Sises Kak Ketin Pere Kitail

NI AHNSOU me Sises laudla, e esehda ia duwen Siohwa eh ketin pere ih ni ahnsou me e seri. Ke leme Sises kapakapohng Siohwa oh kalahngan ong ih?— Dahme ke leme Sises ketin padahkihong Mery oh Sosep ni eh esehda me ira doarehla eh mour sang ni ara wahla ih Isip?—

Sises solahr ketin wia kisin seri men. E solahr ketiket pohn sampah duwehte e ketin wia mahso. Ahpw ke kin tehk me ahnsouwet, ekei aramas kin medewe me Sises seri pwelel men me mi nan dewen kamwenge mahn?— Met kin sansal ni ahnsoun Krismas pwehki nan wasa tohto, kilel kan kin kasalehda Sises nin duwen seri pwelel men.

Ke kamehlele me Sises ketin momour mendahki e solahr ketiket sampah?— Ei, e ketin iasada sang mehla oh met e ketin wia Nanmwarki roson men nanleng. Dahme ke leme e kak ketin wia pwehn pere irail kan me kin papah ih?— Karasepe, ni en Sises ketiket sampah, e ketin kasalehda ia duwen eh kak ketin pere irail kan me kin poakohng ih. Kita pahn kilang ia duwen eh ketin wia met ehu rahno ni eh ketiket rehn sapwellime tohnpadahk kan nan pwoht pwoat.

E lelehr mwurin souwas. Sises ketin padapadahk rahno pwon limwahn Lehen Kalili. Met iei lapalahn leh ehu me mwein mwail 13 reirei oh mwail 7 elep tehlap. Sises ahpw mahsanihong sapwellime tohnpadahk ko: ‘Kitail kotehwei mahs lehet oh douluhlwohng palio.’ Irail eri tepida seiloakla palio pihlo. Sises ketin pwangada oh e ketila mwurio oh mwurin ahnsou kis, e ahpw ketin meirkelikla.

Tohnpadahk ko pepehd oh mwasamwasahn pwohto. Soahng koaros mwahu erein ahnsou kis, ahpw mwuri ekis, kisinieng kehlail tepida ipido. E kekehlaila oh ilok pil lalaudla. Ilok tepida kuskuslong nan pwohto oh pwohto direkihla pihl.

Tohnpadahk ko masakada ar pahn kihrla. Ahpw Sises sohte ketin masepwehkada. E ketin wie memeirte mwurio. Tohnpadahk ko ahpw pangenda oh patohwanohng: ‘Sounpadahk, Sounpadahk, komw ketin doareikitala, se pahn mehkihla melimel wet.’ Sises ketida oh mahsanihong kisiniengo oh ilok ako: ‘Tokedi! Kumwail meleileidi!’

Ahnsowohte kisiniengo tokedi oh leho meleileidi. Tohnpadahk ko ahpw pwuriamweila. Saikinte pak ehu re kilang soahng wet. Irail ahpw tepida ndapene: “Ia duwe? Ihs memenet, me kin mahseniongete kisinieng oh iloak kan, a re kin peikiong?”​—Luk 8:22-25; Mark 4:35-41.

Ke ese ihs Sises?— Ke ese e kihsang ia sapwellime manaman?— Tohnpadahk ko sohte anahne masepwehk ni Sises eh ketiket rehrail pwehki Sises sohte duwehte kitail. E kak ketin wia soahng kapwuriamwei kan me aramas teikan sohte kak wia. I pahn padahkihong uhk pil ehu mehkot tohrohr me e ketin wia mahs ni ahnsou me leho melimelda.

Met wiawi ahnsou ehu mwuhr. Ni eh soutikpene, Sises mahsanihong sapwellime tohnpadahk ko en douda nan pwohto oh seiloakla pali teio. Sises ahpw ketidahla pohn nahnao oh kelehpwla. Wasao me meleilei oh e kak kapakapohng Seme, Siohwa Koht.

Tohnpadahk ko douda pohn pwohto oh tepida seilahng apali leho. Sohte pwand e tepida kisiniengda. E wia lalaudla oh wasapwongdier. Irail kihdi arail serek oh tepida sei. Ahpw sohte kak pwehki kisiniengo inenen kehlail. Pwohto wie dukdukou nan ilok laud oh pihl kohkohlong nan pwohto. Irail nannanti en lellahng ni oaroahro ahpw sohte kak.

Sises ketikette pohn nahnao. E ketiket wasao ahnsou reirei. Ahpw met e mwahngih me sapwellime tohnpadahk ko apwalkihda ilok laudo. Ih eri ketisang pohn nahnao oh ketidihdohng ni oaroahro. Sises kupwurki sewese sapwellime tohnpadahk ko, e ahpw ketin alialu kohla rehrail nan leh me ilokino!

Dahme pahn wiawi ma ke song en alu pohn pihl?— Ke pahn kihrla oh mwopwula. Ahpw Sises ketin weksang kitail. E sapwellimaniki kehl tohrohr. Sises ketin alu reirei pwehn lella ni pwohto. E kereniongehr lel ni sohrahn ahnsou me tohnpadahk ko kilangada Sises eh ketiket kohdo pohn pihlo. Irail sohte kak kamehlele dahme re kilango. Irail uhdahn masepwehkada oh weriwerki ar masepwehk. Sises eri mahsenlahng irail: “Kumwail koapworopwor; ngehi met, kumwail dehr masepwehk.”

Ni ahnsowohte me Sises ketida pohn pwohto, melimelo uhdi. Tohnpadahk ko pwurehng pwuriamweikihla met. Re poaridi mwohn Sises oh patohwan: “Mehlelete me komwi me Sapwellimen Kohto!”​—Madiu 14:22-33; Sohn 6:16-21.

E sou pahn mwahu en momour ni ahnsowo oh kilang Sises eh kin ketin wia soahng pwukat?— Ke ese dahme kahrehda Sises ketin wia manaman pwukat?— E ketin wia mepwukat pwehki e ketin poakohng sapwellime tohnpadahk ko oh e kupwurki sewese irail. Ahpw e pil ketin wia mepwukat pwehn kasalehda me e sapwellimaniki manaman laud oh e pahn ketin doadoahngki ni ahnsou kohkohdo nin duwen Kaunen Wehin Koht.

Pil rahnwet, Sises kin ketin doadoahngki sapwellime manaman pwehn pere sapwellime tohnpadahk kan sang Sehdan eh kin nannanti en kauhiraildi sang ren padahkihong meteikan duwen Wehin Koht. Ahpw Sises sohte kin ketin doadoahngki sapwellime manaman pwehn pere sapwellime tohnpadahk kan sang soumwahuda de pil kamwahwihala arail soumwahu. Sapwellimen Sises wahnpoaron ko pil mehla. Rien Sohn pwutak Seims pil kamakamala, oh pein Sohn lekdeklong nan imweteng.​—Wiewia 12:2; Kaudiahl 1:9.

Pil duwehte rahnwet. Mehnda ma aramas kin papah Siohwa de soh, irail koaros kak soumwahuda oh mehla. Ahpw ni ahnsou keren, ni Sises eh pahn ketin kaunda sampah nin duwen nanmwarki en Wehin Koht, soahng kan pahn wekila. Solahr me pahn masak pwehki Sises pahn ketin doadoahngki sapwellime manaman pwehn wia kamwahupen koaros me kin peikiong ih.​—Aiseia 9:6, 7.