IRELAUD 3
Ia Duwen Kowe oh Omw Pwoud Pahn Kak Kamwahwihala Kahpwal kan
“Kumwail nantihong en limpoakpene, pwe limpoak kin mahkohng soahng tohto.”—1 Piter 4:8
Ni ahnsou me kowe oh omw pwoud pahn tepida mihpene, soangsoangen kahpwal kan pahn kin pwarada. Mwein e pahn sang ni wekpeseng en amwa madamadau kan, pepehm kan, oh elen mour. De mwein kahpwal kan pahn kohsang likin amwa pwopwoud oh sang irair kan me kumwa sohte kasik en wiawi.
E kin wia kasongosong en pohnsehse dahme uhdahn kin wiawi, ahpw Paipel kaweidki kitail en tehk oh kamwahwihala atail kahpwal kan. (Madiu 5:23, 24) Ke pahn diarada kaweid me keieu mwahu ni omw pahn doadoahngki kaweid en Paipel kan.
1 KOASOIAPENE KAHPWALO
DAHME PAIPEL MAHSANIH: “Mie . . . ahnsoun koasoi.” (Eklesiasdes 3:1, 7, NW.) Tehk kanahieng pwe kumwa en kihong ahnsou en koasoiapene amwa kahpwalo. Kasalehiong omw pwoud ni mehlel omw pepehm oh dahme ke medewehiong ireo. Ahnsou koaros “lokaia mehlel” ong omw pwoud. (Episos 4:25) Mendahki ma omw pepehm kehlail kan pidada met, pelianda omw ineng en men akamai. Omw sapeng ni meleilei kak sewese amwa koasoipene en dehr wiahla akamai laud ehu.—Lepin Padahk 15:4; 26:20.
Mehnda ma ke sapwungki, kasalehdahte kadek oh dehr manokehla kasalehda limpoak oh wahu ong omw pwoudo. (Kolose 4:6) Song mwadang en kamwahwihala irairo, oh dehr uhdihsang koasoakoasoipene.—Episos 4:26.
DAHME KE KAK WIA:
Koasoanehdi ahnsou me konehng en koasoiapene kahpwalo
Ma e lel ahnsoun omw pahn rong, pelianda omw ineng en sopuk. Pwe e pahn mie omw ahnsoun koasoi
2 RONG OH WEHWEHKI
DAHME PAIPEL MAHSANIH: “Kumwail limpoakpene . . . oh kumwail wahupene nanpwungamwail.” (Rom 12:10) Mwomwen omw pahn rong uhdahn kesempwal. Song en wehwehki en omw pwoudo eh madamadau ni limpoak oh aktikitik. (1 Piter 3:8; Seims 1:19) Dehr mwomwehdahte rongorong. Ma kak, kihdi mahs dahme ke wiewiao oh rong kanahieng omw pwoudo, de ke peki ma kumwa kak koasoiapene mwuhr. Ma ke medewehiong omw pwoudo nin duwen iengomw men a kaidehn emen me kin pelian uhk, ke sohte pahn mwadang en “mwakar.”—Eklesiasdes 7:9.
DAHME KE KAK WIA:
Ni omw wie rongorong, ritingada omw madamadau en kak rong ire koaros, mendahki ke sohte perenki dahme ke rongorongo
Rong pwe ken wehwehki dahme e uhdahn men koasoia. Tehk mwekid en paliwere oh mwomwen ngileo
3 KAPWAIADA
DAHME PAIPEL MAHSANIH: “Doadoahk ke ahpw pahn mour; ma ke pahn mwomwohdete wie koasoakoasoi, ke pahn semwehmwe.” (Lepin Padahk 14:23) E sohte itar en pwungkipenehte dahme mwahu ong kahpwal wet. Ahpw kumwa anahne kapwaiada dahme kumwa koaros piladahr. Met pahn kakete pidada nanti oh doadoahk laud, ahpw e uhdahn pahn mie katepe. (Lepin Padahk 10:4) Ma kumwa doadoahkpene nin duwen pwihn ehu, amwa doadoahk laud “pahn mie katepe.”—Eklesiasdes 4:9.
DAHME KE KAK WIA:
Pilada kahk mwahu kan me emenemen kumwa kak wia pwehn kamwahwihala amwa kahpwalo
Pwurepwurehng tetehk ia duwen amwa kekeirda