IRELAUD 5
Ia Duwen Omw Kak Kolokol Popohl Rehn Omw Peneinei
“Kumwail en . . . kadek, mpahi oh karakarahk, aktikitik oh kanengamah.”—Kolose 3:12
Ni meh riemen eh kin pwopwoudida ira kin wiahla ehu peneinei kapw. Mehlel ke pahn ahnsou koaros poakohng oh wauneki omw pahpa nohno, ahpw met, omw pwoud me wia aramas me keieu kesempwal ong uhk nan sampah. Mwein met pahn apwal ong ekei omw peneinei en wehwehki. Ahpw kaweid en Paipel kan pahn kak sewese iuk ken kin toupahrek, pwe ken kak kolokol popohl rehn omw peneinei ni omw kin nanti laud en kakairada omw nanpwungmwahu rehrail.
1 AHNEKI MADAMADAU PWUNG DUWEN OMW PENEINEI
DAHME PAIPEL MAHSANIH: “Kahkahki semomw oh inomw.” (Episos 6:2) Mendahki ia uwen omw mah, ahnsou koaros ke anahne wauneki omw pahpa oh nohno. Pohnese me omw pwoudo pil mie eh pahpa oh nohno me e anahne kin tehk. “Limpoak . . . sohte kin peirin,” eri dehr perki en omw pwoudo nanpwungmwahu rehn eh pahpa nohno.—1 Korint 13:4; Kalesia 5:26.
DAHME KE KAK WIA:
Song dehr doadoahngki soangen koasoi me duwehte, “Omw peneinei kin ahnsou koaros mwamwahlikin ie” de “Omw nohnou sohte douluhl mwahuki dahme I kin wia”
Song wehwehki en omw pwoudo eh madamadau ong ireo
2 WIAHDA KOASOANDI TENG MA ANAHN
DAHME PAIPEL MAHSANIH: “Ohl emen pahn kin mweikihsang seme oh ine oh ehukihong eh pwoud, pwe ira en kin wiahla ehu.” (Senesis 2:24) Ni ahnsou me ke pwopwoudida, omw pahpa oh nohno ele pahn pehm me ira kin pwukoahkinuhkte, oh re ele pahn men iang pidada nan omw mouren pwopwoud laudsang dahme konehng.
Kowe oh omw pwoud me pahn koasoanehdi iahd me ira pahn iang pidada nan amwa mouren pwopwoud, oh ni ahl limpoak kasalehiong ira dahme kumwa koasoanehdi. Ke kak koasoi ni sansal oh inen ong ira duwen omw koasoandi kan, ahpw ni ahnsowohte sohte kasalehda loaumwohmw. (Lepin Padahk 15:1) Aktikitik, opampap oh kanengamah pahn sewese iuk kakairada omw nanpwungmwahu rehn omw peneinei, oh kowe oh omw peneinei kak pousehlahte “kasalehda nanpwungamwail amwail limpoak.”—Episos 4:2.
DAHME KE KAK WIA:
Ma ke kin pwunodki duwen ia uwen amwa peneinei kan ar kin pidada nan amwa mour, koasoiaiong omw pwoud ni ahnsou me soahng koaros meleilei
Kumwa koaros en pwungkipene ia duwen amwa pahn apwalihala ire pwukat