PALI SILUH
Pepehm Kamedek Kan—Ni Ahnsou me Kitail Kin “Kaulime Emen”
“Emen sister nan ei mwomwohdiso karaun likamwih ie me dene I kawaisang nah mwohni. Meteikan nan mwomwohdiso esehda met oh kamehlele dahme sistero nda. Mwuhr, sistero padahkihong ie me e alehdi ekei ire kapw kan me kadehdehda me I sohte wiahda met. Mendahki e peki mahk, I pehm nan ei mohngiong me I sohte kak mahkikihong duwen dahme wiawihong ieo.”—Linda.
KE KAK wehwehki ahn Linda pepehm, me uhdahn medekla laud pwehki wiewiahn emen rie Kristian? E kansensuwed me ekei kin nohn nsensuwedkihla mwekid en meteikan me kaluwetehla ar nanpwungmwahu rehn Siohwa. Ia duwe, ih met me kin wiawihong uhk?
Mie me Kak “Irehdihsang Kitail ni Limpoak en Koht”?
Ni mehlel, ele kitail uhdahn pahn apwalki mahkohng iangatail Kristian kan me kamedekihala kitail. Ahpw udahno, Kristian akan anahne poakohng emenemen. (Sohn 13:34, 35) Kahrehda ma iangatail Kristian men wiahiong kitail sapwung ehu, nsensuwed oh medek uhdahn kak kauweikitailla.—Melkahka 55:12.
Mehlel me Paipel kin kasalehda me mie ahnsou kan me Kristian men “kin kaulime emen.” (Kolose 3:13) Eri mendahki met, ni soahng wet eh kin pein wiawihong kitail, ele kitail kin diarada me e kin inenen apwal en powehdi met. Mie mehkot me kak sewese kitail? Tehk ire mehlel siluh pwukat sang nan Paipel:
Samatail nanleng kin ketin mwahngih soahng koaros. Siohwa kin ketin mwahngih soahng koaros me kin wiewiawi, iangahki soangen wiewia sapahrek kan me kitail kin lelohng oh lokolok me kin iangohdohte. (Ipru 4:13) Laudsang met, Siohwa kin ketin poakeikitailla ni ahnsou me kitail kin lokolok. (Aiseia 63:9) E sohte kin ketin mweidohng “lokolok, de apwal,” de soahng sohte lipilipil, de pil emen sapwellime ladu en “irehdihsang kitail ni limpoak en Koht.” (Rom 8:35, 38, 39) E sou mwahu ma kitail pil wia duwehte, oh dehr mweidohng mehkot de emen en katohreikitailsang Siohwa?
En mahk sohte wehwehki en pwungki wiewia sapwung. Ni ahnsou me kitail kin mahkohng irail kan me wiahiong kitail sapwung ehu, kitail sohte kin katikala, wiahda kahrepe ieu, de pwungki arail wiewia kan. Tamataman, Siohwa sohte kin ketin kupwurki dihp, ahpw e kin ketin mahk ma mie kahrepen en wia met. (Melkahka 103:12, 13; Apakuk 1:13) Ni Siohwa eh kin ketin kangoange kitail en mahkohng meteikan, e kin mahmahsanihong kitail en kahlemengih ih. E sohte kin ketin “engieng kohkohlahte.”—Melkahka 103:9; Madiu 6:14.
E kin wia kamwahupatail ni ahnsou me kitail kin kesehla atail lingeringer. Ni soangen ahl dah? Medewehla karasaras wet. Ke pwekada takai ehu, mwein takaio sohte nohn toutou, oh koledi oh kadangala pehmwen. Ele e pahn mengei en kolokol takaio ni ahnsou mwotomwot. Ahpw, ia duwen ma ke kolokol takaio ekis werei? Ia uwen werei en omw pahn kak kolokol, ni minit kei? awa ehu? de reireisang? Ni mehlel, pehmwen uhdahn pahn pwangada! Eri, paunen takaio sohte pahn wekila. Ahpw uwen werei en omw pahn kolokol takaio, ih uwen omw pahn kehn toutou en takaio. Met mehlel me pid duwen en kolokol lingeringer. Uwen werei en atail pahn kolokol lingeringer ih pahn uwen laud en atail pahn kamedekihala pein kitail mehnda ma mehkot tikitik. Eri, e sohte kapwuriamwei me Siohwa kin ketin kangoangehkin kitail en kesehla atail lingeringer. Mehlel, en kesehla lingeringer wia kamwahupatail.—Lepin Padahk 11:17.
E kin wia kamwahupatail ni ahnsou me kitail kin kesehla atail lingeringer
“I Pehm me Siohwa Kin Ketin Mahmahseniong Ie”
Dahme sewese Linda en dehr kolokol eh lingeringerki dahme ienge Kristian men wiahiong ih? Likin soahng teikan, e kin doudouloale kahrepen eh pahn kasalehda mahk me poahsoankihda Paipel. (Melkahka 130:3, 4) Linda uhdahn mwekidki ni eh esehda me ni atail pahn kasalehda mahk, Siohwa pahn pil ketin mahkohng kitail. (Episos 4:32–5:2) Me pid ia duwen soahng pwukat ar kamwakid ih, e koasoia: “I pehm me Siohwa kin ketin mahmahseniong ie.”
Kedekedeo, Linda kakehr kesehla eh lingeringer. E uhdahn mahkohng sistero, oh met sistero wia emen kompoakepah keren. Met Linda kin pousehlahte eh papah Siohwa. Ken kamehlele me Siohwa ketin kupwurki seweseiuk ken pil wia met.