En Loalopwoatpene

Siohwa ketin kupwurki kitail en kesempwalki “loalopwoat.” (Lepin Padahk 3:3) Met wia mehkot me keieu kesempwal nan mouren pwopwoud, pwehki ma sohte loalopwoat, pahn sohte mie likilik. Likih emenemen wia mehkot kesempwal pwe limpoak en kak kekeirda.

Rahnwet, mie soahng tohto me kak kauwehla loalopwoatpene nan pwopwoud. Pwehn pere mouren omw pwopwoud, mie soahng riau me ke anahne koasoanehdi teng en wia.

1 OMW PWOPWOUD EN WIA MEHKOT ME IANG KEIEU KESEMPWAL

DAHME PAIPEL MAHSANIH: “Pilada dahme keieu mwahu [kesempwal, NW].” (Pilipai 1:10) Omw pwopwoud iei mehkot me iang soahng kan me keieu kesempwal nan omw mour. E warohng wia kisehn mehkan me uhdahn kesempwal.

Siohwa ketin kupwurki ken kesempwalki omw pwoud oh ken “dadaurete omw peren” rehn omw pwoud erein amwa mour. (Eklesiasdes 9:9) E ketin kasalehda mwahu me ken dehr sohla nsenohki omw pwoud ahpw kumwa koaros en diarada wiepe kan en kaperenda emenemen. (1 Korint 10:24) Kahrehiong omw pwoud en pehm me ke anahne ih oh kesempwalki ih.

DAHME KE KAK WIA:

• Kaukaule kihong omw pwoud ahnsou oh tetehk mwahu eh irair kan

• Nan omw madamadau pahn kin “kita” ahpw kaidehn “ngehi”

2 PERE MOHNGIONGOMW

DAHME PAIPEL MAHSANIH: “Mehmen me pahn kilikilang lih emen oh men dihpki, nahn e wiadahr dipen kamwahl nan kapehde.” (Madiu 5:28) Ma emen kin medemedewehte duwen soahng samin kan, e kin rasehng eh sohte kin lelepekiong eh pwoud.

Siohwa ketin mahsanih me ke anahne “kanahieng omw madamadau.” (Lepin Padahk 4:23; Seremaia 17:9) Pwehn wia met, ke anahne pere mesomwen sang soahng samin kan. (Madiu 5:29, 30) Alasang mehn kahlemeng en Sohp, me wiahda inou lapalap ehu en dehr kangkakil lih emen ni ineng suwed. (Sohp 31:1) Koasoanehdi teng ken dehr kilang kilel suwed. Oh koasoanehdi ken dehr mwahukihda emen tohrohr likin omw pwoud.

DAHME KE KAK WIA:

• Wia pwe en sansal ong meteikan me ke kin uhdahn loalopwoatohng omw pwoud

• Pohnese pepehm en omw pwoud, oh mwadangete kauhdi omw nanpwungmwahu rehn emen me pahn kahrehda omw pwoud en soansuwedki