Wehi Ehu me Pahn Kaunda Sampah Pwon

Ke kak medewehla Wehi dahieu me kitail koasokoasoia?— Ei, Wehin Koht. Wehi wet pahn kahrehiong sampah en wiahla paradais. Ke men esehla duwen Wehi wet?—

Wehi koaros mie nanmwarki. Oh nanmwarki kin kaunda aramas nan sapweo. Ke ese ihs Nanmwarki en Wehin Koht?— Sises Krais. E ketiket nanleng. Kereniong e pahn kaunda koaros pohn sampah nin duwen Nanmwarki men! Ke leme kitail pahn peren ahnsou me Sises pahn kaunda sampah pwon nin duwen Nanmwarki men?—

Kitail pahn uhdahn peren! Nan Paradais, aramas kan solahr pahn pei de kohla mahwen. Aramas koaros pahn poakohng emenemen. Sohte emen pahn soumwahuda de mehla. Me maskun kan pahn kilangada wasa, me salengepon kan pahn rongada wasa oh irail kan me sohte kak alu pahn kak tang oh lus. E pahn diren mwenge ong koaruhsie. Oh mahn akan pahn mwahupene nanpwungarail oh pil mwahuong kitail. Aramas akan me mehla pahn pwurehng mourda. Ohl oh lih tohto me kitail sukuhlki nan kisin pwuhket duwehte Repeka, Reap, Depit oh Elaisa pahn pwurehng mourda! Ke men tuhwong irail ni ahnsou me irail pahn pwurehng mourda?—

Siohwa ketin poakohng uhk oh men ken peren. Ma ke kin sukusukuhlki duwen Siohwa oh peikiong ih, ke pahn kak mour kohkohlahte nan paradais kaselel ehu! Ih met me ke men wia?—