Mendahki Kasongosong kan, Tengehdiongete Amwail Pwoson!

“Riei ko! Kumwail perenkihda ma soangen apwal koaros kin lelohng kumwail.​—SEIMS 1:​2.

1. Sapwellimen Siohwa aramas kan kin papah ih ni pwoson oh ki “peren en mohngiong” mendahki dahkot?

SAPWELLIMEN Siohwa aramas kan kin papah ih nin duwen sapwellime Sounkadehde kan ni ahr kin pwoson ih oh ahneki “peren en mohngiong.” (Deuderonomi 28:47; Aiseia 43:10) Re wia met mendahki re kin mihla pahn kasongosong tohto. Mendahki arail apwal kan, re kin ale kamweit sang mahsan pwukat: “Riei ko! Kumwail perenkihda ma soangen apwal koaros kin lelohng kumwail, pwe kumwail ese me ni amwail pwoson eh kin powehdi apwal pwukat, e kin kalaudehla amwail kanangamah ni ahnsou apwal.”​—⁠Seims 1:​2, 3.

2. Dahme kitail ese duwen sounnting en kisinlikouhn Seims?

² Tohnpadahk Seims, rien Sises Krais, ntingihdi mahsan pwukat mpen sounpar 62 C.E. (Mark 6:⁠3) Seims kin wia elder men nan mwomwohdisohn Serusalem. Ni mehlel, ih, Cephas (Piter), oh Sohn “kin wia poahsoan kei”​—⁠utupen mwomwohdiso me kehlail oh teng. (Kalesia 2:⁠9) Ni ahnsou me ireo me pid sirkumsais pwarada mwohn “wahnpoaron ko oh ohl mah kan” mpen pahr 49 C.E., Seims kihda iren sawas ehu sang nan Paipel me governing body nan keieun senturi kin uhd doadoahngki.​—⁠Wiewia 15:​6-​29.

3. Ia ekei kahpwal kan me lelohng Kristian kan nan keioun senturi, oh iaduwen atail kak paiekihda laud kisin likouhn Seims?

³ Nin duwen silepe ngehnin men me kin nseno, Seims ‘wehwehki mwomwen pelin sihpwo.’ (Lepin Padahk 27:23) E pohnese me Kristian kan kin ahnsouwo mihla pahn kasongosong mwuledek kan. Lamalam en ekei anahne kapwungpwungla, pwehki re kin perenkihte me kepwehpwe kan. Ong me tohto, kaudok kin wiahte mwohmw ehu. Ekei kin karehda apwal pwehki arail lokaia soh konehng kan. Ngehnin sampah kin kihda lipwalipw suwed, oh me tohto sohla kin kanengamah de kapakap. Ni mehlel, soumwahu en pali ngehn kin wiawihong ekei Kristian kan. Kisinlikou en Seims kin doakedoake soangen apwal pwukat ni ahl ehu pwehn kihda kangoang, oh ah kaweid kan kin katapan rahnwet duwehte nan keieun senturi C.E. Kitail pahn ale kapai laud ma kitail pahn wiahki kisinlikou wet me duwehte e ntingdiohng emen emen pein kitail.a

Ni Ahnsou Me Kitail Kin Lelohng Kasongosong kan

4. Iaduwen atail en kilangwohng kasongosong kan?

⁴ Seims padahkiong kitail iaduwen sen kilangwohng kasongosong kan. (Seims 1:​1-4) Seims sohte koasoia duwen ah peneinei ong sapwellimen Koht Ohlo, ahpw e ni karakarahk kahdaneki pein ih “laduhn Koht oh Kaun Sises Krais.” Seims ntingwohng “keinek eisek riau” en Israel en ngehn me “mwarahkpeseng,” keieu pwehki kamakam kan. (Wiewia 8:1; 11:19; Kalesia 6:16; 1 Piter 1:⁠1) Nin duwen Kristian kan, kitail kin pil lelohng kamakam kan, oh kitail kin “lelohng soangen apwal kan.” Ahpw ma kitail tamataman me kasongosong kan me kitail kin kanengamahiong kin kakehlailla atail pwoson, kitail pahn “perenkihda” ni ahnsou me e kin lelohng kitail. Ma kitail kolokolte atail loaloapwoat ong Koht ahnsoun kasongosong kan, met pahn wahdohng kitail nsenamwahu soutuk.

5. Atail kasongosong kan ele pahn pidada dah, oh dahme pahn wiawi ni ahnsou me kitail kin kanengamahiong oh powehdi?

⁵ Atail kasongsong kan kin pil iangahkihte kahpwal akan me kin kalap lelohng tohnsampah. Karasepe ehu, soumwahu ele pahn kaloke kitail. Koht sohte kin ahnsouwet wiahda manaman kan pwehn kamwahuwiala soumwahu kan, ahpw e kin sapengla atail kapakap ki loalokong oh kehl me anahn ong soumwahu kan. (Melkahka 41:​1-3) Kitail kin pil lokolongki me pwung nin duwen Sounkadehdehn Siohwa kan me kin ale kamakam. (2 Timoty 3:12; 1 Piter 3:14) Ni ahnsou me kitail kin kanengamahiong soangen kasongosong pwukat, atail pwoson kin kehlailla, wiahla pwoson ehu me “powehdi kasongosong kan.” Oh ni ahnsou me atail pwoson kin kana, met kin “kalaudehla kanengamah.” Pwoson me kin kehlailkihda kasongosong kan pahn sewese kitail en kak kanengamahiong kasongosong kan me pahn pwarada mwuhr.

6. Iaduwen “kanangamah ni ahnsou apwal en poatopoatete oh unsekla,” oh kahk katapan dah kei kitail kak wia ni ahnsou me kitail mihla pahn kasongosong?

⁶ “Ahpw,” Seims mahsanih, “kanengamah ni ahnsou apwal en poatopoatete oh unsekla.” Ma kitail mweidalahte kasongosong ehu en wiawi ni atail sohte nantiong en kauhdi mwadang ni atail doadoahngki wiepe kan me sohte pid Pwuhk Sarawi, eri kanengamah pahn wia “doadoahk” en kaunsekla kitail nin duwen Kristian kan, kaidehn pwehki seupwoson. Ni mehlel, ma kasongosong ehu kin kapwarehda ekei atail luwet kan, kitail en rapahki sawas en Siohwa en powehdi met. Iaduwen ma kasongosongo iei en wia tiahk en nenek? Kitail en kapakapki kahpwalo oh eri kapwaiada dahme kitail kapakapki. Ele kitail anahne wekidala atail wasahn doadoahk en mwohni de wiahda kahk teikan pwehn kolokolte atail loaloapwoat ong Koht.​—⁠Senesis 39:​7-9; 1 Korint 10:13.

Rapahki Loalokong

7. Iaduwen atail kak ale sawas pwehn kak powehdi kasongosong kan?

⁷ Seims kasalehong kitail dahme sen wia ma kitail sehse iaduwen atail pahn powehdi kasoangosong ehu. (Seims 1:​5-8) Siohwa sohte pahn kadeik kitail ma sohte atail loalokong oh kitail kin kapakapki met ni pwoson. E pahn sewese kitail en kilangwohng kasongosong ni ahl ehu me pwung oh en kanengamahiong. Ele iengetail me pwoson kan de ni ahnsou kan me kitail onop Paipel kan pahn katamankin kitail iren Pwuhk Sarawi kan. Wiewia kan me manaman en Koht kamwekidada pahn karehong kitail en kilang dahme se anahne wia. Ngehnin Koht kak kahluwa kitail. (Luk 11:13) Pwehn paiekihda soahngen kapai pwukat, kitail en ieiangete Koht oh sapwellime aramas kan.​—⁠Lepin Padahk 18:⁠1.

8. Dahme karehda emen me kin peikasal sohte kak alehdi mehkot sang rehn Siohwa?

⁸ Siohwa pahn ketikihong kitail loalokong pwehn powehkihdi kahpwal akan ma kitail “kin kapakap ni pwoson oh sohte peikasal.” Emen me kin peikasal kin “rasehng iloak en nan madau kan me kin pwungupwungudengkiseli kisinieng” kohweikohdo. Ma kitail kin soh tengeteng duwehte met ni pali ngehn, ‘kitail sohte kak leme me kitail kak alehdi mehkot sang rehn Siohwa.’ Kitail endehr “peikasal” oh “soh tengeteng” nan atail kapakap de ni ahl teikan. Ahpw, kitail en pwoson Siohwa, Utupen loalokong.​—⁠Lepin Padahk 3:​5, 6.

Kepwehpwe oh Semwehmwe Kak Peren

9. Dahme karehda mie karepen atail en peren nin duwen tohnkaudek kan en Siohwa?

⁹ Mendahki ma ehu atail kasongosong iei mouren semwehmwe, kitail en tamataman me irail koaros me kepwehpwe kan oh pil iangahki me semwehmwe kan kak peren. (Seims 1:​9-11) Mwohn ahr wiahla sounidawehn Sises kan, me keidi tohto sohte kepwehpwe oh sampah kin mwamwahlekin irail. (1 Korint 1:26) Ahpw re kak perenki arail “kasapwildahng” pwukoahn tohn sohsohn Wehio. (Rom 8:​16, 17) Oh, aramas kepwehpwe kan me mahs kin ale wahu kin uhd “sansaro” nin duwen sounidawehn Krais kan. Ahpw, nin duwen sapwellimen Siohwa ladu kan, kitail koaros kak peren pwehki kepwehpwehn sampah oh ndand kin wia soahng kan me soh katepe ni ah kin kaparekiong kepwehpwehn pali ngehn me kitail paiekihda. Oh ia uwen atail kin kalahnganki me nanpwungatail sohte me kin aklapalapki me dene e ndand!​—⁠Lepin Padahk 10:22; Wiewia 10:​34,35.

10. Iaduwen Kristian men pahn kilangwohng kepwehn wahr kan?

¹⁰ Seims sewese kitail en kilang me atail mour sohte kin poahsoanda pohn kepwehpwe oh ndand en sampah. Duwehte kaselel en wahnrohs ehu me sohte kak irehdi ih sang en mengkihla “karakar mwuledek” en ketipino, ih duwen en ohl kepwehpwe men ah kepwe kan sohte kak kareireila ah mour. (Melkahka 49:​6-9; Madiu 6:27) Ele e kak mehla nin doken e raparapahki “elen ah mour,” nan pisnes. Ihme kahrehda, me keieu kesempwal iei en “kepwehpwe rehn Koht” oh wia soahng koaros me kitail kakohng pwehn utungada mehkan en Wehio.​—⁠Luk 12:​13-21; Madiu 6:33; 1 Timoty 6:​17-19.

Meid Pai Irail Ko Me Kin Kanengamahiong Kasongosong Kan

11. Ia koapworopwor ong irail ko me tengediongte ahr pwoson mendahki kasongosong kan?

¹¹ Mendahki ma kitail kepwehpwe de semwehmwe, kitail kak peren ihte ma kitail kanengamahiong atail kasongosong kan. (Seims 1:​12-15) Ma kitail kanengamahiong kasongosong kan oh sohte kesehla atail pwoson, kitail kak paiekihda, pwehki mie kaperen en wia dahme pwung mwohn silangin Koht. Ni ahr kolokol teng ahr pwoson lau mehla, Kristian pwekipwekihda ngehn kan pahn alehdi “nin en mour,” mour me sohte kak pwurehng mehla nanleng. (Kaudiahl 2:10; 1 Korint 15:50) Ma kitail ahneki koapworopwor en mour soutuk sampah oh kolokolte atail pwoson Koht, kitail kak kilangwohng mour soutuk nan paradais nin sampah. (Luk 23:​43: Rom 6:23) Ia uwen Siohwa kin mwahu ong koaros me kin kasalehda ahr pwoson ih!

12. Ni ahnsou me kitail kin lelohng apwal kan, dahme karehda kitail endehr nda: “Koht kin kasonge ie”?

¹² Pein Siohwa kin kasongehkin kitail apwal akan? Soh, kitail sohte kak nda: “Koht kin kasonge ie.” Siohwa sohte kin songosong en karehong kitail en wiahda dihp ahpw e uhdahn pahn sewese kitail oh ketikihong kitail kehl me anahn pwehn dadaurete pahn kasongosong kan ma kitail kolokolte teng atail pwoson. (Pilipai 4:13) Koht me sarawi, ihme e sohte pahn kihong kitail nan irair kan me kak kaluwetehla atail pelian wiewia sapwung. Ma kitail kihong pein kitail nan irair ehu me kak kauwehla atail pwoson, oh kitail wiahda dihp, kitail endehr kapwukoahki Koht met, “pwe sohte me suwed kot kak kasongosonge Koht, oh pein Koht sohte kin kasongosonge aramas.” Mendahki Siohwa mwein pahn mweidohng kasongosong ehu en kaiane kitail ong pein kamwahupatail, e sohte kin kasonge kitail pwehki e kupwurki suwed en lelohng kitail. (Ipru 12:​7-11) Sehdan pahn kasonge kitail en wiahda dihp, ahpw Koht kak doare kitail sang me suwedo.​—⁠Madiu 6:13.

13. Dahme kak wiawi ma kitail sohte kin soikala ineng suwed ehu?

¹³ Kitail anahne irair en kapakap pwehki irair ehu kak kapwarehda ineng sapwung me pahn karehong kitail en wiahda dihp. Seims mahsanih: “A aramas kin lelohng nan songosong sang ni pein eh ineng suwed eh kin kainangiong pein ih oh karehiong nan dihp.” Kitail sohte kak kapwukoahki Koht dihp me kitail wiahda ma kitail kin mweidong mohngiongatail en medemedewe ineng dipan akan. Ma kitail sohte kihsang rehtail ineng sapwung kan, ‘e pahn wosada,’ kekeirada nan mohngiong, oh “kanaitikihada dihp.” Ni ahnsou me dihpo wiawihda, “e kin kahrehiong mehla.” E sansal me, kitail anahne pere mohngiongatail oh pelianda lamalam dipan akan. (Lepin Padahk 4:23) Kain ale peneu me dihp pahn powehdi ih, ahpw e sohte pelianda met. (Senesis 4:​4-8) Eri, iaduwen ma kitail tepiada idawehnla wiewia ehu me kin uhwong Pwuhk Sarawi? Ni mehlel kitail pahn kalahnganki ma Kristian elder kan kin song kapwungkitailla pwe kitail endehr dipada ong Koht.​—⁠Kalesia 6:⁠1.

Koht​—⁠Utupen Soahng Mwahu Kan

14. Ni irair dahieu me kitail kak nda me kisakis kan en Koht me “unsek”?

¹⁴ Kitail en tamataman me Siohwa iei utupen, kaidehn kasongsong kan, ahpw soahng mwahu kan. (Seims 1:​16-18) Seims kin koasoiahki ienge me pwoson kan “riei kompoakepahi kan” oh kasalehda me Koht iei Sounketikihdahn ‘soangen wiewia sapan koaros oh kisakis mwahu koaros.’ Sapwellimen Siohwa kisakis kan ni pali ngehn oh pali war me “unsek,” soahng koaros miehier. Re kohdihdo sang “nanleng,” sang wasa me Koht kin ketiket ie. (1 Nanmwarki 8:39) Siohwa iei “Sounwiepen marain koaros en nanleng”​—⁠ketipin, maram, oh usu kan. E kin pil ketikihong kitail marain en pali ngehn oh padahk mehlel. (Melkahka 43:3; Seremaia 31:35; 2 Korint 4:⁠6) Me weksang ketipino me kin kahrehda mwete kan en wekidekla ni ah kin mwekid oh ah karakar kin keieu kehlail mwurin souwas, Koht kin ahnsou koaros wuk ni ah kin ketikihda soahng mwahu kan. E uhdahn pahn kaunopkitailda pwehn kak sewese kitail en powehdi kasongosong kan ma kitail isaneki sapwellime koasoandi en pali ngehn kan me e ketikihdahki ah Mahsan oh “pwihn en ladu lelepek oh loalokong.”​—⁠Madiu 24:45.

15. Ia ehu kisakis keieu kaselel kan en Siohwa?

¹⁵ Ia ehu sapwellimen Koht kisakis me keieu mwahu? Iei ah ketikihdo seri ngehnin kan ki ngehn sarawi, me kin doadoahk pidada rongamwahu, de “mahsan en padahk mehlel.” Irail ko me kin alehda ipw en pali ngehn kin wia “ekei tepin wahnsahpw,” me pilipil sang nanpwungen tohnsampah pwehn wiahla “wehi oh samworo” nanleng. (Kaudial 5:10; Episos 1:​13, 14) Seims ele kin medemedewe duwen tepin wahn pilawa barley me kin meirongla ni Nisan 16, me iei rahno me Sises ketin kaiasada, oh pil duwen meirong en lopwon en pilawa wihd ni rahn en Pendekos, ni ahnsou me ngehn sarawi wudekedi. (Lipai 23:​4-11, 15-17) Nan irair wet, Sises iei tepin wahnsahpw oh irail tohn sohso kan iei “ekei tepin wahnsahpw.” Iaduwen ma kitail ahneki koapworopwor en mour sampah? Eri, atail tamataman met pahn sewese kitail en koledi teng atail pwoson Sounketikihdahn “kisakis mwahu koaros,” me karehda mour soutuk en kak mie pahn kaundahn Wehio.

En ‘Kapwaiada Mahseno’

16. Dahme karehda kitail en ‘mwadang en rong ahpw pwand en lokaia oh mwakar’?

¹⁶ Mendahki ma kitail kin ale kasongepen atail pwoson ahnsou wet de soh, kitail en “kapwaiada mahseno.” (Seims 1:​19-25) Kitail anahne “mwadang ong rong” mahsen en Koht, en peik kapwaiada met. (Sohn 8:47) Ni pali teio, kitail en “pwand en lokaia,” ni atail kasawih mahs atail lokaia kan. (Lepin Padahk 15:​28; 16:23) Seims kin kangoangehkin kitail endehr mwadang en nda me atail kasongosong kan kin tepsang rehn Koht. Kitail pil ale kaweid en “pwand en lingeringer; pwehki lingeringer en aramas sohte kin sewese kapwaiada sapwellimen Koht kupwur pwung.” Ma kitail lingeringerkihda dahme emen nda, kitail en ‘uhdi mahs’ pwehn liksang kihda pasapeng en akpwung. (Episos 4:​26, 27) Ngehnin lingeringer me kak karehong kitail apwal oh wiahla kasongosong ehu ong mehteikan sohte kak kapwarehda pwoson me atail Koht pwungo kupwurki kitail en kasalehda. Pil ehu, ma kitail kin “dirki dehde mwahu,” kitail pahn “pwand en mwakar,” oh riatail brother oh sister kan pahn men kerenih kitail.​—⁠Lepin Padahk 14:29.

17. Dahme kin pweida ni ahnsou me kitail kin kihsang nan mohngiongatail oh iangahki nan atail lamalam me suwed kan?

¹⁷ Kitail uhdahn anahne pwilikihdi “soahngen tiahk samin koaros”​—⁠mehkoaros me Koht kin ketin tateki oh soahng kan me kin utungada lingeringer. Me pil laudsang met, kitail en ‘kesehwei sang rehtail soahngen wiewia sapwung kan koaros.’ Kitail koaros anahne kamwakelehsang nan atail mour wiewia samin en uduk de samin en pali ngehn. (2 Korint 7:1; 1 Piter 1:14-16; 1 Sohn 1:⁠9) Kamwakelehsang me suwed kan nan mohngiongatail oh atail lamalam kin sewese kitail en “ale mahsen kan me e kin padokedi” en padahk mehlel. (Wiewia 17:​11, 12) Mendahki ia uwen werei en atail mih nan padahk mehlel, kitail en ahnsou koaros mweidohng padahk mehlel en poad loaletail kan. Dahme kahrehda? Pwehki sang ni ngehnin Koht, mahseno me poadidi kin kapwarehda “irair en aramas kapw” me kin koanoahdi komourla.​—⁠Episos 4:​20-24.

18. Iaduwen meno me kin wie rongorongte mahseno kin weksang meno me kin rong oh kapwaiada?

¹⁸ Iaduwen atail en kasalehda me mahseno kin wia kahluwapatail? Iei atail pahn “kapwaiada mahseno, ahpw kaidehn rongete.” (Luk 11:28) “Irail ko me kin kapwaiada mahseno” kin ahneki pwoson me kin kapwarehda soahngen wiewia duwehte idipek nan kalohk oh kaukaule iang pidada nan mihding kan en sapwellimen Koht aramas akan. (Rom 10:​14, 15; Ipru 10:​24, 25) Emen me kin rongorongte mahseno “kin rasehng aramas me kin irongen nan kilahs ehu oh kin kilang uhdahn mwomwen pein ih.” E kin irongin meseo, oh eri kohkohla oh manokehla duwen dahme anahn pwehn kamwahuwiala mwomweo. Nin duwen “irail kan me kin kapwaiada mahseno,” kitail kin ni keneinei onopki oh peikiong sapwellimen Koht “kosonned unsek,” me kin oarepene soahng koaros me e kupwurki kitail en wia. Kamaiou me kitail kin paiekihda kin weksang douluhl kaliduhla pahn dihp oh mehla, pwe e kin kahlwahlahng mour. Ihme kitail en ‘tehk mwahu kosonnedo,’ ahnsou koaros kasakasawih oh peikiong. Oh medewehla duwen met! Nin duwen ‘irail kan me kin kapwaiada mahseno, ahpw kaidehn me kin rongete oh manokehla,’ kitail ahneki peren me kin kohsang kupwuren Koht.​—⁠Melkahka 19:​7-11.

Wia Laudsang Ihte Mwomwen Tohnkaudok Kan

19, 20. (a) Nin duwen me Seims 1:​26, 27 kasalehda, dahme kitail anahne wia nin duwen kaudok mwakelekel? (b) Ia ekei karasepe kan en kaudok min?

¹⁹ Ma kitail pahn paiekihda kupwuren Koht, kitail anahne tamataman me kaudek mehlel sohte kin wiahte mwohmw. (Seims 1:​26, 27) Ele kitail pahn medemedewe me kitail wia ‘tohnkaudok’ pwung en Siohwa, ahpw dahme Siohwa kin medemedewehkin emen emen kitail ong ire wet, ih me keieu kesempwal. (1 Korint 4:⁠4) Ehu kahpwal toutou iei ma emen sohte kak ‘koledi lowe.’ Kitail pahn pitih pein kitail ma kitail medemedewe me Koht kin kupwurperenki atail kaudok ma kitail kin kauwe meteikan, lokaia likamw, de wia lokaia soh konehng teikan. (Lipai 19:16; Episos 4:25) Ni mehlel, se sohte men atail “mwomwen kaudok” en “soh katepe” oh sapwung mwohn Koht pwehki kahrepe ehu.

²⁰ Mendahki Seims sohte kilelehdi irair koaros en kaudok mwakelekel, e mahsanih me e kin pil pidada ‘apwalih me seupwoupwou kan oh liohdi kan nan ahr apwal kan.’ (Kalesia 2:10; 6:10; 1 Sohn 3:18) Mwomwohdisohn Kristian kin kasalehda nsenohki apwalih liohdi kan. (Wiewia 6:1-6; 1 Timoty 5:​8-10) Pwehki Koht iei Sounperepen liohdi kan oh me seupwoupwou kan, kitail en miniminiong Ih ni atail pahn wia dahme kitail kakohng pwehn sewese irail ni pali ngehn oh paliwar. (Deuderonomi 10:​17, 18) Kaudok mwakelekel kin pil wehwehki “en dehr saminkihla tiahk suwed kan en sampah wet,” koasoandi en aramas soh unsek me mihmi pahn manaman en Sehdan. (Sohn 17:16; 1 Sohn 5:19) Ihme kitail en kolokolte atail maiou sang wiewiahn sampah me dohsang Koht pwe sen kak kapinga Siohwa oh sawas nan sapwellime doadoahk.​—⁠2 Timoty 2:​20-22.

21. Me pid duwen kisinlikouhn Seims, peidek dah teikan me kitail konehng tehk?

²¹ Kaweid en Seims me kitail apwtehn tehkpene pahn sewese kitail en kanengahmaiong kasongosong kan oh kitail en pil koledi teng atail pwoson. E pahn kalaudehla atail kalahnganki Sounketikihdahn kisakis mwahu kan me limpoak. Oh mahsan kan en Seims en sewese kitail en wia kaudok min. Dahme e pil padahkiong kitail? Kahk dah teikan me kitail en wiahda pwehn kadehdehda me atail pwoson Siohwa me mehlel?

[Nting tikitik me mi pah]

Iaduwen Komw Pahn Sapeng?

◻ Dahme pahn sewese kitail en kanengamahiong kasongosong kan?

◻ Mendahki kasongosong kan, dahme karehda Kristian kan kak peren?

◻ Iaduwen kitail kak kapwaiada mahseno?

◻ Dahme kaudok mwakelekel kin pidada?

[Kilel nan pali 6]

Ni ahnsou me kitail kin mihla pahn kasongosong, kitail en kasalehda pwoson sapwellimen Siohwa manaman en sapengla kapakap kan