Kaweid Sang Rehn Koht Ong Pilada Ihs Me Ke Pahn Pwoudki

“I pahn padahkihong uhk ahl me ke pahn weid ie I pahn kaweid uhk oh panawih iuk.”​—MELKAHKA 32:8.

1. Ia ekei irair kesempwal kan pwehn sewese pwopwoud ehu en pweida mwahu?

SOUNPIR nan wehwe nan circus likahswei oh kadarala likahs oh pwonopwonla ahpw piripir kohwei. Ih eri kapawei peh kan pwehn parokedi peh kan en ienge teio me neh kan katengeteng ni likahs teio oh moange uhdila pah onopada en daper peh kan en me piripir kohdo nan wehwe. Soun skate pohn ais emen ohl oh emen lih kirikiriswei pohn ais ni soan pahrek nan wasahn kapoudiahl. Eri, ohlo pwekeda liho oh kesehda nan wehwe. Eri, liho pir nan wehwe oh pwuridi oh sokokihdi elep neh pohn ais oh iangete ohlo kirikiris kohwei ni soandi mwahu. Likamwete mehpwukat me nok mengei. Eri, ihs me pahn kak song wiewia keper pwukat ni a sohte pahn praktis de en mie ienge me koahiek, oh ni mehlel en alehdi kaweid kan me pwung ong wiewia pwukat. Ni soangen ahlohte, likamwete pwopwoud me kin pweida mwahu mehkot me kin pein miehla. Ahpw, ni mehlel, pwopwoud kin anahne emen en ahneki werek mwahu oh ahneki pahrekpene en wiewia kan, ahpw mehlel me kin poahsoankihda kaweid erpit kan. Ni mehlel, kaweid pwung kin inenen kesempwal.

2. (a) Ihs me tepida koasoanehdi koasoandi en pwopwoud, oh ong kahrepe dahieu? (b) Iaduwen ekei koasoandi en kapwopwoud kan wiawihdahr?

² E wia mehkot me kin pein wiawi ni me pwulopwul men me saikinte pwopwoud kin medemedewe kanahieng ihs me pahn wiahla ah pwoud erein mour. Sang ni ahnsou me Siohwa tepin wiahda koasoandi en pwopwoud, ohl emen pwoudki lih emen kin wia mehkot me aramas akan kin ahn wia. Ahpw, tepin ohl, Adam, sohte pein pilada lih emen en pwoudki. Siohwa, ni limpoak, ketikihong ih liho. (Senesis 2:18-24) Tepin pwopwoud anahne kaparaparala pwe sampah pwon pahn dirkihla aramas akan. Mwurin tepin kapwopwoudo, pali laud en ahnsou pahpa oh nohno kin koasoanehdi ihs me neira seri kan pahn pwoudki. (Senesis 21:21; 24:2-4, 58; 38:6; Sosua 15:16, 17) Nan rahn pwukat, edetehn nan ekei sahpw akan re kin koasoanehdihte ihs me neirail kan pahn pwoudki, aramas tohto nan rahnpwukat kin pein pilada ahr pwoud.

3. Dahme emen anahne wia ma e pahn pilada ihs me e pahn pwoudiki?

³ Ia mwomwen emen a kin pilada eh pwoud? Ekei kin kilang me masamwahu​—me kin wia ineng en masarail. Ekei kilang me kepwehpwe me kak kihong irail arail anahn en dipwisou kan. Ahpw, soahng pwukat pahn kak wahdohng emen peren oh nsenamwahu rehn eh pwoud? Lepin Padahk 31:30 mahsanih, “Poh komwokomw me widingan, oh lingan kin sohrala, ahpw lih emen me kin lemmwiki Kauno [“Siohwa,” New World Translation] uhdahn pahn ndandla.” Dahme keieu kesempwal: Sohpeiong Siohwa ni ahnsou me ke pahn pilada ihs me ke pahn pwoudki.

Kaweid Limpoak Me Kohsang Rehn Koht

4. Sawas dahieu me Koht ketikihda ong pilada ihs me kitail pahn pwoudiki?

⁴ Samatail limpoak, Siohwa, ketikihda sapwellime Mahsen me ntingdi pwehn kaweidih kitail ni soahng koaros me kitail pahn wia. E mahsanih: “Ngehi me Kauno [“Siohwa,” NW], omw Koht, me kupwurki padahkih iuk pwe en wia kamwahu ehu ong uhk oh kaweid uhk nan ahl me ke pahn keid ie.” (Aiseia 48:17) E sohte kapwuriamwei en diarada nan Paipel kaweid kan me kin pweida mwahu ong wia pilipil mwahu me pid ihs me emen pahn pwoudki. Siohwa kin kupwurki atail pwopwoud kan en pweida mwahu oh peren. Ihme kahrehda, E ketikihong kitail sawas akan pwehn sewese kitail en wehwehki oh kapwaiada kaweid pwukat. Kitail soh pahn lemeleme me Sounkapikpatail me limpoak kak kihong kitail soahng sawas oh kaweid?​—Melkahka 19:8.

5. Dahme anahn ong pwopwoud ehu en ahneki peren me pahn werei?

⁵ Ni ahnsou me Siohwa wiahda koasoandi en pwopwoud, E kupwurki koasoandi wet nanpwungen ohl oh lih en mihmihte kohkohlahte. (Mark 10:6-12; 1 Korint 7:10, 11) Ihme kahrehda, E “kin kalahdeki mweipeseng en pwopwoud,” oh e ketin mweidong mweipeseng en wiawi ihte ma emen rehra wiahda dipen “kamwahl.” (Malakai 2:13-16; Madiu 19:9) Ihme kahrehda, en wia pilipil mwahu en ihs me kitail pahn pwoudki kin wia pilipil kesempwal ehu nan atail mour oh kitail en dehr mwamwahliki pilipil wet. Pilipil en ihs me emen pahn pwoudki kin kisehn pilipil malaulau kan me kitail kin wiahda kin kak imwikihla atail kin peren de nsensuwed erein atail mour. Atail pahn wiahda pilipil mwahu pahn kak kahrehda kitail pahn ahneki peren oh nsenamwahu nan atail mour, ahpw, ma kitail pahn wiahda pilipil sapwung, met pahn kak imwikihla nsensuwed. (Lepin Padahk 21:19; 26:21) Pwe ahmw peren en kak werei, e kesempwal en wiahda ahmw pilipil mwahu oh wiahda ahmw inou me ke pahn kak kolokol erein amwa pwopwoud, pwe Koht ketin koasoanehdi koasoandi en pwopwoud ong riemen me pahn miniminpene oh sawaspene.​—Madiu 19:6.

6. Dahme kahrehda ohl oh lih pwulopwul kan anahne kanahieng ni ahnsou me re pahn pilada ihs me re pahn pwoudiki, oh iaduwen irail pahn kak wiahda arail pilipil kan ni elen loalokong?

⁶ Mwahnakapw oh peinakapw kan anahne kanahieng pwe lingan en paliwar de ineng kehlail kan dehpa karotongala arail mehn tenek ni ahnsoun rapahkihda arail pwoud. Ni mehlel, ma ara pwopwoud pahn poahsoanehda pohn ihte soahng pwukat, ara limpoak kak mwadang sarasang oh ira pahn kak tepiehr kadongodongkihla emen emen. (2 Samuel 13:15) Ahpw, weksang met, soangen limpoak me kin werei kin kak wiawi ma kitail pahn ahnsou koaros karanih atail pwoud oh pil ma kitail pahn wehwehkihla pein kitail. Kitail pil anahne en wehwehki dahme keieu mwahu ong kitail ele mwein kaidehn dahme pein mongiongitail kan kin inengieng. (Seremaia 17:9) Ihme kahrehda, kaweid me kohsang rehn Koht me dierekda nan Paipel me inenen kesempwal. E kin sewese kitail en dehdehkihla mwahu iaduwen kitail kak wiahda pilipil pwung kan nan atail mour. Sounmelkahka kasalehda duwen sapwellimen Siohwa mahsen kan: “I pahn padahkihong uhk ahl me ke pah weid ie; I pahn kaweid uhk oh panawih iuk.” (Melkahka 32:8; Ipru 4:12) Ni ahnsowohte me pwopwoud kin kaitarala atail anahn akan ong limpoak oh anahn en ahneki aramas en werekiong, pwopwoud pil kak wia mehkot apwal me kak ihte powehkihdi ma kitail pahn mahlahn madamadau oh wehwehkihla mehkan.

7. Dahme kahrehda ekei aramas sohte men ale kaweid me kin poahsoanda pohn Paipel me kin pid duwen pilada ahmw pwoud, ahpw met pahn kak imwikihla dah?

⁷ E kin wia elen erpit ma kitail pahn rong duwen dahme Ih me tepin koasoanehdi koasoandi en pwopwoud kin mahsanih duwen wiahda atail pilipil kan ong ihs me kitail pahn pwoudki. Ahpw, mwein kitail sohte men rong kaweid me poahsoanda pohn Paipel ni ahnsou me atail pahpa oh nohno kan de Kristian elder kan kin kihong kitail kaweid pwukat. Mwein kitail lemeleme me re sohte kin uhdahn wehwehki kitail, oh atail pepehm kehlail kan mwein kin kahrehong kitail en wia dahme pein mongiongitail kan kin men wia. Ahpw, ni ahnsou dower powe, kitail mwein pahn kak koluhla pwandala pwe kitail sohte rong kaweid mwahu me kohwongehr kitail pwe kitail pahn kak nsenamwahu nan atail mour. (Lepin Padahk 23:19; 28:26) Oh pil, mwein mwuhr kitail sohte kilang limpoak nan atail pwopwoud, oh kitail kin apwaliki apwalih neitail seri kan oh mwein atail pwoud sohte iang padahk mehlel. E kin inenen kansensuwed ma koasoandi en pwopwoud me pahn kakete wahdohng pwopwoud peren laud ahpw e uhd imwila suwed!

Lelepek ong Koht​—Irair Kesempwal Ehu

8. Iaduwen lelepek ong Koht kin sewese pwopwoud ehu en pweida mwahu oh perenda?

⁸ Mehlel, poakpene mehkot me kin kolpene mwahu pwopwoud. Ahpw, ahnekipene kesempwaliki mehkan me inenen kesempwal sang met pwe ih me kin wiahda pwopwoud me mwahu oh peren. Ma ira koaros pahn lelepek ong Siohwa Koht, met pahn kak imwikihla miniminpene oh nsenamwahu. (Eklesiasdes 4:12) Ni ahnsou me Kristian pwopwoud ehu pahn poahsoanehda ara mour pohn kaudok mehlel en Siohwa, ira kak miniminpene ni pali ngehn, oh ni ara madamadau kan, oh pil tiahk kan. Ira kin kohpene oh onop Mahsen en Koht. Ira pil kin ahnekipene ahnsoun kapakap, oh met pahn kaminiminpene mohngiongara. Ira kin sawaspene ni ara pahn iang towehda mihding kan koaros en Kristian oh kalohk. Met kin sewese ira en ehupene ni pali ngehn oh sewese ira en kerenpene. Ahpw, me keieu kesempwal, met kin imwikihla sapwellimen Siohwa kapai kan.

9. Dahme Eipraam wia me kin pid rapahki en nah pwutak Aisek eh pwoud, oh met kin imwikihla dah?

⁹ Pwehki Eipraam kin lelepek ong Koht, e pil men kaperenda Koht ni ahnsou me e pahn pilada en nah pwutak Aisek eh pwoud. Eipraam mahsanihong nah ladu lelepek men: “I anahne ke en inoukiong ie oh kahukihla mwohn Kauno [“Siohwa,” NW], Koht en nanleng oh sampah, me ke sohte pahn pilada en nei pwutaket eh pwoud emen sang wasaht nan Kenan. Ke pahn pwurowei nan uhdakeio oh rapahkihda en nei pwutak Aisek, eh pwoud sang rehn kisehi ko. . . . [Siohwa] pahn ketin kadar sapwellime tohnleng mwohmw pwe ke en kak alehsang wasao en nei pwutako eh pwoud.” Repeka wiahla lih pwopwoud kaselel men, oh Aiseia poakpoake ih ni mehlel.​—Senesis 24:3, 4, 7, 14-21, 67.

10. Mehnia koasoandi en Pwuhk Sarawi kin kohwong ohl oh lih pwopwoud kan?

¹⁰ Ma kitail Kristian akan me saikinte pwopwoud, lelepek ong Koht pahn kak sewese kitail en kekeirada loalatail soangen irair kan me pahn kak sewese kitail en kaunopada pwehn kapwaiada koasoandi kan me kin pid pwopwoud me kileledi nan Pwuhk Sarawi ahnsou me kitail pwopwoudida. Wahnpoaron Pohl koasoia duwen ekei koasoandi kan en ohl oh lih pwopwoud kan: “Kumwail lih pwopwoud kan, kumwail pein uhpah amwail pwoud kan, duwehte amwail kin uhpah Kauno. . . . Kumwail ohl pwopwoud kan, kumwail poakohng amwail werek kan duwehte Krais eh ketin poakohng mwomwohdiso oh ketin pangala pein ih pwehki mwomwohdiso. . . . Ohl akan uhdahn pahn poakohng ar werek kan duwehte ar kin poakohng pein paliwarail kan. . . . Ahpw e pil dokedokei kumwail; eri emenemen ohl pwopwoud en poakohng eh werek duwehte eh kin poakohng pein ih, oh emenemen lih pwopwoud en wauneki eh pwoud.” (Episos 5:22-33) E inenen sansal ong kitail me mahsen en Pohl me kin kohsang rehn Koht oh kaweid wet kin kasalehda me limpoak oh wahu me inenen kesempwal nanpwungen pwopwoud. Ma emen kin kapwaiada kaweid wet, e kin kasalehda me e lemmwiki Siohwa. Edetehn ahnsoun meleilei de kahpwal akan, pwopwoud kan anahne en loalopwoat ong emen emen sang mohngiong. Irail Kristian akan me kin medemedewe en pwoudki emen pahn anahne en kapwaiada pwukoa wet.

Wiahda Pilipil Mwahu Ong Iahd Ke Pahn Pwopwoud

11. (a) Mehnia kaweid en Pwuhk Sarawi kin pid duwen ahnsou dah e konehng emen en pwopwoudida? (b) Karasepe dahieu kin kasansalehda duwen elen erpit en idawehnla kaweid en Paipel me ntingihdier nan 1 Korint 7:36?

¹¹ E inenen kesempwal en ese ong pein kitail ahnsou konehng en pwopwoud. Pwehki aramas koaros me wekpeseng, Pwuhk Sarawi sohte kin koasoanehdi sounpar depe emen en pwopwoudla. Ahpw, e kin kawehwehda me e mwahu emen en awih lao lel e “daulih ahnsoun peren en pwulopwul,” pwe ahnsou me e pwulopwul, ineng en men wia nsen en pwopwoud me kehlail oh pahn kakete kerempwa ah pilipil pwung kan. (1 Korint 7:36) Michelle koasoia, “Ni ahnsou me I kilang kompoakpahi kan werewerekih meteikan oh pwopwoudla, oh ni ahnsou pali moron en irail kin wie pwulopwulte, met iei ahnsou apwal ehu ong ie en kapwaiada kaweid wet, ahpw I ese me kaweid wet me kin kohsang rehn Siohwa, oh kitail pahn kak paiekihda sapwellime kaweid akan. Ahpw, pwehki I sohte karuwaru en pwoudiki emen, I kak medemedewe duwen ahi nanpwungmwahu rehn Siohwa oh pil koahiekla, eri met emen sohte kak alehdi ni ahnsou me e wiahla mwahnakapw de peinakapw. Sounpar kei mwuri, I koahiekla oh kakete kapwaiada pwukoa kan de pil powehdi kahpwal akan me pahn kak pwarada nan pwopwoud.”

12. Dahme kahrehda e sohte wia elen loalokong en karuwaru pwoudiki emen ni ahnsou e pwulopwul?

¹² Aramas akan me kin karuwaru pwopwoudla ni ahnsou me irail pwulopwulte kin mwuhr diarada me arail anahn akan oh ineng kan kin wekila ni ahnsou me re kin laudla. Irail kin pohnese me mehkan me re kin inengieng mahs kin sohlahr wia mehkot kesempwal ong irail. Emen sister pwulopwul kin kalap medemedewe me e men pwopwoud ahnsou me e pahn lel sounpar 16. Eh nohno kahlap pwopwoudla ni ahnsou me e sounpar 16 oh pil eh nohno. Ni ahnsou me emen mwahnakapw me e kin mwahuki sohte pwungki en pwoudki ih ahnsowo, sistero uhd pilada en pwoudki emen me men pwopwoud ahnsowo. Ahpw, mwuhr, e koluhla ahpw pwandala.

13. Irail akan me kin nohn karuwaru en pwopwoud, kin saikinte ahneki dah?

¹³ Ni ahnsou me kitail pahn medemedewe en pwoudki emen, e kesempwal kitail en mahla ni atail madamadau ong soahng kan koaros me pid pwopwoud. Ma emen pwopwoud ahpw e saikinte kaunopada, e pahn kak imwikihla kahpwal tohto me pwopwoud pwulopwul kan sohte kaunopada pwehn powehdi. Irail mwein saikinte lelohng kahpwal pwukat de ahneki koahiek en powehdi pwunod akan me kin pwarada nan pwopwoud kan oh kaiahne seri kan. E konehng en pwopwoud ihte ni ahnsou me kitail kaunopadahr ni paliwar, madamadau kan oh pali ngehn pwehn kak pwopwoud oh nsenamwahu.

14. Dahme anahn ma aramas akan men powehdi pwunod akan me kin pwarada nan pwopwoud?

¹⁴ Pohl ntingihdi duwen irail akan me pahn pwopwoudida pahn “diar apwal tohto.” (1 Korint 7:28) Ei, kahpwal akan pahn kak pwarada pwehki irair akan en pwopwoud kin wekpeseng, oh pil ara madamadau kan kin wekpeseng. Pwehki soh-unsek en aramas akan, ele mwein e kin apwal en kapwaiada pwukoa kan nan koasoandi en pwopwoud. (1 Korint 11:3; Kolose 3:18, 19; Taitus 2:4, 5; 1 Piter 3:1, 2, 7) Ahpw, ma emen kin mahla ni ah madamadau oh pil mah ni pali ngehn, e pahn kak rapahki oh kapwaiada kaweid kan me kin kohsang rehn Koht oh mehpwukat pahn sewese ih en powehdi kahpwal kan ni elen limpoak.

15. Dahme pahpa oh nohno kan kak wia en kaunopada neirail seri kan ong pwopwoud? Kihda karasepe ieu.

¹⁵ Pahpa oh nohno kan kak kaunopadahng neirail seri kan ong pwopwoud ni arail kin sewese neirail kan en wehwehki duwen kesempwalpen kapwaiada kaweid kan me kin kohsang rehn Koht. Ni ahr kin doadoahngki kaweid sang Pwuhk Sarawi oh sawaspen Paipel en Kristian akan, pahpa oh nohno kan kak sewese neirail seri kan en tehk ma pein irail de emen me re men pwoudiki kakehr kapwaiada koasoandi en pwopwoud.a Emen sister me ede Blossom, mahki sounpar eisek waluh, lemeleme me e poakong brother pwulopwul men nan ah mwomwohdiso. Brother pwulopwul menet wia Regular Pioneer, oh ira men pwopwoudida. Ahpw, en Blossom eh pahpa oh nohno peki reh en awih sounpar ehu, pwe re lemeleme me Blossom nohn pwulopwul. Mwuri, Blossom ntingihdi met: “I inenen perenkihda me I rong oh kapwaiada kaweid sang ahi pahpa oh nohno pwe ira ahneki erpit me pid ire wet. Mwurin sounpar ehu, I koahiekla oh tepida kilang me brother menet sohte ahneki irair kesempwal kan en wiahla ohl pwopwoud mwahu men. Kedekedeo, brother menet solahr wia emen Sounkadehdehn Siohwa, oh I kak nda me I pitsangehr kahpwalo. I inenen pai pwe I kak likih ahi pahpa oh nohno pwe re kihong ie kaweid me erpit oh mwahu!”

‘Pwopwoud Ihte Rehn Kauno’

16. (a) Iaduwen Kristian akan mwein pahn ale kasongosong kan en ‘ihte en pwoudikihda emen Kristian’? (b) Ni ahnsou kitail lelong kasongosong en pwoudikihda seupwoson men, dahme Kristian akan anahne medemedewe duwen?

¹⁶ Sapwellimen Siohwa kaweid ong Kristian akan me inenen sansal: ‘Pwopwoud ihte rehn Kauno.’ (1 Korint 7:39) Kristian pahpa oh nohno kan iangahki neirail seri kan mwein pahn kakete ale kasongosong kan me pid ire wet. Iaduwen? Eri, me pwulopwul kan mwein kin men pwopwoud, ahpw likamwete sohte aramas nan mwomwohdiso me re kak diar pwehn pwoudki. Mehlel, mwein nan ekei wasa kan, brother kan me kak pwopwoud me malaulau sang sister kan me kak pwopwoud, de sohte emen brother me mwahu en pwoudikihda wasao. Eri, ahnsou me ohl pwulopwul men me saikinte iangala padahk mehlel kin mwahukihda sister men, mwein sistero pahn lemeleme me e kak pohnsehsehla kaweid me Siohwa ketikihda nan Pwuhk Sarawi me pid pwopwoud . . . de mwein emen lih pwulopwul me saikinte iangala padahk mehlel mwahuki brother men, oh brothero pahn lemeleme me e kakete pohnsehsehla kaweid me kohsang Siohwa me pid pwopwoud. Pahn soangen irair pwukat, e pahn mwahu en medemedewe duwen mehn kahlemeng mwahu en Eipraam. Pwehki Eipraam kin tehk mwahu me nah pwutak Aisek pahn pwoudikihda emen tohn kaudok en Siohwa, wiewia wet kin kasalehda me e men kolokolete eh nanpwungmwahu rehn Koht. Aisek pil kin wia met ong nah pwutak Seikop. Irail koaros kin nantihong kapwaiada kupwuren Koht, oh met kin kaperenda Koht oh irail ale kapai tohto.​—Senesis 28:1-4.

17. Dahme kahrehda ma emen pahn pwoudikihda seupwoson men, e pahn imwikihla suwed, oh ia kahrepe keieu kesempwal kitail en ‘ihte pwoudikihda emen Kristian’?

¹⁷ Ekei pak, irail me seupwoson akan kin wiahla Kristian. Ahpw, pali laud en ahnsou, ma emen pwoudikihda emen me seupwoson, ah pwopwoud kin imwila suwed. Irail me seupwoson akan sohte kin ahneki madamadau kan me pahrekiong atail pwoson, koasoandi kan, oh pil atail mehn akadei kan. (2 Korint 6:14) Met pahn kak kahrehong koasoipene nanpwungen ohl pwopwoud oh lih pwopwoud en apwal oh pil ara peren pahn tikitikla. Karasepe ieu, emen Kristian lih kin inenen nsensuwed pwe ni ahnsou me e ale kangoang laud sang mihding me e iang towehda, e kin pwurala imwe, ahpw e sohte kak koasoiaiong eh pwoud seupwoson duwen mehkan ni pali ngehn me e ahpwtehn sukuhliki. Ni mehlel, dahme keieu kesempwal iei en kapwaiada kaweid wet: ‘pwopwoud ihte rehn Kauno’ pwe met kin kasalehda me kitail kin lelepek ong Siohwa. Ni ahnsou me kitail kin kapwaiada Mahsen en Koht, kadeikpen loalatail sohte pahn kadeingkitailla, pwe kitail kin “wia soahng kan me kin kaparanda kupwure.”​—1 Sohn 3:21, 22.

18. Ni ahnsou me kitail kin medemedewe duwen pwopwoud, ire kesempwal dah kei kitail anahne medemedewe duwen, oh dahme kahrehda?

¹⁸ Ni ahnsou me kitail pahn medemedewe duwen pwopwoud, kitail anahne keieu nsenohki de tehk duwen tiahk mwakelekel oh uwen kehlail ni pali ngehn en emen me kitail men pwoudikihda. Ma e kin kasalehda irair akan en Kristian, iangahki limpoak ong Koht oh mour unsek oh lelepek ong Ih, mehpwukat kin kesempwal sang tehk duwen masamwahu oh paliwar mwahu en emen me kitail men pwoudiki. Irail akan me kin kenikenla rehn Koht kin paiekihda met pwehki re kin kalahnganki oh kapwaiada ahr pwukoa en kehlailda ni pali ngehn nin duwen pwopwoud ehu. Oh pil, sawas me keieu laud pwopwoud ehu pahn kak alehdi kin kohsang ma ira koaros kin lelepek ong Sounkapikpatail oh pwungki ni unsek en ale sapwellime sawas. Ni ahl wet, kitail kin wauneki Siohwa oh atail pwopwoud kin kak poahsoankihda utuht en pali ngehn me pahn kahrehda pwopwoud tengeteng.

[Nting tikitik me mi pahs]

Iaduwen Ke Pahn Sapeng?

• Dahme kahrehda kaweid sang rehn Koht me kesempwal ong sewese kitail en pilada mwahu atail pwoud kan?

• Iaduwen lelepek ong Koht pahn kak sewese atail pwopwoud kan en kehlailda?

• Iaduwen pahpa oh nohno kan kak kaunopada neirail seri kan ong pwopwoud?

• Dahme kahrehda e kesempwal kitail en ‘ihte pwoudikihte emen Kristian?

[Kilel kan nan pali 11]

Kapwaiada sapwellimen Koht kaweid ong pilada ihs me ke pahn pwoudki pahn kak imwikihla peren laud

[Kilel kan nan pali 12]

Kapai laud kan kin kohsang atail kapwaiada kaweid en ‘pwopwoud ihte rehn Kauno’