Repeka Men Kaperenda Siohwa

Repeka lih emen me poakohng Siohwa. Eden eh pwoudo iei Aisek. Aisek pil poakohng Siohwa. Ia duwen Repeka eh tuhwong Aisek? Ia duwen Repeka eh kasalehda me e men kaperenda Siohwa? Kitail pahn sukuhlki mahs duwen ahn Repeka pwoud, Aisek.

Ahn Aisek pahpa oh nohno iei Eipraam oh Sara. Irail kin mihmi nan sapwen Kenan. Aramas en wasao sohte kin kaudokiong Siohwa. Ahpw Eipraam men nah pwutak en pwoudiki lih emen me kin kaudokiong Siohwa. Ih eri kadarala nah laduwo, mwein Elieser, pwehn diarada ahn Aisek pwoud nan sapwen Aran. Ekei ahn Eipraam peneinei kin mihmi wasao.

Nein Eipraam ladu teikan iang Elieser kohla mwo. Wasao inenen doh. Irail oh iangahki kamel ehk me wa mwenge oh kisakis kan ahpw mwesel kohkohla. Ia duwen Elieser eh pahn ese mehnia lih me e pahn pilada ong Aisek? Ni Elieser oh ladu teikan ar lella Aran, irail uhdi ni pwarer ehu pwehki Elieser ese me aramas pahn kereniong kohdo pwehn idipil ie. E kapakapohng Siohwa: ‘Ma I peki rehn lih pwulopwul emen en kihdo pihl oh e pahn kihong ie oh nei kamel ko pihl, I pahn ese me ih lih menet me komwi ketin piladahr.’

Iet Repeka, serepein pwulopwul men, pa kohkohdo ni pwarero. Paipel mahsanih me e uhdahn masamwahu. Elieser peki reh nime pihl oh Repeka ahpw sapeng: ‘Ei, maing. I pahn kihwei nimomw pihl oh pil nimen noumw kamel ko.’ Nna medewehla! Ni ahnsou me kamel kin men nimpilda, e kin nimala pihl laud. Eri Repeka anahne pwurupwurala idipil ni pwarero. Ke kak kilang nan kilelo ia uwen Repeka eh doadoahk laud?— Elieser pwuriamweikihla ia duwen Siohwa eh ketin sapengala eh kapakapo.

Elieser kihong Repeka kisakis kaselel tohto. Repeka luhkehla Elieser oh ienge ladu ko ni imwen eh peneinei. Elieser kawehwehda dahme kahrehda Eipraam kadarala ih wasao oh ia duwen Siohwa eh ketin sapengala eh kapakapo. Ahn Repeka peneinei perenki mweidohng ih en pwoudiki Aisek.

Ahpw ke leme Repeka men pwoudiki Aisek?— Repeka ese me Siohwa ketin kadarodo Elieser wasao. Eri ni ahn Repeka peneineio ar idek reh ma e men kohla Kenan oh pwoudiki Aisek, e nda: ‘Ei, I men kohla.’ Repeka mwadang iang Elieser kohkohla. Ni arail lella Kenan, e pwoudkihla Aisek.

Pwehki Repeka wia dahme Siohwa kupwurki ih en wia, Siohwa ketin kapaiada ih. Sounpar tohto mwuri, Sises ketin ipwidi sang eh peneineio! Ma ke duwehte Repeka oh kaperenda Siohwa, e pahn pil ketikihong uhk kapai kan.