Mpwer Ehu Me Wekpesang

PWUTAK riemenet inenen wekpesang, kaidehn? Ke ese ia adara? Sounpwek mahno iei Ihsau, oh pwutak me apwahpwali sihpwo iei Seikop.

Ihsau oh Seikop mpwer ehu nain Aisek oh Rihpeka. Ara pahpa Aisek kin poakong Ihsau pwehki e uhdahn kadek pwek mahn oh wahdo kenarail kisin mwenge ong peneineio. Ahpw Rihpeka poakong Seikop pwehki e impai oh karakarahk.

Ara pahpa kalap Apram memourte ansouo, oh kitail kak medewela duen Seikop ah kin perenki rong Apram padahkiong ih duen Siohwa. Apram eri mehla ni ah mahkiehr sounpahr 175, ansouo mpwero mahkiehr sounpahr 15.

Ni ansou me Ihsau mahki sounpahr 40 e pwoudkihda lih riemen sang sahpwen Kenaan. Met kahreong Aisek oh Rihpeka insensuwed laud, pwehki lih pwukat sohte kaudokiong Siohwa.

Eri ehu rahn mehkot wiawi me kahreong Ihsau en mwakarada kowahlap ong rie Seikop. Ansou lelehr me Aisek pahn kapaiada nah pwutak laudo. Pwehki Ihsau me laud sang Seikop, Ihsau eri kihkiheng me ih me pahn ale kapai. Ahpw Ihsau ansoukis mwowe netikihlahr ah pwuhng en ale kapai ong Seikop. Pil, ni ansou me pwutak riemenet ipwidi Koht mahsanih me Seikop pahn ale kapai. Oh iet me wiawiehr. Aisek kihong kapai nah pwutak Seikop.

Mwuhri, ni en Ihsau esehdahr met e mwakarkihda kowahlap ong Seikop. E inenen mwakar oh inda me e pahn kamehla Seikop. Ni en Rihpeka rongadahr met, e uhd insensuwedkihla. Ih eri padahkiong ah pwoud Aisek: ‘E pahn inenen suwed ma Seikop pil pahn pwoudkihda emen lih pwilidak en Kenaan.’

Pwehki met Aisek eri likweri Seikop oh padahkiong ih: ‘Dehr pwoudkihda lih en Kenaan. Kohla rehn peneinei en kisehn ahmw pahpa kalap, Peduel nan Aran. Pwoudkihda emen nain Lapan serepein ko.’

Seikop peikiong ah pahpa, oh ansouohte tapiada ehu sapal reirei lahng wasa me peneinei en ah pahpa ko kousoan, Aran.