Kilangwohng Koht Pwe Omw Mouren Pwopwoud en Nsenamwahu

Siohwaa Koht me ketin wia tepin kapwopwoud. Paipel padahkihong kitail me e ketin wiahda tepin liho oh “ketin kahredohng” ohlo. Adam uhdahn perenkihda, ih eri nda: “Iei met emen me rasehng iehte—tih me sang tih kat, oh uduk sang ni udukei.” (Senesis 2:22, 23) Siohwa ketin kupwurkihte pwopwoud kan en nsenamwahu.

Ni ahnsou me ke pwopwoudla, ele ke pahn medewe me soahng koaros pahn mwahu. Ahpw, ni mehlelo, ohl pwopwoud men oh lih pwopwoud men me uhdahn poakohng emenemen pahn ekei pak ahneki kahpwal kan. (1 Korint 7:28) Nan kisin pwuhk wet, ke pahn diarada kaweid kan sang nan Paipel. Ma ke doadoahngki kaweid pwukat, e pahn kak sewese omw mouren pwopwoud oh peneinei en nsenamwahu.​—Melkahka 19:8-11.

1 PWUNGKI PWUKOA ME SIOHWA KETIKIHONG UHK

DAHME PAIPEL MAHSANIH: Ohl pwopwoud iei me moangen eh peneinei.​—Episos 5:23.

Ma kowe ohl pwopwoud men, Siohwa ketin kasik ken apwalih mwahu omw pwoud ni elen kadek. (1 Piter 3:7) E ketin wiahda liho en wia sawaspomw, oh e kupwurki ken kasalehda omw wauneki oh poakohng ih. (Senesis 2:18) Uwen omw pahn kin poakohng omw pwoudo me kahrehda ke pahn men nsenohki mahs eh anahn kan mwohn omw anahn kan.​—Episos 5:25-29.

Ma kowe lih pwopwoud men, Siohwa ketin kasik ken wauneki laud omw pwoud oh sewese ih en kak kapwaiada eh pwukoa. (1 Korint 11:3; Episos 5:33) Utung en omw pwoudo pilipil kan oh sang nan loalomw unsek miniminiong eh koasoandi kan. (Kolose 3:18) Ma ke wia met, ke pahn lingan mwohn silangin Siohwa oh omw pwoud.​—1 Piter 3:1-6.

DAHME KE KAK WIA:

• Idek rehn omw pwoudo ia duwen omw pahn kak kamwahwihala omw wia ohl pwopwoud de lih pwopwoud mwahu men. Rong kanahieng, oh song wia dahme ke kak wia pwe ken kak kamwahwihala

• Kanengamah. Anahne ahnsou pwe kumwa koaros en esehla ia mwomwen amwa pahn kin kaperenda emenemen

2 UHDAHN NSENOHKI EN OMW PWOUDO EH PEPEHM KAN

DAHME PAIPEL MAHSANIH: Ke anahne tetehk en omw pwoudo eh anahn kan. (Pilipai 2:3, 4) Apwalih omw pwoud ni keneinei, oh tamataman me Siohwa kupwurki sapwellime ladu kan en “kadek ong aramas koaros.” (2 Timoty 2:24) “Lokaia mwahl kin kauwehla wasa rasehng kedlahs, ahpw lokaiahn loalokong kin kamwahwihala wasa.” Eri pilada mwahu omw lokaia kan. (Lepin Padahk 12:18) Sapwellimen Siohwa manaman pahn sewese iuk en koasoi ni kadek oh limpoak.​—Kalesia 5:22, 23; Kolose 4:6.

DAHME KE KAK WIA:

• Kapakapki sawas pwe ken meleilei, oh ritingada omw madamadau mwohn omw pahn koasoiaiong omw pwoud ire kesempwal kan

• Medewe kanahieng duwen dahme ke pahn nda oh ia duwen omw pahn ndahla

3 MEDEMEDEWE NIN DUWEN PWIHN EHU

DAHME PAIPEL MAHSANIH: Ni ahnsou me ke pwopwoudida, kowe oh omw pwoud wiahla “warteieu.” (Madiu 19:5) Ahpw kumwa aramas riemen oh amwa madamadau ele pahn wekpeseng. Eri kumwa anahne esehla ehukihpene amwa madamadau kan oh pepehm kan. (Pilipai 2:2) Anahne ehupene ni ahnsoun wiahda pilipil kan. Paipel mahsanih: “Ale kaweid mwahu, ke ahpw pahn pweida.” (Lepin Padahk 20:18) Mweidohng kaweid en Paipel kan en kahluwa kumwa ni amwa pahn kin ehupene wiahda pilipil kesempwal kan.​—Lepin Padahk 8:32, 33.

DAHME KE KAK WIA:

• Ehukihong omw pwoud omw pepehm kan, kaidehn ihte omw madamadau de ire teikan

• Idek rehn omw pwoud ia eh madamadau mwohn omw pahn wiahda pilipil kesempwal kan