Ia Duwen Ipwidi en Seri Men Eh Kin Wekidala Mouren Pwopwoud

Ipwidi en seri men kin kak ahnsowohte kaperen oh apwal ong pwopwoud ehu. Nin duwen pahpa oh nohno kapw ehu, mwein kowe oh omw pwoudo pahn pwuriamweikihla ni amwa pahn diarada me kumwa pahn doadoahngki pali laud en amwa ahnsou oh kehl pwehn apwalih noumwa serio. Sohte meir mwahu oh pil wekideklahn pepehm kan pahn kak kahrehda kumwa en ahneki pwunod nan amwa pwopwoud. Kumwa koaros pahn anahne wiahda wekidekla kan pwehn apwalih noumwa serio oh en kolokol amwa nanpwungmwahu. Ia duwen kaweid en Paipel eh kak sewese kumwa en powehdi kahpwal pwukat?

1 WEHWEHKI IA DUWEN IPWIDI EN SERI MEN EH KAK WEKIDALA AMWA MOUR

DAHME PAIPEL MAHSANIH: “Limpoak me kanengamah oh kadek.” Oh pil, limpoak “sohte kin mehwo, de kin mwadang lingeringerda.” (1 Korint 13:4, 5) Nin duwen nohno men me ahpwtehn nainekihda seri men, ke uhdahn pahn kin kihong omw ahnsou laud ong noumw seri. Ahpw, omw pwoudo pahn kakete tepida pehm me ke sohla kesempwalki ih, eri dehr manokehla me e pil anahne omw ahnsou. Ma ke kin kasalehda kanengamah oh kadek, ke pahn kak sewese ih en pehm me ke kin anahne ih oh en pil pehm me e iang pidada nan apwalih noumwa serio.

“Kumwail ohl pwopwoud kan . . . kumwail uhdahn pahn kin pohnese me iei irail me luwet.” (1 Piter 3:7) Wehwehki me omw pwoudo pahn kihong eh ahnsou laud ong noumwa serio. Omw pwoudo ahneki pwukoa kapw kei oh ele e pahn pwunod, pwangada, de pil nsensuwed. Ekei pak, e pahn kakete nsensuwedla pahmw, ahpw song en meleilei, pwehki “kanengamah mwahusang kehlail.” (Lepin Padahk 16:32) Kasalehda elen loalokong oh utung eh anahn akan.—Lepin Padahk 14:29.

DAHME KE KAK WIA:

• Pahpa kan: Sewese omw pwoudo apwalih noumwa seri, pil iangahki nipwong kan. Katikala ahnsou me ke kin doadoahngki ong soahng teikan me ke kin wia pwe ken kak kihong ahnsou laud ong omw pwoud oh noumwa serio

• Nohno kan: Ni ahnsou me omw pwoudo pahn men sewese iuk apwalih noumwa serio, mweidohng en sawas. Ma e sohte wia doadoahk mwahu, dehr kauwe ih, ahpw ni ahl kadek kasalehiong ih ia mwomwen eh pahn wia met

2 KAKEHLAKA AMWA NANPWUNGMWAHU

DAHME PAIPEL MAHSANIH: “Ira en kin wiahla ehu.” (Senesis 2:24) Mehnda ma mie emen me kapw nan amwa peneinei, tamataman me kowe oh omw pwoudo “wiahla ehu.” Wia uwen amwa kak en kolokol amwa nanpwungmwahu en kehlail.

Lih pwopwoud kan: Kalahnganki en omw pwoud eh kin sawas oh utung uhk. Omw kin kasalehda kalahngan kak “kamwahwihala wasa.” (Lepin Padahk 12:18) Ohl pwopwoud kan: Ndaiong omw pwoud ia uwen omw poakohng oh kesempwalki ih. Kapingahki mwomwen eh kin apwalih peneinei.​—Lepin Padahk 31:10, 28.

“Eri, kumwail dehr kin ngoangki raparapahkihte pein kamwahupamwail kan, ahpw emenemen en ngoangki rapahki kamwahupen meteikan.” (1 Korint 10:24) Ahnsou koaros wia dahme kin mwahuong omw pwoud. Nin duwen pwopwoud ehu, kihong ahnsou en koasoipene, kapinga oh rong emenemen. Dehr roporop ni ahnsou me e kin lel ahnsoun amwa pahn kin wia nsenen pwopwoud. Pohnese en omw pwoudo eh anahn kan. Paipel mahsanih: “Dehpa irehdi paliwere ong ni nsenen pwopwoud.” (1 Korint 7:3-5) Eri koasoiapene ni mehlel ire wet nanpwungamwahte. Amwa kanengamah oh wehwehki ire wet pahn kakehlaka amwa nanpwungmwahu.

DAHME KE KAK WIA:

• Dehr manokehla en wiahda ahnsou ong kumwa kelehpw

• Wia kisin soahng kan me pahn kahrehiong omw pwoudo en pehm me ke poakohng, me duwehte ntingihong ih kisinlikou de kihong ih kisin kisakis

3 KAIAHNEHDA NOUMWA SERI

DAHME PAIPEL MAHSANIH: “Sang ni omw kisin seri ke pil kin ese Pwuhk Sarawi, me kak kasalehiong uhk erpit me kak kahluweiukalahng nan mour soutuk.” (2 Timoty 3:15) Koasoanehdi dahme kumwa pahn wia pwehn kasukuhlih noumwa serio. Noumwa serio ahneki koahiek kaselel en sukuhlki soahng kan, pil mwohn eh ipwidi e pil kak wia met. Ahnsou me serio mihmihte nan kapehden eh nohno, e kin kak rongada ngilomw oh mwekidki omw pepehm kan. Wadawadohng ih sangete ni eh pwelel. Mendahki ele e sohte pahn wehwehki dahme ke wadewadek, omw kin wie wadawad ong ih pahn kak sewese ih en perenki wadawad ni ahnsou me e pahn laudla.

Noumwa serio sohte nohn tikitik en rong amwa kin koasoia duwen Koht. Mweidohng en kin rong amwa kin kapakapohng Siohwa. (Deuderonomi 11:19) Pil ni ahnsou me kumwail kin mwadongpene, koasoia duwen soahng kan me Koht ketin kapikada. (Melkahka 78:3, 4) Ni eh kekeirda, e pahn pehm amwa limpoakohng Siohwa oh eh limpoakohng ih pahn pil kekeirda.

DAHME KE KAK WIA:

• Kapakapki erpit pwe kumwa en kak kaiahnehda noumwa serio

• Kapwukapwurehiong lepin lokaia kan oh madamadau kan ong noumw serio pwe en mwadang tepida sukuhlki soahng kan