Aisek Alehda Ah Pwoud Lih Kasehlel Men

KE ESE ihs lih nan kilel wet? Eden liho Rihpeka. Oh ohlo me kohkohdohn tuhong liho iei Aisek. E pahn wiahla ahn Aisek pwoud. Eri iaduen met wiawi?

Ahn Aisek pahpa Apram mwahuki emen lih mwahu en pwoudiki nah pwutak. E sohte mwahuki Aisek en pwoudkihda lih en Kenaan, pwehki aramas en wasao kin kaudokiong koht likamw akan. Ihme Apram likweri nah ladu oh indaiong: ‘I mwahuki ken kohla rehn kisehi kan Aran oh ale emen lih pwoud en nai pwutak, Aisek.’

Ansouohte ladu en Apram alehda kamel ehk oh tapiada ah sapsapal reireio. Ni ansou me e kerenlahng kisehn Apram kan, ih eri uhdi ni pwarer ehu. Met mwehrin souwas, ansou me lih akan kin kohdo sang nan kahnihmwo pwen idip pihl sang nan pwarer wasao. Ihme ansouo ladu en Apramo eri kapakap ong Siohwa: ‘Lih me kihong ie nimei pihl oh kanim pile nai kamel ko, ih me komw pilada pwoud en Aisek.’

Sohte pwand Rihpeka kohieido sang nan kahnihmwo pwen idip pihl. Ni ansou me laduo peki reh nime pihl, e kihong ih. Serepein menet pil idip oh kanim pile nah kamel me men nim pihldahr ko. Met inenen doadoahk laud pwehki kamel kin nimala pihl laud.

Ni en Rihpeka kaimwisekela wiewia wet, ladu en Apram idek me ia eden ah pahpa. E pil peki ma e kak wendi ni ihmwarail pwongo. Serepeino eri inda: ‘Ai pahpa Peduel, oh mie wasa me ke kak keiru reht pwonget.’ Ahn Apram laduo ese me Peduel nain rien Apram emen ohl me ede Nahor. Ihme ni ansouo e kelepwikidi oh danke Siohwa pwehki e kahluwa ih ong kisehn Apram ko.

Ni pwongo ahn Apram laduo padahkiong Peduel oh rien Rihpeka ohl Lapan dahme e kohkihdo. Ira pwungki me Rihpeka en iang ih kohla oh pwoudkihda Aisek. Eri, dahme Rihpeka koasoaia ni ah idek reh met? Serepeino inda, ‘Ei,’ e mwahuki kohla. Ihme mahnda en rahn mwuhri irail eri dakehda kamel ko oh tapiada sapallahng wasa doh pwuralahng Kenaan.

Ni ansou me re lel Kenaan, e soutikpeneiehr. Rihpeka kilang ohl emen alialu nan mohs. Iei Aisek. Ohlo uhdahn perenkihda ah kilangada Rihpeka. Ahn Aisek nohno Sarah mehlahr sounpahr siluh mwowe oh e saikinte insenamwahukihla met. Ahpw met Aisek kilangadahr Rihpeka oh uhdahn limpoak ong liho laud, kahreong ih en pil pwurehng insenamwahula.