Ahneki Madamadau Pwung ong Mouren Pwopwoud me Sohte Soandi Mwahu
“Ong me pwopwoudier kan kosonned ehu mie, kaidehk ahi pwe sapwellimen Kaun-o.”—1 KOR. 7:10.
KE KAK KAWEHWEHDA?
Ni ahl dahieu me Koht ketin kapatapenehr pwopwoud?
Ia duwen elder kan arail kak sewese Kristian kan me ahneki kahpwal nan arail mouren pwopwoud?
Ia duwen atail pahn kilangwohng pwopwoud?
1. Ia duwen Kristian kan ar kin kilangwohng koasoandi en pwopwoud? Dahme kahrehda?
NI KRISTIAN akan arail kin pwopwoudida, re kin wiahda inou ehu ong Koht. Pwukoa wet inenen kesempwal. (Ekl. 5:4-6) Siohwa me ketin koasoanehdi koasoandi en pwopwoud, kahrehda ih me ketin “kapatapene” pwopwoud kan. (Mark 10:9) Pwopwoud kan kin patpene mwohn silangin Koht sohte lipilipil dahme kosonned en ehuehu sahpw kin koasoanehdi. Sapwellimen Siohwa ladu kan anahne kilangwohng arail koasoandi en pwopwoud duwehte eh kin ketin wia. Pwopwoud kan anahne wia met mehnda ma irail kaidehn sapwellime tohnkaudok kei ni ahnsou me re pwopwoudida.
2. Peidek dah kan me kitail pahn koasoiapene nan iren onop wet?
2 Pwopwoud kak imwikihla peren laud. Ahpw, dahme kitail kak wia ma kitail sohte nsenamwahuki atail pwopwoud? Soangen pwopwoud wet kak pwurehng mwahula? Sawas dah me mie ong pwopwoud kan me sohte ahneki popohl nan arail mouren pwopwoud?
E PAHN WIA PWOPWOUD NSENAMWAHU DE SOH?
3, 4. Dahme kak wiawi ma kitail pahn wiahda pilipil sapwung ehu en ihs me kitail pahn pwoudiki?
3 Ni mouren pwopwoud en Kristian ehu eh kin pweida, e kin kahrehda peren mehlel oh met kin kawauwih Siohwa. Ahpw ma pwopwoud ehu sohte kin nsenamwahu, e kak kahrehda nsensuwed laud. Kristian kiripw kan me kin idawehn sapwellimen Koht kaweid, pahn kak tapiada arail mouren pwopwoud ni ahl mwahu. Ahpw Kristian men me wiahda pilipil sapwung ehu ni eh pahn pilada ihs me e pahn pwoudiki pahn kak ahneki kahpwal kan oh nsensuwed. Karasepe, ekei me pwulopwul kin tepida ahneki emen mwohn arail saikinte onopada ong pwukoahn mouren pwopwoud. Ekei kin rapahkihda arail pwoud nan Internet oh kin mwadangete pwopwoudida oh mihla nan mouren pwopwoud me sohte nsenamwahu. Ekei kin wiahda dihp laud ehu ni ahnsou me re kin ehu oh re kin tapiada arail mouren pwopwoud ni arail sohte kin wauneki emenemen.
4 Ekei Kristian pwoudiki me sohte “kin idawehn Kauno” oh re kin lelohng kahpwal pwehki arail pwoud sohte kin papah Siohwa. (1 Kor. 7:39, NW) Ma ke mi nan irair wet, kapakapki sapwellimen Koht mahk oh sawas. Siohwa sohte kin ketikihsang kahpwal kan me kin kohsang sapwung kan en mahs, ahpw ma aramas men kin mehlel oh wehkada me e wiahda sapwung, Siohwa kak ketin sewese pwehn dadaurete. (Mel. 130:1-4) Eri, wia omw kak koaros en kaperenda Koht oh peren me Siohwa kin ketikihda pahn kakehlaiukada.—Neh. 8:10.
AHNSOU ME MOUREN PWOPWOUD EHU MIHLA NAN KEPER
5. Soangen madamadau dah kan me Kristian kan en dehr ahneki ma arail mouren pwopwoud sohte nsenamwahu?
5 Ma ekei sohte kin nsenamwahu nan arail mouren pwopwoud, re kakete medewe: ‘Uhdahn I men kamwahwihala ei mouren pwopwoud? Mwein I pahn nsenamwahu ma I pwoudiki emen tohrohr!’ Re mwein kin medemedewe duwen arail pahn kohkohsang arail pwoud oh medewe: ‘I men pwurehng saledekla! I kak mweisang ei pwoudo? Mehnda ma I sohte kak mweisang ei pwoud pwehn pwoudiki emen tohrohr, I kak tohrohrasang oh pwurehng nsenamwahuki ei mour.’ Kristian akan en dehr ahneki madamadau pwukat oh medemedewe ia pahn mwomwen arail mour ma re wia met. Ahpw re anahne song wia uwen arail kak nan irairo oh idawehn sapwellimen Koht kaweid.
6. Ia wehwehn sapwellimen Sises mahsen nan Madiu 19:9?
6 E kesempwal en tamataman me Kristian men me mweisang eh pwoud sohte kak saledek en pwurehng pwopwoudida nin duwen me Paipel mahsanih. Sises mahsanih: “Pwe mehmen mweisang eh pwoud ni kahrepe ieu me kaidehn kamwahl, e ahpw pwoudikihda emen lih tohrohr, e wiadahr dipen kamwahl.” (Mad. 19:9) Nenek kin pidada kamwahl oh dihp laud teikan me pid wia nsen pwopwoud. Ma Kristian men kin medemedewe en mweisang eh pwoud mehnda ma sohte emen ira wiahda dipen nenek, e kesempwal en kapakapki sapwellimen Koht kaweid.
7. Dahme aramas akan kakete medewe ma pwopwoud Kristian ehu sohte pweida?
7 Ma pwopwoud ehu sohte kin mweipeseng de tohrohrpeseng, e kakete kasalehda me ahn emen nanpwungmwahu rehn Koht luwet. Wahnpoaron Pohl kihda peidek kesempwal wet: “Pwe ma aramas emen sohte ese duwen eh pahn apwalih pein eh peneinei, a ia duwen eh pahn kak apwalih mwomwohdisohn Koht?” (1 Tim. 3:5) Ma ira koaros kin nda me ira Kristian ahpw ara pwopwoud sohte pweida, aramas kakete medewe me ira sohte kin kapwaiada dahme ira kin padahngki.—Rom 2:21-24.
8. Dahme sapwung ma pwopwoud Kristian ehu koasoanehdi ira en tohrohrpeseng de mweipeseng?
8 Ma pwopwoud Kristian ehu kin koasoakoasoane me ira pahn tohrohrpeseng de mweipeseng ahpw met sohte pahrekiong kaweid en Paipel, mie mehkot sapwung nan ara nanpwungmwahu rehn Siohwa. Mwein emen de ira koaros sohte kin doadoahngki kaweid kan en Paipel. Ma ira koaros kin likih Siohwa ni mohngiong unsek, ira pahn kak kamwahwihala ara pwopwoud.—Wadek Lepin Padahk 3:5, 6.
9. Ia duwen ekei Kristian ar kin paiekihda ar kin mihmihte rehn arail pwoud?
9 Pwopwoud tohto uhdahn pweida mendahki nin tapio e sohte mwomwen me e kak pweida. Kristian kan me kin ahneki kahpwal nan arail pwopwoud oh sohte kin mwadangete kohkohsang arail pwoud kin kalapw paiekihda. Karasepe, medewehla dahme kak wiawi ma ohl pwopwoudo kaidehn Sounkadehdehn Siohwa. Wahnpoaron Piter ntingihedi: “Kumwail lih pwopwoud kan, kumwail peikiong amwail pwoud kan, pwe ma ekei irail sohte pwoson mahsen en Koht, re en alehkihla pwoson amwail mouren wiewia mwahu. Kumwail sohte anahne kapahrekiong irail, pwe re pahn pein kilang amwail mour mwakelekel oh duwen amwail wauneki Koht.” (1 Pit. 3:1, 2) Pwehki ahn liho wiewia mwahu, eh pwoudo kakete iangala padahk mehlel. Kristian kan me kin kamwahwihala arail mour en pwopwoud oh mihmihte rehn arail pwoud kin wauneki Koht oh peneinei pwon kak paiekihda.
10, 11. Wekidekla dah kan me ele pahn kahrehda kahpwal nan mouren pwopwoud? Sawas dahieu me Kristian kan kak koapworopworki?
10 Pali laud en Kristian kiripw kan kin pilada ren pwoudiki emen Kristian me papidaislahr pwehki re men kaperenda Siohwa. Mendahki met, ara irair kan kakete wekila ni ahl ehu me ira sohte kasik. Karasepe, emen ira kakete tepida ahneki kahpwal laud en madamadau oh pepehm. De mwein emen ira uhdihsang oh sohla kin iang kalohk. Met duwehte dahme wiawihong Linda, sounkalohk ngoang oh nohno limpoak men.a E pehm me sohte mehkot e kak wia ni ahnsou me eh pwoudo tepida wia soahng suwed kan. Eh pwoudo sohte koluhkihla soahng kan me e wiahda oh e anahne piskenla. Kristian kan me mi nan soangen irair wet kak medewe me solahr arail koapworopwor. Dahme re anahne wia?
11 Mwein ke pahn medewe: ‘Uhdahn I anahne kin nannantihong kamwahwihala ei mouren pwopwoud sohte lipilipil dahme wiawi?’ Sohte emen kak de anahne wiahiong uhk pilipil wet. Ahpw mie kahrepe mwahu kan en dadaurete nan pwopwoud me mwomwen solahr koapworopwor. Kristian kan me kin dadaurete nan mouren pwopwoud apwal pwehki kadeikpen loalarail sohte mweidohng ren kohkohsang arail pwoud kin kesempwal rehn Koht. (Wadek 1 Piter 2:19, 20.) Siohwa pahn ketin doadoahngki sapwellime Mahsen oh manaman pwehn ketin sewese Kristian kan ma re kin wia soahng koaros me re kak pwehn kakehlakahda arail mouren pwopwoud.
RE ONOPADAHR REN SEWESEIUK
12. Ia ahn elder kan pepehm ma kitail pahn peki arail sawas?
12 Ma mie kahpwal nan omw mouren pwopwoud, ke kak peki sawas rehn Kristian koahiek kan. Elder kan wia silepen mwomwohdiso oh re pahn perenki kasalehiong uhk sapwellimen Koht kaweid kan sang nan Paipel. (Wiewia 20:28; Seims 5:14, 15) Ke dehr medewe me elder kan sohla pahn waunekin uhk oh omw pwoudo ma kumwa pahn koasoiaiong irail amwa kahpwal laud nan amwa mouren pwopwoud oh peki arail sawas. Re pahn poakohng oh wauneki kumwa laudsang mahs pwehki re kilang me kumwa uhdahn men kaperenda Koht.
13. Kaweid dahieu me mi nan 1 Korint 7:10-16?
13 Ni ahnsou me elder kan pahn sewese pwopwoud kan me kaidehn koaros Sounkadehdehn Siohwa kan, re kak doadoahngki ahn Pohl kaweid: “Ong me pwopwoudier kan kosonned ehu mie, kaidehk ahi pwe sapwellimen Kaun-o, eri, iet: lih pwopwoud men sohte pahn mweisang eh pwoud; a ma e mweisang, e sohte pahn pwurehng pwopwoudida, de e uhdahn pahn pwurehng eh wereko; oh ohl pwopwoud sohte pahn mweisang eh pwoud. . . . Pwe ia duwen omw kak ese . . . ma ke kak komourala omw pwoudo de soh?” (1 Kor. 7:10-16) Ia uwen eh pahn wia kapai ehu ma omw pwoudo wiahla sapwellimen Siohwa ladu men!
14, 15. Iahd me lih pwopwoud Kristian men kakete pilada en kohkohsang eh pwoud? Dahme kahrehda Kristiano anahne kapakapki ireo oh kasawih eh pepehm kan ni mehlel?
14 Kahrepe dah kan me lih pwopwoud Kristian men pahn kakete “mweisang” de kohkohsang eh pwoud? Ekei kin pilada ren tohrohrpeseng pwehki kahrepe pwukat: ohlo sohte men apwalih anahn en peneinei kahrehda kin sohte neirail mwohni oh kanarail mwenge, ohlo kin wiakauwe laud kahrehda e pehm me eh mour mi nan keper de ahn ohlo wiewia kan kin kahrehda Kristiano eh sohla kak papah Koht.
15 En mihmihte de kohkohsang atail pwopwoud iei pein atail pilipil. Ahpw Kristian kan anahne kapakapki irairo oh kasawih arail pepehm ni mehlel. Karasepe, me kaidehn Sounkadehdehohte me kin kerempwa Kristiano eh kin papah Siohwa? De Kristiano pein sohla kaukaule wia pein eh onop Paipel, iang towehda mihting kan oh iang kalohk?
16. Dahme kahrehda Kristian kan ren dehr mwadang pilada ren mweipeseng?
16 Kitail en dehr mwadang pilada en mweipeseng. Kitail kin kesempwalki atail nanpwungmwahu rehn Koht oh kitail kin kalahnganki oh wauneki sapwellime kisakis en pwopwoud. Nin duwen sapwellimen Siohwa ladu kan, kitail sohte men wiahda pilipil kan me kak kahdsuwedihala mwareo. Pwehki kahrepe wet, kitail en dehr men pitiehdi atail pwoud oh koasoanehdi en kohkohsang pwehn pwoudikihda emen tohrohr.—Ser. 17:9; Mal. 2:13-16.
17. Iahd me kitail kak nda me ‘Koht ketin malipeikitaildohng nan popohl?’
17 Kristian men me pwoudiki emen me kaidehn Sounkadehdehn Siohwa anahne wia uwen eh kak en kolokol ara mouren pwopwoud en kehlail. Ahpw mwurin Kristiano eh wiahier eh kak koaros oh e sohte pweida, e sohte anahne kapwukoahki pein ih ma eh pwoudo pilada en kohkohlahsang. Pohl ntingihedi: “Ahpw ma me soh pwosono men kohkohsang, mweidohng en kohkohsang, riatail ohlo de liho saledeklahr nan soangen irair wet, pwe Koht ketin malipeikumwaildohng nan popohl.”—1 Kor. 7:15, NW.b
LIKIH SIOHWA
18. Mehnda ma kitail sohte kak kamwahwihala atail mouren pwopwoud, kamwahu dah kan kak wiawi ma kitail song en kamwahwihala?
18 Ma mie kahpwal nan atail mouren pwopwoud, kitail anahne kapakapki kitail en kehlail oh likih Siohwa ahnsou koaros. (Wadek Melkahka 27:14.) Medewehla Linda me kitail koasoakepenehr mwoweo. Sounpar tohto e kin song uwen eh kak koaros en kamwahwihala eh mouren pwopwoud, ahpw imwila ira mweipeseng. Ia duwe, e medewe me sohte katepen eh nanti? E nda: “Soh. Ei nanti wia kadehde mwahu ong meteikan. I ahneki nsenmwakelekel. Ahpw me keieu imwila mwahu, erein ahnsowo e sewese nait serepeino en kehlailte nan padahk mehlel. E wiahla Sounkadehdehn Siohwa ngoang men.”
19. Dahme kakete wiawi ma kitail song en nantihong kamwahwihala atail mouren pwopwoud?
19 Lih Kristian men me adaneki Marilyn inenen perenki eh likih Koht oh wia uwen eh kak koaros en kamwahwihala eh mouren pwopwoud. E nda me mie ahnsou me e men tohrohrasang eh pwoudo pwehki e sohte men apwalih eh anahn akan oh e pil kahrehda eh nanpwungmwahu rehn Siohwa eh mihla nan keper. Mahs, eh pwoudo wia elder men, ahpw e tepida iang pidada pesines kan me kahrehda kahpwal kan. E tepida sohla iang towehda mihting kan oh ira sohla koasoipene. Dahme wiawi September 11 nan kahnimw en New York kamasakada laud Marilyn kahrehda e apwal en patehng meteikan. Ahpw e pehmada me e pil pwukoahki kahpwal kan me ira ahneki, kahrehda e anahne wiahda wekidekla kan. Ira eri pwurehng tepida koasoipene, wia ara onop en peneinei oh iang towehda mihting kan. Elder kan uhdahn kadek oh sawas laud. Mwurin ahnsou kis ira pehm me ara mouren pwopwoud pwurehng mwahula. Ira uhdahn peren. Mwuhr eh pwoudo pwurehng alehdi pwukoa kan nan mwomwohdiso. Marilyn nda me ira anahne ale kasukuhl mwahu sang soahng kamedek kan me ira lelohng, ahpw e imwila mwahu.
20, 21. Dahme kitail anahne koasoanehdi en wia nan atail mouren pwopwoud?
20 Mehnda ma kitail kiripw de pwopwoud, kitail anahne ahnsou koaros kehlail oh likih Siohwa. Ma mie kahpwal kan nan atail mouren pwopwoud, kitail anahne wia soahng koaros me kitail kak pwehn kapwungala oh tamataman me pwopwoud kan “solahr wia riemen, pwe warteieu.” (Mad. 19:6) Oh ma ke mihmihte rehn omw pwoud me kaidehn Sounkadehdehn Siohwa mendahki ke kin ahneki kahpwal kan, ke pahn kakete ahneki peren en kilang omw pwoudo eh pahn wiahla sapwellimen Siohwa ladu men.
21 Sohte lipilipil irair dah me kitail ahneki, kitail anahne ahnsou koaros mwekid ni ahl ehu me pahn wia mehn kadehde mwahu ong irail me kaidehn tohnmwomwohdiso. Ma kitail ahneki kahpwal laud kan nan atail mouren pwopwoud oh pehm me kitail men kohkohsang atail pwoud, kitail anahne kasawih ni keneinei atail kahrepe kan. Kitail anahne kapakap ngidingid, doudouloale iren Paipel kan oh peki sawas rehn elder kan. Ahpw me keieu kesempwal, kitail anahne koasoanehdi kitail en kaperenda Siohwa Koht ni soahng koaros me kitail kin wia oh kasalehda atail uhdahn kalahnganki oh wauneki sapwellime kisakis kaselel en pwopwoud.
[Nting tikitik kan me mi pah]
a Ahd kan wekidekla.
b Menlau kilang pwuhken “Dadaurete ni Limpoak en Koht,” pali 251-253.
[Blurb nan pali 20]
Kristian kan me ahneki kahpwal ahpw sohte mwadangete kohkohsang arail pwoud kin kalapw paiekihda
[Blurb nan pali 22]
Kitail anahne kapakapki kitail en kehlail oh likih Siohwa ahnsou koaros
[Kilel nan pali 19]
Siohwa kin ketin kapaiada Kristian kan me kin nantihong kakehlahda arail mouren pwopwoud
[Kilel nan pali 21]
Mwomwohdisohn Kristian kak kihda kangoang oh sawas