Mie Pak me Ke Pehm me Ke Kelekelehpw oh Masepwehk?

Kilang kisin pwutak menet nan kilel wet. E mwomwen me e masepwehk oh pehm me e kelekelehpw, kaidehn? Mie pak me ke ahneki soangen pepehm wet?— Ekei pak, koaros kin ahneki soangen pepehm wet. Paipel mahsanih duwen kompoakepahn Siohwa kan me pil pehm me re kelekelehpw oh masepwehk. Emen rehrail iei Elaisa. Nna, kitail pahn sukuhlki duwen ih.

Elaisa kin mihmi nan Israel mahsie, mwohn Sises ketin ipwidi. Eihap, nanmwarki en Israel ni ahnsowo, sohte kin kaudokiong Koht mehlel, Siohwa. Eihap oh eh pwoud, Sesepel, kin kaudokiong koht likamw Paal. Eri, pali laud en aramas nan Israel pil tepida kaudokiong Paal. Lih nanmwarki Sesepel inenen lemei oh e men kemehla aramas koaros me kin kaudokiong Siohwa, iangahki Elaisa! Ke ese dahme Elaisa wia?—

Elaisa tang! E kohla wasa doh nan sapwtehn oh rukula nan pwoaren paip ehu. Ke leme dahme kahrehda e wia met?— Ei, e masepwehkada. Ahpw Elaisa sohte anahne masepwehk. Dahme kahrehda? Pwehki e ese me Siohwa kak ketin sewese ih. Siohwa ketin kasalehiongehr Elaisa sapwellime manaman. Ehu ahnsowo, Siohwa ketin sapeng ahn Elaisa kapakap sang ni eh ketin kadarodo kisiniei sang nanleng. Eri, Siohwa uhdahn kak ketin sewese Elaisa met!

Ni Elaisa eh mihmi nan pwoahro, Siohwa mahsanihong Elaisa: ‘Dahme ke wiewia wasaht?’ Elaisa sapeng: ‘Ngehite kelehpw me kin kaudokiong komwi. I kelekelehpw oh I masak me I pahn kamakamala.’ Elaisa medewe me meteikan koaros me kin kaudokiong Siohwa kamakamalahr. Ahpw Siohwa mahsanihong Elaisa: ‘Soh, met sohte mehlel. Miehte aramas 7,000 me kin kaudokiong ie. Ken eimah. Miehte doadoahk me I men ken wia!’ Ke leme Elaisa perenkihda eh rong met?—

Dahme ke kak sukuhlki sang dahme wiawihong Elaisa?— Ke sohte anahne pehm me ke kelekelehpw oh masepwehk. Mie kompoakepahmw kan me kin poakohng Siohwa oh re pil poakohng uhk. Oh pil Siohwa ahneki manaman laud oh e pahn ketin sewese iuk! Ke perenki ese me ke sohte uhdahn kelehpw?—