Ni Ahnsou me Kahpwal Ehu Kin Pwarada

Mehnda ma ke wia uwen omw kak koaros en ahneki mouren pwopwoud oh peneinei nsenamwahu, soahng kan me ke sohte kasik kak wiawi me pahn kahrehiong en apwal ong uhk en kolokol omw peren. (Eklesiasdes 9:11) Koht kin ketikihda sawas ni limpoak ni ahnsou me kitail kin lelohng kahpwal kan. Ma ke kin idawehn kaweid en Paipel kan, kowe oh omw peneinei pahn kak powehdi mepwukat, mendahte ma nan kahpwal me keieu suwed kan.

1 LIKIH SIOHWA

DAHME PAIPEL MAHSANIH: “Mweidohng ih amwail pwunod koaros, pwehki eh kin ketin apwahpwalih kumwail.” (1 Piter 5:7) Ahnsou koaros tamataman me kaidehn Koht me ketin pwukoahki omw apwal kan. (Seims 1:13) Ni omw karanihala ih, e pahn ketin sewese iuk ni ahl me keieu mwahu. (Aiseia 41:10) “Kumwail kasalehiong amwail apwal kan koaros.”​—Melkahka 62:8.

Ke pahn pil diarada nsenamwahu ahnsou me ke kin wadek oh onopki noumw Paipel rahn koaros. Imwilahn met, ke pahn kilang ia duwen Siohwa eh kin ketin “sewesei kitail nan atail apwal akan koaros.” (2 Korint 1:3, 4; Rom 15:4) E ketin inoukihda me e pahn ketikihong uhk ‘sapwellime popohl, me inenen laudsang uwen atail dehdehki.’​—Pilipai 4:6, 7, 13.

DAHME KE KAK WIA:

• Kapakapki sapwellimen Siohwa sawas pwe ken kak meleilei oh madamadau mwahu

• Kousapahlih koaros omw pilipil kan oh pilada mehnia me keieu mwahu ong uhk

2 APWALIH KOWE OH OMW PENEINEI

DAHME PAIPEL MAHSANIH: “Aramas loalokong kin ngoangki oh onopada ale padahk ahnsou koaros.” (Lepin Padahk 18:15) Alehdi ire mehlel kan koaros. Tehk dahme emenemen nan omw peneinei kin anahne. Koasoiong irail. Rong irail.​—Lepin Padahk 20:5.

Ia duwen ma emen me ke kin poakohng mehla? Dehr masak en kasalehda omw pepehm kan. Tamataman me Sises pil “ketin tentenihr.” (Sohn 11:35; Eklesiasdes 3:4) E pil kesempwal en kommoal oh meir mwahu. (Eklesiasdes 4:6) Met pahn kahrehiong en mengei en powehdi soahng kansensuwed kan.

DAHME KE KAK WIA:

• Mwohn kahpwal ehu pahn pwarada, wia ken ahnla koasoakoasoiong omw peneinei ahnsou koaros. Ahnsou me kahpwal ehu pahn pwarada, e pahn mengei ong irail en koasoiong uhk

• Koasoiong meteikan me ke leme pil lelohng soangen kahpwalohte me ke ahneki

3 ALE SAWAS ME KE ANAHNE

DAHME PAIPEL MAHSANIH: “Kompoakepah kan kin kasalehda ar limpoak ahnsou koaros. Ia katepen eh mie kompoakepahmw ma e sohte seweseiuk ni ahnsou apwal?” (Lepin Padahk 17:17) Kompoakepahmw kan men sewese iuk, ahpw mwein re sehse dahme re pahn kak wia. Dehr pweiek en padahkihong irail dahme ke uhdahn anahne. (Lepin Padahk 12:25) Oh pil, rapahki sawas sang irail kan me wehwehki audepen Paipel. Kaweid kan me re pahn kihong uhk sang nan Paipel pahn kak sewese iuk.​—Seims 5:14.

Ke pahn diarada utuht me ke anahne ni omw kin kaukaule werekiong irail kan me uhdahn ahneki pwoson mehlel ong Koht oh likih sapwellime inou kan. Ke pahn pil diarada nsenamwahu laud ahnsou me ke kin sewese meteikan me anahne kangoang. Ehukihong irail omw pwoson Siohwa oh pil sapwellime inou kan. Kaukaule sewese irail kan me anahne sawas, oh ke dehr sohte men patehng irail kan me kin poakohng oh nsenohkin uhk.​—Lepin Padahk 18:1; 1 Korint 15:58.

DAHME KE KAK WIA:

• Koasoiong kompoakepahmw men me ke karanih oh mweidohng en sewese iuk

• Kasalehda ni sansal oh mehlel duwen dahme ke anahne