Sises Ketin Alu Pohn Pihl

Kaidehn kamwahwihala soumwahute de kaiasada me melahr kante me Sises kak ketin wia, ahpw e pil kak ketin kamwakid kisinieng oh keteu. Mwurin eh wie kapakap pohn nahnao, Sises ketin kilengdihla ni Sehden Kalili oh mahsanihada melimel ehu. Sapwellime wahnpoaron ko mi nan wararail pwohto, nannantihong ar wie seisei pelipelian kisiniengo. Sises eri ketidihla oh tepida alu pohn pihlo kohla ni wararail pwohto. Ni wahnpoaron ko ar kilangada me mie me alialu pohn pihlo, irail masepwehkada. Ahpw Sises mahsanihong irail: ‘Ngehi met. Kumwail dehr masepwehk.’

Piter eri nda: ‘Maing, ma mehlel komwi men, a komw mahsanih pwe ien kohwei rehmw.’ Sises eri mahsanihong Piter: ‘Kohdo rehi.’ Nanwerengen melimelo, Piter doudihsang pohn pwohto oh tepida alu pohn pihlo kohla rehn Sises. Ahpw ni eh kerenlahng ih, Piter kilenglahng melimelo oh masepwehkada. Ih eri pehmada me e tepidahr kikihrala. Piter ahpw werda oh nda: ‘Maing, komw sewese ie!’ Sises eri koledi peho oh mahsanih: ‘Dahme ke tepida peikasalki? Ia omw pwoson?’

Sises oh Piter eri douda pohn pwohto, oh ni ahnsowohte, melimelo pa uhdi. Ke kak medewehla ia en wahnpoaron ko ar pepehm? Irail nda: “Mehlelete me komwi me Sapwellimen Kohto.”

Kaidehn ihte ahnsou wet me Sises ketin kamwahwihala mesenleng. Pil ehu ahnsowo ni Sises oh wahnpoaron ko ar wie seiseiloakla palio sehdo, Sises meirla mwurin wararail pwohto. Ni eh wie memeir, lapalahn melimel ehu pa pwarada. Eri iloak ko ahpw pwungupwungdahng pohn pwohto, oh pihl kadirehla pwohto. Wahnpoaron ko ahpw pangenda Sises, oh weriwerki: ‘Sounpadahk, kitail pahn melahr! Sewesei kiht!’ Sises eri ketida oh mahsanihong sehdo: “Tokedi!” Ni ahnsowohte, kisiniengo oh sehdo pa meleileidi. Sises eri ketin idek rehn wahnpoaron ko: ‘Ia amwail pwoson?’ Irail eri ndapene nanpwungarail: ‘Kisinieng oh iloak pil kin peikiong ih.’ Wahnpoaron ko sukuhlki me, ma irail pahn uhdahn likih Sises, irail sohte pahn anahne masak mehkot.