn wadek duwen wekidekla laud ehu me pahn wiawi. Nan iretikitik 5 oh 6, Piter ntingihdi duwen Nohliko ni mwehin Noha, me kasorehla aramas suwed akan ni ahnsowo. Nan iretikitik 7, Piter koasoia duwen “nanleng oh sampah en ahnsou wet,” kaun akan oh aramas akan, me wie nekinek “ong ni rahnen kadeik, iei rahnen kamwomwmwomwlahn me suwed kan.” Met kin utungada kawehwehn lepin lokaia pwukat “nanleng oh sampah en ahnsou wet” me sohte kin wehwehki weren sampah oh audepen lahng, ahpw e kin rasehng aramas akan oh arail kaun akan.

¹⁸ Mwuri, Piter kawehwehda me rahn en Siohwa pahn wia kamwakel laud ehu, pwehn kaunopada ong lahng kapw oh sampah kapw me ntingihdi nan iretikitik 13. Tehk ni imwin iretikitik wet​—“wasa me pwungen kalahngan en Koht pahn poadada ie poatopoat.” Met soh pahn padahkihong kitail me wekidekila kaselel laud pahn wiawi? Met soh kin kihong kitail koapworopwor laud ehu duwen wiewia kapw akan me pahn wiawi, iei ahnsou ehu me aramas akan pahn perenkihda ahr mour laudsang nan rahnpwukat? Ma ke kak wehwehki irewet, met kin kadehde me ke wehwehki dahme Paipel kohpadahr, oh aramas malaulau kin ahneki loalokong wet.

19. Soangen irair dahieu me pahn wiawi ni ahnsou me pwuhken Kaudiahl kawehwehda duwen “lahng kapw ehu oh sampah kapw ehu” pahn pweida?

¹⁹ Nna, kitail en pousehlahte. Kitail wadekehr lepin lokaia pwukat “lahng kapw oh sampah kapw” nan Aiseia irelaud 65 oh pil nan 2 Piter irelaud 3. Eri, pakalahng ni pwuhken Kaudiahl irelaud 21, pwe iretikitik wet pil kin doadoahngki lepin lokaia pwukat nan Paipel. E pahn kihong kitail sawas laud ma kitail pahn wehwehki ire laud kan en mwowe. Irelaud riau mwowe, nan Kaudiahl irelaud 19, kin kawehwe duwen mahwen ehu​—ahpw kaidehn mahwen nanpwungen wehi kan. Ehu pali, iei “Mahsen en Koht.” Mwein ke ese me ahd wet wehwehki Sises Krais. (Sohn 1:1, 14) E kin ketiket nanleng, oh nan kasansal wet, e kin mih rehn sapwellime sounkaris kan en nanleng. Irail kin peiong ihs? Irelaudo koasoiada duwen “nanmwarki kan,” “kaun en sounpei kan,” oh aramas akan me kin pwukoahki soangsoangen pwukoa kan, “tikitik kan oh me laud akan.” Mahwen wet kin wiawi ni ahnsou me Rahnen Siohwa pahn kohdo, en kasorehla suwed kan koaros. (2 Deselonika 1:6-10) Pousehlahte, nan pwuhken Kaudiahl irelaud 20 tepkihda kawehwehda duwen ni ahnsou me “serpent en kawao, me iei Tepil de Sehdan,” pahn sapwadada. Met kin kaunopada ahl ehu en pil tehk duwen Kaudiahl irelaud 21.

20. Kaudiahl 21:1 kin kasansalehda wekidekla laud dahieu me pahn wiawi ni ahnsou kohkohdo?

²⁰ Wahnpoaron Sohn tepkihda mahsen kaperen pwukat ni e mahsanih: “Eri, I ahpw kilangada lahng kapw ehu oh sampah kapw ehu. Keieun lahngo oh keieun sampah sohla mie, oh madau pil sohla mie.” Poahsoankihda dahme kitail wadek nan Aiseia irelaud 65 oh 2 Piter irelaud 3, kitail kak kamehlele me met sohte kin wehwehki weren sampah oh audepen nanleng oh madau pahn sohrala. Nin duwen irelaud kan mwowe kin kasalehda, me aramas suwed kan oh ahr kaunda kan, oh pil Sehdan kaun soh-sansal men pahn koakoahksang sampah. Ei, inou wet kin pid duwen koasoandi kapw en aramas akan nin sampah wet.

21, 22. Kapai dah kei Sohn kin kamehlelehong kitail, oh ia wehwehn limwihasang pilen masarail koaros?

²¹ Kitail kin ale kamehlelepen koapworopwor wet ni ahnsou me kitail pahn doulahte wadek kokohp kaselel wet. Imwin iretikitik 3 kin koasoia duwen ni ahnsou me Koht pahn ketiket rehn aramas akan, me wehwehki me e pahn sohpei ohng aramas akan pwehn kapwaiada sapwellime kupwur kan. (Esekiel 43:7) Sohn pousehla koasoia met nan iretikitik 4, oh 5: “E [Siohwa] pahn kin ketin limwihasang pilen masarail koaros. Mehla solar pahn wiawi, solahr mwahiei, solahr nsensuwed, solahr medek. Soahng mering kan sohralahr. Eri, me ketiket pohn mwoahlo ahpw mahsanih, ‘Met I pahn onehda sapahl mehkoaros!’ E ahpw pil mahsanihong ie, ‘Ntingihedi met, pwehki mahsen pwukat me mehlel oh likilik.’” Kokohp wet kin kihong kitail kangoang laud!

²² Nna, medewehla dahme Paipel kohpadahr. ‘Koht pahn kin ketin limwihasang pilen masarail koaros.’ Met sohte kak wehwehki pilen mese kan me kin kamwakelehda masatail kan, de e pil sohte kak wehwehki pilen mas me kin kohdi ahnsoun peren. Soh, pilen mese kan me Koht pahn limwihasang iei pilen mese kan me kin wiawi pwehki lokolok, nsensuwed, pahtou, oh medek kan. Iaduwen kitail kak kamehlele met? Eri, sapwellimen Koht inou wet kin pid duwen limwihasang pilen mese kan me kin wiawi pwehki ‘mehla, mwahiei, nsensuwed, oh medek solahr pahn wiawi.’​—Sohn 11:35.

23. Imwilahn irair dah kei me kokohp en Sohn kin kamehlele ong kitail?

²³ Met sohte kin kamehlelehong kitail me soumwahu en kanser, mwoator, soumwahu en mohngiong, oh mehla pahn sohralahr? Ihs rehtail me saikinte emen kompoakpatail mehkihla soumwahu, aksident, de kahpwal akan duwehte melimel de lapake? Koht inoukihong kitail me mehla sohlar pahn wiawi, oh met kin padahkiong kitail me seri kan me ipwidi sohte anahne mahla​—oh imwikihla mehla. Kokohp wet pil kin wehwehki me soumwahu pwukat solahr pahn wiawi, soumwahu en Alzheimer, osteoporosis, fibroid tumors, glaucoma, de cataracts​—soangen soumwahu kan me aramas mah kan kin kalapw soumwahukihda.

24. Iaduwen ‘lahng kapw ehu oh sampah kapw ehu’ kapaiada aramas akan, oh dahme kitail pahn sukuhliki mwuhr?

²⁴ Ke soh pahn pwungki me irairen mwahiei pahn tikitikla ni ahnsou me mehla, mahla, oh soumwahu pahn sohralahr? Ahpw, iaduwen irair en semwehmwe, wiakau seri kan, oh kopwung sapwung pwehki aramas kin lipilipilki aramas? Ma wiewia pwukat​—me kin wiawi rahnpwukat​—pahn wiwiawihte, kitail sohte pahn kak kilang mwahiei en sohrala. Ihme, mour pahn “lahng kapw oh sampah kapw” sohte pahn ohkihla kahpwal pwukat me kin kahrehda mwahiei. Wikidekla laud pahn wiawi! Kitail koasoiapeneier lepin lokaia pwukat “lahng kapw oh sampah kapw” pak siluhte sang pak pahieu me pwarada nan Paipel. Pil mie ehu ahnsou me kin doadoahngki lepin lokaia pwukat oh kadokepene dahme kitail kasawihada oh kamehlelehong kitail duwen ia kahrepe kitail kak kasikasik iahd oh iaduwen Koht pahn kapwaiada sapwellime inou en ‘onehda sapahl mehkoaros.’ Artikel en mwuri pahn koasoia duwen kokohpo oh peren dahieu kitail kak ahneki.

[Nting tikitik me mi pah]

Dahme Ke Tamanda?

• Pak siluh dah kan me Paipel kohpadahr duwen “lahng kapw ehu oh sampah kapw ehu”?

• Iaduwen mehn Suhs en mahs ako kin pid pweidahn kokohp en “lahng kapw ehu oh sampah kapw ehu”?

• Pweida dah kan pahn wiawi me pid “lahng kapw oh sampah kapw” nin duwen me Piter koasoia?

• Iaduwen Kaudiahl irelaud 21 kin kihong kitail koapworopwor kaselel ehu ong dahme pahn wiawi ni ahnsou kohkohdo?

[Kilel nan Pali 10]

Nin duwen Siohwa kohpadahr, Sairus sewese mehn Suhs akan en p wurala sapwarail nan pahr 537 B.C.E.